DILONGI 01
Mutindu Biblia Lenda Sadisa Nge
Beto yonso ke kudiyulaka sambu na nki beto ke zingaka, ke monaka mpasi, ke fwaka mpi mutindu luzingu ta vanda na bilumbu ke kwisa. Beto ke kudiyangisaka mpi sambu na mambu ya konso kilumbu. Mu mbandu, kuzwa mbongo ya me fwana sambu na kulungisa bampusa na beto mpi mutindu ya kuzinga na kiese na dibuta. Bantu mingi me bakisaka nde Biblia ke sadisaka bo na kubaka bamvutu na bangiufula ya kuluta mfunu ya luzingu mpi yo ke pesaka bo bandongisila ya mfunu na luzingu na bo ya konso kilumbu. Keti nge ke ndimaka nde Biblia lenda sadisa bantu yonso?
1. Inki kele mwa bangiufula yina Biblia ke pesaka bamvutu?
Biblia ke pesaka bamvutu na bangiufula yai ya mfunu: Beto me katukaka na wapi? Sambu na nki beto ke zingaka? Sambu na nki bantu ke monaka mpasi? Inki ke kuminaka muntu kana yandi me fwa? Kana bantu yonso ke zolaka kuzinga na ngemba, ebuna sambu na nki bitumba kele mingi? Inki ta kumina ntoto na bilumbu ke kwisa? Biblia ke lombaka beto na kusosa bamvutu na bangiufula yai mpi bantu mingi ke ndimaka nde bamvutu na yo kele ya kieleka.
2. Inki mutindu Biblia lenda sadisa beto na kuzinga konso kilumbu na kiese?
Biblia ke pesaka beto bandongisila ya mbote. Mu mbandu yo ke longaka mabuta mutindu ya kuzinga mpenza na kiese. Yo ke songaka beto mambu ya beto lenda sala kana beto kele ti basusi mpi mutindu ya kusepela ti kisalu. Nge ta zaba nki Biblia ke tubaka sambu na mambu yai mpi mambu mingi ya nkaka ntangu beto ta longukaka mukanda yai. Yo ta sadisa nge na kundima nde “Masonuku yonso [mambu yonso yina kele na Biblia] kele . . . mfunu.”—2 Timoteo 3:16.
Mukanda yai ke baka ve kisika ya Biblia. Kansi yo ta sadisa nge na kutadila nge mosi mambu yina Biblia ke tubaka. Yo yina, beto ke lomba nge na kutanga baverse ya kele na konso dilongi mpi na kutala kana yo ke wakana ti mambu ya nge ke longuka.
LONGUKA MAMBU MINGI
Beto tala mutindu Biblia ke sadisaka bantu mingi, mutindu nge lenda kuma kutanga yo ti kiese mpi sambu na nki yo kele mbote na kusosa lusadisu sambu nge bakisa yo.
3. Biblia lenda twadisa beto
Biblia kele bonso mwinda mosi ya ke pela ngolo. Biblia lenda sadisa beto na kubaka balukanu ya mbote mpi na kuzaba mambu yina ta salama na bilumbu ke kwisa.
Beno tanga Nkunga 119:105 mpi na nima beno pesa mvutu na bangiufula yai:
Inki mutindu muntu yina sonikaka nkunga yai vandaka kutadila Biblia?
Inki mutindu nge ke tadilaka Biblia?
4. Biblia lenda pesa bamvutu na bangiufula na beto
Biblia pesaka bamvutu na bangiufula yina nkento mosi vandaka kudiyula banda bamvula mingi. Beno tala VIDEO, mpi na nima beno pesa mvutu na bangiufula yai:
Inki bangiufula nkento yina beto me tala na video vandaka kudiyula?
Inki mutindu kulonguka Biblia sadisaka yandi?
Biblia ke songaka beto na kuyula bangiufula. Beno tanga Matayo 7:7 mpi na nima beno pesa mvutu na ngiufula yai ya ke landa:
Inki bangiufula nge ke kudiyulaka yina nge ta zola kubaka bamvutu na Biblia?
5. Nge lenda kuma kutanga Biblia ti kiese
Bantu mingi ke tangaka Biblia ti kiese mpi bo ke bakilaka yo mambote. Beno tala VIDEO mpi na nima beno pesa mvutu na bangiufula ya ke landa:
Inki mutindu baleke yai ya beto me tala na video ke tadilaka kutanga mikanda?
Ata bo ke sepelaka ve kutanga mikanda, kansi sambu na nki bo me kumaka kusepela kutanga Biblia bubu yai?
Biblia ke longaka mambu yina lenda lembika beto mpi kupesa beto kivuvu. Beno tanga Baroma 15:4 mpi na nima beno pesa mvutu na ngiufula yai:
Keti nge me sepela mutindu nge me zaba mambu mingi ya verse yai ke tubila?
6. Bantu ya nkaka lenda sadisa beto na kubakisa Biblia
Bantu mingi me bakisaka nde katula kutanga Biblia bo mosi, yo kele mfunu mingi kulonguka yo ti bantu ya nkaka. Beno tanga Bisalu 8:26-31 mpi na nima beno pesa mvutu na ngiufula yai:
Inki mutindu beto lenda bakisa Biblia?—Tala verse 30 mpi 31.
Muntu ya Etiopia vandaka na mfunu ya lusadisu sambu na kubakisa mambu yina yandi vandaka kutanga. Bubu yai, bantu mingi me bakisaka nde yo kele mfunu mingi na kulonguka Biblia ti bantu ya nkaka
BANTU YA NKAKA KE TUBAKA NDE: “Kulonguka Biblia kele kulutisa ntangu.”
Inki nge ta tuba? Sambu na nki?
NA BUNKUFI
Biblia ke pesaka bandongisila sambu na luzingu ya konso kilumbu. Yo ke pesaka bamvutu na bangiufula ya mfunu, yo ke lembikaka bantu mpi ke pesaka bo kivuvu.
Inki Nge Me Simba?
Inki bandongisila beto lenda zwa na Biblia?
Inki kele mwa bangiufula yina Biblia ke pesaka bamvutu?
Inki mambu nge ta sepela kulonguka na Biblia?
TALA MPI
Tala mutindu bandongisila ya Biblia kele mfunu bubu yai.
“Malongi ya Biblia Kele Mayele Yina Ke Vandaka Mfunu Ntangu Yonso” (Nzozulu ya Nkengi No. 1 2018)
Tala mutindu Biblia sadisaka muntu mosi ya vandaka kuniokwama na mabanza banda kileki.
Tala bandongisila ya mfunu yina Biblia ke pesaka sambu na mabuta.
“Mambu 12 Yina Ke Salaka nde Mabuta Kuvanda na Kiese” (Telama! No. 2 2018)
Longuka mambu yina Biblia ke tubaka sambu na bangindu ya mbi yina bantu ke vandaka ti yo sambu na mfumu ya nsi-ntoto.
Sambu na Nki Beto Fwete Longuka Biblia?—Video ya Nda (3:14)