Baleke​—“Beno Landa Kusala Ngolo Sambu na Luguluku na Beno Mosi”

 1. Sambu na nki mbotika kele mfunu mingi? (Tala kifwanisu ya luyantiku ya disolo.)

KONSO mvula bantu mingi ya ke longukaka Biblia ke bakaka mbotika. Mingi na kati na bo kele baleke, batoko to nkutu bana-baleke. Bibuti mingi ya baleke yai kele Bambangi ya Yehowa. Baleke ya me bakaka mbotika me bakaka lukanu ya kuluta mfunu. Sambu na kuguluka mpi kuzinga mvula na mvula, beto fwete baka mbotika.—Matayo 28:19, 20; 1 Piere 3:21.

 2. Sambu na nki nge fwete wa ve boma na kudipesa na Yehowa?

² Kana muntu me baka mbotika, Yehowa ke sakumunaka yandi na mitindu mingi. Kansi yo ke natilaka muntu mpi mikumba mingi. Inki mutindu? Kilumbu ya mbotika, mpangi yina salaka diskure yulaka nde: “Na nsadisa ya kimenga ya Yezu Kristu, keti nge me balula ntima na masumu na nge mpi nge me kudipesa na Yehowa sambu na kusala luzolo na yandi?” Nge ndimaka nde Ee. Nge silaka nde nge ta zola Yehowa mpi nde kusadila yandi kele kima ya kuluta mfunu na luzingu na nge. Keti nge ke monaka mbi mutindu nge salaka lusilu yai? Ata fioti ve! Nge ta kudiyangisaka ve ata fioti mutindu nge me ndimaka nde Yehowa kutwadisa luzingu na nge. Bantu ya me zaba ve Yehowa kele na lweka ya Satana. Diabulu ke kudibanzaka ve sambu na bo, yandi ke kudibanzaka mpi ve sambu na nge. Ya kieleka, yandi ta sepela kana nge buya Yehowa mpi nge landa yandi sambu nge vidisa kivuvu na nge ya luzingu ya mvula na mvula.

 3. Inki mutindu Yehowa me sakumunaka nge sambu nge me kudipesaka na yandi?

³ Yindula mutindu Yehowa me sakumunaka nge sambu nge me kudipesaka na yandi mpi me bakaka mbotika. Nge me pesaka Yehowa luzingu na nge, yo yina nge lenda tuba na masonga yonso nde: “Yehowa kele na lweka na mono; mono ta wa boma ve. Muntu lenda sala mono nki?” (Nkunga 118:6) Kusadila Yehowa mpi kuzaba nde yandi ke zolaka beto kele lukumu ya kuluta nene.

4, 5. (a) Sambu na nki kudipesa na Yehowa kele mukumba ya muntu yandi mosi? (b) Inki mambu ya mpasi baleke mpi bambuta ke kutanaka ti yo?

⁴ Kuyindula ve nde kinduku na nge ti Yehowa kele kima mosi yina dibuta na beno ke sadila kansi bibuti na nge bantu ke futa mbongo. Ata nge kele na nzo na beno, kinduku na nge ti Yehowa kele mukumba na nge mosi. Sambu na nki yo kele mfunu na kuvila ve mambu yai? Ata muntu mosi ve lenda zaba kibeni mambu yina lenda meka lukwikilu na yandi na bilumbu ke kwisa. Mu mbandu, mbala ya nkaka nge bakaka mbotika ntangu nge vandaka leke. Kansi ntangu yai ya nge me kuma toko, nge me kuma ti bangindu ya nkaka mpi nge ke kutana ti mambu ya nkaka. Toko mosi ya nkento tubaka nde: “Mwana lenda buya kukonda mpasi bima yina bo ke pesa yandi na dati yina yandi butukaka sambu yandi kele Mbangi ya Yehowa. Kansi na nima ya bamvula, ntangu yandi ke yela, nzala ya kuvukisa nitu ke kumaka ngolo, na ntangu yina yandi fwete monisa lukwikilu ya ngolo mpi kundima nde kuzitisa bansiku ya Yehowa ke vandaka ntangu yonso sambu na mambote na beto.”

⁵ Baleke mpamba ve ke kutanaka ti mambu ya mpasi. Ata bambuta yina ke baka mbotika ke kutanaka ti mambu yina lenda meka lukwikilu na bo. Mu mbandu, bo lenda kutana ti bampasi na makwela, maladi to mambu ya me tala kisalu. Beto yonso, bambuta mpi baleke, fwete kangama na Yehowa na konso mambu yina beto ke kutana ti yo.—Yakobo 1:12-14.

 6. (a) Kusila na kulemfukila Yehowa na mambu yonso ke tendula nki? (b) Bafilipi 4:11-13 me longa nge nki?

⁶ Sambu na kulanda kukangama na Nzambi, nge fwete yibuka nde nge silaka Yehowa Nzambi ya Kuluta Kuzanguka nde nge ta lemfukilaka yandi na mambu yonso, disongidila, nge ta sadila yandi ata nge kutana ti mambu ya mpasi, ata banduku to bibuti na nge me yambula kusadila yandi. (Nkunga 27:10) Lomba Yehowa na kusadisa nge na mambu yonso yina nge ke kutana ti yo sambu nge zitisa mambu yina nge silaka yandi.—Tanga Bafilipi 4:11-13.

 7. ‘Kusala ngolo sambu na luguluku na nge mosi ti boma mpi matekita’ ke tendula nki?

⁷ Yehowa ke zola nde nge kuma nduku na yandi. Ata mpidina, nge fwete sala bikesa sambu na kukumisa kinduku yango ngolo mpi kudibongisa sambu nge guluka. Bafilipi 2:12 ke tuba nde: “Beno landa kusala ngolo sambu na luguluku na beno mosi ti boma mpi matekita.” Yo ke tendula nde nge fwete yindula mingi mambu yina lenda sadisa nge na kulanda kuvanda nduku ya Yehowa mpi kukangama na yandi. Nge lenda tuba nde nge ta sala yo kukonda mpasi. Kansi kuvila ve nde bampangi ya nkaka yina sadilaka Nzambi bamvula mingi kele diaka ve ya kwikama. Inki lenda sadisa nge na kusala bikesa sambu nge guluka?

 8. Kulonguka ke tendula nki? Sambu na nki yo kele mfunu?

⁸ Sambu na kuvanda nduku ya Yehowa, beto fwete widikila yandi mpi kusolula ti yandi. Kulonguka Biblia kele mutindu ya mbote ya kuwidikila Yehowa. Kulonguka ke tendula kutanga mpi kuyindula mambu yina kele na Biblia mpi na mikanda na beto. Kutanga Biblia ke tendula ve kaka kusimba mambu na ntu, mutindu bana ya nzo-nkanda ke salaka. Kansi yo kele bonso nzietelo mosi ya kitoko ya nge ke sala, ya ke sadisa nge na kumona bima mingi ya mpa ya me tala Yehowa. Kusala mpidina ta kumisa nge pene-pene na Nzambi mpi yandi ta pusana pene-pene na nge.—Yakobo 4:8.

 9. Inki bisadilu ke sadisaka beto na kulonguka Biblia beto mosi?

⁹ Yehowa me pesaka beto bisadilu mingi yina lenda sadisa beto na kulonguka. Mu mbandu, na jw.org, kitini “Adolescents” kele ti masolo “Explore la Bible ou activités pour le culte familial,” ya ke monisa malongi yina beto lenda baka na masolo ya Biblia mpi mutindu ya kusadila malongi yango. Diaka, jw.org, kele ti kitini “Inki Biblia Ke Longaka Mpenza?” Yo kele ti masolo yina lenda sadisa nge na kukumisa lukwikilu na nge ngolo mpi kuzaba mutindu ya kulonga bantu malongi ya Biblia. Disolo “Baleke ke kudiyula . . . Inki Mono Lenda Sala Sambu Kutanga Biblia Kupesa Mono Kiese?” na Réveillez-vous ! ya Aprili 2009 kele ti bandongisila ya mbote ya ke monisa mutindu ya kulonguka nge mosi. Kulonguka mpi kuyindula mambu ya nge ke longuka kele mfunu mingi sambu na kuguluka.—Tanga Nkunga 119:105.

10. Sambu na nki beto fwete samba?

¹⁰ Beto ke widikilaka Yehowa ntangu beto ke tangaka Biblia, kansi beto ke solulaka ti yandi ntangu beto ke sambaka. Beto fwete tadila bisambu na mutindu ya mbote, kansi ve bonso nzila mosi yina beto ke sadila kaka sambu na kubaka mambote. Kusamba kele kusolula ti Ngangi na beto. Yindula fioti, Yehowa kele ti mpusa ya kuwa mambu yina nge ke songa yandi! (Tanga Bafilipi 4:6.) Yo yina kana diambu mosi ke yangisa nge, Biblia ke lomba nge na ‘kulosila Yehowa kizitu na nge.’ (Nkunga 55:22) Bampangi mingi ke tubaka nde ndongisila yai me sadisaka bo mpenza. Yo lenda sadisa nge mpi!

11. Sambu na nki nge fwete tondaka Yehowa?

¹¹ Beto fwete samba ve kaka sambu na kulomba Yehowa lusadisu. Biblia ke tuba nde: “Beno pesa matondo.” (Bakolosai 3:15) Bantangu ya nkaka beto ke kudiyangisaka mingi mpi yo ke salaka nde beto vila mambu ya mbote yina Yehowa me sadilaka beto. Yo yina meka kusala mutindu yai: Konso kilumbu, yindula ata mambu tatu yina ke pusa nge na kutonda Yehowa, mpi tonda yandi sambu na yo. Abigail, toko mosi yina bakaka mbotika ti bamvula 12, ke tuba nde: “Mono ke bakisaka nde beto fwete tonda Yehowa kuluta bantu yonso na ntoto ti na zulu. Beto fwete tonda yandi ntangu yonso sambu na mambu yonso ya mbote yina yandi ke sadilaka beto.” Abigail waka ngiufula yai ya yandi me kumaka mpi kuyindula mingi nde: “Kana mono telama mbasi kaka ti bima yai ya mono me tonda Yehowa bubu, keti mono ta tonda Yehowa?”a

12, 13. Inki ke ndimisaka nge kibeni nde Yehowa kele mbote, sambu na nki yo kele mbote na kuyindula mutindu Yehowa me sadisaka nge?

¹² Yehowa sadisaka ntotila Davidi na kukanga ntima na mambu mingi ya mpasi. Yo yina, Davidi vandaka kubakisa mbote mambu yina yandi tubaka ntangu yandi sonikaka nde: “Beno meka mpi beno mona nde Yehowa kele mbote; kiese na muntu yina ke tinaka na yandi.” (Nkunga 34:8) Verse yai ke monisa nde muntu yandi mosi fwete mona mambote yina Yehowa ke sadila yandi. Biblia, mikanda na beto mpi balukutakanu ke sadisaka nge na kumona mutindu Yehowa me sadisaka bampangi ya nkaka na kubikala ya kwikama. Kansi sambu kinduku na nge ti Yehowa kukuma ngolo, nge fwete tula dikebi na mutindu Yehowa ke sadisa nge. Inki mambu ya luzingu na nge ke ndimisaka nge kibeni nde Yehowa kele mbote?

¹³ Konso Mbangi ya Yehowa me monaka mutindu Yehowa me sadisaka yandi na mutindu mosi ya kuyituka. Yandi ke binga konso muntu na kukwenda pene-pene na yandi mpi ya Mwana na yandi. Yezu tubaka nde: “Ata muntu mosi ve lenda kwisa na mono kana Tata, yina tindaka mono, kubenda yandi ve.” (Yoane 6:44) Keti nge ke monaka nde Yehowa me bendaka nge na yandi? Keti nge ke yindulaka nde ‘Yehowa me bendaka kaka bibuti na nge mpi nde nge ke landa kaka bibuti na nge’? Kuvila ve nde ntangu nge kudipesaka na Yehowa mpi bakaka mbotika, nge salaka kinduku na nge mosi ti Yehowa. Biblia ke tuba nde: ‘Kana muntu ke zolaka Nzambi, Nzambi me zaba yandi.’ (1 Bakorinto 8:3) Landa kubaka na mbalu dibaku yina Yehowa me pesaka nge ya kuvanda na dibundu na yandi.

14, 15. Inki mutindu kisalu ya kusamuna lenda kumisa lukwikilu na nge ngolo?

¹⁴ Yehowa ke monisilaka nge mpi ntima-mbote ntangu yandi ke pesaka nge kikesa ya kulonga bantu kieleka na kisalu ya kusamuna to na nzo-nkanda. Yo ke vandaka pete ve na kulonga banduku ya nzo-nkanda, sambu nge me zaba ve mambu yina bo lenda tuba. Yo ke vandaka mpi pete ve na kulonga na ntwala ya bantu mingi. Kansi nki lenda sadisa nge?

¹⁵ Yindula bikuma yina me pusaka nge na kukwikila na malongi ya Biblia. Kana ba fiche d’étude ya jw.org, ya ke sadisaka na kulonguka Biblia kele mpi na ndinga mosi yina nge me zaba, sala ngolo na kusadilaka yo. Yo lenda sadisa nge na kuyindula diaka mbote malongi yina nge ke kwikilaka, bikuma yina ke pusaka nge na kukwikila yo mpi mutindu ya kulonga yo na bantu ya nkaka. Kana nge me longuka yo mbote-mbote, yo ta pusa nge na kulonga bantu mambu ya Yehowa.—Yeremia 20:8, 9.

16. Inki lenda sadisa nge na kulonga kieleka ti kikesa?

¹⁶ Ata nge me kudibongisa mbote, kutendudila bantu ya nkaka malongi ya Biblia ke vandaka pete ve. Mpangi-nkento mosi ya bamvula 18, yina bakaka mbotika ti bamvula 13, ke tuba nde: “Mono ke zabaka malongi ya Biblia kansi bantangu ya nkaka yo ke vandaka mpasi na kutendudila bantu mambu yango.” Yo yina yandi yantikaka kulonga bantu kieleka na mutindu ya pete mpi na bangogo na yandi mosi. Yandi ke tuba nde: “Banduku ya nzo-nkanda ke tubaka pwelele mambu yina bo ke salaka. Mono mpi fwete tuba pwelele. Mono ta zabisa bo kima mosi yina mono salaka, mu mbandu mono lenda tuba nde ‘Mono vandaka kusamuna kilumbu mosi, ebuna . . .’ Na nima mono lenda zabisa bo mambu yina sepedisaka mono kilumbu yango. Ata mono ke zabisaka bo ve mbala mosi malongi ya Biblia, banduku ya nkaka ya nzo-nkanda ke sepelaka kuwa mambu yina mono salaka na kisalu ya kusamuna. Bantangu ya nkaka bo ke yulaka mono bangiufula ya me tala kisalu ya kusamuna. Kusadila mayele yai ke sadisaka mono mingi mpi mono ke waka kiese.”

17. Inki diaka lenda sadisa nge na kulonga bantu ya nkaka?

¹⁷ Kana nge ke tudila bantu dikebi mpi ke zitisa bo, bo mpi ta zitisa nge mpi ta zola malongi na nge. Mu mbandu, Olivia, kele ti bamvula 17, yandi bakaka mbotika na kileke, yandi ke tuba nde: “Mbala mingi mono vandaka kuwa nsoni nde kana mono ke tubila Biblia mingi na masolo na mono, bantu ta sepela ve.” Na nima yandi sobaka mutindu ya kutadila mambu. Na kisika ya kuwa nsoni, yandi tubaka nde: “Baleke mingi ke zabaka ve mambu ya me tala Bambangi ya Yehowa. Bambangi ya Yehowa ya bo me zaba kele kaka beto. Mambu ya beto ke sala lenda sadisa bo na kundima malongi ya Biblia to ve. Keti beto ta sadisa bo kana beto ke wa nsoni, kele madidi-madidi, ke baka mpenza ve ntangu ya kuzabisa bo balukwikilu na beto, to ke wa boma na kutuba? Kusala mpidina ta pusa bo na kuyindula nde beto ke vandaka ve na kiese ya kuvanda Bambangi ya Yehowa. Nkutu bo ta sepela ve ti malongi na beto sambu bo ta mona nde beto mosi ke ndimaka yo ve. Kansi kana beto ke zabisa bo mambu ya Biblia na kiese, ke tubila yo mbala na mbala na masolo na beto, ntembe kele ve nde bo ta zitisa beto.”

18. Inki bikesa nge fwete landa kusala sambu nge guluka?

¹⁸ Beto me mona nde sambu na kuguluka, konso muntu fwete landa kusala bikesa. Yo yina, beto fwete tangaka Biblia mpi kuyindula mingi mambu yina beto ke tanga, kusamba Yehowa, mpi kuyindula mutindu yandi me sadisaka beto. Kana nge ke sala mpidina, kinduku na nge ti Yehowa ta kuma ngolo. Yo ta pusa nge mpi na kulonga bantu ya nkaka malongi ya Biblia.—Tanga Nkunga 73:28.

19. Sambu na nki bikesa yonso ya beto ke sala sambu na kuguluka kele mfunu?

¹⁹ Yezu tubaka nde: “Kana muntu ke zola kulanda mono, bika yandi kudibuya, yandi baka nti na yandi ya mpasi, mpi yandi fula kulanda mono.” (Matayo 16:24) Ya kieleka, sambu na kulanda Yezu, konso muntu fwete kudipesa na Yehowa mpi kubaka mbotika. Mbotika kele kaka luyantiku ya luzingu mosi ya kitoko yina ta pesa nge dibaku ya kuzinga mvula na mvula na Paladisu. Yo yina landa kusala bikesa sambu nge guluka!