2 Bantotila

5 Namani mfumu ya basoda ya ntotila ya Siria, vandaka muntu mosi ya lukumu yina mfumu na yandi vandaka kuzitisa mingi, sambu Yehowa nungisaka* Siria na nzila na yandi. Yandi vandaka soda ya ngolo, ata yandi vandaka muntu ya maladi ya lepre.* 2 Bantu ya Siria vandaka kukwisa kunwanisa insi ya Izraele; kilumbu mosi bo kangaka mwana-nkento mosi ya fioti ya Izraele mpi bo nataka yandi na kimpika, ebuna yandi kumaka nsadi ya nkento ya Namani. 3 Mwana yina tubilaka mfumu na yandi ya nkento nde: “A kana mfumu na mono kukwenda na mbikudi+ na Samaria! Yandi ta belula yandi na lepre na yandi.”+ 4 Yo yina yandi* kwendaka mpi zabisaka mfumu na yandi, yandi songaka yandi mambu yina mwana-nkento yina ya Izraele tubaka.

5 Ebuna ntotila ya Siria tubaka nde: “Kwenda ntangu yai! Mpi mono ta tindila ntotila ya Izraele mukanda.” Yo yina yandi kwendaka; yandi nataka batalanta* kumi ya arza, bashekele 6 000 ya wolo, mpi bilele kumi. 6 Yandi natilaka ntotila ya Izraele mukanda yina vandaka kutuba nde: “Kumosi ti mukanda yai ya me kwisila nge, mono me tinda Namani nsadi na mono sambu nge belula yandi na lepre na yandi.” 7 Ntangu ntotila ya Izraele tangaka mukanda yina, yandi pasulaka bilele na yandi mpi tubaka nde: “Am Keti mono kele Nzambi, sambu na kufwa muntu to kubika yandi na luzingu?+ Sambu yandi ke tindila mono muntu yai, mpi yandi ke songa mono na kubelula yandi na lepre na yandi! Beno mosi ke mona nde yandi ke sosila mono makambu.”

8 Kansi ntangu Elisha, muntu ya Nzambi ya kieleka, waka nde ntotila ya Izraele me pasula bilele na yandi, na mbala mosi yandi tindilaka ntotila ndinga nde: “Sambu na nki nge me pasula bilele na nge? Pardo bika yandi kwisa na mono sambu yandi zaba nde mbikudi mosi kele na Izraele.”+ 9 Yo yina Namani kwisaka ti bampunda na yandi mpi bapusu-pusu na yandi ebuna yandi telamaka na munoko ya nzo ya Elisha. 10 Kansi Elisha tindaka kinati-nsangu sambu na kusonga yandi nde: “Kwenda, yobila mbala nsambwadi+ na Yordani,+ ebuna mpusu na nge ta vutuka mutindu yo vandaka, mpi nge ta kuma bunkete.” 11 Namani waka makasi mpi yantikaka kukwenda; yandi tubaka nde: “Mono kuditubilaka nde, ‘Yandi ta kwisa kukutana ti mono, yandi ta telama awa, mpi yandi ta binga zina ya Yehowa Nzambi na yandi, yandi ta lutisa-lutisa diboko na yandi na zulu ya lepre sambu na kubelula yo.’ 12 Keti Abana ti Parpare, banzadi ya Damasi,+ me luta ve bamasa yonso ya Izraele? Keti mono lenda yobila ve kuna mpi kukuma bunkete?” Ebuna yandi balukaka mpi kwendaka ti makasi.

13 Bansadi na yandi pusanaka pene-pene na yandi mpi tubaka nde: “Tata na mono, kana mbikudi songaka nge na kusala kima mosi ya nene, keti nge zolaka kusala yo ve? Keti nge fwete sala yo ve nkutu kuluta, sambu yandi me tubila nge kaka nde, ‘Yobila mpi kuma bunkete’?” 14 Yo yina yandi kwendaka mpi kudilosaka* na Yordani mbala nsambwadi, kaka mutindu muntu ya Nzambi ya kieleka tubaka.+ Ebuna mpusu na yandi vutukaka bonso ya mwana-bakala ya fioti,+ mpi yandi kumaka bunkete.+

15 Na nima, yandi vutukaka na muntu ya Nzambi ya kieleka,+ yandi mpi bantu yonso yina vandaka ti yandi,* yandi telamaka na ntwala na yandi mpi tubaka nde: “Ntangu yai mono me zaba nde Nzambi kele ve na kisika ya nkaka na ntoto ya mvimba kansi yandi kele kaka na Izraele.+ Yo yina, pardo, ndima dikabu* ya nsadi na nge ke pesa.” 16 Kansi Elisha tubaka nde: “Ya kieleka mutindu Yehowa yina mono ke sadilaka* kele na luzingu, mono ta ndima yo ve.”+ Yandi bondilaka yandi na kundima yo, kansi yandi vandaka kaka kubuya. 17 Nsuka-nsuka Namani tubaka nde: “Kana mpidina ve, pardo, bika nde bo pesa nsadi na nge ntoto ya insi yai yina bampunda zole lenda nata, sambu nsadi na nge ta pesa diaka ve dikabu ya kuyoka to kimenga na banzambi ya nkaka katula kaka na Yehowa. 18 Kansi bika Yehowa kulolula nsadi na nge sambu na diambu yai: Ntangu mfumu na mono ke kotaka na nzo* ya Rimoni sambu na kufukama kuna, yandi ke yekamaka na diboko na mono, yo yina mono ta fukama na nzo ya Rimoni. Ntangu mono ke fukama na nzo ya Rimoni, pardo, bika Yehowa kulolula nsadi na nge sambu na diambu yai.” 19 Ebuna yandi tubilaka yandi nde: “Kwenda na ngemba.” Ntangu Namani katukaka kisika yina Elisha vandaka mpi tambulaka mwa kitamina, 20 Gehazi+ nsadi ya Elisha muntu ya Nzambi ya kieleka+ kuditubilaka nde: ‘Tala, mfumu na mono me bika nde muntu yai ya Siria Namani+ kukwenda mpi yandi me ndima ve bima yina yandi nataka. Ya kieleka mutindu Yehowa kele na luzingu, mono ta landa yandi ntinu mpi mono ta baka mwa kima na maboko na yandi.’ 21 Yo yina Gehazi landaka Namani. Ntangu Namani monaka muntu mosi ke landa yandi ntinu, yandi kulumukaka na pusu-pusu na yandi sambu na kukutana ti yandi mpi tubaka nde: “Keti mambu yonso kele mbote?” 22 Yandi tubaka nde: “Mambu yonso kele mbote. Mfumu na mono me tinda mono, yandi me tuba nde, ‘Baleke zole ya babakala yina me katuka na ntoto ya bangumba ya Efrayimi me kwisa sesepi yai na mono; bo kele na kati ya kimvuka ya bambikudi. Pardo, pesa bo talanta mosi ya arza ti bilele zole.’”+ 23 Namani tubaka nde: “Baka batalanta zole.” Yandi landaka kubondila yandi,+ ebuna yandi kangisaka batalanta zole ya arza na kati ya basaki zole, ti bilele zole, ebuna yandi pesaka yo na bansadi na yandi zole mpi bo nataka yo na ntwala na yandi.

24 Ntangu yandi kumaka na Ofeli,* yandi bakaka yo na maboko na bo, tulaka yo na nzo, mpi bikisaka bo bo kwenda. Ntangu bo kwendaka, 25 yandi kotaka mpi telamaka pene-pene ya mfumu na yandi. Ebuna Elisha tubilaka yandi nde: “Gehazi, nge me katuka na wapi?” Kansi yandi tubaka nde: “Nsadi na nge kwendaka ve ata kisika mosi.”+ 26 Elisha tubilaka yandi nde: “Keti ntima na mono vandaka ve kuna ti nge ntangu muntu yina kulumukaka na pusu-pusu na yandi sambu na kukutana ti nge? Keti yai ntangu ya kundima arza to ya kundima bilele to bilanga ya olive to bilanga ya vinu to mameme to bangombe to bansadi ya babakala to bansadi ya bankento?+ 27 Ntangu yai, lepre+ ya Namani ta kangama na nge mpi na bana na nge kimakulu.” Na mbala mosi yandi katukaka na ntwala na yandi mpi basikaka, yandi kumaka muntu ya lepre, mpembe bonso mvula ya mpembe.*+