Bantu Kesosa Bamvutu ya Mbote

Inki mutindu mu lenda tanina mavimpi na munu?

Inki mu lenda sala sambu luzingu ya dibuta na munu kuvanda ya kyese?

Inki mu lenda sala sambu bo katula munu ve na kisalu?

KETI nge mekudiyulaka dezia ngyufula mosi na kati ya bangyufula yai? Keti nge zwaka bamvutu ya mbote yina kusadisaka nge mpenza? Konso mvula, bo kebasisaka kiteso ya mikanda 2 000 ya kuswaswana yina kepesaka bandongisila na mambu yai mpi na mambu yankaka ya mfunu. Na Grande-Bretagne, batangi kebasisaka mbongo kiteso ya badolare 150 milio konso mvula sambu na kusumba mikanda ya kepesaka bandongisila na yina metala mutindu ya kunwana ti bampasi ya luzingu. Na États-Unis, kuteka mikanda ya kemonisaka mutindu ya kunwana ti bampasi kukonda lusadisu ya bantu yankaka kekotisaka mbongo kiteso ya badolare 600 milio konso mvula. Nge mosi mpamba ve muntu ke na kusosa bandongisila ya mbote ya kemonisa mutindu ya kunwana ti mambu ya luzingu ya konso kilumbu.

Sambu na yina metala bandongisila ya beto kekuta na mikanda mingi-mingi yai, nsoniki mosi kutubaka nde: “Mikanda mingi ya mpa kevutukilaka kaka mambu yina bo mesonikaka dezia.” Ya kyeleka, bandongisila mingi ya beto kekuta na mikanda yina, kevutukilaka kaka mayele ya bo mesonikaka na mukanda mosi ya ntama kibeni kuluta mikanda yonso ya nsi-ntoto. Bo mekabulaka mukanda yango mingi kibeni kuluta mikanda yonso. Bo mebalulaka yo na mvimba to na ndambu na bandinga kiteso ya 2 400. Na kimvuka, bo menyemaka yo na bakopi kuluta bamiliare 4,6. Mukanda yango kele Biblia.

Biblia ketuba pwelele nde: “Bo sonikaka Mukanda ya Nzambi yonso na ngolo na yandi; mambu yonso kele na kati yo kele mfunu sambu na kulonga bantu mambu ya kieleka, sambu na kusungika bifu yina kele na mambu ya bantu ke longuka, sambu na kubongisa bantu, ti sambu na kulonga bantu na kuzinga luzingu mosi ya kinzambi.” (2 Timoteo 3:16) Ya kyeleka, bo sonikaka ve Biblia sambu yo vanda mukanda yina kesadisa bantu na kunwana ti bampasi na bo bo mosi. Lukanu na yo ya ntetentete kele ya kumonisa luzolo ya Nzambi sambu na bantu. Ata mpidina, Biblia kele ti bansangu mingi ya kemonisa mutindu ya kunwana ti bampasi yina bantu yonso kekutanaka ti yo, mpi yo kesila nde bantu yina kelandaka lutwadisu na yo talonguka mambu yina tanatila bo mosi mambote. (Yezaya 48:17, 18) Kana beto sadila bandongisila na yo ya mbote, yo kenungaka konso ntangu mpi na konso muntu, yo vanda yandi kele na nki dikanda, na nki ndinga, to yandi melongukaka mingi to ve.