DILONGI 13
Mutindu Mabundu ya Luvunu Ke Fingisaka Zina ya Nzambi
Kana Nzambi kele zola, ebuna sambu na nki mabundu yina ke tubaka nde bo ke sambilaka yandi ke salaka mambu mingi ya mbi? Na kutuba ya masonga, sambu yo kele mabundu ya luvunu. Yo ke fingisaka zina ya Nzambi. Inki mutindu mabundu ya luvunu ke fingisaka zina ya Nzambi? Inki mutindu yandi ke kudiwaka sambu na mabundu ya luvunu? Mpi nki yandi ke kana kusala yo?
1. Inki mutindu mabundu ya luvunu ke fingisaka zina ya Nzambi na mambu yina yo ke longaka?
Mabundu ya luvunu me ponaka na “kundima luvunu na kisika ya kundima kieleka ya Nzambi.” (Baroma 1:25) Mu mbandu, mabundu mingi ke longaka ve bandimi na bo zina ya Nzambi. Kansi Biblia ke tubaka nde beto fwete sadila zina ya Nzambi. (Baroma 10:13, 14) Kana mambu ya mbi me salama, bamfumu ya nkaka ya mabundu ke tubaka nde yo kele luzolo ya Nzambi. Kansi yo kele luvunu. Mambu ya mbi ya ke salamaka ke katukaka ve ata fioti na Nzambi. (Tanga Yakobo 1:13.) Kima ya ke pesa mpasi kele nde, bantu ke zolaka diaka ve Nzambi sambu na mambu ya luvunu yina mabundu mingi ke longaka.
2. Inki mutindu mabundu ya luvunu ke fingisaka zina ya Nzambi na mambu yina yo ke salaka?
Mabundu ya luvunu ke sadilaka ve bantu mambu bonso Yehowa. Biblia ke tuba nde “masumu [ya mabundu ya luvunu] me kuma mingi kibeni mpi yo me tombuka tii na zulu.” (Kusonga 18:5) Banda ntama, mabundu ya luvunu ke kudikotisaka na politiki, ke pesaka maboko na bitumba mpi ke fwisaka bantu mingi to ke ndimaka nde bo fwa bantu. Bamfumu ya nkaka ya mabundu ke zolaka kukuma bamvwama, yo yina bo ke lomba-lombaka mbongo na bandimi na bo. Mambu yai ya bo ke salaka, ke monisaka mpenza nde bo me zaba nkutu ve Nzambi mpi nde bo kele ve ti nswa ya kutuba nde bo kele bansadi na yandi.—Tanga 1 Yoane 4:8.
3. Nzambi ke waka nki mutindu sambu na mabundu ya luvunu?
Kana mambu yina mabundu ya luvunu ke salaka ke pesaka nge makasi, nge ke yindula nde yo ke salaka Yehowa nki mutindu? Yandi ke zolaka bantu. Kansi yandi ke waka makasi sambu bamfumu ya mabundu ke fingisaka zina na yandi mpi ke sadilaka bandimi na bo mambu ya mbi. Yo yina, yandi ke tuba nde yandi ta fwa mabundu ya luvunu mpi bantu “ta mona [yo] diaka ve.” (Kusonga 18:21) Kubika fioti, Nzambi ta fwa mabundu yonso ya luvunu.—Kusonga 18:8.
LONGUKA MAMBU MINGI
Beto tala diaka mutindu Nzambi ke waka sambu na mabundu ya luvunu. Beto tala mpi mambu mingi yina yo ke salaka mpi sambu na nki yo fwete kanga nge ve nzila ya kulonguka mambu ya Yehowa.
4. Nzambi ke ndimaka ve mabundu yonso
Bantu mingi ke yindulaka nde mabundu kele bonso banzila mingi mpi nde yo yonso ke nataka na Nzambi. Keti yo kele kieleka? Beno tanga Matayo 7:13, 14 mpi na nima beno pesa mvutu na ngiufula yai:
Inki Biblia ke tubaka sambu na nzila yina ke nataka na luzingu?
Beno tala VIDEO mpi na nima beno pesa mvutu na ngiufula ya ke landa.
Keti Biblia ke tubaka nde Nzambi ke sepelaka ti mabundu yonso?
5. Mabundu ya luvunu ke landaka ve mbandu ya zola ya Nzambi
Mabundu ya luvunu ke fingisaka zina ya Nzambi na mitindu mingi. Mu mbandu, yo ke fingisaka yo mingi-mingi ntangu yo ke kudikotisaka na bitumba. Sambu na kumona mbandu mosi, beno tala VIDEO. Na nima beno pesa mvutu na bangiufula ya ke landa.
Inki mambu mabundu mingi salaka na Bitumba ya Zole ya Ntoto ya Mvimba?
Nge ke wa nki mutindu sambu na mambu yina yo salaka?
Beno tanga Yoane 13:34, 35 mpi 17:16. Na nima beno pesa mvutu na bangiufula yai:
Nge ke yindula nde Yehowa ke waka nki mutindu ntangu mabundu ke kudikotisaka na bitumba?
Mabundu ya luvunu ke salaka mambu mingi ya mbi. Inki mambu nge ke monaka ya ke ndimisaka nge nde mabundu ya luvunu ke landaka ve mbandu ya zola ya Nzambi?
Mabundu ya luvunu ke landaka ve mbandu ya zola ya Nzambi
6. Nzambi ke zola nde bantu kubasika na mabundu ya luvunu
Beno tanga Kusonga 18:4a mpi na nima beno pesa mvutu na ngiufula yai:
Inki mutindu nge ke kudiwa mutindu nge me zaba nde Nzambi ke zolaka kugulusa bantu yina bo ke kusaka na mabundu ya luvunu?
7. Landa kulonguka mambu ya Nzambi ya kieleka
Keti mambu ya mbi yina mabundu ya luvunu ke longaka mpi ke salaka fwete pusa nge na kutadila Nzambi na mutindu ya mbi? Yindula nde mwana mosi ke buya kulanda bandongisila ya mbote yina tata na yandi ke pesa yandi. Yandi me katuka na nzo mpi me kuma kusala mambu ya mbi kibeni. Tata ke sepela ve ti mambu yina mwana na yandi ke sala. Sambu na nki yo ta vanda mbote ve kana beto pesa tata foti sambu na mambu ya mbi yina mwana na yandi ke sala?
Keti yo ta vanda mbote na kupesa Yehowa foti mpi kubuya kulonguka mambu na yandi kaka sambu na mambu yina mabundu ya luvunu ke salaka?
BANTU YA NKAKA KE TUBAKA NDE: “Mono ke sepelaka ve ti mambu ya Nzambi sambu mabundu ke salaka mambu mingi ya mbi.”
Keti nge ke tubaka mpi mutindu yai?
Sambu na nki nge fwete bika ve nde mambu ya mbi yina mabundu ya luvunu ke salaka kupusa nge na kukuma kutadila Yehowa na mutindu ya mbi?
NA BUNKUFI
Mabundu ya luvunu ke fingisaka zina ya Nzambi na mambu ya luvunu yina yo ke longaka mpi mambu ya mbi kibeni yina yo ke salaka. Nzambi ta fwa mabundu ya luvunu.
Inki Nge Me Simba?
Nge ke wa nki mutindu sambu na mambu yina mabundu ya luvunu ke longaka mpi ke salaka?
Yehowa ke waka nki mutindu sambu na mabundu ya luvunu?
Inki Nzambi ta sala mabundu ya luvunu?
TALA MPI
Tala bikuma zole ya ke salaka nde mabundu mingi kusepedisa ve Nzambi.
Sambu na nki Yehowa ke zolaka nde beto sambila yandi ntangu beto me vukana ti bantu ya nkaka?
“Keti Yo Kele Mfunu na Kuvanda ti Dibundu?” (Disolo ya kele na jw.org)
Mumpe mosi vandaka kudiyangisa sambu na mambu ya vandaka kusalama na dibundu na bo. Kansi yo kangaka yandi ve nzila ya kulonguka mambu ya kieleka sambu na Nzambi.
“Sambu na Nki Mumpe Mosi Katukaka na Dibundu na Bo?” (Disolo ya kele na Telama!)
Banda ntama, mabundu ke longaka mambu ya luvunu yina ke pusaka bantu na kuyindula nde Nzambi ke tudilaka bo ve dikebi mpi nde yandi kele nku. Tala malongi tatu ya luvunu yina bo ke longaka.
“Baluvunu Yina Ke Monisa Nzambi Bonso Muntu ya Me Konda Zola” (Nzozulu ya Nkengi, Novembri 1, 2013)