Kapu 67

Bau Mekuka Ve na Kukanga Yandi

NTANGU Nkinsi ya Bisasa kele kaka na kusalama, bamfumu ya dibundu metinda basoda sambu na kukanga Yezu. Yandi kesosa ve na kubumbana. Kansi, Yezu kelanda na kulonga na meso ya bantu na kutubaka nde: “Mono ta vanda ti beno mwa-ntangu fioti, ebuna mono ta vutuka kuna na muntu yina tindaka mono. Beno ta sosa mono, kansi beno ta mona mono ve, sambu beno lenda kwisa kukuma ve na kisika yina ya mono ta vanda.”

Bayuda kebakisa ve, mpi mpila yina bau keyulana bau na bau nde: “Yandi ke tuba nde beto ta mona yandi diaka ve. Mpidina yandi ta kwenda wapi? Keti yandi ta kwenda na [Bayuda yina memwanganaka na kati ya bantu ya Greki mpi na kulonga Bagreki, NW]? Nki disongidila ya mambu yai ya yandi me tuba, nde: ‘Beno ta sosa mono, kansi beno ta mona mono ve, sambu beno lenda kwisa kukuma ve na kisika yina ya mono ta vanda’?” Ya kyeleka, Yezu ketubila lufwa na yandi yina mefinama mpi lufutumuku sambu na kuzinga na zulu, kuna bambeni na yandi lenda kulanda yandi ve.

Kilumbu ya nsambwadi mpi ya nsuka ya nkinsi melunga. Konso suka ya nkinsi, nganga-Nzambi mosi kelosaka masa, ya kuyitaka kubakama na Kiziba ya Siloami, sambu na kulosama na nsi ya mesa ya kimenga. Na ntembe ve, sambu na kuyibusa bantu dyambu yai ya konso kilumbu, Yezu meboka nde: “Kana muntu ke na nzala ya masa, yandi kwisa kunwa masa ya mono ke na yo. Mutindu ke tubaka Mukanda ya Nzambi nde: ‘Konso muntu yina ke ndimaka mono, masa yina ke pesaka moyo ta kwisaka kubasika na ntima na yandi bonso masa ke basika na nto.’ ”

Ya kyeleka, Yezu ketubila awa mambu yina metala malanda ya nene ntangu mpeve tatyamuka. Na mvula yina talanda, kutyamuka ya mpeve yango tasalama na Pantekoti. Kuna, masa yina ke pesaka moyo ta kwisaka kubasika ntangu balongoki 120 tayantika na kusamuna na bantu. Kansi tii na ntwala ya ntangu yina, mpeve kele ve na sansa nde ata mosi ve na kati ya Balongoki ya Kristu mepakulama na mpeve santu mpi mebingama sambu na luzingu ya zulu.

Sambu na kundima malongi ya Yezu, bankaka meyantika na kutuba nde: “Ya kieleka, muntu yai kele Profete,” na ntembe ve, na kutubilaka profete mosi ya kuluta Moize yina kusilamaka nde yandi takwisa. Bankaka ketuba nde: “Yandi kele Mesia.” Kansi bankaka kebuya nde: “Mesia lenda katuka na ntoto ya Galilea ve! Mukanda ya Nzambi ke tubaka nde Mesia ta vanda muntu mosi ya dikanda ya Davidi. Yandi ta katuka na Betelemi, bwala yina ya Davidi vandaka kuzingila.”

Ebuna kukabwana mebasika na kati ya kibuka. Bantu ya nkaka kezola kukanga Yezu, kansi ata muntu mosi ve memeka na kukanga yandi. Ntangu basoda ya bau kutindaka mevutuka nkatu Yezu, bambuta-nganga ti Bafarize keyufula nde: “Sambu na nki beno me kwisa kunata yandi awa ve?”

Basoda mevutula nde: “Ata mbala mosi ve muntu me tubaka mambu mutindu muntu yai ke tuba!”

Na makasi ya mingi, bamfumu ya dibundu mebanda kusadila masaula, luvwezo ti mafingu. Bau kevwenza nde: “Keti beno mpi yandi me kusa beno? Na kati ya bamfumu na beto ti na kati ya Bafarize, keti muntu mosi me ndimaka yandi? Ve, bantu yina ke ndima yandi kele kaka bantu yina kuzaba ve Bansiku ya Moize, ebuna bo kele bantu yina ya Nzambi me singaka.”

Ntangu yandi mewa mambu yai, Nikodemo, Mufarize mpi mfumu ya Bayuda (disongidila, mambere ya Sanedreni), kele ti kikesa ya kukotila Yezu. Nge lenda kuyibuka nde bamvula zole ti ndambu na ntwala, Nikodemo kukwisaka na Yezu na mpimpa mpi kumonisaka lukwikilu na yandi. Ntangu yai, Nikodemo ketuba nde: “Kana beto landa Bansiku na beto, beto lenda pesa muntu ndola ve, kana beto me sambisa yandi ntete ve sambu na kuzaba kana nki yandi me sala.”

Bafarize mewa makasi ya kuluta mingi na kumona nde ata nkutu muntu na bau mosi fwete kukotila Yezu. Bau mevutula na makasi yonso nde: “Keti nge mpi nge kele muntu ya Galilea? Kwenda kutanga ntete Mukanda ya Nzambi, ebuna nge ta mona nde ata profete mosi me katukaka ntete ve na Galilea.”

Ata nkutu Masonuku ketuba ve mbala mosi nde mbikudi tabasika na Galilea, yau kemonisa nde Kristu takatuka kuna, na kutubaka nde yau kulombamaka nde “nsemo ya nene” kumonana na ntoto yai. Dyaka, Yezu kubutukaka na Betelemi, mpi yandi kuvandaka mwana ya Davidi. Ngatu, Bafarize, ata nkutu bau kebakisa dyambu yai, yau fwete kuvanda bau bantu kumwangaka bangindu ya luvunu yina bantu kele na yau sambu na Yezu. Yoane 7:​32-52; Yezaya 9:​1, 2; Matayo 4:​13-17.

▪ Inki kesalamaka konso suka ya nkinsi, mpi mbala ya nkaka inki mutindu Yezu mebenda dikebi na dyambu yai?

▪ Sambu na inki basoda mekuka ve na kukanga Yezu, mpi inki mutindu bamfumu ya mabundu mesala?

▪ Nikodemo kele nani, inki kele nkadilu na yandi na ntwala ya Yezu, mpi inki mutindu bankundi na yandi Bafarize mebaka yandi?

▪ Inki nzikisa kemonisa nde yau kulombamaka nde Kristu kukatuka na Galilea?