Bampangi ya Ntoto ya Mvimba Kesadisana — Watchtower MIKANDA YA KE NA INTERNET

Bampangi ya Ntoto ya Mvimba Kesadisana

NA BISIKA yonso, bantu kele. Mingi mekuma minunu, na kati na bo bankaka kekuka dyaka ve kutambula sambu na kimbefo. Beto kemona bankento ya kele na mavumu mpi bankwelani ya mpa mesimba bana na bo. Bantu yai yonso kele barefizie, babakala, bankento, mpi bana, ya metina babwala na bo sambu na bitumba, bampasi ya kebwaka na ntoto, to sambu na mambu yankaka. Bo mebika banzo na bo sambu na kukwenda kusosa kisika ya bo lenda zinga na ngemba na insi mosi ya nzenza ya kele penepene. Bamingi yo kekuminaka bo mbala mingi. Kana bo kemona nde bitumba kezola kuyantika to dyambu mosi ya mpasi kezola kubwa, bo kebakaka mwa bima na banzo na bo, bo kevukisaka bana na bo, ebuna bo keyantikaka kutambula sambu na kukwenda na kisika yina bo lenda zwa lutaninu. Na nima, kana mambu yonso mevutuka na ndonga, barefizie mingi kevutukaka sambu na kutunga dyaka banzo na bo mpi kuyantika dyaka luzingu.

Na bamvula yai, République centrafricaine keyambaka barefizie mingi ya kekatukaka na bansi mingi. Ntama mingi ve, bantu mingi, na kati na bo kuvandaka mpi ti Bambangi ya Yehowa, kutinaka bitumba yina kubwaka na République démocratique du Congo ya ke na kunyokwama na bitumba sambu na kukwenda kusosa kisika ya kele na mwa ngemba na République centrafricaine.

Bampangi Mepesa Lusadisu

Bambangi ya Yehowa ya République Centrafricaine kuvandaka na kyese mpi bo monaka yo bonso okazio mosi ya mbote ya kuyidika mutindu ya kusadisa bampangi. Bo yidikaka bisika ya kulala sambu na bampangi na beto Bakristu yina vandaka kukwisa. Na luyantiku, bo vandaka kuzwa bisika ya kulala na banzo ya bampangi, kansi sambu barefizie vandaka kukuma mingi, yo vandaka pwelele nde bo vandaka na mfunu ya bisika mingi yankaka. Yo yina, bo kumisaka banzo ya Kimfumu yankaka banzo ya kulala. Bambangi ya insi yina kudipesaka na kutula minda yankaka, batiyo ya masa, ti pavema sambu banzo yango kuvanda bisika ya mbote sambu na bantu yina bo tulaka na kuzinga muna. Barefizie vandaka kusala kumosi ti bampangi ya insi yai sambu na kuyidika bisika yai ya kulala. Bo salaka manaka mosi ya mbote ya balukutakanu ya Bukristu na Lingala sambu bampangi yina takwisa bo zwa madya ya kimpeve ya kepesaka kikesa na luzingu. Kuwakana ya ngolo yina vandaka na kati ya Bambangi ya insi yina ti banzenza na bo kumonisaka nde kimpangi ya ntoto ya mvimba kele kima ya kyeleka.

Mabuta ya barefizie vandaka kukuma ve bo yonso kumosi. Bantangu yankaka, bantu ya mabuta yina kupanzanaka, kuvukanaka dyaka ntangu bo vandaka kukuma na insi yina. Bo salaka lisiti ya bantu yina kukumaka mbote na Banzo ya Kimfumu. Bo yidikaka programe sambu na kusosa bisika bantu yina vandaka mekuma ntete ve kele. Biro ya filiale yina ketwadisaka kisalu ya Bambangi ya Yehowa na insi yai kutindaka bakaminio tatu sambu na kwenda kubaka Bambangi yina kuvandaka dyaka na nzila mpi kusosa konso Mbangi yina kuvilaka. Bantu vandaka kuzaba bakamio yai na kidimbu mosi ya nene yina vandaka ya kusonika nde: “WATCH TOWER—Bambangi ya Yehowa.”

Yindula kyese yina kimvuka mosi ya bana nsambwadi yina kuvandaka barefizie ya mekabwanaka ti bibuti na bo kuwaka ntangu bo monaka kaminio ya Bambangi ya Yehowa. Kukonda kusukinina, bo kwendaka ntinu kisika kaminio kuvandaka mpi bo tubaka nde bo kele Bambangi. Bampangi kukotisaka bo na kaminio mpi bo nataka bo na Nzo ya Kimfumu, kisika bo vukanaka dyaka ti mabuta na bo.

Inki kima kusadisaka Bakristu yai ya masonga na kuzinga ti bampasi ya mutindu yina, mbala mosi ve, kansi mbala mingi? Ntembe kele ve nde bo kendimaka mpenza nde beto kezinga na bilumbu ya nsuka mutindu Masonuku ya Santu kutubaka yo.—2 Timoteo 3:1-5; Kusonga 6:3-8.

Ata mpidina, bo mezaba nde ntama mingi ve Yehowa Nzambi tasukisa bitumba, kimbeni, nku, ti mavanga. Makambu ya kirefizie takuma kima ya ntama. Kansi na ntwala nde yo salama, sambu na kulungisa ndongisila ya ntumwa Polo yina kele na 1 Korinto 12:14-26, Bambangi ya Yehowa kesalaka ngolo na kusadisana. Ata bamasa ya nene, bandilu ya bansi, bandinga kekabulaka bo mpi ata bo kezingaka na bisika ya ntama, bo keyindulaka bampangi na bo, yo yina bo kesukininaka ve na kusadisa muntu yina kele na mfunu ya lusadisu.—Yakobo 1:22-27.

[Karte ya kele na lutiti 30]

(Sambu na kumona mambu yonso, tala mukanda)

AFRIKA

République Centra-fricaine

République démocratique du Congo

[Bangogo ya kemonisa kisina ya foto]

[Bifwanisu ya kele na lutiti 30]

Banzo ya Kimfumu tatu kukumaka bisika ya kuyambila bampangi

[Kifwanisu ya kele na lutiti 31]

Bo tulaka nswalu bima ya kusadila na kinkuku

[Kifwanisu ya kele na lutiti 31]

Barefizie mingi mpenza kukumaka

[Bifwanisu ya kele na lutiti 31]

Babébé yai mekatuka kubutuka kansi bo mekuma dezia barefizie