DILONGI 46
Sambu na Nki Nge Fwete Kudipesa na Nzambi mpi Kubaka Mbotika?
Sambu nge pesa luzingu na nge na Yehowa, nge fwete sala kisambu mpi kusonga yandi nde nge ta sambilaka kaka yandi mpi nge ta salaka ntete luzolo na yandi na luzingu na nge ya mvimba. (Nkunga 40:8) Na nima ya kusala yo, nge lenda baka mbotika. Kana nge me baka mbotika, nge ta monisa na meso ya bantu ya nkaka nde nge me kudipesaka na Nzambi. Lukanu ya kudipesa na Yehowa kele lukanu ya kuluta mfunu na luzingu ya muntu. Inki lenda pusa nge na kubaka lukanu yai ya kuluta mfunu yina ta soba luzingu na nge?
1. Inki ke pusaka muntu na kudipesa na Nzambi?
Zola ke pusaka beto na kudipesa na Yehowa. (1 Yoane 4:10, 19) Biblia ke tuba nde: “Zola Yehowa Nzambi na nge na ntima na nge ya mvimba, na moyo na nge ya mvimba, na mabanza na nge yonso, mpi na ngolo na nge yonso.” (Marko 12:30) Beto ke monisaka nde beto ke zolaka Nzambi na mambu ya beto ke tubaka mpi ke salaka. Kaka bonso bakala ti nkento mosi ya ke zolana mpenza ke kwelanaka, mutindu mosi mpi zola na beto sambu na Yehowa ke pusaka beto na kudipesa na yandi mpi na kubaka mbotika.
2. Inki balusakumunu Yehowa ta pesa nge kana nge me baka mbotika?
Kana nge me baka mbotika, nge ta kuma ti bampangi mingi ya ke zingaka kibeni na kiese. Mpidina, Yehowa ta monisilaka nge zola na yandi na mitindu mingi mpi kinduku na nge ti yandi ta kuma mpenza ngolo kuluta mutindu yo kele bubu yai. (Tanga Malaki 3:16-18.) Diaka yandi ta kuma Tata na nge mpi nge ta kota na dibuta ya bampangi ya ntoto ya mvimba yina ke zolaka yandi mpi ke zolaka nge. (Tanga Marko 10:29, 30.) Ya kieleka, kele ti mwa mambu ya nge fwete sala na ntwala ya kubaka mbotika. Nge fwete longuka mambu ya Yehowa, kuzola yandi mpi kumonisa lukwikilu na Mwana na yandi. Na nima, nge fwete pesa luzingu na nge na Yehowa. Kana nge me sala mambu yai mpi nge me baka mbotika, nge ta kota na nzila yina ke nataka na luzingu ya mvula na mvula. Ndinga ya Nzambi ke tuba nde: “Mbotika . . . ke gulusa beno mpi ntangu yai.”—1 Piere 3:21.
LONGUKA MAMBU MINGI
Beto tala sambu na nki yo kele mfunu nde nge kudipesa na Yehowa mpi nge baka mbotika.
3. Beto yonso fwete pona nani beto ta sambilaka
Na Izraele ya ntangu ya ntama, bantu ya nkaka vandaka kuyindula nde yo kele mbi ve kana bo ke sambila Yehowa mpi ke sambila diaka nzambi ya luvunu Baale. Kansi Yehowa tindaka profete na yandi Eliya sambu yandi sadisa bo na kukatula ngindu yai ya mbi. Beno tanga 1 Bantotila 18:21 mpi na nima beno pesa mvutu na ngiufula yai:
Yo vandaka kulomba nde bantu ya Izraele kupona na kusala nki?
Bonso bantu ya Izraele, beto mpi fwete pona nani beto ta sambilaka. Beno tanga Luka 16:13 mpi na nima beno pesa mvutu na bangiufula yai:
Sambu na nki yo kele ve mbote kana beto ke sambila Yehowa mpi ke sambila diaka muntu to kima ya nkaka?
Inki mutindu beto ke monisaka nde beto me ponaka na kusambila Yehowa?
4. Yindula mingi zola yina Yehowa ke monisilaka nge
Yehowa me pesaka beto makabu mingi ya mbote. Inki beto lenda pesa yandi? Beno tala VIDEO.
Inki mambu Yehowa me salaka yina ke monisa nde yandi ke zolaka nge? Beno tanga Nkunga 104:14, 15 mpi 1 Yoane 4:9, 10. Na nima, beno pesa mvutu na bangiufula yai:
Inki makabu Yehowa me pesaka nge yina ke sepedisaka nge mingi?
Inki mutindu nge ke kudiwa ntangu nge ke yindula makabu yina yandi me pesaka nge?
Kana muntu mosi me pesa beto kado mosi ya beto ke sepela mpenza ti yo, beto ke pesaka yandi mersi mingi sambu na yo. Beno tanga Kulonga 16:17 mpi na nima beno pesa mvutu na ngiufula yai:
Ntangu nge ke yindulaka bima yonso yina Yehowa me salaka sambu na nge, yo ke pusaka nge na kupesa yandi nki?
5. Kudipesa na Nzambi ke natilaka beto mambote mingi
Bantu mingi ke yindulaka nde bo ta vanda na kiese kana bo kele bantu ya lukumu, kana bo kele ti kisalu ya mbote to kana bo kele ti mbongo mingi. Keti yo kele masonga? Beno tala VIDEO mpi na nima beno pesa mvutu na bangiufula ya ke landa.
Ata mpangi yai ya beto me tala na video vandaka kuzola nsaka ya balo mingi, sambu na nki yandi yambulaka yo?
Yandi bakaka lukanu ya kudipesa na Yehowa kansi ve na nsaka ya balo. Nge ke ndima nde yo vandaka lukanu ya mbote? Sambu na nki?
Na ntwala nde ntumwa Polo kukuma Mukristu, yandi vandaka kusala kisalu mosi ya lukumu. Yandi vandaka kulonguka nsiku ya Bayuda na longi mosi ya lukumu. Kansi yandi yambulaka yo sambu na kukuma Mukristu. Keti Polo kudiyangisaka na nima sambu na lukanu yai ya yandi bakaka? Beno tanga Bafilipi 3:8 mpi na nima beno pesa mvutu na bangiufula yai:
Sambu na nki Polo tubaka nde mambu yina yandi salaka na ntwala nde yandi kuma Mukristu vandaka “kita ya mvindu”?
Kansi nki mambote yandi bakaka na nima?
Nge ke yindula nde nki ta sadisa nge mpenza na kuvanda ti luzingu ya mbote: Kusadila Yehowa to kusala mambu ya nkaka na luzingu?
Ntangu Polo kumaka Mukristu, yandi bakaka mambote mingi kuluta bima yina yandi yambulaka
BANTU YA NKAKA KE TUBAKA NDE: “Mono ke zaba nde yai kele dibundu ya kieleka kansi mono kele ntete ve ya kuyilama sambu na kubaka mbotika.”
Nge ke yindula nde yo kele mfunu na kupesa luzingu na nge na Yehowa? Sambu na nki?
NA BUNKUFI
Zola ke pusaka beto na kupesa luzingu na beto na Yehowa mpi na kubaka mbotika.
Inki Nge Me Simba?
Sambu na nki yo me fwana nde beto zola Yehowa mpi beto sambila yandi na ntima ya mvimba?
Inki balusakumunu Yehowa ta pesa nge kana nge me baka mbotika?
Keti nge ta zola kupesa luzingu na nge na Yehowa?
TALA MPI
Tala sambu na nki nkento mosi ya vandaka kubula miziki mpi bakala mosi ya vandaka kusala nsaka mosi ya balo pesaka luzingu na bo na Yehowa.
Tala bikuma ya nkaka ya fwete pusa nge na kudipesa na Nzambi.
“Sambu na Inki Kudipesa na Yehowa?” (Nzozulu ya Nkengi, Yanuari 1, 2010)
Na nkunga ya ke landa, tala kiese yina bantu ya me kudipesaka na Yehowa ke vandaka ti yo.
Na disolo “Bamvula Mingi Mono Vandaka Kudiyula nde, ‘Sambu na Nki Beto Kele na Luzingu?’” tala mambu ya pusaka nkento mosi na kutula mambu ya kuluta mfunu na kisika ya ntete.
“Biblia Ke Sobaka Luzingu ya Bantu” (Disolo ya kele na Nzozulu ya Nkengi)