Kieleka Ke Nataka “Ngemba Ve, Kansi Mbele ya Bitumba”

1, 2. (a) Inki ngemba beto lenda vanda ti yo bubu yai? (b) Sambu na nki ngemba ya kieleka kele ve na ntoto? (Tala kifwanisu ya luyantiku ya disolo.)

BETO yonso ke zolaka kuzinga na ngemba, kukonda basusi. Yo yina beto ke tondaka Yehowa sambu yandi ke pesaka beto “ngemba ya Nzambi,” yina ke lembikaka beto kana beto kele na makasi to na mpasi. (Bafilipi 4:6, 7) Sambu beto me kudipesaka na Yehowa, beto ke vandaka mpi na “ngemba ti yandi.” Yo ke tendula nde beto ke salaka kinduku ya mbote ti yandi.—Baroma 5:1.

² Kilumbu yina Nzambi ta tula ngemba na ntoto ya mvimba me lunga ntete ve. Beto ke zinga na bilumbu ya nsuka, yo yina mpasi mpi basusi kele mingi. Beto ke zinga ti bantu ya nku. (2 Timoteo 3:1-4) Diaka, beto fwete nwana ti Satana mpi kutelemina malongi na yandi ya luvunu. (2 Bakorinto 10:4, 5) Kansi kima ya kuluta mpasi kele ntangu bantu ya dibuta ke buyisa beto na kusambila Yehowa. Bankaka lenda kuma kuvweza balukwikilu na beto mpi kutuba nde beto ke kabula dibuta. Bo lenda tuba nkutu nde nge kele diaka ve muntu ya dibuta na beto kana nge ke landa kusadila Yehowa. Inki beto ta sala kana bantu ya dibuta ke telemina balukwikilu na beto? Inki mutindu beto lenda tanina ngemba kana beto ke kutana ti mambu ya mutindu yai?

3, 4. (a) Inki ke kuminaka bantu yina ke ndimaka malongi ya Yezu? (b) Inki ntangu yo ke vandaka mpasi kibeni na kulanda Yezu?

³ Yezu zabaka nde bantu yonso ve ta ndima malongi na yandi. Yandi zabaka mpi nde balongoki fwete vanda kikesa sambu bankaka ta telemina bo. Mbangika yai lenda sala nde ngemba kuvanda diaka ve na dibuta. Yezu tubaka nde: “Beno yindula ve nde mono kwisaka sambu na kutula ngemba na ntoto; mono kwisaka sambu na kutula ngemba ve, kansi mbele ya bitumba. Mono kwisaka kutula kukabwana, na kati ya mwana-bakala ti tata na yandi mpi mwana-nkento ti mama na yandi mpi nkento ya makwela ti bokilo na yandi ya nkento. Ya kieleka, bambeni ya muntu ta vanda bantu ya nzo na yandi mosi.”—Matayo 10:34-36.

⁴ Inki Yezu zolaka kutuba ntangu yandi tubaka nde “Beno yindula ve nde . . . mono kwisaka sambu na kutula ngemba”? Yandi zolaka kuzabisa bantu nde bayina ta landa yandi ta kutana ti bampasi. Ya masonga, Yezu kwisaka na ntoto sambu na kulonga bantu kieleka ya Nzambi kansi ve kukabula mabuta. (Yoane 18:37) Kansi yo vandaka mfunu nde balongoki kuzaba nde kulanda Yezu ta vanda ve ntangu yonso pete, mingi-mingi kana banduku to bantu ya mabuta na bo ke ndima ve kieleka.

 5. Inki mambu balongoki ya Yezu ke kutanaka ti yo?

⁵ Yezu tubaka nde balongoki na yandi ta kutana ti mbangika na mabuta na bo, yo yina bo fwete landa kukanga ntima. (Matayo 10:38) Balongoki ke sepedisaka Yezu ntangu bo ke landaka kukanga ntima ata mabuta na bo ke seka bo to me yambula bo. Ata bo ke kutana ti bampasi, bo ke bakaka mambote mingi kuluta.—Tanga Marko 10:29, 30.

 6. Inki beto fwete vila ve ntangu bantu ya dibuta ke telemina beto?

⁶ Ata bantu ya dibuta ke telemina beto sambu beto ke sambila Yehowa, beto fwete landa kuzola bo. Kansi beto fwete vila ve nde zola na beto sambu na Nzambi mpi sambu na Kristu fwete luta zola yina beto kele na yo sambu na bantu ya dibuta na beto. (Matayo 10:37) Beto fwete zaba nde Satana lenda sadila zola yina beto ke monisila bantu ya dibuta sambu na kubebisa kinduku na beto ti Yehowa. Beto tadila mambu ya nkaka ya mpasi mpi mutindu beto lenda nunga yo.

 7. Inki nge fwete sala kana nkwelani na nge kele ve Mbangi ya Yehowa?

⁷ Biblia ke tuba nde bantu yina ke kwela ta “kutana ti bampasi.” (1 Bakorinto 7:28) Kana nkwelani na nge kele ve Mbangi ya Yehowa, yo lenda yika diaka bampasi mpi basusi na makwela. Kansi yo kele mfunu na kuzaba nde Yehowa ke zolaka ve nde bankwelani kukabwana to kufwa makwela kaka sambu nkwelani ya nkaka kele ve Mbangi ya Yehowa. (1 Bakorinto 7:12-16) Kana balaka na nge ke sadilaka ve Yehowa to ke disaka ve dibuta na kimpeve, nge fwete zitisa yandi sambu yandi kele mfumu ya dibuta. Kana nkento na nge ke sadilaka ve Yehowa, nge fwete landa kuzola yandi mpi kulungisa bampusa na yandi.—Baefezo 5:22, 23, 28, 29.

 8. Inki bangiufula nge lenda kudiyula kana nkwelani na nge ke bikila nge ntangu fioti sambu na mambu ya kimpeve?

⁸ Inki nge ta sala kana nkwelani na nge ke bikila nge ntangu fioti sambu na mambu ya kimpeve? Bakala ya mpangi-nkento mosi pesaka yandi kaka bilumbu fioti sambu na kusamuna. Kana nge ke kutana ti diambu ya mutindu yai, kudiyula nde: ‘Keti nkwelani na mono ke buyisaka mono na kusambila Yehowa? Kana ve, keti mono lenda sala mambu yina yandi ke lomba mono?’ Kana nge kele ti mabanza ya mbote, nge lenda fiotuna bampasi mingi na makwela.—Bafilipi 4:5.

 9. Inki mutindu kibuti yina kele Mbangi ya Yehowa lenda longa bana na kuzitisa kibuti yina kele ve Mbangi ya Yehowa?

⁹ Kana nkwelani na nge kele ve Mbangi ya Yehowa, yo lenda vanda mpasi sambu nge longuka Biblia ti bana na beno. Mu mbandu, kana nge ke zola nde bana na nge kulemfuka na nsiku yai ya Biblia: “Kumisa tata na nge ti mama na nge.” (Baefezo 6:1-3) Inki nge ta sala kana nkwelani na nge ke zitisaka ve minsiku ya Biblia? Pesa bana na nge mbandu ya mbote, zitisa nkwelani na nge. Yindula bikalulu ya mbote ya nkwelani na nge mpi monisa yandi nde nge ke sepelaka na mambu ya mbote yina yandi ke salaka. Kutubila ve bifu na yandi na meso ya bana. Nkutu tendudila bana nde, konso muntu fwete pona na kusadila Yehowa to ve. Kana nge ke longa bana na nge na kuzitisa nkwelani na nge yina kele ve Mbangi ya Yehowa, yo lenda pusa yandi na kusadila Yehowa.

10. Inki mutindu bibuti yina kele Bambangi ya Yehowa lenda longa bana na kuzola Yehowa?

¹⁰ Bankwelani ya nkaka ya kele ve Bambangi ya Yehowa lenda zola nde bana na bo kusala bankinsi ya nsi-ntoto to kundima malongi ya luvunu. Babakala ya nkaka lenda buyisa bankento na bo ya kele Bambangi ya Yehowa na kulonguka Biblia ti bana na bo. Ata mpidina, nkento yina kele Mbangi ya Yehowa ta sala bikesa na kulonga bana na yandi Biblia. (Bisalu 16:1; 2 Timoteo 3:14, 15) Mu mbandu, bakala lenda buyisa nkento na yandi na kulonguka ti bana to na kunata bo na balukutakanu. Mpangi-Nkento lenda zitisa nsiku ya bakala na yandi, kansi yandi lenda sadila mayele ya nkaka, yandi lenda kuma kuzabisa bana malongi ya Biblia na mabaku ya kuswaswana. Kusala mpidina ta sadisa bana na kuzaba mambu yina Yehowa ke zolaka mpi yina yandi ke buyaka. (Bisalu 4:19, 20) Nsuka-Nsuka, bana bo mosi ta baka lukanu ya kusadila Yehowa to ve.a—Kulonga 30:19, 20.

11. Na dibuta, nki lenda basisa mavwanga na kati na beto ti bayina ke sambilaka ve Yehowa?

¹¹ Mbala ya nkaka ntangu beto yantikaka kulonguka Biblia, beto zabisaka ve bantu ya dibuta na beto. Kansi ntangu lukwikilu na beto ke yelaka, beto ke bakisaka nde beto fwete zabisa bo lukanu na beto ya kusadila Yehowa. (Marko 8:38) Kwikama na nge na Nzambi lenda basisa mavwanga na dibuta. Beto tadila mambu yina beto lenda sala sambu na kutanina ngemba mpi kukangama na Yehowa.

12. Inki lenda pusa bantu ya dibuta na kutelemina beto mpi nki mutindu beto lenda monisa nde beto ke bakisa mabanza na bo?

¹² Sosa kubakisa mabanza ya bantu ya dibuta na beno ya kele ve Bambangi. Beto kele na kiese sambu beto me zabaka kieleka. Kansi bantu ya dibuta na beto lenda yindula nde bo ke kusaka beto to beto ke sambaka na kadibundu ya mpamba-mpamba. Bo lenda yindula nde beto ke zolaka bo ve sambu beto ke salaka diaka ve bankinsi ti bo. Bo lenda wa boma nde mambu ya mbi ta kumina beto kana beto me fwa. Beto fwete sala ngolo na kubakisa mambu ya bo ke yindula mpi kuwidikila bo na dikebi yonso sambu na kuzaba mambu yina ke yangisa bo. (Bingana 20:5) Ntumwa Polo sosaka kubakisa “bantu ya mitindu yonso” sambu yandi longa bo nsangu ya mbote. Kana beto ke sosa kubakisa mabanza ya bantu ya dibuta na beto, yo ta sadisa beto na kulonga bo kieleka.—1 Bakorinto 9:19-23.

13. Bangogo na beto fwete vanda nki mutindu ntangu beto ke solula ti bantu ya dibuta na beto?

¹³ Tuba na mawete. Biblia ke tuba nde: “Mambu ya beno ke tuba kuvanda ntangu yonso ya mbote.” (Bakolosai 4:6) Yo ke vandaka pete ve. Beto lenda lomba Yehowa mpeve santu sambu yo sadisa beto na kuvanda bantu ya mawete mpi beto zinga mbote ti bantu ya dibuta na beto. Beto fwete yangisa bo ve sambu na malongi na bo ya luvunu. Kana bo me tuba to me sala kima mosi yina me pesa beto mpasi, beto lenda landa mbandu ya bantumwa. Polo tubaka nde: “Ntangu bo ke finga beto, beto ke sakumuna; ntangu bo ke monisa beto mpasi, beto ke kanga kaka ntima; ntangu bo ke kusila beto makambu, beto ke pesa mvutu na mawete yonso.”—1 Bakorinto 4:12, 13.

14. Inki mambote beto ke bakaka sambu na bikalulu na beto ya mbote?

¹⁴ Vanda ti bikalulu ya mbote. Sambu na nki yo kele mfunu? Ata kutuba na mawete lenda sadisa beto na kuzinga na ngemba ti bantu ya dibuta na beto, bikalulu na beto ya mbote kele mfunu mingi kuluta. (Tanga 1 Piere 3:1, 2, 16.) Sala mambu yina ta ndimisa bantu ya dibuta nde makwela ya Bambangi ya Yehowa ke vandaka ya kiese, bo ke taninaka mbote bana na bo, ke zitisaka bansiku ya Biblia mpi ke vandaka ti luzingu ya mbote. Ata bantu ya dibuta na beto ke ndima ve kieleka, beto ke vandaka na kiese sambu bikalulu na beto ya mbote ke sepedisaka Yehowa.

15. Inki mutindu beto lenda kudibongisa sambu mavwanga kubasika ve ti bantu ya dibuta na beto?

¹⁵ Kudibongisa. Yindula na ntwala mambu yina lenda basisa mavwanga ti bantu ya dibuta na beno. Na nima, sosa kuzaba mambu yina nge lenda sala. (Bingana 12:16, 23) Mpangi-Nkento mosi na Australie salaka mutindu yina. Bokilo na yandi vandaka kutelemina ngolo kieleka mpi bantangu ya nkaka bokilo yango vandaka kuwa makasi. Yo yina na ntwala ya kubinga bokilo na yandi, mpangi-nkento ti bakala na yandi vandaka kusamba sambu Yehowa kusadisa bo na kusolula mbote. Bo vandaka kuyindula na ntwala masolo ya kitoko yina bo ta solula ti yandi. Diaka, bo vandaka kusolula mingi ve sambu mbala mingi mavwanga vandaka kubasika.

16. Inki mutindu nge lenda yala mabanza na nge mpi kutuba ve mambu yina lenda pesa bantu ya dibuta na beno mpasi?

¹⁶ Ya kieleka, nge lenda tina ve mambu yonso yina lenda kumina nge ti bantu ya dibuta na beno yina kele ve Bambangi. Ata mpidina, kana mavwanga me basika yo lenda pesa nge mpasi sambu nge ke zolaka bo mpi ke zolaka kusepedisa bo. Kansi kuvila ve nde nge fwete zola Yehowa mingi kuluta bantu ya dibuta na beno. Kana bo me zaba nde nge ke zolaka Yehowa mingi, bo ta bakisa nde kusadila Yehowa kele mfunu. Nge lenda pusa bo ve na ngolo na kulonguka kieleka. Kansi, luzingu na nge lenda ndimisa bantu ya nkaka nde kuzitisa bansiku ya Yehowa me natilaka nge mambote. Ya masonga, Yehowa me pesaka bo mpi dibaku ya kusadila yandi.—Yezaya 48:17, 18.

17, 18. Inki lenda sadisa nge kana bo me basisa muntu ya dibuta na beno na dibundu?

¹⁷ Kana bo me basisa muntu ya dibuta na beno na dibundu to yandi mosi me buya kusadila Yehowa, yo ke pesaka mpasi mingi. Nge lenda wa mpasi bonso nde bo me lwadisa nge na mbele. Inki mutindu nge lenda nunga mpasi yai?

¹⁸ Landa kaka kusadila Yehowa. Kana nge ke kutana ti mpasi ya mutindu yai, kumisa lukwikilu na nge ngolo. Tanga Biblia konso kilumbu, yidikaka balukutakanu, kwendaka na balukutakanu mpi lomba Yehowa na kusadisa nge na kukanga ntima. (Yude 20, 21) Inki nge ta sala kana nge me sala bikesa kansi mpasi ke mana ve? Kuyambula ve! Landa kaka kusadila Yehowa. Malembe-Malembe, nge ta kuma kuyala mawi mpi mabanza na nge. Mambu yai kuminaka muntu yina sonikaka Nkunga 73. Na ntangu mosi buna, yandi vandaka kukuka ve kuyala mabanza mpi mawi na yandi. Kansi kusadila Yehowa sadisaka yandi na kukuma ti mabanza ya mbote. (Nkunga 73:16, 17) Kusadila Yehowa lenda sadisa nge mpi.

19. Inki mutindu nge lenda zitisa ndola yina Yehowa me pesa?

¹⁹ Zitisa ndola yina Yehowa me pesa. Nzambi me zaba nde ndola na yandi ke natilaka bantu yonso mambote, ata muntu yina bo me basisa na dibundu. Beto ke waka mpasi mingi kana bo me basisa muntu ya beto ke zolaka na dibundu, kansi yo lenda sadisa yandi na kuvutukila Yehowa. (Tanga Baebreo 12:11.) Na ntangu yina yandi kele na ndola, beto fwete zitisa nsiku ya “kuvukana” ve ti muntu yina bo me basisaka na dibundu. (1 Bakorinto 5:11-13) Yo kele pete ve. Ata mpidina, beto fwete solula ve ti yandi, kubinga yandi ve na telefone, kusonikila yandi ve mukanda to ba message na telefone.

20. Inki kivuvu beto fwete vanda na yo?

²⁰ Kuvidisa ve kivuvu! Zola ke “tulaka ntima na mambu yonso,” yo yina beto ke ndimaka nde bantu yina ta vutukila Yehowa. (1 Bakorinto 13:7) Kana mpangi na nge yina bo basisaka na dibundu me yantika kusoba mabanza, nge lenda samba sambu yandi baka kikesa ya ke katuka na Biblia mpi kusala mambu yai ya Yehowa ke lomba yandi: “Kwisa kuvutuka na mono.”—Yezaya 44:22.

21. Inki nge fwete sala kana bantu ya dibuta ke telemina nge sambu nge kele longoki ya Yezu?

²¹ Yezu tubaka nde beto fwete zola yandi mingi kuluta bantu ya nkaka. Yandi vandaka kundima nde balongoki na yandi ta vanda kikesa mpi ta landa kukangama na yandi ata bantu ya mabuta na bo ke telemina bo. Yo yina, kana bantu ya dibuta na beno ke telemina nge sambu nge kele longoki ya Yezu, samba Yehowa sambu yandi sadisa nge na kukanga ntima tii na nsuka. (Yezaya 41:10, 13) Vanda na kiese sambu Yehowa mpi Yezu ke sepelaka mingi ti nge mpi ta pesa nge matabisi sambu na kwikama na nge.