DISOLO YA KULONGUKA 33
Sepela ti Mambu Yina Nge Lenda Sala Sambu na Yehowa
“Kusepela na bima yina meso ke mona kele mbote kuluta kulanda banzala na nge.”—LON. 6:9.
NKUNGA 111 Bikuma ya Kiese na Beto
MAMBU YINA DISOLO YAI KE TUBILAa
1. Inki bampangi mingi ke sala sambu na kusala mingi na kisalu ya Yehowa?
BETO kele ti mambu mingi ya kusala mutindu nsi-ntoto yai ke kuma na nsuka. (Mat. 24:14; Luka 10:2; 1 Pie. 5:2) Beto yonso ke zolaka kudipesa ya mvimba na kisalu ya Yehowa. Bampangi ya nkaka ke zolaka kukuma bapasudi-nzila. Bankaka ke zolaka kusadila Yehowa na Betele to na kisalu ya kutunga banzo ya Kimfumu, banzo ya balukutakanu ya nene, babiro ya Betele mpi babiro ya kubalula mikanda. Bampangi mingi ke salaka yonso sambu na kulungisa mambu yina bo ke lombaka sambu na kukuma bansadi ya kisalu to bankuluntu. (1 Tim. 3:1, 8) Yehowa ke vandaka na kiese mingi ntangu yandi ke monaka bansadi na yandi ke sadila yandi na luzolo yonso.—Nk. 110:3; Yez. 6:8.
2. Beto lenda kudiwa nki mutindu kana beto ke lungisa ve balukanu ya nkaka ya kimpeve?
2 Kansi beto lenda lemba nitu kana bantangu mingi ke luta mpi beto ke lungisa ve balukanu ya nkaka na kisalu ya Yehowa. To beto lenda lemba nitu kana bamvula na beto to mambu ya luzingu na beto ke pesa beto ve nzila ya kusala mambu ya nkaka na kisalu ya Yehowa. (Bing. 13:12) Beto baka mbandu ya mpangi Melissa.b Yandi vandaka kuzola kusadila Yehowa na Betele to kukota Nzo-Nkanda ya Bansamuni ya Kimfumu. Kansi yandi ke tuba nde: “Mono me lutisaka bamvula yina bo ke lombaka. Bubu yai, kukota Betele to kukota Nzo-Nkanda ya Bansamuni ya Kimfumu kele ndosi sambu na mono. Bantangu ya nkaka, yo ke lembisaka mono nitu.”
3. Yo lenda lomba nde bampangi ya nkaka kusala nki sambu na kubaka mikumba ya nkaka na dibundu?
3 Yo lenda lomba nde bampangi ya nkaka ya baleke yina kele ti sante ya mbote kuyedisa bikalulu ya nkaka na ntwala ya kubaka mikumba ya nkaka na dibundu. Bo lenda vanda mayele, bantu ya ke bakaka balukanu mpi bo ke vandaka ti mpusa ya ngolo ya kusala mambu. Kansi yo lenda lomba nde bo longuka na kuvanda ntima-nda, na kusala mambu mbote-mbote mpi na kuzitisa bantu ya nkaka. Kana nge sala bikesa sambu na kukuma ti bikalulu yina kele mfunu, bampangi lenda pesa nge mukumba na ntangu yina nge yindulaka ve. Beto baka mbandu ya mpangi-bakala Nick. Ntangu yandi vandaka ti bamvula 20, yandi lembaka kibeni nitu sambu yandi kumaka ve nsadi ya kisalu. Yandi ke tuba nde: “Mono yindulaka nde mono me sala diambu mosi ya mbi.” Ata mpidina, yandi landaka kusala bikesa sambu na kukuma ti bikalulu yina yo lombaka nde yandi kuma ti yo. Yandi landaka kusala mingi na dibundu mpi kusala mingi kisalu ya kulonga nsangu ya mbote. Bubu yai, yandi kele mpangi ya Komite ya Filiale.
4. Inki beto ta tubila na disolo yai?
4 Keti nge me lemba nitu sambu nge me lungisa ve lukanu mosi ya kimpeve? Kana mpidina, songa Yehowa mambu yina ke yangisa nge. (Nk. 37:5-7) Diaka, solula ti bampangi ya kuyela na kimpeve sambu bo pesa nge bandongisila yina ta sadisa nge na kusadila diaka Yehowa mbote mpi sala bikesa ya kusadila bandongisila yina bo ke pesa nge. Kana nge sala mutindu yina, nge lenda baka mukumba yina nge ke zola to nge lenda lungisa balukanu yina nge kuditudilaka. Kansi mutindu mbandu ya mpangi Melissa me monisa yo, yo lenda vanda mpasi nde beto lungisa lukanu mosi na kisalu ya Yehowa bubu yai. Inki beto ta sala? Inki nge lenda sala sambu na kulanda kuvanda na kiese? Sambu na kubaka mvutu na ngiufula yai, disolo yai ta tubila (1) kisika yina beto lenda zwa kiese, (2) mambu yina beto fwete sala sambu na kukuma ti kiese mingi mpi (3) balukanu yina beto fwete kuditudila yina ta yika beto kiese.
KISIKA YINA BETO LENDA ZWA KIESE
5. Inki beto fwete sala sambu na kuvanda na kiese? (Longi 6:9)
5 Mutindu Longi 6:9 ke monisa yo, beto ta zwa kiese kana beto ke sosa yo na kisika ya mbote. (Tanga.) Muntu yina ke sepelaka ti “bima yina meso ke mona” ke sepelaka ti bima yina yandi kele ti yo, mu mbandu mambu yina yandi lenda sala. Kansi muntu yina “ke landaka banzala na yandi” ke vandaka ve na kiese ata fioti. Inki dilongi beto ke baka? Sambu na kuvanda na kiese, beto fwete tula dikebi na bima yina beto kele ti yo mpi na balukanu yina beto ta kuka kulungisa.
6. Inki mbandu beto ta tadila ntangu yai mpi nki beto ta mona?
6 Keti beto lenda sepela kibeni ti bima yina beto kele ti yo? Bantu mingi ke yindulaka nde yo lenda salama ve sambu beto ke zolaka kulanda kulonguka mutindu ya kusala mambu ya mpa. Kansi diambu ya kieleka kele nde beto lenda sepela kibeni ti bima yina beto kele ti yo. Inki mutindu? Mbandu ya batalanta yina Yezu pesaka ya kele na Matayo 25:14-30 ta sadisa beto na kusepela ti bima yina beto kele ti yo. Beto ta mona mambu yina beto fwete sala sambu na kuvanda na kiese mpi kusepela diaka mingi ti bima yina beto kele ti yo.
MAMBU YINA BETO FWETE SALA SAMBU NA KUKUMA TI KIESE MINGI
7. Tubila na bunkufi mbandu ya batalanta yina Yezu pesaka.
7 Mbandu ya batalanta ke tubila mfumu mosi yina zolaka kusala nzietelo. Kansi na ntwala ya kukwenda, yandi bingaka bampika na yandi mpi yandi pesaka konso mpika batalanta sambu na kusala mumbongo.c Mfumu yina zabaka nde bampika na yandi vandaka ve mayele kiteso mosi. Yo yina, yandi pesaka mpika ya ntete batalanta tanu, ya zole batalanta zole mpi ya tatu, talanta mosi. Bampika zole salaka bikesa sambu na kukumisa batalanta ya mfumu na bo mingi. Kansi mpika ya tatu, salaka ve ata kima mosi ti mbongo yina bo pesaka yandi. Yo yina mfumu na yandi katulaka yandi na kisalu.
8. Sambu na nki mpika ya ntete waka kiese mingi?
8 Mpika ya ntete waka kiese mingi mutindu mfumu na yandi pesaka yandi batalanta tanu. Yo vandaka mbongo mingi kibeni mpi yo vandaka kumonisa nde mfumu vandaka kutudila yandi ntima mingi. Ebuna mpika ya zole? Yandi lendaka kulemba nitu sambu mfumu na yandi pesaka yandi ve batalanta tanu mutindu yandi pesaka mpika ya ntete. Kansi nki yandi salaka?
Inki malongi beto lenda baka na mpika ya zole yina Yezu tubilaka na mbandu na yandi? (1) Mfumu na yandi pesaka yandi batalanta zole. (2) Yandi salaka ngolo sambu na kuzwa mbongo mingi sambu na mfumu na yandi. (3) Yandi kumisaka batalanta zole ya mfumu na yandi, batalanta iya (Tala baparagrafe 9-11)
9. Inki Yezu tubaka ve sambu na mpika ya zole? (Matayo 25:22, 23)
9 Tanga Matayo 25:22, 23. Yezu tubaka ve nde mpika ya zole waka makasi sambu mfumu na yandi pesaka yandi kaka batalanta zole. Yezu tubaka mpi ve nde mpika yina bokutaka nde: ‘Batalanta yango ya mfumu me pesa mono yo yai? Shi mono mpi kele bonso mpika yina yandi me pesa batalanta tanu. Kana mfumu ke yindula nde mono ke salaka ve ngolo, mono lenda zika batalanta na yandi yai zole mpi mono sala kisalu na mono mosi.’
10. Inki mpika ya zole salaka ti batalanta yina mfumu pesaka yandi?
10 Bonso mpika ya ntete, mpika ya zole bakisaka nde kisalu yina mfumu na yandi pesaka yandi vandaka mfunu mpi yandi salaka ngolo sambu na kusadila mfumu na yandi. Yo yina batalanta zole yina bo pesaka yandi, yandi kumisaka yo batalanta iya. Mfumu futaka mpika yina sambu na kisalu na yandi ya ngolo. Mfumu sikisaka yandi mpi yandi pesaka yandi mikumba mingi.
11. Inki beto lenda sala sambu na kukuma ti kiese mingi?
11 Mutindu mosi, beto lenda kuma ti kiese mingi kana beto ke sala bikesa sambu na kusala mbote konso kisalu yina bo ke pesa beto na kisalu ya Yehowa. “Kudipesa ya mvimba” na kisalu ya kulonga nsangu ya mbote mpi na kusala bisalu ya dibundu. (Bis. 18:5; Baeb. 10:24, 25) Yidika mbote balukutakanu sambu nge pesa bamvutu mpi bakomantere ya ke pesa kikesa. Kubaka ve na nsaka konso disolo yina bo ke pesa nge na lukutakanu ya kati-kati ya mposo. Kana bo me lomba nge na kulungisa mukumba mosi na dibundu, sala yo na ntangu ya mbote mpi monisa nde nge kele muntu yina bo lenda tudila ntima. Kuyindula ve nde kisalu yina bo me pesa nge na dibundu kele ve mfunu mpi nde nge kele ve ti mfunu ya kulutisa ntangu na nge na kusala yo. Sala ngolo sambu nge kuma kusala kisalu na nge mbote. (Bing. 22:29) Kana nge ke kudipesa ya mvimba na mambu ya kimpeve mpi na mikumba na nge, nge ta yela nswalu mpi nge ta kuma ti kiese mingi. (Bag. 6:4) Yo ta vandila nge ve mpasi na kusepela ti bampangi yina ke baka mukumba yina nge ke zolaka.—Bar. 12:15; Bag. 5:26.
12. Inki mpangi Melissa mpi mpangi Nick salaka sambu na kuvanda ti kiese mingi?
12 Keti nge ke yibuka diaka mbandu ya mpangi Melissa yina beto me tubila na paragrafe 2 yina vandaka kuzola kukota Betele to Nzo-Nkanda ya Bansamuni ya Kimfumu? Ata yandi kukaka ve kulungisa balukanu yina, yandi ke tuba nde: “Mono kudipesaka ya mvimba na kisalu na mono ya kimupasudi-nzila mpi mono salaka ngolo sambu na kusadila bametode yonso ya kisalu ya kulonga nsangu ya mbote. Yo me natilaka mono kiese mingi.” Ebuna nki mpangi Nick salaka ntangu yandi lembaka nitu sambu yandi salaka bamvula mingi mpi yandi kumaka ve nsadi ya kisalu? Yandi ke tuba nde: “Mono tulaka dikebi na mikumba yina mono vandaka ti yo. Mu mbandu, kulonga nsangu ya mbote, kupesa bamvutu mpi bakomantere ya ke pesa kikesa na balukutakanu. Mono fulusaka mpi formilere sambu na kukota Betele mpi bo ndimaka mono na mvula yina landaka.”
13. Kana nge ke kudipesa ya mvimba na mukumba yina nge kele ti yo, nki mambote nge ta baka? (Longi 2:24)
13 Kana nge ke kudipesa ya mvimba na mukumba yina nge kele ti yo, keti nge ta baka diaka mikumba mingi na bilumbu ke kwisa? Ee nge lenda baka yo bonso mpangi Nick. Kansi kana nge baka yo ve, bonso mpangi Melissa, kiese na nge ta kuma mingi mpi nge ta sepela sambu na mambu yina nge ke sala sambu na Yehowa. (Tanga Longi 2:24.) Nge ta vanda mpi na kiese mingi sambu nge ke zaba nde mambu yina nge ke sala ke sepedisa Mfumu na beto Yezu Kristu.
BALUKANU YINA TA YIKA BETO KIESE
14. Ntangu beto ke baka balukanu na kisalu ya Yehowa, nki beto fwete vila ve?
14 Kana beto ke kudipesa ya mvimba na mukumba yina beto kele ti yo, keti yo ke tendula nde beto fwete sosa ve mitindu ya nkaka ya kusala mingi na kisalu ya Yehowa? Yo ke tendula ve mutindu yina. Beto fwete kuditudila balukanu yina ta sadisa beto na kusamuna mbote mpi na kulonga mbote. Beto fwete kuditudila mpi balukanu yina ta sadisa beto na kusadisa bampangi. Beto ta lungisa balukanu yina kana beto ke kudipesa na kusadisa bampangi na kisika ya kusosa mambote na beto mosi.—Bing. 11:2; Bis. 20:35.
15. Inki balukanu lenda sadisa nge na kukuma ti kiese mingi?
15 Inki balukanu nge lenda kuditudila? Samba Yehowa sambu yandi sadisa nge na kuzaba balukanu yina nge ta kuka kulungisa. (Bing. 16:3; Yak. 1:5) Nge lenda sala bikesa ya kulungisa balukanu yina beto me tubila na paragrafe 1 ya disolo yai. Mu mbandu, kukuma mupasudi-nzila nsadisi to mupasudi-nzila ya ntangu yonso. Nge lenda sadila Yehowa na Betele to kusala kisalu ya kutunga banzo ya Kimfumu, banzo ya balukutakanu ya nene, babiro ya Betele mpi babiro ya kubalula mikanda. Nge lenda longuka mpi ndinga ya nkaka sambu na kulonga mingi nsangu ya mbote na kisika ya nkaka. Sambu na kuzaba mambu mingi na mutindu nge lenda lungisa balukanu yina, tala kapu 10 ya mukanda, Beto Me Vukana Sambu na Kusala Luzolo ya Yehowa mpi solula ti bankuluntu ya dibundu na beno.d Ntangu nge ke sala bikesa sambu na kulungisa balukanu yina, bampangi ta mona nde nge ke yela na kimpeve mpi nge ta kuma ti kiese mingi.
16. Inki nge lenda sala kana nge ke kuka ve kulungisa lukanu mosi?
16 Ebuna nki nge ta sala kana nge ke kuka ve kulungisa balukanu yina beto me tubila? Kuditudila lukanu ya nkaka yina nge ke mona nde nge ta kuka kulungisa. Beto tadila balukanu yina nge lenda kuka kulungisa.
Inki balukanu ya nkaka nge lenda lungisa? (Tala paragrafe 17)f
17. Mutindu 1 Timoteo 4:13, 15 ke monisa yo, nki mpangi-bakala lenda sala sambu na kukuma longi ya mbote?
17 Tanga 1 Timoteo 4:13, 15. Kana nge kele mpangi-bakala yina me bakaka mbotika, nge lenda sala ngolo sambu na kukuma kutuba mbote mpi kulonga mbote. Sambu na nki? Sambu kana nge ke “kudipesa na” kutanga, na kutuba mpi na kulonga nge ta sadisa bantu yina ke widikila nge. Nge lenda kuditudila lukanu ya kulonguka mpi ya kusadila konso dilongi ya kele na kamukanda Kudipesa na Kutanga mpi na Kulonga. Longuka ntete dilongi mosi. Sadila yo mbote-mbote na nzo mpi sala ngolo na kusadila dilongi yango ntangu nge ke sala masolo na balukutakanu. Lomba bandongisila na kilandi ya ndongisi to na bankuluntu ya nkaka yina “ke salaka ngolo na kutuba mpi na kulonga.”e (1 Tim. 5:17) Tula dikebi na kusadila dilongi yina kele na kamukanda Kulonga mpi sadisa bantu yina ke widikila nge na kukumisa lukwikilu na bo ngolo to na kusadila mambu yina bo ke longuka. Kana nge sala mutindu yina, nge ta kuma ti kiese mingi, bo mpi ta kuma ti kiese mingi.
Inki balukanu ya nkaka nge lenda lungisa (Tala paragrafe 18)g
18. Inki lenda sadisa beto sambu beto kuma kulonga mbote?
18 Beto yonso kele ti mukumba ya kulonga mpi ya kukumisa bantu balongoki. (Mat. 28:19, 20; Bar. 10:14) Keti nge ke zola kusala diaka mbote kisalu yai ya mfunu? Longuka kamukanda Kulonga mpi kuditudila balukanu yina ta sadisa nge na kusadila mambu yina nge ke longuka. Nge lenda zwa bandongisila ya nkaka ya mfunu na Mukanda ya Lukutakanu—Luzingu mpi Kisalu na Beto ya Bukristu mpi na bavideo ya bambandu ya masolo ti muntu yina beto ke talaka na balukutakanu ya kati-kati ya mposo. Meka kusadila bangindu mingi ya bambandu yina sambu na kuzaba ngindu yina ta simba na teritware na beno. Kana nge sadila bangindu yina, nge ta kuma longi ya mbote mpi nge ta kuma ti kiese mingi.—2 Tim. 4:5.
Inki balukanu ya nkaka nge lenda lungisa? (Tala paragrafe 19)h
19. Inki nge lenda sala sambu na kukuma ti bikalulu yina ke sepedisaka Nzambi?
19 Ntangu nge ke kuditudila balukanu, kuvila ve nde bikalulu yina ke sepedisaka Nzambi kele na kati ya balukanu ya kuluta mfunu yina nge fwete kuditudila. (Bag. 5:22, 23; Bakol. 3:12; 2 Pie. 1:5-8) Inki mutindu nge lenda sala yo? Beto baka mbandu. Kana nge ke zola kukumisa lukwikilu na nge ngolo, nki nge lenda sala? Nge lenda tanga masolo na mikanda na beto ya ke tubila mutindu ya kukumisa lukwikilu ngolo. Nge lenda tala masolo ya kele na JW Télédiffusion ya ke monisa mutindu bampangi monisaka lukwikilu ya ngolo ntangu bo vandaka kukutana ti bampasi ya mutindu na mutindu. Na nima, tala mutindu nge lenda landa mbandu ya lukwikilu na bo.
20. Inki beto fwete sala sambu na kukuma ti kiese mingi mpi sambu beto lemba ve nitu?
20 Ya kieleka, beto yonso ke zolaka kusala mingi na kisalu ya Yehowa kuluta mutindu beto ke sala yo bubu yai. Na nsi-ntoto ya mpa, beto ta kudipesa ya mvimba na kisalu ya Yehowa mutindu beto ke zola. Kana beto ke sala yonso yina beto lenda sala bubu yai sambu na kusadila Yehowa, beto ta kuma ti kiese mingi mpi beto ta lemba ve nitu. Diambu ya kuluta mfunu kele nde, beto ta kumisa Yehowa ‘Nzambi na beto ya kiese.’ (1 Tim. 1:11) Yo yina, beto fwete sepela ti mambu yina beto lenda sala sambu na Yehowa.
NKUNGA 82 “Bika nde Nsemo na Beno Kusema”
a Beto ke zolaka Yehowa mingi kibeni yo yina beto ke zolaka kusala yonso yina beto lenda sala na kisalu na yandi. Beto ke zolaka kusala mingi kisalu ya kulonga nsangu ya mbote to beto ke zolaka kulungisa mambu yina bo ke lombaka sambu na kubaka mikumba ya nkaka na dibundu. Kansi nki beto ta sala kana beto ke kuka ve kulungisa balukanu ya nkaka ata beto ke sala bikesa mingi? Inki ta sadisa beto na kulanda kusadila Yehowa mpi na kulanda kuvanda na kiese? Beto ta baka bamvutu na bangiufula yai na mbandu ya batalanta yina Yezu pesaka.
b Beto me soba bazina ya nkaka.
c NTENDULA YA BANGOGO: Talanta mosi vandaka salere ya bamvula kiteso ya 20.
d Bo ke lombaka bampangi-babakala yina me bakaka mbotika na kulungisa mambu yina bo ke lombaka sambu na kukuma bansadi ya kisalu mpi bankuluntu. Kana nge ke zola kuzaba mambu yina bo ke lombaka sambu na kubaka mikumba, tala bakapu 5 mpi 6 ya mukanda Beto Me Vukana Sambu na Kusala Luzolo ya Yehowa.
e NTENDULA YA BANGOGO: Kilandi ya ndongisi kele nkuluntu yina bo me ponaka sambu na kupesa bankuluntu mpi bansadi ya kisalu bandongisila ntangu bo ke sala masolo na dibundu. Yandi ke pesaka bo ve bandongisila na meso ya bantu.
f NTENDULA YA BIFWANISU: Sambu mpangi mosi kulungisa lukanu na yandi ya kukuma longi ya mbote, yandi ke sala bansosa na mikanda na beto.
g NTENDULA YA BIFWANISU: Mpangi-nkento mosi kuditudilaka lukanu ya kulonga nsangu ya mbote na dibaku ya mbote; yandi ke pesa nkento mosi yina ke pesa yandi madia, karti ya jw.org.
h NTENDULA YA BIFWANISU: Mpangi-nkento mosi ke zola kumonisa bikalulu yina ke sepedisaka Nzambi yo yina yandi ke pesa mpangi mosi kima ya kudia.