Bangyufula ya Batangi

Ntangu yankaka beto kewaka bampangi ketuba to kesamba sambu Kimfumu ya Nzambi kukwisa na zulu ya ntoto. Keti yai kele ntubilu mosi ya mbote?

Na kutuba mbote, ntubilu ya mutindu yina kewakana ve ti ntubilu ya Masonuku. Kimfumu ya Nzambi kele Kimfumu ya zulu. Yau yina, Ntumwa Polo kusonikaka nde: “[Mfumu] ta katula mono na bampasi yonso, ebuna yandi ta kotisa mono mbote-mbote na Kimfumu na yandi ya zulu. Lukumu kuvanda na yandi mvula na mvula! Amen.”—2 Timoteo 4:18; Matayo 13:44; 1 Korinto 15:50.

Kimfumu tulamaka na zulu na 1914, mpi yau takatulama ve kuna sambu na kwisa kutulama na paladisu ya ntoto yina tavutulama to na kifulu yankaka. Yezu Kristu kele Ntotila ya Kimfumu. Bonso Ntotila, Yezu kele na kiyeka na zulu ya bawanzyo. Yau yina, kifulu kibeni ya luyalu na yandi kele na diboko ya kibakala ya Nzambi na zulu. Bakristu ya kupakulama kekwenda kuvukana ti yandi bonso bantotila mpi banganga-Nzambi na zulu.—Efezo 1:19-21; Kusonga 5:9, 10; 20:6.

Keti pana yau kesongidila nde beto lenda lomba dyaka ve na Nzambi na bangogo ya kitini ya Kisambu ya Mfumu yina ketuba nde: “Kimfumu na nge kwisa, luzolo na nge kusalama awa na ntoto bonso na zulu”? (Matayo 6:10) Beto fwete lomba, nkutu kisambu yina mefwana mpi kele kaka na ntendula ya mingi.

Kubika fyoti Kimfumu ya Nzambi tazenga mambu sambu na ntoto, ye yai kele kima ya beto kevandaka na yau na ntu ntangu beto kesambaka mpi kesadilaka bangogo ya kufwanana ti yina kele na Kisambu ya Mfumu. Mu mbandu, Daniele 2:44 kebikula nde Kimfumu “kekwisa” kufwa makanda yonso mpi tabaka luyalu ya ntoto yai yonso. Kusonga 21:2 ketubila Yeruzalemi ya Mpa yina kekatuka na zulu kekwisa kukita. Yeruzalemi ya Mpa metungama ti Bakristu ya kupakulama 144 000 yina tavanda nkento ya Kristu. Bau kele mpi bamvingidi-difwa yina kevukana ti Yezu na Kimfumu. Yau yina, Kusonga 21:2 ketendula dikebi ya bau tatula na ntoto, yina tabuta balusakumunu mingi sambu na bantu ya kwikama—Kusonga 21:3, 4.

Tii kuna bambikudulu ya kitoko yai ti yankaka talungana, yau tavanda mbote na kulanda kusamba Yehowa Nzambi na bangogo ya Yezu, “Kimfumu na nge kwisa.” Kansi, beto fwete tula na ntu nde Kimfumu takwisa ve kimuntukimuntu na zulu ya Ntoto. Luyalu ya Kimfumu kele na zulu, kansi na ntoto ve.

[Bangogo ya kemonisa kisina ya foto ya lutiti 31]

Earth: Based on NASA photo