Kusonga

21 Ebuna, mono monaka zulu ya mpa ti ntoto ya mpa;+ sambu zulu ya ntama ti ntoto ya ntama vilaka,+ mpi nzadi-mungwa+ vandaka diaka ve. 2 Mono monaka mpi mbanza ya santu, Yeruzalemi ya Mpa, ke kulumuka katuka na zulu, na Nzambi,+ mpi yo me kudibongisa bonso nkento yina ke kwela yina me kudikumisa kitoko sambu na bakala na yandi.+ 3 Ebuna mono waka ndinga mosi ya ngolo ke katuka na kiti ya kimfumu mpi ke tuba nde: “Tala! Tenta ya Nzambi kele ti bantu, yandi ta zinga ti bo, mpi bo ta vanda bantu na yandi. Mpi Nzambi yandi mosi ta vanda ti bo.+ 4 Mpi yandi ta kusula mansanga yonso na meso na bo,+ lufwa ta vandaka diaka ve;+ mawa, bidilu, mpi mpasi ta vandaka diaka ve.+ Mambu ya ntama me vila.”

5 Ebuna Muntu yina me vanda na kiti ya kimfumu+ tubaka nde: “Tala! Mono ke sala bima yonso ya mpa.”+ Yandi tubaka diaka nde: “Sonika, sambu mambu yai kele ya kwikama* mpi ya kieleka.” 6 Mpi yandi tubilaka mono nde: “Yo me lungana! Mono kele Alfa mpi Omega,* luyantiku mpi nsuka.+ Konso muntu yina kele na nzala ya masa, mono ta pesa yandi masa ya nto ya masa ya luzingu ya ofele.+ 7 Konso muntu yina ta nunga ta baka* bima yai, mpi mono ta vanda Nzambi na yandi mpi yandi ta vanda mwana na mono. 8 Kansi, bantu yina me konda kikesa, bantu yina me konda lukwikilu,+ bantu yina kele mvindu mpi nzanzi, bantu yina ke fwaka bantu,+ bantu yina ke salaka pite,*+ bantu yina ke salaka bisalu ya bampeve ya mbi, mpi bantu yina ke sambilaka biteki, mpi bantu yonso ya luvunu,+ dikabu na bo ta vanda na dizanga yina ke pela ti tiya mpi sufre.+ Yo ke monisa lufwa ya zole.”+

9 Wanzio mosi na kati ya bawanzio nsambwadi yina vandaka ti babolo nsambwadi, ya kufuluka ti bampasi nsambwadi ya nsuka,+ kwisaka mpi tubilaka mono nde: “Kwisa, mpi mono ta songa nge nkento yina ke kwela, nkento ya Mwana-Dimeme.”+ 10 Mpi na ngolo ya mpeve yandi nataka mono na ngumba mosi ya nene mpi ya nda, ebuna yandi songaka mono Yeruzalemi, mbanza ya santu, ke kulumuka katuka na zulu, na Nzambi,+ 11 mpi ya kele ti nkembo ya Nzambi.+ Yo vandaka kungenga bonso ditadi ya ntalu kibeni, bonso ditadi ya yaspe yina ke ngenga bonso kristale.+ 12 Yo vandaka ti lupangu mosi ya nene mpi ya nda, mpi bakielo 12; bawanzio 12 vandaka na bakielo yina, mpi bo sonikaka bazina ya makanda 12 ya bana ya Izraele na bakielo yina. 13 Bakielo tatu vandaka na esti, bakielo tatu na nordi, bakielo tatu na sudi, mpi bakielo tatu na westi.+ 14 Lupangu ya mbanza mpi vandaka ti matadi 12 ya fondasio, mpi bazina 12 ya bantumwa 12+ ya Mwana-Dimeme vandaka na zulu ya matadi yina.

15 Ebuna wanzio yina vandaka kutuba ti mono simbaka lukengi ya wolo bonso kitesilu, sambu na kutesa mbanza, bakielo na yo, mpi lupangu na yo.+ 16 Bandambu yonso iya ya mbanza kele kiteso mosi; nda na yo kele kiteso mosi ti nene na yo. Yandi tesaka mbanza ti mwa-nti yina, yo vandaka ba stade 12 000;* nda, nene, mpi nda na yo katuka na ntoto tii na zulu kele kiteso mosi. 17 Yandi tesaka mpi lupangu na yo, yo vandaka maboko 144* na kutadila kitesilu ya bantu, yina kele mpi kitesilu ya wanzio. 18 Ebuna bo tungaka lupangu ti yaspe,+ mpi mbanza vandaka wolo ya kukonda kuvukisa ti kima ya nkaka bonso tala-tala ya ke sema. 19 Bo kumisaka bafondasio ya lupangu ya mbanza kitoko ti matadi ya ntalu ya mutindu na mutindu: fondasio ya ntete vandaka yaspe, ya zole safire, ya tatu kalasedoni, ya iya emerode, 20 ya tanu sardoniksi, ya sambanu sardwane, ya nsambwadi krisolite, ya nana berile, ya uvwa topaze, ya kumi krisopraze, ya kumi na mosi yasente, ya kumi na zole ametiste. 21 Diaka, bakielo 12 vandaka mayaka 12; bo salaka konso kielo ti diyaka mosi. Mpi bala-bala ya nene ya mbanza vandaka wolo ya kukonda kuvukisa ti kima ya nkaka, bonso tala-tala yina ke monisa ndambu ya nkaka.

22 Mono monaka ve tempelo na kati na yo, sambu Yehowa* Nzambi Nkwa-Ngolo Yonso+ mpi Mwana-Dimeme kele tempelo na yo. 23 Mpi mbanza vandaka ve na mfunu nde ntangu to ngonda kupesa yo nsemo, sambu nkembo ya Nzambi vandaka kupesa yo nsemo,+ mpi Mwana-Dimeme+ vandaka mwinda na yo. 24 Makanda ta tambula na nsemo na yo,+ mpi bantotila ya ntoto ta nata nkembo na bo na kati na yo. 25 Bo ta kangaka ve bakielo na yo na mwini, sambu mpimpa ta vandaka ve kuna.+ 26 Bo ta nata nkembo mpi lukumu ya makanda na kati na yo.+ 27 Kansi, konso kima ya mvindu mpi konso muntu yina ke salaka mambu ya nzanzi mpi ya luvunu ta kota ve kuna ata fioti;+ bantu ta kota kuna kele kaka bantu yina bo me sonikaka bazina na bo na rulo ya luzingu ya Mwana-Dimeme.+