KETI NGE ZABAKA YO?

MASONUKU ke tubila masolo ya bantu mingi yina pasulaka bilele na bo. Diambu yina lenda yitukisa batangi mingi ya Biblia ya bubu yai, kansi sambu na Bayuda yo vandaka kumonisa nde muntu kele na mpasi ya ngolo na ntima, mawa, nsoni, to makasi.

Mu mbandu, Rubeni ‘pasulaka bilele na yandi’ ntangu yandi monaka nde lukanu na yandi ya kugulusa mpangi na yandi Yozefi nungaka ve sambu bo tekaka yandi na kimpika. Yakobi, tata na bo ‘pasulaka bilele na yandi’ ntangu yandi yindulaka nde mbisi mosi ya makasi fwaka Yozefi. (Kuy. 37:18-35) Yobi ‘pasulaka bilele na yandi’ ntangu bo zabisaka yandi nde bana na yandi yonso me fwa. (Yobi 1:18-20) Kinati-nsangu mosi yina vandaka ti “bilele ya kupasuka-pasuka” telamaka na ntwala ya Eli, nganga-nzambi ya nene sambu na kuzabisa yandi nde bantu ya Izraele me bela na bitumba, bana na yandi zole ya babakala me fwa, mpi bo me botula sanduku ya kuwakana. (1 Sam. 4:12-17) Ntangu ntotila Yoziasi waka bangogo ya Nsiku yina bo tangilaka yandi mpi monaka bifu yina bantu na yandi salaka, yandi “pasulaka bilele na yandi.”—2 Bant. 22:8-13.

Ntangu bo vandaka kusambisa Yezu, nganga-nzambi ya nene Kaifa “pasulaka bilele na yandi ya zulu” ntangu yandi waka bangogo yina yandi monaka nde yo vandaka mafingu. (Mat. 26:59-66) Masolo ya ntama ya Barabi ke tubaka nde, konso muntu yina me wa bantu ke finga zina ya Nzambi yandi fwete pasula bilele na yandi. Kansi mikanda ya nkaka ya Barabi yina basikaka na nima ya kubeba ya tempelo ya Yeruzalemi tubaka nde: “Konso muntu yina me wa bantu ke finga zina ya Nzambi na bilumbu na beto, yandi fwete pasula ve bilele na yandi, sambu kana yandi sala mpidina, bilele na yandi ta kuma bitenda.”

Ya kieleka, kupasula bilele vandaka na mfunu na meso ya Nzambi kaka kana muntu yina me sala mpidina me monisa mawa ya kieleka. Yo yina, Yehowa zabisaka bantu na yandi na ‘kupasula ve bilele na bo, kansi na kupasula bantima na bo mpi kuvutukila yandi.’—Yoe. 2:13.