Baleke, Keti Beno Ke na Kuyela na Kimpeve?

NA NTANGU Hideo keyindulaka ntangu yandi vandaka na nzo-nkanda ya sekondere, yandi ketuba nde: “Ata mu vandaka kukwenda na balukutakanu ya Bukristu, mu vandaka ve ti mpusa ya ngolo ya kusadila Yehowa. Mu vandaka kuyindula mbala mingi mutindu mu tazabana mingi na bana ya nzo-nkanda na mono mpi mutindu mu tatambulaka na lulendo yonso ti makangu na mono na balabala bonso muntu ya lukumu. Mu vandaka mpenza ve ti balukanu ya mbote, mpi mu vandaka ve ata ti mpusa ya kuyela na kimpeve.” Bonso Hideo, baleke mingi kezingaka kaka mutindu yina kukonda ata lukanu mosi, bo kevandaka ve na mpusa ya kulungisa ata balukanu ya mfunu to kusosa kuyela.

Kana nge kele toko, mbala yankaka nge kesepelaka na ntangu nge kesala nsaka mosi buna to konso kima ya nge kezolaka kusala sambu na kulutisa ntangu. Kansi, kana yo mekuma ntangu ya kusala mambu ya kimpeve, nge kesepelaka ve. Keti nge lenda wa mpi kyese sambu na balukanu ya kimpeve? Tadila bangogo yai ya muyimbi-bankunga: “Bansiku ya Mfumu Nzambi bantu lenda tula yo ntima, yo ke pesaka mayele na bantu yina ke na mayele ve. Bansiku ya Mfumu Nzambi . . . ke na kifu ve, yo ke kangulaka meso ya bantu.” (Nkunga 19:8, 9) Ndinga ya Nzambi lenda tambusa “bantu yina ke na mayele ve” sambu bo sala mambu ti mayele na mpila nde yandi ‘kukangula bo meso.’ Ya kyeleka, nge lenda sepela na mambu ya kimpeve. Kansi nki kele mfunu sambu nge sala mutindu yina? Wapi nge fwete yantikila?

Vanda na Mpusa ya Kusadila Nzambi

Ya ntete, nge fwete vanda na mpusa. Baka mbandu ya Yoziasi, Ntotila ya Yuda ya leke. Ntangu bo sengumunaka mukanda ya Bansiku ya Yehowa na tempelo, Yoziasi kulombaka nde bo tangila yandi yo mpi mambu ya yandi waka kusimbaka mpenza ntima na yandi. Yo yina, “Yoziasi fwaka-fwaka biteki yonso ya nsoni yina vandaka na bantoto ya bantu ya Israele.” (2 Bansangu 34:14-21, 33) Lutangu ya Ndinga ya Nzambi kupusaka Yoziasi na kusala mambu mingi sambu lusambu ya kyeleka kukwenda na ntwala.

Nge mpi lenda kuna mpusa ya kusadila Yehowa kana nge ketanga Biblia mbala na mbala mpi nge keyindulula mambu yina ya nge ketanga. Yo yina kima kupesaka Hideo mpusa. Yandi yantikaka kuta kinduku ya ngolo ti mupasudi-nzila mosi ya mbuta, disongidila Mbangi ya Yehowa ya kesalaka kisalu ya ntangu yonso. Mupasudi-nzila yina vandaka longoki ya Biblia mosi ya kikesa mpi yandi vandaka kusala ngolo na kusadila malongi na yo na luzingu na yandi. Sambu yandi bakaka kikesa mingi na mbandu ya mupasudi-nzila yina, Hideo yantikaka kusala mutindu mosi mpi yandi kunaka mpusa ya ngolo ya kusadila Nzambi mpi bantu yankaka. Yandi yelaka na kimpeve na mpila nde luzingu na yandi kukumaka ti lukanu.

Kutanga Biblia konso kilumbu lenda pesa batoko mpusa. Takahiro ketendula nde: “Konso ntangu ya mu vandaka kwenda kulala kana mu meyibuka nde mu mesala ntete ve lutangu na mono ya Biblia ya kilumbu yina, mu vandaka kutelama mpi kusala yo. Yo yina, mu zwaka lutwadisu ya Yehowa. Lutangu ya Biblia konso kilumbu kusadisaka mono mingi na kuyela na kimpeve. Sambu mu bakaka lukanu ya kusala mingi na kisalu ya Yehowa, ntangu fyoti na nima ya kumanisa nzo-nkanda ya sekondere mu yantikaka kisalu ya mupasudi-nzila ya ntangu yonso. Mono kezolaka kisalu yango mingi.”

Katula lutangu ya Biblia, inki dyaka lenda sadisa nge na kukumisa mpusa na nge ya kukumisa Yehowa ngolo? Tomohiro kulongukaka kyeleka ya Biblia ti mama na yandi. Yandi ketuba nde: “Zola ya Yehowa ti ya kimenga ya nkudulu ya Yezu kusimbaka mpenza ntima na munu kaka na nima ya kulonguka mbotembote mukanda La vie a bien un but ntangu mu vandaka ti bamvula 19. Ntonda sambu na zola ya Nzambi kupusaka mono na kusala mingi na kisalu ya Yehowa.” (2 Korinto 5:14, 15) Bonso Tomohiro, baleke mingi mebakaka kikesa na kuyela na kimpeve na kulandaka kulonguka Biblia bo mosi na kikesa yonso.

Ata mpidina, inki beto lenda tuba kana nge kele kaka ve na mpusa ya masonga ya kusadila Yehowa? Keti kele ti muntu yina nge lenda kangudila ntima sambu na kubaka lusadisu? Ntumwa Polo kusonikaka nde: “Sambu konso ntangu Nzambi ke salaka na beno na mpila nde beno kuzola mambu yina ya yandi ke zolaka, mpi nde beno [kuvanda na luzolo, NW] ya kusala yo.” (Filipi 2:13) Kana nge samba Yehowa sambu na kulomba lusadisu, yandi tapesa nge mpeve santu na yandi, yina tapesa nge ngolo ya “kusala” kaka ve kansi mpi ya “kuvanda na luzolo.” Yo ketendula nde mpeve santu ya Nzambi takumisa mpusa na nge ya kusadila Yehowa na kiteso ya ngolo na nge kezodila mpi yo tasadisa nge na kuyela na kimpeve. Yo yina, tula ntima na ngolo ya Yehowa mpi kumisa ntima na nge ngolo!

Kuditudila Balukanu

Kana nge mebaka lukanu ya kusadila Yehowa mingi mpenza, nge fwete kuditudila balukanu sambu na kuyela na kimpeve. Mana, leke mosi ya nkento ya Mukristu, kutubaka nde: “Kuditudila balukanu kusadisaka mono mingi. Kansi na kisika ya kuvutuka na nima, mu vandaka kwenda na ntwala ti kikesa. Ti balukanu na mono na mabanza, mu sambaka Yehowa na kikesa yonso sambu yandi sadisa mono, mpi yo sadisaka mono na kuyela na Kimpeve kukonda kusakana.”

Balukanu na nge fwete vanda ya kyeleka mpi ya nge takuka na kulungisa. Kutanga mukapu mosi ya Biblia konso kilumbu lenda vanda lukanu mosi ya mefwana. Nge lenda kuditudila mpi lukanu ya kuyantika kusala bansosa. Beto pesa mbandu ti kima mosi ya kele na Kifalansa, nge lenda longuka bikalulu ya Yehowa yina kele ya kusonika na nsi ya ntu-dyambu “Qualités par leur nom” na nsi ya zina “Jéhovah” na Index des publications de la Société Watch Tower. Yo kele ti bazina kiteso ya 40 yina nge lenda tadila, mpi kukonda ntembe bansosa yina takumisa nge penepene na Yehowa mpi yo tapesa nge mpusa ya kusala mingi sambu na yandi. Balukanu yankaka ya muntu lenda lungisa kukonda mpasi lenda vanda kupesa mvutu ata mbala mosi mpamba na konso lukutakanu ya Bukristu yina kelombaka nde bawi kupesa bamvutu, kusala ngolo na kuzaba mbotembote muntu mosi ya dibundu na beno na konso lukutakanu, mpi kukonda kulutisa kilumbu ya mvimba kukonda kusamba Yehowa mpi kutuba mambu yina metala yandi na bantu yankaka.

Kana nge mesonikisaka ntete ve zina na Nzo-Nkanda ya Kisalu ya Teokrasi, yo lenda vanda lukanu ya mbote sambu na nge. Keti nge meyantikaka dezia kusala kisalu ya kulonga bantu? Kana ve, nge lenda sala ngolo sambu na kukuma nsamuni yina mebaka ntete ve mbotika. Kitambi ya melanda lenda vanda ya kutadila mbotembote bangwisana na nge ti Yehowa mpi kudipesa na nge mosi na yandi. Baleke mingi kesalaka ngolo sambu na kuzinga na kuwakana ti kudipesa na bo na kusalaka kisalu ya ntangu yonso.

Ata kuvanda ti balukanu na luzingu na nge kele mbote, kansi keba na kuyedisa mpeve ya kutesana ti bantu yankaka. Nge tavanda na kyese mingi na kisalu ya nge kesala kana nge kekudifwanisa ve ti bantu yankaka.​—Galatia 5:26; 6:4.

Mbala yankaka nge keyindula nde nge kele ve ti eksperiansi mpi nde yo kele mpasi na kutula balukanu ya nge takuka kulungisa. Kana mpidina, landa ndongisila yai ya Biblia: ‘Wa mambu ya bantu ya mayele tubaka.’ (Bingana 22:17) Sosa lusadisu na bibuti na nge to na Bakristu yankaka ya kuyela. Ya kyeleka, bibuti ti Bakristu yankaka fwete vanda na bukatikati mpi kupesa bana na bo kikesa na dyambu yai. Kana bo wa nde beno kepusa bo na kusala ngolo sambu na kulungisa lukanu yina bankaka kutudilaka bo lenda katula baleke kyese mpi nkutu yo lenda bebisa mfunu ya kuvanda ti balukanu. Dyambu yai kukuminaka mwana nkento mosi, yina kutubaka nde: “Bibuti na mono tudilaka mono balukanu mingi, mu mbandu kusonikisa zina na Nzo-Nkanda ya Kisalu ya Teokrasi, kubasika na kisalu ya kusamuna, kubaka mbotika, mpi kukuma mupasudi-nzila. Mu salaka ngolo sambu na kulungisa balukanu yina yonso. Kansi, ntangu mu vandaka kulungisa lukanu mosi, na kisika ya kusikisa mono, bibuti na mono vandaka kupesa mu lukanu yankaka sambu na kulungisa. Yo yina, mu vandaka kuwa ntangu yonso bonso nde bo kepusa mu na kulungisa balukanu yango. Mu lembaka kibeni mpi mu kumaka kumona dyaka ve ata mfunu ya kulungisa yo.” Inki kima kuvandaka mbi na mambu ya bo salaka? Balukanu yonso kuvandaka ya mbote, kansi yo katukaka ve na ntima na yandi mosi. Sambu na kununga, nge fwete baka desizio ya kuditudila lukanu nge mosi!

Yindula Yezu Kristu. Ntangu yandi kwisaka na ntoto, yandi zabaka nki Tata na yandi, Yehowa, vandaka kuzola nde yandi sala. Kusala luzolo ya Yehowa kuvandaka ve kaka lukanu sambu na Yezu, kansi kisalu ya yandi fwete lungisa. Inki mutindu Yezu vandaka kutadila mukumba na yandi? Yandi tubaka nde: “Madia na mono kele yo yai: na kulanda luzolo ya muntu yina tindaka mono ti na kumanisa kisalu yina ya yandi me pesaka mono na kusala.” (Yoane 4:34) Yezu kuvandaka na kyese na kusala luzolo ya Yehowa mpi kulungisa mambu yina Tata na yandi vandaka kukinga na kumona. Yo vandaka bonso madya sambu na Yezu, yandi vandaka kusepela mpi kumona kyese na kumanisa kisalu yina bo vandaka kukinga nde yandi sala. (Baebreo 10:5-10) Nge mpi lenda vanda na kyese kana nge baka lukanu ya kulungisa mambu yina bibuti na nge kesyamisa nge na kusala.

Kulemba Ve na Kusala Mambu ya Mbote

Kana nge mebaka lukanu mosi, sala ngolo na kulungisa yo. Galatia 6:9 ketuba nde: “Beto lemba ve na kusala mambu ya mbote. Sambu, kana beto ke sala kaka, beto ta katula bambuma na ntangu ya mbote.” Kutula ve ntima na ngolo to kaka na mayele na nge mosi. Zaba nde nge takutana ti mambu ya mpasi mpi bantangu yankaka nge lenda mona bonso nde nge kenunga ve. Kansi Biblia kendimisa beto nde: “Yindula Mfumu Nzambi na mambu yonso ya nge ke salaka, yandi ta songa nge nzila ya mbote.” (Bingana 3:6) Yehowa tapesa nge ngolo kana nge kesala kikesa sambu na kulungisa balukanu na nge ya kimpeve.

Ee, kana nge kuna mpusa ya kusadila Yehowa mpi ya kulungisa balukanu ya kimpeve, nge takuka na kusala na mpila nde ‘bantu yonso kumona [kuyela, NW] na nge.’ (1 Timoteo 4:15) Kana nge sala mutindu yina, nge tavanda ti luzingu mosi ya kele na lukanu na kisalu ya Nzambi.

[Kifwanisu ya kele na lutiti 31]

Kutanga Biblia mpi kuyindulula mambu yina nge metanga tapusa nge na kusadila Yehowa

[Kifwanisu ya kele na lutiti 32]

Yezu kulungisaka mambu yina Tata na yandi zolaka nde yandi sala