Keti Nge Ke Tudilaka Diaka Ve Nzambi Ntima?

“SAMBU NA NKI kaka mono? Sambu na nki Nzambi pesaka nzila nde mambu yai kukumina mono?” Bangiufula yai yangisaka Sidnei, toko mosi ya bamvula 24 na Brésil. Na nima ya kusala kisumbula na pisine, yandi kumaka kutambula na velo ya bikata.

Bantu lenda tudila diaka ve Nzambi ntima kana bo ke kutana ti bampasi, mu mbandu kisumbula, maladi, lufwa ya muntu mosi ya bo vandaka kuzola, kisumbula ya lugangu mpi bitumba. Bampasi ya mutindu yai kele ve diambu ya mpa. Yobi kutanaka ti bampasi mingi. Yandi yindulaka nde Nzambi muntu vandaka na kisina ya bampasi na yandi. Yandi tubaka nde: “Nzambi, mono ke binga nge kansi nge ke ndima ve; ntangu mono ke samba, nge ke wa ve. Nge me kuma muntu ya nku, nge ke monisa mono mpasi na ngolo na nge yonso.”​—Yobi 30:20, 21.

Yobi zabaka ve kisika yina bampasi na yandi vandaka kukatuka, kikuma yina bampasi kwisilaka yandi mpi muntu yina pesaka yo nzila. Biblia ke monisa beto kikuma yina bampasi ke kuminaka beto mpi mutindu beto fwete tadila yo.

Biblia ke tuba sambu na Nzambi nde: “Yandi ke salaka kaka mbote, yandi ke zengaka makambu na nzila ya mbote. Yandi ke salaka mambu yonso ya yandi ke tubaka, yandi ke taka luvunu ve, yandi kele muntu ya kieleka mpenza.” (Kulonga 32:4) Kana Nzambi ‘ke zengaka makambu na nzila ya mbote mpi ke salaka kaka mbote,’ keti yandi lenda zola nde bantu kumona mpasi? Keti yandi lenda sadila bisumbula sambu na kuniokula bantu to sambu na kusungika bifu na bo?

Nkutu, Biblia ke zabisa beto nde: “Ntangu muntu ke kutana ti mumekamu, bika yandi tuba ve nde: ‘Nzambi ke meka mono.’ Sambu Nzambi lenda mekama ve na mambu ya mbi mpi yandi mosi ke mekaka ve ata muntu mosi.” (Yakobo 1:13) Ya kieleka, Biblia ke zabisa beto nde na luyantiku Nzambi gangaka bantu ya kukuka. Yandi tulaka Adami ti Eva na kisika mosi ya mbote, pesaka bo kisalu mosi ya mbote mpi bima yonso ya bo vandaka na yo mfunu sambu na kuzinga. Nzambi songaka bo nde: “Beno buta bana mingi, mpidina bana na beno ta zingaka na bisika yonso na nsi-ntoto ti kuyala yo.” Yo kele pwelele nde Adami ti Eva vandaka ve ata ti kikuma mosi ya kubuya kutudila Nzambi ntima.​—Kuyantika 1:28.

Kansi, bubu yai luzingu na beto kele ve ya kukuka. Banda bamvula mingi, bantu ke kutanaka ti bampasi ya ngolo. Mambu yai ya Biblia ke tuba kele ya kieleka: “Tii ntangu yai lugangu yonso ke landa na kudila kumosi mpi na kumona mpasi kumosi.” (Baroma 8:22) Inki mambu salamaka?

Sambu na kubakisa kikuma yina bantu ke monaka mpasi, beto fwete tadila diaka mutindu bampasi yantikaka. Nzambi buyisaka Adami ti Eva na kudia ‘mbuma ya nti ya ke pesaka mayele sambu na kuzaba mambu ya mbote ti mambu ya mbi.’ Kansi, Satana Diabulu, wanzio yina kolamaka kusaka bo. Ntangu Adami ti Eva diaka mbuma yango, bo kolamaka na minsiku ya Nzambi ya kuzaba mambu ya mbote ti ya mbi. Diabulu zabisaka Eva nde bo ta fwa ve kana bo me kolama na Nzambi; mpidina yandi monisaka nde Nzambi kele muntu ya luvunu. Diaka, Satana monisaka nde Nzambi me yiminaka bigangwa na yandi nswa ya kuzaba mambu ya mbote ti ya mbi. (Kuyantika 2:17; 3:1-6) Satana monisaka diaka nde bantu ta zinga mbote kana Nzambi ke yala bo ve. Mambu yai yonso basisaka ngiufula mosi ya mfunu: Keti Nzambi me fwana na kuyala bantu?

Diabulu basisaka diaka ntembe ya nkaka. Yandi fundaka bantu nde bo ke sadilaka Nzambi sambu na bikuma ya bwimi. Sambu na Yobi muntu ya kwikama, Diabulu zabisaka Nzambi nde: “Si nge ke kebaka yandi ti fami na yandi ti bima yonso ya yandi ke na yo . . . Kansi ntangu yai, meka fioti na kubotula bima yonso ya yandi ke na yo, nge ta mona nde yandi ta finga nge na meso ya bantu yonso!” (Yobi 1:10, 11) Ata Satana tubaka mambu yai sambu na Yobi, yandi monisaka nde bantu yonso ke sadilaka Nzambi sambu na bikuma ya bwimi.

Inki mutindu Nzambi zolaka kumanisa bantembe yina mbala mosi mpi kimakulu? Nzambi ya kuluta mayele zengaka mambu na mutindu ya mbote sambu nde beto lemba ve nitu. (Baroma 11:33) Yandi bakaka lukanu nde bantu kuditwadisa bo mosi. Mpidina, mambu yina ta salama ta monisa yo mosi luyalu ya me fwana na kuyala bantu.

Mambu ya mpasi ya ke salama bubu yai na ntoto ke monisa pwelele nde bantu me fwana ve na kuditwadisa. Baluyalu ya bantu ke kuka ve na kutula ngemba, na kutanina bantu mpi na kupesa bo kiese. Nkutu, baluyalu yango ke bebisa ntoto. Mambu yai ke monisa nde Biblia ke tubaka mambu ya kieleka. Yo ke tubaka nde: “Ke na muntu ve lenda songa nzila na makulu na yandi ntangu yandi ke tambula.” (Yeremia 10:23) Luyalu ya Nzambi mpamba ta natila bantu ngemba, kiese mpi mambote ya kimakulu. Yai kele mambu yina Nzambi ke kana na kusala.​—Yezaya 45:18.

Inki mutindu Nzambi ta lungisa lukanu na yandi sambu na bantu? Yezu longaka balongoki na yandi na kusamba nde: “Bika nde Kimfumu na nge kukwisa. Bika nde luzolo na nge kusalama na ntoto, bonso na zulu.” (Matayo 6:10) Ya kieleka, Nzambi ta katula bampasi yonso na nzila ya Kimfumu na yandi na ntangu ya me fwana. (Daniele 2:44) Kinsukami, maladi mpi lufwa ta vanda diaka ve. Biblia ke tuba sambu na bansukami nde Nzambi ‘ta sadisa bantu ya mawa yina ke didila yandi.’ (Nkunga 72:12-14) Sambu na maladi, Biblia ke tuba nde: “Ata muntu mosi ve ta tuba diaka nde: ‘Mono ke bela.’” (Yezaya 33:24) Sambu na bantu ya me fwaka ya kele na mabanza ya Nzambi, Yezu tubaka nde: “Ngunga ke kwisa ntangu bantu yonso ya kele na maziamu ya mbambukilu ta wa ndinga na yandi mpi ta basika.” (Yoane 5:28, 29) Balusilu yai kele ya kitoko mpenza!

Bamvula kiteso ya 17 na nima ya kisumbula na yandi, Sidnei, ya beto me tubila na luyantiku ya disolo yai, tubaka nde: “Ntangu mono salaka kisumbula, mono vandaka kutudila diaka ve Nzambi ntima. Kansi bubu yai, mono ke tubaka diaka ve nde Yehowa muntu vandaka na kisina ya kisumbula na mono. Bilumbu ya nkaka, mono ke vandaka mawa-mawa mpi ke dilaka kana mono me tala kifu ya mono me kumaka ti yo na nitu. Kansi, Biblia me sadisaka mono na kubakisa nde aksida yina vandaka ve ndola ya Nzambi. Yo ke tubaka nde ntangu mpi mambu ya kukonda kukana ke kuminaka bantu yonso. Kusamba Yehowa mpi kutanga baverse yina ke tubilaka kimbefo me sadisaka mono na kuvanda ngolo na kimpeve mpi na kuvanda ti mabanza ya mbote.”​—Longi 9:11; Nkunga 145:18; 2 Bakorinto 4:8, 9, 16.

Kuzaba bikuma yina Nzambi me pesaka nzila na bampasi mpi mutindu yo ta mana ntama mingi ve ta sadisa beto na kutudila Nzambi ntima. Beto ke ndima nde Nzambi kele “muntu yina ke pesaka matabisi na bantu yina ke sosaka yandi na masonga yonso.” Ata muntu mosi ve ya ke tulaka lukwikilu na Nzambi mpi na Mwana na yandi ta lemba nitu.​—Baebreo 11:6; Baroma 10:11.