2 Bantotila

3 Yehorami+ mwana ya Ahabi kumaka ntotila ya Izraele na Samaria na mvula ya 18 ya Yehoshafati ntotila ya Yuda, mpi yandi yalaka bamvula 12. 2 Yandi vandaka kaka kusala mambu ya mbi na meso ya Yehowa, kansi ve na kiteso yina tata na yandi to mama na yandi salaka, sambu yandi katulaka dikunzi ya santu ya Baale yina tata na yandi salaka.+ 3 Kansi yandi kangamaka na masumu yina Yeroboami mwana ya Nebati pusaka Izraele na kusala.+ Yandi yambulaka yo ve.

4 Mesha ntotila ya Moabi vandaka muntu ya ke sansaka mameme mpi yandi vandaka kufuta kitadi na ntotila ya Izraele, bana-mameme 100 000 mpi mameme ya babakala 100 000 ya bo me katula ve mika. 5 Ntangu Ahabi fwaka,+ ntotila ya Moabi kolamaka na ntotila ya Izraele.+ 6 Yo yina na kilumbu yina, ntotila Yehorami basikaka na Samaria mpi vukisaka Izraele ya mvimba. 7 Yandi tindilaka mpi Yehoshafati ntotila ya Yuda nsangu nde: “Ntotila ya Moabi me kolamina mono. Keti nge ta kwenda ti mono sambu na kunwanisa Moabi?” Yandi tubaka nde: “Mono ta kwenda.+ Mono kele mutindu mosi ti nge. Bantu na mono kele mutindu mosi ti bantu na nge. Bampunda na mono kele mutindu mosi ti bampunda na nge.”+ 8 Ebuna yandi yulaka nde: “Beto ta tombuka na nki nzila?” Yandi vutulaka nde: “Na nzila ya ntoto-makanga ya Edomi.”

9 Ebuna ntotila ya Izraele kwendaka ti ntotila ya Yuda mpi ntotila ya Edomi.+ Na nima ya kuzieta-zieta bilumbu nsambwadi, masa vandaka ve sambu na basoda mpi sambu na bambisi ya bwala yina vandaka kulanda bo. 10 Ntotila ya Izraele tubaka nde: “Mawa kibeni! Yehowa me binga bantotila yai tatu, kaka sambu na kupesa bo na maboko ya Moabi!” 11 Ebuna Yehoshafati tubaka nde: “Keti kele ve ti mbikudi ya Yehowa awa yina beto lenda yula Yehowa na nzila na yandi?”+ Nsadi mosi ya ntotila ya Izraele vutulaka nde: “Elisha+ mwana ya Shafati, yina vandaka kulosila Eliya masa na maboko.”*+ 12 Ebuna Yehoshafati tubaka nde: “Ndinga ya Yehowa kele na yandi.” Yo yina ntotila ya Izraele, Yehoshafati, mpi ntotila ya Edomi kulumukaka kisika yandi vandaka.

13 Elisha tubilaka ntotila ya Izraele nde: “Inki mambu nge ti mono?*+ Kwenda na bambikudi ya tata na nge mpi na bambikudi ya mama na nge.”+ Kansi ntotila ya Izraele tubilaka yandi nde: “Ve, sambu Yehowa muntu me binga bantotila yai tatu sambu na kupesa bo na maboko ya Moabi.” 14 Ebuna Elisha tubaka nde: “Ya kieleka mutindu Yehowa ya makesa yina mono ke sadilaka* kele na luzingu, kana mono vandaka kuzitisa ve Yehoshafati+ ntotila ya Yuda, mono zolaka ve kutala nge to kutudila nge dikebi.+ 15 Ntangu yai beno natila mono muntu mosi ya ke bulaka kidare.”*+ Ntangu muntu ya ke bulaka kidare yantikaka kubula, diboko ya Yehowa kwisaka na zulu na yandi.+ 16 Yandi tubaka nde, “Yehowa ke tuba nde: ‘Beno timuna mabulu mingi na muwanda yai; 17 sambu Yehowa ke tuba nde: “Beno ta mona ve mupepe, mpi beno ta mona ve mvula; kansi muwanda yai ta fuluka na masa, mpi beno ta nwa masa na yo,+ beno, bitwisi na beno, mpi bambisi na beno ya nkaka.”’ 18 Kansi yo kele diambu ya fioti na meso ya Yehowa,+ sambu yandi ta pesa mpi Moabi na maboko na beno.+ 19 Beno fwete fwa bambanza yonso ya ngolo+ mpi bambanza yonso ya kuluta kitoko, beno fwete zenga banti yonso ya mbote, beno fwete kanga banto yonso ya masa, mpi beno fwete bebisa na matadi bisika yonso yina ntoto kele mbote.”+

20 Ebuna na suka, na ntangu ya bo ke pesaka dikabu ya mbuma ya suka,+ masa vandaka kukatuka na kintulumukina na ndambu ya Edomi, ebuna insi yina fulukaka ti masa.

21 Bantu yonso ya Moabi waka nde bantotila yina me kwisa kunwanisa bo, yo yina bo bingaka babakala yonso yina lenda nata binwaninu,* ebuna bo telamaka na ndilu. 22 Ntangu bo telamaka na suka-suka, ntangu vandaka kusema na zulu ya masa, mpi sambu na bantu ya Moabi yina vandaka na lweka yina ya nkaka, masa vandaka kumonana mbwaki bonso menga. 23 Bo tubaka nde: “Yai menga! Yo fwete vanda nde bantotila yina me fwisana na mbele ya bitumba.+ Ebuna ntangu yai, O Moabi, kwenda kubotula bima!” 24 Ntangu bo kumaka na camp ya Izraele, bantu ya Izraele telamaka mpi bo yantikaka kufwa bantu ya Moabi, ebuna bantu yina tinaka.+ Bo kotaka na Moabi, bo vandaka kufwa bantu ya Moabi ntangu bo vandaka kukwenda. 25 Bo fwaka bambanza, mpi konso muntu losaka ditadi na bisika yonso yina ntoto vandaka mbote, ebuna bo fulusaka yo ti matadi; bo kangaka banto yonso ya masa,+ mpi bo zengaka banti yonso ya mbote.+ Nsuka-nsuka, kaka bibaka ya matadi ya Kire-hareseti+ bikalaka. Ebuna bantu yina vandaka kulosa matadi na balanse ziungaka yo mpi bwisaka yo.

26 Ntangu ntotila ya Moabi monaka nde yandi me bela bitumba, yandi bakaka bantu 700 yina vandaka ti bambele ya bitumba sambu na kupasula nzila na ndambu ya ntotila ya Edomi;+ kansi bo kukaka ve. 27 Yo yina yandi bakaka mwana na yandi ya ntete ya bakala yina zolaka kuyala na kisika na yandi mpi yandi pesaka yandi bonso kimenga ya kuyoka+ na kibaka. Ebuna bo wilaka Izraele makasi ya ngolo, yo yina bo yambulaka kunwanisa yandi mpi bo vutukaka na insi na bo.