Kuyantika

39 Kansi, bo nataka Yozefi na Ezipte,+ mpi muntu mosi ya Ezipte, zina na yandi Potifare,+ kapita ya nzo ya Farao, mfumu ya bantu yina ke kengilaka yandi, sumbaka yandi na bantu ya Ismaele+ yina nataka yandi kuna. 2 Kansi Yehowa vandaka ti Yozefi.+ Yo yina, yandi vandaka kununga mpi bo tulaka yandi mfumu ya nzo ya mfumu na yandi, muntu ya Ezipte. 3 Ebuna mfumu na yandi monaka nde Yehowa vandaka ti yandi mpi nde Yehowa vandaka kunungisa mambu yonso ya yandi vandaka kusala.

4 Yandi landaka kundima Yozefi, ebuna Yozefi kumaka kapita na yandi. Yo yina, yandi tulaka yandi mfumu ya nzo na yandi, mpi pesaka yandi kiyeka ya kutala bima na yandi yonso. 5 Yantika ntangu yina yandi tulaka Yozefi mfumu ya nzo na yandi mpi pesaka yandi kiyeka ya kutala bima na yandi yonso, Yehowa landaka kusakumuna nzo ya muntu yina ya Ezipte sambu na Yozefi, mpi lusakumunu ya Yehowa vandaka na zulu ya bima yonso yina yandi vandaka ti yo na nzo mpi na bilanga.+ 6 Nsuka-nsuka, yandi bikaka bima na yandi yonso na maboko ya Yozefi, mpi yandi vandaka kuyindula ve ata kima mosi katula kaka madia yina yandi vandaka kudia. Diaka, Yozefi yelaka mpi kumaka nene, nda mpi kitoko.

7 Na nima ya mambu yai, nkento ya mfumu na yandi yantikaka kutudila Yozefi meso mpi kutuba nde: “Lala ti mono.” 8 Kansi yandi buyaka mpi tubilaka nkento ya mfumu na yandi nde: “Tala, mfumu na mono ke zabaka ve bima yina mono kele ti yo na nzo, mpi yandi me tulaka bima na yandi yonso na nsi ya kiyeka na mono. 9 Kele ve ata ti muntu mosi ya nene kuluta mono na nzo yai, mpi yandi me yiminaka mono ata kima mosi ve katula kaka nge, sambu nge kele nkento na yandi. Yo yina, inki mutindu mono lenda sala mbi yai ya nene mpi kusala kibeni disumu na ntwala ya Nzambi?”+

10 Konso kilumbu yandi vandaka kutubila Yozefi, kansi Yozefi vandaka kundima ve ata fioti na kulala ti yandi to na kuvanda ti yandi. 11 Kansi kilumbu mosi ntangu Yozefi kotaka na nzo sambu na kusala kisalu na yandi, bansadi yonso ya nzo vandaka ve na kati ya nzo. 12 Ebuna yandi simbaka Yozefi na lele na yandi mpi tubaka nde: “Lala ti mono!” Kansi Yozefi bikisaka lele na yandi na diboko ya nkento yina mpi tinaka na nganda. 13 Ntangu nkento yina monaka nde Yozefi me bikisa lele na yandi na diboko na yandi mpi me tina na nganda, 14 yandi yantikaka kubinga bantu ya nzo na yandi na ndinga ya ngolo mpi kutubila bo nde: “Beno tala! Yandi natilaka beto Mu-Ebreo yai sambu bantu kukuma kuseka-seka beto. Yandi kwisaka sambu na kulala ti mono, kansi mono yantikaka kuboka na ngolo yonso ya ndinga na mono. 15 Ebuna ntangu yandi me wa nde mono me tombula ndinga mpi me boka, yandi me bikisa lele na yandi na lweka na mono mpi me tina na nganda.” 16 Na nima yandi tulaka lele ya Yozefi na lweka na yandi tii kuna mfumu ya Yozefi kwisaka na nzo na yandi.

17 Ebuna nkento yina songaka yandi diambu yina mosi: “Nsadi ya Mu-Ebreo yina nge natilaka beto kwisaka na mono sambu na kukumisa mono muntu yina bantu ke seka. 18 Kansi ntangu mono tombulaka ndinga na mono mpi yantikaka kuboka, yandi bikisaka lele na yandi na lweka na mono mpi tinaka na nganda.” 19 Ntangu mfumu na yandi waka mambu yina nkento na yandi tubilaka yandi nde: “Nsadi na nge me sala mono mambu yai,” yandi dasukaka. 20 Yo yina, mfumu ya Yozefi bakaka yandi mpi tulaka yandi na boloko, kisika bo vandaka kutula bantu ya boloko ya ntotila, mpi yandi bikalaka kuna na boloko.+

21 Kansi, Yehowa vandaka kaka ti Yozefi mpi landaka kumonisila yandi zola ya kwikama mpi kusadisa yandi sambu mfumu ya nene ya boloko+ kundima yandi. 22 Yo yina mfumu ya nene ya boloko pesaka Yozefi kiyeka ya kutala bantu yonso ya boloko, mpi mambu yonso yina bo vandaka kusala kuna, yandi muntu vandaka kutinda bantu na kusala yo.+ 23 Mfumu ya nene ya boloko vandaka kutala ata kima mosi ve yina vandaka na nsi ya kiyeka ya Yozefi, sambu Yehowa vandaka ti Yozefi mpi Yehowa vandaka kunungisa+ mambu yonso ya yandi vandaka kusala.