Bisalu

1 O Teofile, mono sonikaka disolo ya ntete ya mambu yonso yina Yezu yantikaka kusala mpi kulonga+ 2 tii na kilumbu yina bo tombulaka yandi na zulu,+ na nima ya kupesa bantumwa yina yandi solaka bansiku na nzila ya mpeve santu.+ 3 Na nima ya kumona mpasi, yandi vandaka kudimonisa ya moyo na bantu yai na banzikisa mingi ya ke ndimisa.+ Bo monaka yandi na nsungi ya bilumbu 40, mpi yandi vandaka kutubila Kimfumu ya Nzambi.+ 4 Ntangu yandi vandaka kukutana ti bo, yandi songaka bo nde: “Beno katuka ve na Yeruzalemi,+ kansi beno landa kuvingila kima yina Tata silaka,+ yina mono tubilaka beno; 5 sambu ya kieleka, Yoane botikaka bantu na masa, kansi beno ta baka mbotika na mpeve santu+ bilumbu fioti na nima.”

6 Ntangu bo vukanaka, bo yulaka yandi nde: “Mfumu, keti nge ke vutula kimfumu na Izraele na ntangu yai?”+ 7 Yandi tubilaka bo nde: “Yo kele ve mambu na beno na kuzaba bantangu to bansungi yina Tata me tulaka na nsi ya kiyeka na yandi mosi.+ 8 Kansi beno ta baka ngolo ntangu mpeve santu ta kwisa na zulu na beno,+ mpi beno ta vanda bambangi na mono+ na Yeruzalemi,+ na Yudea yonso mpi na Samaria,+ mpi tii na kisika ya kuluta ntama* ya ntoto.”+ 9 Ntangu yandi manisaka kutuba mambu yai, ntangu bo yonso vandaka kutala, bo tombulaka yandi na zulu ebuna dituti mosi fikaka yandi sambu bo mona yandi ve.+ 10 Ntangu yandi vandaka kukwenda, bo vandaka kutala na zulu, na mbala mosi babakala zole yina lwataka bilele ya mpembe+ telamaka pene-pene na bo 11 mpi tubaka nde: “Babakala ya Galilea, sambu na nki beno me telama beno ke tala na zulu? Yezu yai ya bo me katula na ntwala na beno mpi me tombula na zulu ta kwisa kuvutuka mpi mutindu mosi, mutindu beno me mona yandi ke kwenda na zulu.”

12 Ebuna bo katukaka na ngumba mosi yina bo ke bingaka Ngumba ya Banti ya Olive, mpi bo vutukaka na Yeruzalemi.+ Ngumba yina kele pene-pene ya Yeruzalemi, kiteso ya kilometre mosi* mpamba katuka na Yeruzalemi. 13 Ntangu bo kumaka, bo tombukaka na suku mosi ya zulu kisika bo vandaka kuvanda. Yo vandaka Piere, Yoane, Yakobo, ti Andre; Filipo ti Toma; Bartelemi ti Matayo; Yakobo mwana ya Alfeo, Simoni muntu ya kikesa, mpi Yudasi mwana ya Yakobo.+ 14 Bantu yai yonso vandaka kukwamina na kisambu ti lukanu mosi, kumosi ti bankento ya nkaka,+ Maria mama ya Yezu, mpi ti bampangi na yandi ya babakala.+

15 Na bilumbu yina, Piere telamaka na kati-kati ya bampangi (bantu yonso vandaka kiteso ya 120) mpi tubaka nde: 16 “Babakala, bampangi, yo vandaka mfunu nde masonama ya santu kulungana, yina mpeve santu tubaka na mutindu ya mbikudulu na nzila ya Davidi sambu na Yudasi,+ yina kumaka ntwadisi ya bantu yina kangaka Yezu.+ 17 Sambu bo tangaka yandi na kati na beto+ mpi yandi salaka kisalu yai ti beto. 18 (Yo yina, muntu yai sumbaka kilanga ti lufutu ya kukonda lunungu,+ mpi yandi bwaka ntu na ntwala, nitu na yandi pasukaka* mpi misopo na yandi panzanaka.+ 19 Bantu yonso ya Yeruzalemi zabaka diambu yai, yo yina bo bingaka kilanga yina na ndinga na bo nde Akeldama, disongidila, “Kilanga ya Menga.”) 20 Sambu bo me sonikaka na mukanda ya Bankunga nde, ‘Bika nde kisika na yandi ya kuzinga kubikala mpamba, mpi muntu mosi ve kuzinga na kati na yo’+ mpi, ‘Bika muntu ya nkaka kubaka kisalu na yandi ya kukengila.’+ 21 Yo yina, yo kele mfunu nde na kati ya babakala yina vandaka kutambula ti beto ntangu yonso yina Mfumu Yezu vandaka kusala bisalu na yandi* na kati na beto, 22 yantika ntangu Yoane botikaka yandi+ tii na kilumbu yina bo katulaka yandi na kati na beto,+ muntu mosi na kati ya babakala yai fwete kuma mbangi ya lufutumuku na yandi kumosi ti beto.”+

23 Bo pesaka bazina ya bantu zole: Yozefi yina bo vandaka kubinga Barsabasi, yina bo pesaka mpi zina Yustusi, mpi Matiasi. 24 Ebuna bo sambaka mpi tubaka nde: “Nge, O Yehowa,* muntu yina ke zabaka bantima ya bantu yonso,+ songa nani nge me sola na kati ya babakala yai zole 25 sambu yandi baka kisika ya kisalu yai mpi kintumwa, yina Yudasi buyaka sambu na kukwenda na nzila na yandi mosi.”+ 26 Bo bulaka zeke sambu na bo,+ mpi zeke bwaka na Matiasi, ebuna bo tangaka yandi* kumosi ti bantumwa 11.