Keti Kele ti Mukanda Mosi Yina Lenda Sadisa Nge na Kuvanda ti Luzingu ya Mbote na Bilumbu Ke Kwisa?

Mutindu beto monaka yo na disolo ya me luta, bantu mingi vandaka kutula ntima na bimvwama, kulonguka mingi, kukuma ti mbongo mingi mpi kuvanda bantu ya mbote sambu bo vanda ti luzingu ya mbote na bilumbu ke kwisa. Kansi, kana nge ke sala mambu yai sambu na kuvanda ti luzingu ya mbote na bilumbu ke kwisa, yo kele bonso nge ke sosa kukwenda kisika mosi yina nge me kwendaka ntete ve kansi nge me zaba ve kusadila karte mbote sambu na kukwenda kisika yango. Keti yo ke monisa nde kele ve ti kisika ya nkaka yina beto lenda tula ntima sambu na kuzaba mambu yina beto lenda sala sambu na kuvanda ti luzingu ya mbote na bilumbu ke kwisa? Ve.

MUKANDA YINA ME KATUKA NA MUNTU MOSI YA KULUTA MAYELE

Mbala mingi kana beto ke zola kubaka badesizio beto ke sosaka ndongisila na muntu mosi yina kele mbuta to yina kele mayele kuluta beto. Mutindu mosi mpi beto lenda zwa bandongisila yango ya mbote yina lenda sadisa beto na kuzaba mambu yina beto lenda sala sambu na kuvanda ti luzingu ya mbote na bilumbu ke kwisa, na muntu mosi ya kele ti bamvula mingi mpi kele mayele mingi kuluta beto. Beto lenda zwa bandongisila yango na mukanda mosi ya santu yina bo me sonikaka bamvula kuluta 3500. Mukanda yango kele Biblia.

Sambu na nki nge fwete tudila Biblia ntima? Sambu yo me katuka na muntu mosi ya kele ti bamvula mingi mpi ya kele ti mayele mingi kuluta bantu yonso. Muntu yango kele “Mbuta ya Bilumbu” yina me “katuka mvula na mvula tii mvula na mvula.” (Daniele 7:9; Nkunga 90:2) Yandi kele “Ngangi ya zulu, Nzambi ya kieleka, Muntu yina yidikaka ntoto.” (Yezaya 45:18) Yandi mosi ke songa beto nde zina na yandi kele Yehowa.—Nkunga 83:18.

Sambu Biblia me katukaka na muntu yina salaka bantu yonso, yo ke tubaka ve nde mutindu ya kuzinga ya dikanda mosi to mpusu mosi kele mbote kuluta ya nkaka. Bandongisila na yo ke vandaka ntangu yonso mfunu mpi bantu yonso ke bakilaka yo mambote. Bo me sonikaka Biblia na bandinga mingi mpi bo me kabulaka yo mingi kuluta mikanda ya nkaka.a Yo yina, bantu ya bisika yonso ke tangaka Biblia mpi ke sadilaka bandongisila na yo. Bo ke ndimaka mambu yai ya Biblia ke tubaka:

“Nzambi ke pona-ponaka ve, kansi na konso dikanda yandi ke ndimaka muntu yina ke tinaka yandi boma mpi ke salaka mambu ya mbote.”—BISALU 10:34, 35.

Mutindu bibuti ya zola ke pesaka bana na bo bandongisila, Yehowa Nzambi kele Tata ya zola yandi ke pesaka beto bandongisila na nzila ya Ndinga na yandi Biblia. (2 Timoteo 3:16) Nge lenda tudila Ndinga na yandi ntima sambu yandi muntu me salaka beto mpi yandi me zaba mambu yina lenda sala nde beto vanda na kiese.

BETO FWETE TUDILA BIBLIA NTIMA

Beto fwete tula ntima na mambu yina Biblia ke tubaka sambu na bilumbu yina ke kwisa. Sambu bubu yai beto ke mona mutindu mambu yina Biblia tubaka bamvula kiteso ya 2 000 me luta, ke salama. Mu mbandu yo me tubilaka mambu yina ta salama mpi bikalulu ya bantu.

MAMBU YINA BIBLIA TUBAKA YA KE SALAMA

“Insi mosi ta nwanisa insi ya nkaka, mpi kimfumu mosi ta nwanisa kimfumu ya nkaka. Ntoto ta nikana ngolo, mpi nzala ti kipupa ta vanda na bisika ya mutindu na mutindu.”—LUKA 21:10, 11.

BIKALULU YA BANTU

“Na bilumbu ya nsuka bantangu ya mpasi mpi ya nku ta vanda. Sambu bantu ta vanda bantu ya ke kudizolaka, bantu ya ke zolaka mbongo, bantu ya ke kudikumisaka, bantu ya lulendo, bantu ya ke vwezaka, bantu ya ke lemfukaka ve na bibuti, bantu ya ke pesaka ve matondo, bantu ya me konda kwikama, bantu ya ke zolaka ve bantu ya nkaka, bantu ya ke zolaka ve kuwakana, bantu ya ke kusilaka bankaka makambu, bantu ya me konda kudiyala, bantu ya nku, bantu ya ke zolaka ve mambu ya mbote, bantu ya ke tekaka bankaka, bantu ya ntu-ngolo, bantu ya me fuluka ti lulendo, bantu ya ke zolaka biese na kisika ya kuzola Nzambi.”—2 TIMOTEO 3:1-4.

Inki nge ta tuba ntangu nge ke mona mambu yonso yina Biblia tubaka ntama, ke salama na bilumbu na beto? Ntembe kele ve nde nge ta ndima mambu yina Leung yina ke zingaka na Hong Kong, ke tuba nde: “Mambu yonso ya ke salama bubu, Biblia me tubilaka yo dezia. Kansi, ata muntu mosi ve lenda tuba mambu mpi na bilumbu ke kwisa yo salama kaka mutindu yandi tubaka. Biblia kele mukanda yina me katuka na muntu yina kele mayele mingi kuluta bantu yonso.”

Biblia me tubilaka mambu mingi ya me salamaka dezia.b Yo ke ndimisa beto kibeni nde yo kele Ndinga ya Nzambi. Yehowa ke tuba nde: “Mono kele Nzambi, mpi ya nkaka kele ve ya kele bonso mono. Katuka luyantiku mono ke tubaka na ntwala mambu yina ta salama.” (Yezaya 46:9, 10) Beto kele ti kikuma ya mbote ya kundima nde mambu yina Biblia ke tuba sambu na bilumbu ke kwisa ta salama.

NDONGISILA YINA TA NATILA NGE MAMBOTE BANDA BUBU TII NA BILUMBU KE KWISA

Kana nge ke sadila bandongisila yina Biblia ke pesa beto, nge ta bakila yo mambote. Beto tubila ntete bandongisila yango.

BANDONGISILA YA MBOTE SAMBU NA MBONGO MPI KISALU

“Kupema mwa fioti kele mbote kuluta kisalu ya ngolo mpi kulanda mupepe.”—LONGI 4:6.

MUTINDU DIBUTA LENDA VANDA NA KIESE

“Konso muntu na kati na beno fwete zola nkento na yandi mutindu yandi ke kudizolaka; na ndambu ya nkaka, nkento fwete vanda ti luzitu ya mudindu sambu na bakala na yandi.”—BAEFEZO 5:33.

MUTINDU YA KUZINGA TI BANTU YA NKAKA

“Yambula makasi mpi bikisa nganzi; Kuwa ve makasi mpi kusala ve mambu ya mbi.”—NKUNGA 37:8.

Kana nge ke sadila mambu yina Biblia ke tuba nge ta vanda ti luzingu ya mbote banda bubu yai ti na bilumbu ke kwisa. Biblia kele ti mambu ya kitoko yina Nzambi me tubaka nde yandi ta sala sambu na bilumbu ke kwisa.

BANTU TA ZINGA NA NGEMBA MPI NA LUTANINU

“Bo ta wa kiese kibeni na ngemba ya mingi”—NKUNGA 37:11.

BANTU YONSO TA VANDA TI BANZO MPI MADIA MINGI

“Bo ta tunga banzo mpi ta zinga muna, bo ta kuna bilanga ya vinu mpi ta dia mbuma na yo.”—YEZAYA 65:21.

ATA MUNTU MOSI VE TA BELA TO TA FWA

“Lufwa ta vandaka diaka ve; mawa, bidilu, mpi mpasi ta vandaka diaka ve.”—KUSONGA 21:4.

Inki nge fwete sala sambu na kuvanda ti luzingu ya mbote na bilumbu ke kwisa? Disolo ya ke landa ta pesa mvutu.

a Sambu na kuzaba mambu mingi ya me tala kubalula Biblia mpi kukabula yo, kota na www.jw.org, bweta na MALONGI YA BIBLIA mpi bweta diaka na ISTWARE MPI BIBLIA.

b Sambu na kuzaba mambu mingi, tala kapu 9 ya mukanda La Bible : Parole de Dieu ou des hommes ? yina Bambangi ya Yehowa me basisaka, yo kele mpi na Internet. Kota na www.jw.org, bweta na BIBLIOTEKE mpi bweta diaka na MIKANDA MPI TUMIKANDA.