Tina Mitambu ya Satana

 1. Sambu na nki beto ke fwanisa Satana ti muzombi?

LUKANU ya muzombi ke vandaka ya kukanga to ya kufwa bambisi. Muzombi lenda sadila mitambu mingi, yandi lenda sadila mpi ata mutambu yina Biblia ke tubila. (Yobi 18:8-10) Inki mutindu muzombi ke pusaka bambisi na kukangama na mutambu na yandi? Yandi ke longukaka bambisi mbote-mbote. Yandi ke sosaka kuzaba nzila yina bo ke lutaka, madia yina bo ke diaka mpi mutindu yandi lenda kanga bo. Satana mpi kele bonso muzombi. Yandi ke longukaka beto. Yandi ke sosaka kuzaba kisika yina beto ke kwenda mpi mambu yina ke sepedisaka beto. Na nima, yandi ke sadilaka mutambu yina lenda kanga beto ntangu beto kele na kidiba. Kansi Biblia ke ndimisa beto nde ata yandi me kanga beto, beto lenda tina. Diaka, Biblia ke songaka beto mambu yina beto lenda sala sambu na kutina mitambu yango.

 2. Inki kele mitambu zole ya nene yina Satana ke sadilaka sambu na kukanga bantu?

² Satana ke sadilaka mitambu zole ya nene sambu na kukanga bantu; mitambu yango kele lulendo mpi bwimi.b Banda bamvula mingi, Satana ke sadilaka mitambu yai sambu na kukanga bantu. Yandi kele bonso muntu yina ke kangaka bandeke; yandi ke kangaka bo na mutambu to na filet. (Nk. 91:3) Kansi beto ke zolaka ve nde Satana kukanga beto. Sambu na nki? Sambu Yehowa me songaka beto mayele yonso yina Satana ke sadilaka sambu na kukanga bantu.—2 Bak. 2:11.

 3. Sambu na nki Yehowa salaka nde bo sonika na Biblia, bambandu ya bansadi na yandi yina kumaka lulendo mpi bwimi?

³ Yehowa ke sadilaka bambandu ya bansadi na yandi ya ntangu ya ntama sambu na kusadisa beto na kubuya lulendo mpi nzala ya ngolo ya kuvanda ti bima mingi. Beto ta mona mutindu Satana sadilaka mitambu yai sambu na kukanga bansadi ya nkaka ya Yehowa yina sadilaka Yehowa banda bamvula mingi. Keti yo ke tendula nde beto mpi fwete bwa na mutambu ya Satana? Mpidina ve. Yehowa salaka nde bo sonika bambandu yai na Biblia sambu na “kukebisa beto.” (1 Bak. 10:11) Yandi ke zaba nde bambandu yai lenda sadisa beto na kutina to na kubwa ve na mitambu ya Satana.

 4. Inki lenda kumina beto kana beto me kuma lulendo?

⁴ Satana ke zolaka nde beto kuma lulendo. Yandi ke zaba nde kana beto me kuma lulendo bonso yandi, beto ta baka ve luzingu ya mvula na mvula. (Bing. 16:18) Yo yina, ntumwa Polo tubaka nde muntu yina me “fuluka na lulendo mpi ta bwa na ndola yina bo me zengilaka Diabulu.” (1 Tim. 3:6, 7) Mambu yai lenda kumina beto yonso, yo vanda beto ke sadilaka Yehowa banda bamvula mingi to fioti.

 5. Mutindu Longi 7:16, 20 ke monisa yo, nki mutindu muntu lenda kuma lulendo?

⁵ Muntu ya lulendo ke vandaka bwimi. Satana ke pusaka beto na kutula dikebi kaka na mambu na beto na kisika ya kutudila Yehowa ntima, mingi-mingi ntangu beto ke kutana ti bampasi. Mu mbandu, kana bo me kusila beto makambu to bo me sadila beto mambu ya mbi. Satana ke zolaka nde beto wila Yehowa makasi to bampangi na beto. Diabulu ke zolaka nde nge yindula nde sambu na kusala mambu mbote, nge fwete sala yo na mutindu na nge mosi na kisika ya kulanda lutwadisu yina Yehowa ke pesaka na Ndinga na yandi.—Tanga Longi 7:16, 20.

 6. Inki malongi nge me baka na mbandu ya mpangi-nkento yina ke zingaka na Pays-Bas?

⁶ Beto tadila mbandu ya mpangi-nkento mosi na Pays-Bas. Yandi vandaka kuwa makasi sambu na bifu ya bampangi ya nkaka. Yandi vandaka ve kuzola kulutisa ntangu ti bampangi yango. Yandi ke tuba nde: “Mono vandaka kudiwa mono mosi mpi mono zolaka ve kulolula bo. Mono lombaka bakala na mono na kusoba dibundu.” Na nima, mpangi-nkento yai talaka manaka ya JW Télédiffusion ya Marsi 2016. Manaka yina pesaka bandongisila yina lenda sadisa beto na kukanga ntima na bifu ya bampangi ya nkaka. Yandi ke tuba nde: “Mono bakisaka nde mono fwete kudikulumusa na masonga yonso mpi kutadila mbote bifu na mono na kisika ya kusoba bampangi. Manaka yai sadisaka mono na kutudila Yehowa ntima mpi kutula dikebi kaka na luyalu na yandi.” Inki dilongi beto lenda baka? Kana nge ke kutana ti bampasi, landa kutudila Yehowa ntima. Lomba Yehowa na kusadisa nge sambu nge kuma kutadila bampangi mutindu Yehowa ke tadilaka bo. Tata na nge ya zulu ke monaka bifu na bo kansi yandi ke lolulaka bo na luzolo yonso. Yandi ke zola mpi nde nge sala mutindu mosi.—1 Yoa. 4:20.

 7. Inki mambu kuminaka ntotila Uziya?

⁷ Ntotila Uziya kumaka lulendo; yandi ndimaka ve ndongisila yina bantu ya nkaka pesaka yandi mpi yandi salaka mambu yina yandi vandaka ve ti nswa ya kusala. Uziya salaka mambu mingi ya mbote. Yandi nungaka bitumba mingi, yandi tungaka bambanza ti banzo-zulu mingi mpi yandi salaka bilanga mingi. Biblia ke tuba nde: “Nzambi ya kieleka salaka nde yandi toma.” (2 Bans. 26:3-7, 10) Diaka, Biblia ke tuba nde: “Kansi, ntangu yandi kumaka ngolo, ntima na yandi kumaka lulendo sambu na kubwa na yandi mosi.” Yehowa pesaka nsiku nde banganga-nzambi mpamba bantu fwete yoka ndumbu na tempelo. Kansi ntotila Uziya kwendaka na lulendo yonso na tempelo sambu na kuyoka ndumbu. Yehowa waka makasi mpi yandi losilaka Uziya maladi ya lepre. Yandi bikalaka muntu ya maladi ya lepre, luzingu na yandi ya mvimba.—2 Bans. 26:16-21.

 8. Mutindu 1 Bakorinto 4:6, 7 ke monisa yo, nki lenda sadisa beto na kukuma ve lulendo?

⁸ Keti beto lenda kuma lulendo mpi kusala disumu bonso Uziya? Beto tadila mbandu ya mpangi José. Yandi vandaka kusala mumbongo mpi yo vandaka kutambula mbote mpi yandi vandaka nkuluntu yina bo vandaka kuzitisa. Yandi vandaka kusala badiskure na balukutakanu ya nziunga, na balukutakanu ya distrike mpi bankengi ya nziunga vandaka kulomba yandi bandongisila. Yandi ke tuba nde: “Mono vandaka kuditudila ntima sambu na mayele na mono mpi sambu na mambu yina mono me salaka. Mono tudilaka ve Yehowa ntima. Mono yindulaka nde mono vandaka ngolo, yo yina mono tulaka ve dikebi na balukebisu ya Yehowa mpi na bandongisila na yandi.” Mpangi José salaka disumu ya nene mpi bo basisaka yandi na dibundu. Na nima ya bamvula mingi, yandi vutukaka na dibundu. Yandi ke tuba nde: “Yehowa longaka mono nde kima ya mfunu kele, kusala mambu yina yandi ke lomba beto na kisika ya kusosa lukumu.” Beto fwete vila ve nde mayele yina beto kele ti yo mpi mikumba na beto ke katukaka na Yehowa. (Tanga 1 Bakorinto 4:6, 7.) Kana beto kele lulendo, Yehowa ta sadila beto ve.

 9. Nzala ya ngolo ya kuvanda ti bima mingi pusaka Satana ti Eva na kusala nki?

⁹ Satana Diabulu kele muntu ya ntete yina monisaka nzala ya ngolo ya kuvanda ti bima mingi. Sambu Satana vandaka wanzio ya Yehowa, yo fwete vanda nde yandi vandaka ti mikumba mingi ya mbote. Kansi yandi zolaka kuvanda ti bima mingi. Yandi zolaka nde bantu kusambila yandi mutindu bo ke sambilaka Yehowa. Satana ke zolaka nde beto kuma bonso yandi, yo yina yandi ke zolaka kupusa beto na kusepela ve ti bima yina beto kele ti yo. Mbala ya ntete yina yandi sadilaka mutambu yai kele ntangu yandi solulaka ti Eva. Yehowa pesaka Eva ti bakala na yandi madia mingi disongidila “mbuma ya konso nti ya kilanga” katula kaka mbuma ya nti mosi. (Kuy. 2:16) Kansi Satana kusaka Eva na kudia mbuma ya nti yina Yehowa buyisaka bo. Eva sepelaka ve ti bima yina yandi vandaka ti yo; yandi zolaka kuvanda ti bima mingi. Beto me zaba mambu yina kuminaka yandi. Yandi salaka disumu mpi nsuka-nsuka yandi fwaka.—Kuy. 3:6, 19.

10. Nzala ya ngolo ya kuvanda ti bima mingi pusaka ntotila Davidi na kusala nki?

¹⁰ Nzala ya ngolo ya kuvanda ti bima mingi pusaka ntotila Davidi na kuvila nde Yehowa muntu pesaka yandi bima yonso yina yandi vandaka ti yo; mu mbandu kimvwama, lukumu mpi ngolo ya kununga bambeni na yandi. Davidi zabaka mbote nde makabu yina Nzambi pesaka yandi vandaka ‘mingi kuluta yina yandi lendaka kutubila.’ (Nk. 40:5) Na dibaku mosi, Davidi vilaka mambu yonso yina Yehowa sadilaka yandi. Yandi vandaka diaka ve kusepela ti bima yina yandi vandaka ti yo mpi yandi zolaka diaka kuvanda ti bima mingi kuluta yina Yehowa pesaka yandi. Yandi vandaka ti bankento mingi kansi yandi lulaka nkento ya muntu ya nkaka. Nkento yango vandaka Bat-sheba mpi bakala na yandi vandaka Uria muntu ya dikanda ya Heti. Davidi vukisaka nitu ti nkento yina mpi nkento yango bakaka divumu. Davidi salaka diambu ya mbi kibeni kansi yandi salaka diaka diambu ya nkaka ya mbi kuluta; yandi yidikaka mambu sambu bo fwa Uria. (2 Sam. 11:2-15) Inki Davidi yindulaka? Keti yandi yindulaka nde Yehowa ta zaba ve? Nzala ya kuvanda ti bima mingi pusaka Davidi, nsadi ya kwikama ya Yehowa na kusala mambu ya mbi. Yo yina Yehowa pesaka yandi ndola. Diambu ya kiese kele nde, Davidi ndimaka kifu na yandi mpi yandi balulaka ntima. Yandi vandaka na kiese sambu Yehowa lolulaka yandi.—2 Sam. 12:7-13.

11. Mutindu Baefezo 5:3, 4 ke monisa yo, nki lenda sadisa beto na kuvanda ve ti nzala ya ngolo ya kuvanda ti bima mingi?

¹¹ Mbandu ya ntotila Davidi ke longa beto nki? Dilongi kele nde, beto ta katula nzala ya ngolo ya kuvanda ti bima mingi kana beto ke monisa ntonda sambu na bima yina Yehowa me pesaka beto. (Tanga Baefezo 5:3, 4.) Beto fwete sepela ti bima yina beto kele na yo. Beto fwete sadisa balongoki ya Biblia na kuyindula mambu ya mbote yina Yehowa ke sadilaka bo mpi na kupesa yandi matondo sambu na yo. Kana muntu ke sala mutindu yai konso kilumbu, yandi ta vanda ti mambu mingi yina ta pusa yandi na kupesa Yehowa matondo na bisambu na yandi. (1 Bate. 5:18) Keti nge ke salaka mpi mutindu yai? Kana nge ke yindulula mambu yonso yina Yehowa me sadilaka nge, yo ta pusa nge na kupesa yandi matondo. Kana nge ke pesa Yehowa matondo, nge ta vanda na kiese. Kana nge kele na kiese, nge ta vanda ve ti nzala ya ngolo ya kuvanda ti bima mingi.

12. Nzala ya ngolo ya kuvanda ti bima mingi pusaka Yudasi Iskariote na kusala nki?

¹² Nzala ya ngolo ya kuvanda ti bima mingi pusaka Yudasi Iskariote na kuteka Yezu. Ntete, yandi vandaka ve muntu ya mbi. (Luka 6:13, 16) Yezu ponaka yandi sambu na kuvanda ntumwa. Yezu tudilaka yandi ntima yo yina yandi pesaka yandi kesi ya mbongo. Yezu ti bantumwa na yandi vandaka kusadila mbongo yina sambu na kulungisa bampusa na bo na kisalu ya kusamuna. Mbongo yina vandaka bonso makabu yina beto ke pesaka bubu yai sambu na kupesa maboko na kisalu yina ke salama na ntoto ya mvimba. Kansi na nima, Yudasi kumaka muyibi ata yandi vandaka kuwa balukebisu yina Yezu vandaka kupesa na yina me tala nzala ya kuvanda ti bima mingi. (Mar. 7:22, 23; Luka 11:39; 12:15) Yudasi vilaka balukebisu yina yonso.

13. Inki mutindu nzala ya ngolo ya Yudasi ya kuvanda ti bima mingi monanaka?

¹³ Nzala ya ngolo ya Yudasi Iskariote ya kuvanda ti bima mingi monanaka mwa ntangu fioti na ntwala nde bo fwa Yezu. Simoni muntu ya lepre bingisaka Yezu ti balongoki na yandi mpi Marta ti mpangi na yandi Maria na nzo na yandi. Ntangu bo vandaka kudia, Maria tiamunaka mafuta ya ntalu mingi na ntu ya Yezu. Yudasi ti balongoki ya nkaka waka makasi mingi. Mbala ya nkaka balongoki ya nkaka yindulaka nde bo lendaka kusadila mbongo yina sambu na kusadisa bansukami. Kansi Yudasi waka makasi sambu na kikuma ya nkaka. Yandi “vandaka muyibi” mpi yandi zolaka kuyiba mbongo na kesi. Nsuka-nsuka, nzala ya ngolo ya kuvanda ti bima mingi pusaka Yudasi na kuteka Yezu na ntalu yina bo vandaka kuteka mpika.—Yoa. 12:2-6; Mat. 26:6-16; Luka 22:3-6.

14. Inki mutindu mpangi mosi ti nkento na yandi sadilaka mambu yina kele na Luka 16:13?

¹⁴ Yezu yibusaka balongoki na yandi kieleka mosi ya mfunu. Yandi tubaka nde: “Beno lenda vanda ve bampika ya Nzambi mpi ya Kimvwama.” (Tanga Luka 16:13.) Mambu yai kele kibeni kieleka. Beto tadila mutindu ndongisila yai ya Yezu sadisaka mpangi mosi ti nkento na yandi na Roumanie. Bo zwaka kisalu na insi mosi yina kele ti bimvwama mingi. Bo ke tuba nde: “Beto vandaka ti mfuka mingi na banki mpi beto yindulaka nde kisalu yina vandaka lusakumunu ya Yehowa.” Kansi yo vandaka mutambu. Kana bo ndimaka kisalu yina, yo zolaka kukanga bo nzila ya kusadila Yehowa. Na nima ya kutanga disolo “Tanina Kwikama Na Ntima Mosi” na Nzozulu ya Nkengi ya Augusti 1, 2008, bo sobaka lukanu na bo. Bo ke tuba nde: “Kana beto kwendaka na insi ya nkaka sambu na kukuma ti mbongo mingi, yo zolaka kuvanda mpasi sambu beto sadila Yehowa. Beto bakisaka nde beto zolaka kuvanda diaka ve ti kimpeve ya mbote.” Yo yina, bo buyaka kisalu yina. Inki salamaka na nima? Bakala ya mpangi yina zwaka kisalu na insi na bo mpi kisalu yango sadisaka bo na kuzwa mbongo yina bo vandaka na yo mfunu sambu na kulungisa bampusa na bo. Nkento ke tuba nde: “Yehowa ke sadisaka beto mingi.” Bo kele na kiese sambu bo sadilaka Yehowa na kisika ya kusadila kimvwama.

15. Sambu na nki beto ke ndima nde beto lenda tina mitambu ya Satana?

¹⁵ Inki beto ta sala kana beto me bakisa nde beto me kuma lulendo to bwimi? Beto fwete soba. Polo tubaka nde bantu yina “Satana me kangaka ya moyo” lenda tina na mitambu na yandi. (2 Tim. 2:26) Davidi waka ndongisila ya Natani, yandi balulaka ntima mpi yandi kumaka diaka nduku ya Yehowa. Beto fwete vila ve nde Yehowa kele ngolo kuluta Satana. Yo yina, kana beto ke ndima lusadisu ya Yehowa, beto lenda tina konso mutambu yina Diabulu ke tudila beto.

16. Inki ta sadisa beto na kutina mitambu ya Diabulu?

¹⁶ Ya kieleka, beto fwete kuma ve lulendo to bwimi mpi beto fwete tina mitambu yonso ya Satana. Beto ta sala yo kaka kana Nzambi kusadisa beto. Kansi beto fwete yindula ve nde beto kele ngolo, beto ta kuma ve lulendo mpi beto ta kuma ve ti nzala ya ngolo ya kuvanda ti bima mingi. Sambu ata bansadi ya Yehowa yina me sadilaka yandi bamvula mingi kumaka lulendo mpi bo kumaka ti nzala ya kuvanda ti bima mingi. Yo yina, beto fwete lomba Yehowa na kusadisa beto sambu beto tadila mbote-mbote mabanza mpi bisalu na beto. (Nk. 139:23, 24) Beto fwete sala yonso sambu beto kuma ve lulendo mpi beto kuma ve ti nzala ya ngolo ya kuvanda ti bima mingi.

17. Inki ta kumina mbeni na beto Diabulu ntama mingi ve?

¹⁷ Banda bamvula mingi, Satana ke vandaka muzombi ya nene. Kansi, ntama mingi ve bo ta kanga yandi mpi bo ta fwa yandi. (Kus. 20:1-3, 10) Beto ke vingila kibeni kilumbu yango. Na ntwala nde kilumbu yina kulunga, beto fwete landa kutina mitambu ya Diabulu. Beto fwete sala ngolo sambu beto kuma ve lulendo mpi beto kuma ve ti nzala ya ngolo ya kuvanda ti bima mingi. Beto fwete “vanda bambeni ya Diabulu, ebuna yandi ta tina ntama ti beto.”—Yak. 4:7.