Kapu 41

Kikuma ya Ntembe

NTANGU fyoti na nima ya kuyambama na inzo ya Simoni, Yezu meyantika nzyetolo ya zole ya kusamuna na Galilea. Na nzyetolo na yandi ya kuyitaka ya teritware yina, yandi kuvandaka ti balongoki na yandi ya ntete, Piere, Andre, Yakobo, ti Yoane. Kansi ntangu yai bantumwa 12, ti bankento ya nkaka, kekwenda ti yandi. Na kati na bau, Maria Madelene, Suzane, ti Yoane, yina bakala na yandi kele nsadi ya Ntotila Erode.

Mutindu kisalu ya Yezu kekuma mingi, ntembe na yina metala kisalu na yandi mpi kekuma mingi. Bau menatina Yezu muntu ya bampeve ya mbi yina kele kifwa-meso mpi baba. Ntangu Yezu mebelula yandi, na mpila nde yandi mekatuka na kimpika ya bampeve ya mbi ye lenda kutuba mpi kumona, bibuka keyituka kaka. Bau ketuba nde: “Ebwe, yandi yai lenda vanda Mwana ya Davidi ve?”

Bibuka mevukana kibeni mingi na nzyunga ya inzo yina Yezu kele na mpila nde yandi ti balongoki na yandi kekuka nkutu ve na kudya. Katula bayina keyindula nde yandi lenda kuvanda “Mwana ya Davidi” ya kusilamaka, kele ti balongi ya Bansiku mpi Bafarize yina kukatukaka na Yeruzalemi sambu na kuvwenza yandi. Ntangu bampangi ya Yezu mewa mambu ya Yezu mebasisa, bau mekwisa sambu na kukanga yandi. Sambu na inki kikuma?

Sambu, ata nkutu bampangi na yandi mosi Yezu kekwikila ntete ve nde yandi kele Mwana ya Nzambi. Dyaka, mavwanga ti ntembe ya bantu mingi yina ya yandi mebasisa kekwelana ve ti Yezu yina bau kuzabaka na ntangu yandi vandaka kuyela na Nazareti. Yau yina bau kekwikila nde kele ti kima mosi kekwendila ve mpenza na mabanza ya Yezu. Bau kesukisa nde: “Yandi me lauka,” mpi bau kesosa kukanga yandi sambu na kunata yandi.

Kansi nzikisa kele pwelele nde Yezu kubelulaka muntu ya bampeve ya mbi. Balongi ya Bansiku ti Bafarize kezaba nde bau lenda ve kubuya bukyeleka ya dyambu yai. Yau yina, sambu na kuvwenza Yezu bau metubila bantu nde: “Yandi ke basisaka bampeve ya mbi kaka na ngolo ya mfumu na bo Satana Belezebule.”

Na kuzabaka ngindu na bau, Yezu mebinga balongi ya Bansiku ti Bafarize mpi metuba nde: “Na konso kimfumu yina ya bantu ke nwana bo na bo, ntalu ya bantu yina ta kulumuka. Ebuna, kana bantu ya bwala mosi to ya fami mosi ke nwana bo na bo, bwala yina to fami yina lenda zinga ve. Kana Satana me basisa bantu na yandi mosi, bo me kabana. Ebuna nki mutindu kimfumu na yandi ta zinga diaka?”

Ntendula ya ndonga ya inki mutindu? Sambu Bafarize kendima nde bantu ya nkaka na kati na bau kubasisaka bampeve ya mbi, Yezu meyufula dyaka nde: “Beno ke tubaka nde mono ke basisaka bampeve ya mbi na ngolo ya . . . Belezebule. Ebuna balonguki na beno, na ngolo ya nani bo ke basisaka yo?” Na bangogo ya nkaka, lufundu na bau sambu na Yezu fwete kuvutukila bau. Na nima Yezu mekebisa nde: “Kansi kana mono ke basisaka bampeve ya mbi na ngolo ya [m]peve ya Nzambi, yo ke songa nde Kimfumu ya Nzambi me kuma na kati na beno.”

Sambu na kupesa mbandu nde kubasisa na yandi ya bampeve ya mbi kele nzikisa ya ngolo na yandi na zulu ya Satana, Yezu ketuba nde: “Muntu lenda kota ve na nzo ya muntu mosi ya ngolo sambu na kuyiba bima na yandi kana yandi me kangisa ntete ve muntu yina na bansinga. Kansi kana yandi me kangisa yandi bansinga imene, yandi lenda yiba bima yonso kele na nzo na yandi. Muntu yina kele nduku na mono ve, yandi kele mbeni na mono; muntu yina ke sadisaka mono ve na kuvukisa bantu ya nkaka ti mono, yandi ke panzaka bo.” Yau kemonana pwelele nde Bafarize ketelamanina Yezu, na kumonisaka bau mosi nde bau kele bantu ya Satana. Bau kepanza bantu ya Izraele ntama na yandi.

Na yau, Yezu kekebisa batelemini yai ya Satana nde “[Nzambi] ta lolula ve muntu yina me vwenza Mpeve-Santu.” Yandi ketendula nde: “Konso muntu yina ta tuba mambu ya mbi sambu na Mwana-muntu, Nzambi ta lolula yandi. Kansi muntu yina ta tuba mambu ya mbi sambu na Mpeve-Santu, Nzambi ta lolula yandi ve ata na ntangu yai ata na ntangu yina ke kwisa mpi.” Balongi ya Bansiku yina ti Bafarize kusalaka disumu yina ya kukonda kulolulama na kupesaka na ntima ya mbi yonso kisalu ya kimangu ya mpeve santu ya Nzambi na Satana. Matayo 12:​22-32; Marko 3:​19-30; Luka 8:​1-3; Yoane 7:⁠5.

▪ Inki mutindu nzyetolo ya zole ya Yezu keswaswana ti ya ntete?

▪ Sambu na inki bampangi ya Yezu kemeka na kusimba yandi?

▪ Inki mutindu Bafarize kemeka na kuvwenza bimangu ya Yezu, mpi inki mutindu Yezu mebuya balufundu na bau?

▪ Inki Bafarize mefwana na kubaka, mpi sambu na inki?