Esdrasi

7 Na nima ya mambu yai, na nsungi ya luyalu ya Artazeresesi+ ntotila ya Persia, Esdrasi*+ vutukaka. Yandi vandaka mwana ya Seraya,+ mwana ya Azaria, mwana ya Hilkia,+ 2 mwana ya Shalumi, mwana ya Zadoki, mwana ya Ahitubi, 3 mwana ya Amaria, mwana ya Azaria,+ mwana ya Merayoti, 4 mwana ya Zeraya, mwana ya Uzi, mwana ya Buki, 5 mwana ya Abishua, mwana ya Fineasi,+ mwana ya Eleazare,+ mwana ya Aroni+ mfumu ya banganga-nzambi. 6 Esdrasi yai katukaka na Babilone. Yandi vandaka kalaki ya mikanda* yina zabaka mbote-mbote* Nsiku ya Moize,+ yina Yehowa Nzambi ya Izraele pesaka. Ntotila pesaka konso kima yina yandi lombaka, sambu diboko ya Yehowa Nzambi na yandi vandaka na zulu na yandi.

7 Bantu ya nkaka na kati ya bantu ya Izraele, ya banganga-nzambi, ya Balevi,+ ya miyimbi-bankunga,+ ya bankengidi ya bakielo,+ mpi ya bansadi ya tempelo*+ tombukaka na Yeruzalemi na mvula ya nsambwadi ya ntotila Artazeresesi. 8 Ebuna Esdrasi kwisaka na Yeruzalemi na ngonda ya tanu, na mvula ya nsambwadi ya ntotila. 9 Yandi yantikaka nzietelo katuka na Babilone na kilumbu ya ntete ya ngonda ya ntete, mpi yandi kumaka na Yeruzalemi na kilumbu ya ntete ya ngonda ya tanu, sambu diboko ya mbote ya Nzambi na yandi vandaka na zulu na yandi.+ 10 Esdrasi yidikaka ntima na yandi* sambu na kulonguka Nsiku ya Yehowa, kusadila yo,+ mpi kulonga bansiku ti balusambisu na yo na Izraele.+

11 Yai mambu yina kele na mukanda yina ntotila Artazeresesi pesaka nganga-nzambi Esdrasi, kalaki ya mikanda,* muntu ya me zaba mbote-mbote kulonguka* bantuma ya Yehowa mpi bansiku na yandi sambu na Izraele:

12 * “Artazeresesi,+ ntotila ya bantotila, na nganga-nzambi Esdrasi, kalaki ya mikanda* ya Nsiku ya Nzambi ya zulu: Bika nde ngemba ya kukuka kuvanda na nge. Ntangu yai 13 mono me tuba nde konso muntu na kati ya bantu ya Izraele yina kele na kimfumu na mono ti banganga-nzambi na bo mpi Balevi yina ke zola kukwenda ti nge na Yeruzalemi, yandi kwenda.+ 14 Sambu ntotila ti bandongisi na yandi nsambwadi me tinda nge sambu na kuzikisa kana bo ke sadila Nsiku ya Nzambi na nge, yina nge kele ti yo,* na Yuda mpi na Yeruzalemi, 15 mpi kubaka arza ti wolo yina ntotila ti bandongisi na yandi me pesa na luzolo yonso na Nzambi ya Izraele, yina kisika na yandi ya kuvanda kele na Yeruzalemi, 16 ti arza yonso mpi wolo yina beno ta baka* na provense* ya mvimba ya Babilone, kumosi ti dikabu yina bantu mpi banganga-nzambi ke pesa na luzolo yonso na nzo ya Nzambi na bo, yina kele na Yeruzalemi.+ 17 Ti mbongo yina, nge fwete sumba kukonda kusukinina bangombe ya babakala,+ mameme ya babakala,+ bana-mameme,+ kumosi ti makabu na bo ya mbuma+ mpi makabu na bo ya malafu,+ ebuna nge fwete pesa yo na zulu ya mesa-kimenga ya nzo ya Nzambi na nge na Yeruzalemi.

18 “Nge lenda sala konso kima yina ke monana mbote na meso na nge mpi na meso ya bampangi na nge ti arza mpi wolo yina ta bikala, na kuwakana ti luzolo ya Nzambi na nge. 19 Ebuna malonga yonso yina bo me pesa nge sambu na kisalu ya nzo ya Nzambi na nge, nge fwete nata yo na ntwala ya Nzambi na Yeruzalemi.+ 20 Bima ya nkaka ya mfunu ya nzo ya Nzambi na nge yina nge fwete pesa, nge ta baka yo na kisika ya kubumba bimvwama ya ntotila.+

21 “Mono, ntotila Artazeresesi, mono me songa bantu yonso ya ke kebaka bima ya ntalu na ntoto yina kele na Simu ya Nzadi,* nde konso kima yina nganga-nzambi Esdrasi,+ kalaki ya mikanda* ya Nsiku ya Nzambi ya zulu, ke lomba beno, beno fwete sala yo kukonda kusukinina, 22 tii na batalanta* 100 ya arza, bakore* 100 ya ble, bati* 100 ya vinu,+ bati 100 ya mafuta,+ mpi mungwa+ yonso ya yandi kele na yo mfunu. 23 Konso nsiku yina Nzambi ya zulu ke pesa, bika nde bantu kulungisa yo ti kikesa sambu na nzo ya Nzambi ya zulu,+ sambu Nzambi kuwila ve kimfumu ya ntotila ti bana na yandi makasi.+ 24 Mono ke longisila beno diaka nde beno kele ve ti nswa ya kufutisa mpaku, kitadi,+ to mpaku ya nzila, na banganga-nzambi ti na Balevi, na bantu yina ke bulaka miziki,+ na bankengidi ya bakielo, na bansadi ya tempelo,*+ mpi na bantu ya ke sala kisalu na nzo yai ya Nzambi.

25 “Ebuna nge Esdrasi, na kutadila mayele yina Nzambi na nge me pesaka nge,* tula bazuzi ya mambu ya fioti-fioti mpi bazuzi sambu na kusambisa bantu yonso yina kele na ntoto ya kele na Simu ya Nzadi, bantu yonso yina me zaba bansiku ya Nzambi na nge; mpi nge fwete longa konso muntu yina me zaba yo ve.+ 26 Ebuna konso muntu yina ke zitisa ve Nsiku ya Nzambi na nge mpi nsiku ya ntotila, bo fwete sambisa yandi mpi kuzengila yandi nkanu kukonda kusukinina, yo vanda ya lufwa, ya kimpika, ya kufutisa yandi kibawu, to ya kutula yandi na boloko.”

27 Bika nde Yehowa Nzambi ya ba-nkaka na beto kubaka lukumu, yandi muntu yina me tula na ntima ya ntotila ngindu ya kukumisa nzo ya Yehowa na Yeruzalemi kitoko!+ 28 Mpi yandi me monisila mono zola ya kwikama na ntwala ya ntotila,+ ya bandongisi na yandi,+ mpi ya bamfumu yonso ya ngolo ya ntotila. Yo yina, mono bakaka kikesa* sambu diboko ya Yehowa Nzambi na mono vandaka na zulu na mono, mpi mono vukisaka bantwadisi* ya Izraele sambu na kukwenda ti mono.