Nge tazola ve nde nge kondana!

KUKONDANA wapi? Na Lukutakanu ya Distrike ya Bambangi ya Yehowa “Binati-nsangu ya Ngemba ya Nzambi” ya kefinama nswalunswalu! Na bisika mingi, lukutakanu tayantika na Kitanu na 9:30 ya ntwala-midi ti miziki. Na nima ya kuwa bangyufula yina tasyamisa lukwikilu na disolo “Beto Widikila Bansamuni ya Ngemba ya Kikesa,” nge tasepela na disolo yina tapesa beto kikesa ya tavanda na ntu-dyambu “Inki Nzambi Kelombaka na Beto?”

Kitini ya mfunu na nima-midi ya Kitanu tavanda disolo ya ntu-dyambu “Kisalu na Beto Bonso Binati-nsangu ya Ngemba ya Nzambi.” Na nima kitini “Beto Sadisa Bankaka na Kulonguka Malombu ya Nzambi” tapesa bangindu na yina metala kulonga bantu yampa. Na nima na yau tavanda symposium ya ntangu ya mbote “Keba na Mitambu ya Kubumbana ya Luyangidilu.” Manaka ya Kitanu tasuka ti masolo “Telamina Dyabulu​—Kundima Kimbanda Ve Ata Fyoti” ye “Beto Ndima na Kwikama Yonso Busantu ya Ndinga ya Nzambi.”

Manaka ya Sabala na ntwala-midi tatubila mingi mfunu ya kisalu ya kukumisa bantu balongoki na symposium ya bitini tatu “Binati-nsangu Kenata Nsangu ya Mbote ya Ngemba.” Kitini yina tasuka ti masolo “Makabu ya Kyese na Kati ya Organizasio ya Yehowa” ye “Luzingu mpi Ngemba na Nzila ya Kudipesa mpi Mbotika,” ebuna na nima balongoki yampa tazwa dibaku ya kubotama.

Nsonga ya Sabala na nima-midi “Tadila Bangindu ya Yehowa na Mambu Yonso” tapesa bamvutu na bangyufula bonso ‘Keti bubu yai Bakristu kele na kuvukana na kisalu ya kukabula?’ ye ‘Inki kele ngindu ya Biblia na yina metala ndola ya lufwa?’ Nge tasepela mpi na symposium ya bitini zole “Nzambi ya Ngemba Kesungiminaka Nge” mpi mingimingi disolo ya nsuka “Beto Sosa Ngemba ya Nzambi na Kati ya Luzingu ya Dibuta.”

Manaka ya Lumingu na ntwala-midi tavanda ti symposium ya bitini tatu “Beto Sosa Kuzaba Banani Kele Binati-nsangu ya Kyeleka” ti disolo “Beto Widikila mpi Beto Lemfuka na Ndinga ya Nzambi.” Kitini ya ntwala-midi tasuka ti kifwanifwani yina tapesa bandongisila ya mekatuka na nkenda ya Biblia ya Zuzi Gedeoni.

Kitini ya nsuka ya lukutakanu na Lumingu na nima-midi tanika disolo ya bantu yonso ya kele na ntu-dyambu “Nsukansuka Ngemba ya Kyeleka Mekwisa​—Yau Mekatuka Wapi?” Na nsuka kibeni, disolo ya kyese “Beto Kwenda na Ntwala Bonso Binati-nsangu ya Ngemba ya Nzambi” tamanisa lukutakanu.

Kudibongisa ntangu yai sambu nge vanda pana. Sambu na kuzaba kisika ya kuluta mfinama ti bwala na nge, Yula na Nzo ya Kimfumu ya Bambangi ya Yehowa to sonikila bambasisi ya zulunalu yai. Lisiti ya ba adresi ya balukutakanu sambu na Burundi, Congo ti Zaïre kele na Nzozulu ya Nkengi ya Februari 1, 1996.