1 Bakorinto

4 Muntu fwete tadila beto nde beto kele bansadi* ya Kristu mpi bakapita ya binsweki ya santu ya Nzambi.+ 2 Na diambu yai, kima ya bo ke lombaka na bakapita kele nde bo vanda ya kwikama. 3 Yo kele mfunu ve sambu na mono kana beno sambisa mono to kana tribinale mosi ya bantu kusambisa mono. Ya kieleka, mono ke kudisambisa nkutu ve. 4 Sambu mono ke zaba ve ata diambu mosi ya mbi ya mono me sala. Kansi na diambu yai, mono me monanaka ve muntu ya lunungu; Yehowa* muntu ke sambisaka mono.+ 5 Yo yina, beno sambisa ve+ ata kima mosi na ntwala ya ntangu ya bo me tulaka, tii kuna Mfumu ta kwisa. Yandi ta basisa na nsemo mambu ya kinsweki ya mpimpa mpi yandi ta sala nde balukanu ya bantima kuzabana, ebuna konso muntu ta baka lukumu na yandi na Nzambi.+

6 Ebuna bampangi, mono me sadila mambu yai na mono mosi mpi na Apolo+ sambu na mambote na beno, sambu beno longuka munsiku yai na nzila na beto: “Beno landa kaka mambu yina bo me sonikaka,” sambu beno fuluka ve na lulendo+ mpi beno baka ve muntu mosi na mfunu kuluta muntu ya nkaka. 7 Sambu nani ke sala nde nge swaswana ti muntu ya nkaka? Inki kima ya nge kele na yo yina bo me pesaka nge ve?+ Ebuna, kana bo me pesaka nge yo kibeni, sambu na nki nge ke kudikumisa bonso nde bo pesaka nge yo ve?

8 Keti beno me bakaka ntama bima yonso yina beno kele na yo mfunu? Beno kele dezia bamvwama? Keti beno me yantika kuyala bonso bantotila,+ kansi beto ve? Mono zolaka kuwa kiese kana beno yantikaka kuyala bonso bantotila, sambu beto mpi kuyala ti beno bonso bantotila.+ 9 Sambu mono ke mona bonso nde Nzambi me tulaka beto bantumwa na nsuka sambu bantu yonso kumona beto, bonso bantu yina bo me zengilaka nkanu ya lufwa.+ Nsi-ntoto ya mvimba,+ bawanzio mpi bantu ke mona beto. 10 Beto kele bazoba+ sambu na Kristu, kansi beno kele bantu ya mayele na Kristu; beto kele ngolo ve, kansi beno kele ngolo; bantu ke pesaka beno lukumu, kansi bo ke pesaka beto nsoni. 11 Tii na ntangu yai kibeni, beto kele na nzala ya kudia+ mpi na nzala ya masa;+ beto kele ve na bilele,* bo ke bula beto,*+ beto kele na nzo ve, 12 mpi beto ke sala kisalu ya ngolo ti maboko na beto mosi.+ Ntangu bo ke finga beto, beto ke sakumuna;+ ntangu bo ke monisa beto mpasi, beto ke kanga kaka ntima;+ 13 ntangu bo ke kusila beto makambu, beto ke pesa mvutu na mawete yonso;*+ tii ntangu yai beto me kumaka bonso mvindu ya nsi-ntoto, bima ya bo me losaka.

14 Mono ke sonika ve mambu yai sambu na kupesa beno nsoni, kansi sambu na kukebisa beno bonso bana na mono ya mono ke zolaka mingi. 15 Sambu ata beno lenda vanda ti bankengidi* 10 000 na Kristu, ntembe kele ve nde beno kele ve ti batata mingi; sambu na nzila ya Kristu Yezu mono me kumaka tata na beno na nsadisa ya nsangu ya mbote.+ 16 Ebuna, mono ke bondila beno na kulanda mbandu na mono.+ 17 Yo yina, mono ke tindila beno Timoteo, sambu yandi kele mwana na mono ya mono ke zolaka mingi mpi ya kwikama na Mfumu. Yandi ta yibusa beno mitindu na mono ya kusala mambu na kisalu ya Kristu Yezu,+ mutindu mono ke longaka bisika yonso na konso dibundu.

18 Bantu ya nkaka me fuluka ti lulendo bonso nde mono ta kwisa ve kuna na beno. 19 Kansi, kana Yehowa* kuzola, mono ta kwisa kuna na beno ntama mingi ve mpi mono ta sosa ve kuzaba kutuba ya bantu yina me fulukaka ti lulendo, kansi ngolo na bo. 20 Sambu Kimfumu ya Nzambi me simbama ve na kutuba, kansi na ngolo ya Nzambi. 21 Inki beno ke zola? Keti beno ke zola nde mono kwisila beno ti nti,+ to mono kwisila beno ti zola mpi mpeve ya mawete?