Kuvutukila Bangindu Sambu na Kunyata yo

SAMBU na kulonga mbote yo kelombaka kuvutukila bangindu. Kana nge tubila ngindu mosi ya mfunu mbala mingi, bawi tayibuka yo kukonda mpasi. Kana nge tubila dyaka ngindu yango na mutindu yankaka, bo lenda kuka nkutu kubakisa yo mbotembote.

Kana bawi na nge keyibuka ve mambu ya nge ketuba, yo tapusa bo ve na kusoba mambu ya bo kekwikilaka to bikalulu na bo. Ntembe kele ve nde bo talanda na kuyindula bangindu yina nge kenyata mbala mingi.

Yehowa, Longi na beto ya Nene, mepesaka beto mbandu na mutindu yandi vandaka kusadila kuvutukila. Yandi pesaka Bansiku Kumi na dikanda ya Izraele. Na nsadisa ya wanzyo mosi yina vandaka kinati-nsangu, yandi salaka nde dikanda kuwa bansiku yango na Ngumba ya Sinai. Na nima yandi pesaka yo ya kusonika na Moize. (Kub. 20:1-17; 31:18; Kul. 5:22) Na lutwadisu ya Yehowa, Moize kutubilaka dyaka bansiku yango na dikanda na ntwala ya kukota na Ntoto ya Lusilu, mpi na nsadisa ya mpeve santu, Moize kusonikaka yo, mutindu yo kele na Kulonga 5:6-21. Nsiku mosi na kati ya bansiku yina Nzambi pesaka bantu ya Izraele vandaka kulomba bo na kuzola mpi kusadila Yehowa na ntima, moyo, mpi ngolo na bo yonso. Nzambi kuvutukilaka nsiku yai mpi mbala na mbala. (Kul. 6:5; 10:12; 11:13; 30:6) Sambu na nki? Sambu, mutindu Yezu kutubaka, yo vandaka ‘nsiku ya kuluta mfunu.’ (Mat. 22:34-38) Na nzila ya profete Yeremia, Yehowa kuyibusaka bantu ya Yuda bambala kuluta 20 mfunu ya kuzitisa mambu yonso yina yandi lombaka bo. (Yer. 7:23; 11:4; 12:17; 19:15) Mpi na nzila ya Ezekiele, Nzambi kutubaka bambala kuluta 60 nde makanda “ta zaba nde mono kele Mfumu Nzambi.”​—Ezek. 6:10; 38:23.

Beto kemona mpi mutindu ya mbote ya kusadila kuvutukila bangindu na mambu yina bo sonikaka sambu na yina metala kisalu ya Yezu. Mu mbandu, na kati ya ba Evanzile iya, konso Evanzile ketubilaka mambu ya mfunu yina beto lenda kuta na Evanzile mosi to na ba Evanzile yankaka kansi yo ketubilaka mambu yango na mutindu mosi ya kuswaswana. Na malongi na yandi, Yezu kutubilaka bangindu ya mutindu mosi na baokazio mingi kansi na mitindu ya kuswaswana. (Mar. 9:34-37; 10:35-45; Yoa. 13:2-17) Mpi na ntangu yandi vandaka na Ngumba ya Baolive bilumbu fyoti na ntwala ya lufwa na yandi, Yezu kuvutukilaka bangindu sambu na kunyata ndongisila yai ya mfunu: “Beno kangula meso, sambu beno kuzaba ve nki kilumbu Mfumu na beno ta kwisa.”​—Mat. 24:42; 25:13.

Na Kisalu ya Bilanga. Ntangu nge ketelaka bantu kimbangi, nge ketulaka ntima nde bo tayibuka mambu ya nge ketuba. Kuvutukila mbote bangindu lenda sadisa nge na kulungisa lukanu yai.

Mbala mingi, kuvutukila bangindu na ntangu nge ketubila dyambu mosi tasadisa nge na kukotisa dyambu yango na mabanza ya muntu. Yo yina, na nima ya kutanga verse mosi, nge lenda yula ngyufula yai kelanda sambu na kumonisa mfunu na yo mpi kubenda dikebi na yandi na ngindu na yo ya mfunu, “Keti nge memona bangogo yina verse yai kesadila?”

Nge lenda sadila mpi mbote bansa ya nge ketuba na nsuka ya disolo. Mu mbandu, nge lenda tuba nde: “Ngindu ya mfunu ya disolo na beto ya mu kezola nde nge yibuka yo yai . . . ” Na nima vutukila ngindu yango na bangogo ya pete. Nge lenda tuba kima mosi ya mutindu yai: “Lukanu ya Nzambi kele nde ntoto kukuma paladisu. Mpi lukanu yai talungana kaka.” To nge lenda tuba dyaka nde: “Biblia kemonisa pwelele nde beto kezinga na ntangu ya nsuka ya ngidika ya bima yai. Kana beto kezola kuguluka ntangu ngidika yai tafwa, beto fwete longuka mambu yina Nzambi kelombaka beto.” To nge lenda tuba nde: “Mutindu beto mekatuka kumona yo, Biblia kepesa beto bandongisila ya mbote sambu na kuyidika mambu ya luzingu ya dibuta.” Bantangu yankaka, nge lenda vutukila kaka mambu mutindu yo kele na Biblia bonso ngindu yina nge kezola nde bantu kuyibuka. Ya kyeleka, yo kelombaka kudibongisa na ntwala sambu na kusala yo mbote.

Na ntangu nge kesala bamvutukilu, mpi na ntangu nge kelonguka Biblia ti bantu, kuvutukila bangindu mbote lenda tendula kuyula bangyufula ya mvutukilu.

Kana muntu kemona mpasi na kubakisa to na kusadila bandongisila ya Biblia, yo lenda vanda mfunu nde nge tubila dyambu yango mbala mingi. Sala ngolo na kutubila yo na mitindu ya kuswaswana. Yo kelomba ve nde masolo yango kuvanda ya nda, kansi yo fwete syamisa longoki na kulanda na kuyindula dyambu yango. Yibuka nde Yezu kusadilaka mutindu yai ya kuvutukila bangindu sambu na kusadisa balongoki na yandi na kununga mpusa ya kuditula na kisika ya ntete.​—Mat. 18:1-6; 20:20-28; Luka 22:24-27.

Ntangu Nge Kesala Badiskure. Kana nge kesala badiskure na estrade, lukanu na nge fwete vanda ve kaka ya kupesa nsangu. Nge kezola nde bawi kubakisa, kuyibuka mpi kusadila yo. Sambu na kulungisa lukanu yai, nge fwete sadila mbote kuvutukila.

Kansi, kana nge kevutukila bangindu ya mfunu mbala mingi, nge lenda vidisa dikebi ya bawi na nge. Pona mbotembote bangindu yina nge tanyata mingi. Bangindu yai kevandaka mbala mingi bangindu ya mfunu yina kesimba diskure na nge, kansi yo lenda vanda mpi ti bangindu yankaka yina tavanda mfunu mingi sambu na bawi na nge.

Sambu na kusadila kuvutukila, nge lenda sonika ntete bangindu ya mfunu yina nge tatubila na bangogo na nge ya luyantiku. Sala yo ti bansa ya nkufi yina kepesa ngindu ya kimvuka ya mambu yina nge tatubila, sala yo ti bangyufula, to ti bambandu ya nkufi yina kemonisa mvutu na mambu ya nge tatubila. Nge lenda tubila bumingi ya bangindu ya mfunu mpi kusonika yo na ndonga. Na nima tendula konso ngindu yango na kati ya diskure na nge. Nge lenda landa na kunyata bangindu na kati ya diskure na nge kana nge ketubila mbala na mbala konso ngindu ya mfunu na ntwala ya kuluta na ngindu yankaka. To nge lenda lungisa yo kana nge sadila mbandu mosi yina kemonisa mutindu ya kusadila ngindu yina ya mfunu. Nge lenda nyata dyaka bangindu na nge ya mfunu kana nge tuba yo dyaka na nsuka ya disolo, sadila kufwanisa sambu na kutendula yo pwelele, pesa mvutu na bangyufula yina nge yulaka, to monisa na bunkufi mutindu ya kuyidika mambu yina nge tubilaka na luyantiku.

Katula mambu ya beto metubila awa na zulu, mutubi yina kele ti eksperiansi mingi ketalaka mbotembote bantu yina kele na kati ya bawi na yandi. Kana bantu yankaka na kati na bo kemona mpasi na kubakisa ngindu mosi, mutubi kezabaka yo. Kana ngindu yango kele mfunu mingi, yandi kevutukilaka yo dyaka. Kansi, kuvutukila ngindu yango ti bangogo ya mutindu mosi lenda sadisa yandi ve na kulungisa lukanu na yandi. Sambu na kulonga, yo kelombaka kusala mambu mingi dyaka. Yandi fwete sala yonso na kuvanda na bukatikati. Yandi lenda mona mfunu ya kuyika mambu yina yandi bongisaka ve na ntwala na diskure na yandi. Sambu na kukuma longi ya mbote, nge fwete longuka na kulungisa bampusa ya bawi mutindu yai.