DILONGI 23

Mambote ya Nge Ta Baka Kana Nge Baka Mbotika

Ya Bo Me Niema na Papie

Yezu tubaka nde Bakristu fwete baka mbotika. (Tanga Matayo 28:19, 20.) Kansi mbotika kele nki mpi nki muntu fwete sala sambu na kubaka mbotika?

1. Mbotika kele nki?

Ngogo ya Kigreki ya bo me balula nde “mbotika” ke tendula “kudindisa” na masa. Ntangu Yezu bakaka mbotika, bo dindisaka yandi ya mvimba na nzadi Yordani mpi na nima yandi ‘basikaka na masa.’ (Marko 1:9, 10) Mutindu mosi mpi sambu na kupesa Bakristu ya kieleka mbotika, bo ke dindisaka bo ya mvimba na masa.

2. Kubaka mbotika ke monisaka nki?

Kana muntu me baka mbotika, yandi ke monisaka nde yandi me kudipesaka na Yehowa Nzambi. Inki mutindu muntu ke kudipesaka na Nzambi? Na ntwala ya kubaka mbotika, yandi ke sambaka yandi mosi mpi ke songaka Yehowa nde yandi ke zola kusadila yandi mvula na mvula. Yandi ke silaka na kusadila kaka Yehowa mpi nde kusala luzolo ya Yehowa ta vanda kima ya kuluta mfunu ya luzingu na yandi. Yandi ke bakaka lukanu ya ‘kudibuya . . . mpi ya kufula kulanda’ malongi mpi mbandu ya Yezu. (Matayo 16:24) Kana muntu me kudipesa na Nzambi mpi me baka mbotika, kinduku na yandi ti Yehowa mpi ti bansadi na yandi ke kumaka diaka ngolo.

3. Inki muntu fwete sala sambu na kubaka mbotika?

Sambu na kubaka mbotika, nge fwete longuka mambu ya Yehowa mpi kukuma mpenza kukwikila na yandi. (Tanga Baebreo 11:6.) Nge ta kuma kuzola Yehowa mingi kana nge ke landa kulonguka mambu na yandi mpi ke kumisa lukwikilu na nge ngolo. Yo ta sala nde nge kuma kuzola mingi kusonga bantu ya nkaka mambu na yandi mpi kuzitisa bansiku na yandi. (2 Timoteo 4:2; 1 Yoane 5:3) Mbala mingi, muntu ke kumaka ti nzala ya kudipesa na Nzambi mpi ya kubaka mbotika kana yandi ke zinga “na mutindu yina me fwana na Yehowa, sambu na kupesa yandi kiese kibeni.”—Bakolosai 1:9, 10.a

LONGUKA MAMBU MINGI

Beto tala malongi yina beto lenda baka na mbotika ya Yezu mpi mambu yina muntu fwete sala sambu na kubaka mbotika.

4. Malongi yina beto lenda baka na mbotika ya Yezu

Beno tanga Matayo 3:13-17 sambu na kumona mutindu mbotika ya Yezu salamaka. Na nima beno pesa mvutu na bangiufula yai:

Keti Yezu vandaka bebe ntangu yandi bakaka mbotika?
Inki mutindu yandi bakaka mbotika? Keti bo losilaka yandi kaka mwa masa na ntu?

Ntangu Yezu bakaka mbotika, yandi yantikaka kusala kisalu ya mfunu yina Nzambi pesaka yandi. Beno tanga Luka 3:21-23 mpi Yoane 6:38. Na nima beno pesa mvutu na ngiufula yai:

Na nima ya kubaka mbotika, nki kisalu Yezu tulaka na kisika ya ntete na luzingu na yandi?

5. Nge lenda lungisa lukanu na nge ya kubaka mbotika

Ngindu ya kudipesa na Nzambi mpi kubaka mbotika lenda bangisa nge ntete. Kansi, kana nge ke landa kukumisa kinduku na nge ti Yehowa ngolo, malembe-malembe nge ta kuma ti nzala ya kubaka lukanu yai ya mfunu. Sambu na kumona mutindu bantu ya nkaka salaka yo, beno tala VIDEO.

VIDEO: Mutindu Nge Lenda Kuma Nduku ya Yehowa (1:11)

Beno tanga Yoane 17:3 mpi Yakobo 1:5. Na nima beno pesa mvutu na ngiufula yai:

Inki muntu fwete sala sambu na kuyilama na kubaka mbotika?

A. Nkento mosi ke sala kisambu ya kudipesa na Nzambi.

B. Nkento yango ke baka mbotika mpi me kuma Mbangi ya Yehowa. Bo ke dindisa yandi ya mvimba na masa.

Beto ke kudipesaka na Nzambi ntangu beto ke songaka yandi na kisambu nde beto ke zola kusadila yandi mvula na mvula
Ntangu beto ke bakaka mbotika, beto ke monisaka na meso ya bantu nde beto me kudipesa na Nzambi

6. Mbotika ke sadisaka beto na kukuma bantu ya dibuta ya Yehowa

Ntangu beto ke bakaka mbotika, beto ke kotaka na dibuta ya bampangi ya ntoto ya mvimba yina kele na bumosi. Ata beto ke zingaka na bisika ya kuswaswana mpi ata mambu ya luzingu na beto ke vandaka ve mutindu mosi, beto yonso ke kwikilaka na mambu ya mutindu mosi mpi ke zitisaka bansiku ya mutindu mosi. Beno tanga Nkunga 25:14 mpi 1 Piere 2:17. Na nima beno pesa mvutu na ngiufula yai:

Mutindu baverse yai me monisa yo, nki mutindu mbotika ke sadisaka muntu na kukuma ti kinduku ya ngolo ti Yehowa mpi ti bantu ya nkaka yina ke sambilaka yandi?

Bifwanisu: Mpangi-nkento mosi ya me bakaka mbotika ke yindula na kiese yonso mutindu yandi ke zingaka mbote ti bampangi ya dibundu. 1. Yandi ke songaka mpangi-nkento mosi mambu na yandi ya kinsweki. 2.Yandi ke sadisa mpangi-nkento mosi ya mununu na kutambula. 3. Yandi ke dia ti banduku na yandi ya kele ti bamvula ya kuswaswana. 4. Yandi ti mpangi-nkento ya nkaka, bo ke longa bakala mosi nsangu ya mbote. 5. Yandi ke kanga foto ti Bambangi ya Yehowa zole ya bankento ya kele ve mpusu ya nitu mosi ti yandi na lukutakanu mosi ya distrike.

BANTU YA NKAKA KE TUBAKA NDE: “Mono kele ve ya kuyilama sambu na kubaka mbotika.”

Kana nge ke yindulaka mpi mutindu yai, nge ke ndima nde mbotika kele kaka lukanu mosi ya mfunu yina nge fwete lungisa?

NA BUNKUFI

Yezu tubaka nde Bakristu fwete baka mbotika. Sambu na kubaka mbotika, muntu fwete kuma kukwikila mpenza na Yehowa, kuzitisa bansiku na yandi mpi kupesa luzingu na yandi na Nzambi.

Inki Nge Me Simba?

Mbotika kele nki mpi sambu na nki yo kele mfunu?
Mbotika ke monisaka nki?
Inki muntu fwete sala sambu na kudipesa na Nzambi mpi kubaka mbotika?

Dati ya beno me manisa dilongi yai:

Mambu ya Kusala

Sambu na kuzaba mambu ya nge fwete sala sambu na kubaka mbotika, tala baliste ya mambu ya nge fwete lungisa na nsuka ya Kitini 4, “Keti Mono Kele ya Kuyilama Sambu na Kulonga Nsangu ya Mbote ti Dibundu?” mpi “Keti Mono Kele ya Kuyilama na Kubaka Mbotika?”

Mambu ya Nkaka:

Your other goal

TALA MPI

Tala kana mbotika kele kibeni nki.

“Mbotika Kele Nki?” (Disolo ya kele na jw.org)

Tala diaka mambu yina muntu fwete sala sambu na kubaka mbotika.

“Zola Sambu na Yehowa Ta Pusa Nge na Kubaka Mbotika” (Nzozulu ya Nkengi, Marsi 2020)

Tala mambu yina pusaka bakala mosi na kubaka mbotika.

“Bo Zolaka nde, Mono Mosi Kumona Mambu Yina Biblia Ke Longaka Mpenza” (Nzozulu ya Nkengi, Februari 1, 2013)

Tala sambu na nki mbotika kele lukanu mosi ya mfunu mpi mutindu nge lenda yilama sambu na kubaka mbotika.

“Keti Mono Fwete Baka Mbotika?” (Disolo ya kele na mukanda Bangiufula ya Baleke Ke Kudiyulaka—Bamvutu ya Ta Sadisa Nge, Volime 2, kapu 37)

a Kana muntu bakaka dezia mbotika na dibundu ya nkaka, sambu na nki yandi fwete baka diaka mbotika? Sambu dibundu yina longaka yandi ve malongi ya kieleka ya Biblia.—Tala Bisalu 19:1-5 mpi Dilongi 13.