Longuka na Ndinga ya Nzambi

Sambu na Nki Kulonguka na Nzambi?

Disolo yai kebasisa bangyufula yina ziku nge mekudiyulaka mpi yo kemonisa kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

 1. Sambu na nki kulonguka na Nzambi?

Nzambi kele ti nsangu ya mbote ya kima mosi ya kuluta mbote sambu na bantu. Yandi kesonga beto yo na Biblia. Biblia kele bonso mukanda mosi ya mekatuka na tata na beto ya zola yina kele na zulu.​—Tanga Yeremia 29:11.

 2. Inki kele nsangu ya mbote?

Bantu kele na mfunu ya luyalu ya mbote. Ata mfumu mosi ve memanisaka mubulu, kukonda lunungu, maladi, to lufwa. Kansi kele ti nsangu ya mbote. Nzambi tapesa bantu luyalu mosi ya mbote yina tapesa bantu kimpwanza na mambu yonso ya kepesaka bo mpasi.​—Tanga Daniele 2:44.

 3. Sambu na nki yo kele mfunu na kulonguka na Nzambi?

Kubika fyoti, Nzambi takatula na ntoto bantu ya mbi yina kevandaka na kisina ya bampasi. Na ntwala nde yandi sala yo, yandi kelonga bamilio ya bantu ya kudikulumusa sambu na kuvanda na luzingu ya mbote, ya mesimbama na zola. Na nsadisa ya Ndinga ya Nzambi, bantu kelonguka mutindu ya kununga bampasi ya luzingu, mutindu ya kuzwa kyese ya kyeleka, mpi mutindu ya kusepedisa Nzambi.​—Tanga Sofonia 2:3.

 4. Nani kele Munkwa ya Biblia?

Biblia mesalamaka na mikanda ya fyoti 66. Bantu kiteso ya 40 kusonikaka yo. Moize muntu kusonikaka mikanda tanu ya ntete yo meluta bamvula kiteso ya 3 500. Ntumwa Yoane muntu kusonikaka mukanda ya nsuka yo meluta bamvula kiteso ya 1 900. Kansi, bansoniki ya Biblia kusonikaka mabanza ya Nzambi kansi ya bo mosi ve. Yo yina, Nzambi muntu kele Munkwa ya Biblia.​—Tanga 2 Timoteo 3:16; 2 Piere 1:21.

Beto mezaba nde Biblia mekatukaka na Nzambi sambu yo ketubilaka na sikisiki mambu yina tasalama na makwisa. Ata muntu mosi ve lenda sala mutindu yina. (Yezaya 46:9, 10) Dyaka, Biblia kemonisaka bikalulu ya Nzambi. Yo kele ti kiyeka ya kusoba luzingu ya bantu sambu yo kuma mbote. Mambu yai kendimisa bamilio ya bantu nde Biblia kele Ndinga ya Nzambi.​—Tanga Yozue 23:14; 1 Tesalonika 2:13.

 5. Inki mutindu nge lenda bakisa Biblia?

Yezu kukumaka longi ya nene ya Ndinga ya Nzambi. Ata bantu mingi yina yandi solulaka ti bo kuzabaka Biblia, bo vandaka mpi na mfunu ya lusadisu sambu na kubakisa yo. Sambu na kusadisa bo, Yezu kutubilaka mikapu mingi ya Biblia mpi kupesaka tendula ya “mambu yina kele na mukanda ya Nzambi.” Disolo yai “Longuka na Ndinga ya Nzambi” tasadila metode ya mutindu mosi sambu na kusadisa nge.​—Tanga Luka 24:27, 45.

Kele ve ata ti kima mosi ya kepesaka kyese mingi kuluta kulonguka na Nzambi mambu ya metala lukanu ya luzingu. Kansi bantu yankaka tasepela ve kumona nge ketanga Biblia. Kulemba nitu ve. Kivuvu na nge ya kuvanda na luzingu ya mvula na mvula na bilumbu kekwisa ketadila bikesa na nge sambu na kubaka nzayilu ya Nzambi.​—Tanga Matayo 5:10-12; Yoane 17:3.

Sambu na kuzaba mambu mingi, tala kapu ya 2 ya mukanda yai, Inki biblia Kelongaka Mpenza? yina Bambangi ya Yehowa mebasisaka.