DILONGI 28

Pesa Yehowa ti Yezu Matondo Sambu na Mambu ya Bo Me Salaka Sambu na Nge

Ya Bo Me Niema na Papie

Inki mpila nge ke kudiwaka kana nduku mosi me pesa nge kado mosi ya kitoko? Ntembe kele ve nde nge ke waka kiese mingi kibeni mpi nge ke pesaka yandi mersi sambu na kado yango. Yehowa mpi Yezu me pesaka beto kado mosi ya me luta bakado yonso. Kado yango kele kimenga ya Yezu. Inki nge fwete sala sambu na kupesa bo matondo sambu na yo?

1. Inki beto ke salaka mpi sambu na kupesa matondo sambu na mambu yina Nzambi ti Kristu me sadilaka beto?

Biblia ke tuba nde “konso muntu yina ke monisa lukwikilu na [Yezu]” ta zinga mvula na mvula. (Yoane 3:16) Kumonisa lukwikilu ke tendula nki? Yo ke tendula nde beto fwete suka ve kaka na kundima nde Yezu kele. Kansi beto fwete monisa yo na balukanu ya beto ke bakaka mpi na mambu ya beto ke salaka. (Yakobo 2:17) Kinduku na beto ti Yezu mpi Tata na yandi Yehowa ke kumaka ngolo kana mambu ya beto ke tuba mpi ke sala ke monisa nde beto kele ti lukwikilu.—Tanga Yoane 14:21.

2. Inki nkinsi ya mfunu ke sadisaka beto na kupesa Yehowa ti Yezu matondo sambu na mambu yina bo me sadilaka beto?

Na nkokila na ntwala nde Yezu kufwa, yandi songaka balongoki na yandi mambu ya nkaka ya bo fwete sala sambu na kupesa mersi sambu na kimenga na yandi. Yandi salaka nkinsi mosi ya mfunu yina Biblia ke bingaka nde “Madia ya Nkokila ya Mfumu” to Nkinsi ya Kuyibuka Lufwa ya Kristu. (1 Bakorinto 11:20) Yezu salaka nkinsi yai sambu bantumwa na yandi mpi Bakristu yonso ya kieleka yina ta kwisa na nima na bo kuyibuka nde yandi fwaka sambu na beto. Yo yina yandi tubaka nde: “Beno landa kusala yo sambu na kuyibuka mono.” (Luka 22:19) Beto ke pesaka Yehowa mpi Yezu matondo sambu na zola ya mingi yina bo ke vandaka ti yo sambu na beto, ntangu beto ke kwendaka na Nkinsi ya Kuyibuka Lufwa ya Yezu.

LONGUKA MAMBU MINGI

Beto tala mambu ya nkaka yina nge fwete sala sambu kupesa Yehowa ti Yezu mersi sambu na zola ya mingi yina bo me monisilaka beto mpi beto tala sambu na nki Kuyibuka Lufwa ya Kristu kele mfunu mingi.

3. Inki beto fwete sala sambu na kupesa Yehowa ti Yezu mersi?

Yindula nde muntu mosi me gulusaka nge ntangu nge zolaka kufwa na masa. Keti nge ta vila mambu yina yandi salaka? To nge ta sala yonso sambu na kupesa yandi mersi sambu na mambu yina yandi me sadilaka nge. Mpidina ve?

Yehowa me gulusaka beto mutindu yandi pesaka luzingu ya Mwana na yandi sambu beto baka luzingu ya mvula na mvula. Beno tanga 1 Yoane 4:8-10 mpi na nima beno pesa mvutu na bangiufula yai:

Sambu na nki kimenga ya Yezu kele kado mosi ya mfunu mingi?
Inki mpila nge ke kudiwa ntangu nge ke yindula mambu yina Yehowa mpi Yezu me salaka sambu na nge?

Ebuna, nki beto fwete sala sambu na kupesa matondo sambu na mambu yina Yehowa mpi Yezu me salaka sambu na beto? Beno tanga 2 Bakorinto 5:15 mpi 1 Yoane 4:11; 5:3. Na nima ya kutanga konso verse, beno pesa mvutu na ngiufula yai:

Mutindu verse yai me monisa yo, nki beto fwete sala sambu na kupesa Yehowa ti Yezu mersi?

4. Landa mbandu ya Yezu

Beto ke pesaka mpi Yehowa ti Yezu mersi ntangu beto ke landaka mbandu ya Yezu. Beno tanga 1 Piere 2:21 mpi na nima beno pesa mvutu na ngiufula yai:

Inki nge lenda sala sambu na kulanda mbote-mbote mbandu ya Yezu?

Yezu ke tanga Ndinga ya Nzambi na rulo. — Yezu vandaka kuzola Ndinga ya Nzambi, kulonga nsangu ya mbote mpi kusadisa bantu ya nkaka

Yezu ke solula ti nkento mosi ya Samaria na dibulu mosi ya bo ke bakaka masa ya kunwa. — Yezu vandaka kuzola Ndinga ya Nzambi, kulonga nsangu ya mbote mpi kusadisa bantu ya nkaka

5. Kwenda na Nkinsi ya Kuyibuka Lufwa ya Kristu

Sambu na kuzaba mutindu nkinsi ya ntete ya Madia ya Nkokila ya Mfumu salamaka, beno tanga Luka 22:14, 19, 20. Na nima beno pesa mvutu na bangiufula yai:

Inki mutindu nkinsi ya Madia ya Nkokila ya Mfumu salamaka?
Dimpa mpi vinu ke monisaka nki?—Tala verse 19 mpi 20.

Yezu zolaka nde balongoki na yandi kusala nkinsi ya Madia ya Nkokila ya Mfumu mbala mosi konso mvula na kilumbu yina yandi fwaka. Yo yina, Bambangi ya Yehowa ke vukanaka mbala mosi konso mvula sambu na kuyibuka lufwa ya Kristu kaka mutindu yandi songaka balongoki na yandi na kusala. Sambu na kuzaba mutindu lukutakanu yai ya mfunu ke salamaka, beno tala VIDEO. Na nima beno pesa mvutu na ngiufula ya ke landa.

VIDEO: Beto Yibuka Lufwa ya Yezu (1:41)

Kifwanisu ya ke monisa mambu ya kele na video ‘Beto Yibuka Lufwa ya Yezu.’ Bambangi ya Yehowa me vukana sambu na kusala nkinsi ya Madia ya Nkokila ya Mfumu.

Inki mutindu Nkinsi ya Kuyibuka Lufwa ya Yezu ke salamaka?

Dilonga mosi ya kipala-pala ya kele ti mampa ya kukonda levire mpi dikopa ya tensi ya kele ti vinu.

Dimpa mpi vinu ke vandaka kaka bidimbu. Dimpa ke monisaka nitu ya kukonda masumu yina Yezu pesaka sambu na beto. Vinu ke monisaka menga na yandi

Bo ke lutisa vinu na nkinsi ya Madia ya Nkokila ya Mfumu.

BANTU YA NKAKA KE TUBAKA NDE: “Kukwikila na Yezu me kuka sambu na kuguluka.”

Inki mutindu nge lenda sadila Yoane 3:16 mpi Yakobo 2:17 sambu na kumonisa nde yo ke lombaka kusala mambu mingi ya nkaka?

NA BUNKUFI

Beto ke pesaka matondo na mambu yina Yezu me salaka sambu na beto kana beto ke kwikila na yandi mpi ke kwenda na Nkinsi ya Kuyibuka Lufwa na yandi.

Inki Nge Me Simba?

Kumonisa lukwikilu na Yezu ke tendula nki?
Inki mutindu nge ta zola kupesa Yehowa mpi Yezu mersi sambu na mambu yina bo me sadilaka nge?
Sambu na nki yo kele kibeni mfunu na kukwenda na Nkinsi ya Kuyibuka Lufwa ya Kristu?

Dati ya beno me manisa dilongi yai:

Mambu ya Kusala

Kwenda na Nkinsi ya Kuyibuka Lufwa ya Kristu yina ta salama na mbala ya nima. Yula mpangi ya ke longaka nge Biblia dati yina yo ta salama mpi sonika yo sambu nge vila yo ve.

Mambu ya Nkaka:

Your other goal

TALA MPI

Lufwa ya Kristu ke pusaka beto na kusala nki?

Yandi sadilaka Nitu na Yandi Sambu na Kukumisa Yehowa (9:28)

Tala bantendula yina Biblia ke pesa sambu na lukwikilu mpi mutindu beto lenda monisa yo.

“Kwikila na Balusilu ya Yehowa” (Nzozulu ya Nkengi, Oktobri 2016)

Na disolo “Mono Me Kumaka Bunkete mpi Me Kumaka Kusepela ti Luzingu,” tala mpila kuzaba mfunu ya kimenga ya Kristu sadisaka nkento mosi.

“Biblia Ke Sobaka Luzingu ya Bantu” (Disolo ya kele na Nzozulu ya Nkengi)

Tala sambu na nki bantu fioti mpamba ke diaka dimpa mpi ke nwaka vinu na Nkinsi ya Kuyibuka Lufwa ya Yezu.

“Sambu na Nki Bambangi ya Yehowa Ke Salaka Ve Nkinsi ya Madia ya Mfumu Bonso Mabundu ya Nkaka?” (Disolo ya kele na jw.org)