Nkento ya Lot

LOT na dibuta na yandi vandaka kuzinga kisika mosi na Abraham na insi ya Kana. Kilumbu mosi, Abraham tubaka na Lot nde: ‘Matiti ke dyaka mingi ve sambu na bitwisi na beto. Kana nge mezola, beto kabwana mpi konso muntu kudikwendila ndambu na yandi.’

Lot kutalaka insi. Yandi monaka kisika mosi ya kitoko yina vandaka na masa mpi matiti mingi sambu na bitwisi na yandi. Yau vandaka na District ya Yurdani. Lot kwendaka na ndambu yina, yandi, dibuta na yandi na bitwisi na yandi. Na nsuka, bau kwendaka kuvanda na Sodome.

Bantu ya Sodome vandaka mbi mingi. Lot yina vandaka muntu ya mbote, kumonaka mpasi mingi na ntima na yandi sambu na nkadilu na bau. Nzambi mpi kumonaka nsoni mingi sambu na yau. Yandi tindaka bawanzyo zole sambu na kuzabisa Lot ngindu na yandi ya kufwa Sodome mpi mbanza yankaka yina vandaka na lweka, Gomore.

Bawanzyo songaka Lot nde: ‘Sasuka! Baka nkento na nge ti bana na nge yonso zole ya bankento mpi beno kwenda!’ Sambu Lot na dibuta na yandi vandaka kusukinina, bawanzyo bakaka bau na maboko mpi kubasisaka bau na mbanza. Na nima, wanzyo mosi kutubaka nde: ‘Beno kudigulusa! Beno tala ve na nima. Beno bumbana na bangumba kana ve beno tafwa.’

Lot na bana na yandi ya bankento kulemfukaka: bau tinaka Sodome. Bau kutelamaka na kisika mosi ve mpi bau talaka ve na nima. Kansi nkento ya Lot kukolamaka. Na nima ya kamwa ntangu, yandi telemaka mpi talaka na nima. Sambu na yau, yandi kumaka ditadi ya mungwa. Keti beno kemona yandi awa na kifwanisu?

Nkenda yai ya Bible kepesa beto dilongi mosi. Yau kemonisa beto nde Nzambi kegulusaka bantu yina kelemfukilaka yandi, kansi bayina kelemfukaka ve tafwa.