KAPU 5

“Yai Kele Mwana na Mono”

NA NTANGU bana kesalaka mambu ya mbote, yo kesepedisaka bayina kesansaka bo. Kana mwana ya nkento mesala kima mosi ya mbote, tata na yandi kevandaka na kyese ya kutubila bantu yankaka nde: “Yai mwana na munu ya nkento.” To kana mwana ya bakala mesala mambu ya mbote, tata na yandi kevandaka na kyese ya kutuba nde: “Yai mwana na munu ya bakala.”

Yezu kesalaka ntangu yonso mambu yina kesepedisaka Tata na yandi. Yo yina Tata na yandi kevandaka na kyese mingi sambu na yandi. Keti nge keyibuka mambu yina Tata ya Yezu kusalaka kilumbu mosi ya Yezu kuvandaka ti balongoki na yandi tatu?— Ee, Nzambi kutubilaka bo katuka na zulu nde: “Yai kele Mwana na mono ya mono ke zolaka mingi.”—Matayo 17:5.

Yezu kevandaka ntangu yonso na kyese ya kusala mambu yina kesepedisaka Tata na yandi. Keti nge kezaba sambu na inki? Sambu yandi kezolaka mpenza Tata na yandi. Kana muntu kesala mambu kaka sambu yandi fwe sala yo, yandi tamonaka nde yo ke mpasi mingi. Kansi, kana yandi kesala yo na luzolo na yandi mosi, yandi tamonaka yo pete. Keti nge mezaba kana kuvanda na luzolo ketendula nki mpenza?— Yo ketendula kuzola mpenza kusala kima.

Ata na ntwala nde Yezu kukwisa na ntoto, yandi vandaka na luzolo ya kusala mambu yonso ya Tata na yandi vandaka kulomba yandi na kusala. Yandi vandaka kusala mutindu yina sambu yandi kezolaka Tata na yandi, Yehowa Nzambi. Yezu kuvandaka na kisika ya kitoko na zulu ti Tata na yandi. Kansi, Nzambi kuvandaka ti kisalu mosi ya nene mpenza ya kupesa Yezu. Sambu Yezu kusala kisalu yina, yo lombaka nde yandi katuka na zulu. Yo lombaka nde yandi kwisa kubutuka na ntoto bonso bebe. Yezu kundimaka na kusala yo sambu Yehowa kuzolaka nde yandi sala yo.

Sambu na kubutuka na ntoto bonso bebe, yo lombaka nde Yezu kuvanda ti mama. Zina ya mama na yandi kuvandaka nani?— Zina na yandi kuvandaka Maria. Yehowa kutindaka wanzyo na yandi Gabriele ya katukaka na zulu sambu na kwenda kusolula ti Maria. Gabriele kutubaka na yandi nde yandi tabuta mwana ya bakala. Bo tapesa mwana yina zina Yezu. Ebuna nani zolaka kuvanda tata ya mwana yina?— Wanzyo kutubaka nde Tata ya mwana yina tavanda Yehowa Nzambi. Yo yina, yo lombaka nde bo binga Yezu nde Mwana ya Nzambi.

Nge keyindula nde Maria kutadilaka dyambu yai nki mutindu?— Keti yandi tubaka nde: “Mu kezola ve kuvanda mama ya Yezu?” Ve, Maria kundimaka na kusala mambu yina Nzambi kuzolaka. Kansi, inki mutindu Mwana ya Nzambi na zulu zolaka kubutuka bonso bebe na ntoto? Inki mutindu kubutuka ya Yezu kuswaswanaka ti kubutuka ya babebe yankaka yonso? Keti nge mezaba?—

Nzambi kusalaka bibuti na beto ya ntete, Adami ti Eva, sambu bo vukana bo zole na mutindu mosi ya kuyituka. Na nima, mwana zolaka kuyantika na kuyela na kati ya divumu ya mama na yandi. Bantu ketubaka nde yo kele kima mosi ya kuyituka! Mpidina ve?

Ntangu yai, Nzambi kusalaka dyambu mosi dyaka ya kuyituka mingi. Yandi bakaka luzingu ya Mwana na yandi na zulu mpi yandi tulaka yo na kati ya divumu ya Maria. Na ntwala ya kusala dyambu yai, Nzambi kuvandaka yandi mesalaka ntete ve dyambu ya mutindu yai, mpi kubanda na ntangu yina, yandi mesalaka yo dyaka ve. Dyambu yai ya kuyituka ya yandi salaka kusalaka nde Yezu kuyantikaka na kuyela na divumu ya Maria mutindu babebe yankaka keyelaka na mavumu ya bamama na bo. Na nima, Maria kukwelaka Yozefi.

Ntangu lere ya kubutuka ya Yezu kulungaka, Maria ti Yozefi kwendaka na mbanza Betelemi. Kansi bantu vandaka mingi kibeni na bwala yango. Ata suku mosi kuvandaka ve sambu na Maria ti Yozefi, yo yina bo kwendaka kuvanda na kisika yina bo vandaka kutanina bambisi. Na ntangu bo vandaka kuna, Maria kubutaka, mpi yandi tulaka Yezu na kidikilu, mutindu nge kemona awa na kifwanisu. Kidikilu kele kisika yina bangombe ti bambisi yankaka kedilaka madya na bo.

Mambu ya kyese kusalamaka na mpimpa yina Yezu kubutukaka. Penepene ya Betelemi, wanzyo mosi kumonanaka na bangungudi mingi. Yandi songaka bo nde Yezu kuvandaka muntu mosi ya mfunu. Wanzyo kutubaka nde: ‘Tala! Mu mekwisa kuzabisa beno nsangu ya mbote yina ta pesa kyese mingi na bantu. Bubu yai, muntu mosi mebutuka yina tagulusa bantu.’—Luka 2:10, 11.

Wanzyo kutubilaka bangungudi nde bo tamona Yezu na Betelemi, yandi melala na kidikilu. Ebuna, na mbala mosi, bawanzyo yankaka ya zulu kwisaka kukuta wanzyo yina ya ntete mpi bo kumisaka Nzambi. Bawanzyo kuyimbaka nde: ‘Lukumu na Nzambi mpi Ngemba awa na nsi-ntoto na kati ya bantu yina ya yandi kendimaka.’—Luka 2:12-14.

Ntangu bawanzyo kuvutukaka na zulu, bangungudi kwendaka na Betelemi mpi bo monaka Yezu. Ntangu bo kumaka kuna, bo tubilaka Yozefi ti Maria mambu yonso ya kitoko ya bo waka. Keti nge le yindula kyese yina Maria kuvandaka na yo na mutindu yandi ndimaka na kuvanda mama ya Yezu?

Na nima, Yozefi ti Maria kunataka Yezu na mbanza Nazareti. Yezu kuyeleka kuna. Ntangu yandi kumaka mbuta, yandi yantikaka kisalu na yandi ya nene ya kusamuna. Yo vandaka mosi na kati ya bisalu yina Yehowa Nzambi kuzolaka nde Mwana na yandi kusala na ntoto. Yezu kundimaka na kusala kisalu yina, sambu yandi zolaka Tata na yandi ya zulu mingi kibeni.

Na ntwala nde Yezu kuyantika kisalu na yandi ya Longi ya Nene, Yoane Mbotiki kubotikaka yandi na Nzadi ya Yordani. Ebuna, kima mosi ya kuyituka kusalamaka! Ntangu Yezu vandaka kubasika na masa, Yehowa kutubaka katuka na zulu, nde: “Yai kele Mwana na mono ya mono ke zolaka mingi.” (Matayo 3:17) Keti nge kewaka ve kyese ntangu bibuti na nge ketubilaka nge nde bo kezolaka nge?— Ya kyeleka, Yezu mpi kuwaka kyese.

Yezu vandaka kusala mambu ya mbote ntangu yonso. Yandi yindulaka ve na kuvanda muntu yina yandi vandaka ve. Yandi tubilaka ve bantu nde yandi vandaka Nzambi. Wanzyo Gabriele kutubaka na Maria nde bo tabinga Yezu, Mwana ya Nzambi. Yezu yandi mosi kutubaka nde yandi vandaka Mwana ya Nzambi. Yandi tubilaka mpi ve bantu nde yandi mezaba mambu mingi kuluta Tata na yandi. Yandi tubaka nde: “Tata me luta mono na nene.”—Yoane 14:28.

Ata na zulu, ntangu Tata ya Yezu kupesaka yandi kisalu, Yezu kusalaka yo. Yandi tubaka ve nde yandi tasala yo, kansi na nima yandi kusala yo ve. Yandi vandaka kuzola Tata na yandi. Yo yina, yandi waka mambu yina Tata na yandi kutubaka. Na nima, ntangu Yezu kukwisaka na ntoto, yandi salaka mambu yina Tata na yandi ya zulu kutindaka yandi na kusala. Yandi lutisaka ve ntangu na yandi na kusala mambu yankaka. Yo yina Yehowa kusepelaka na Mwana na yandi!

Keti beto mpi kezola kusepedisa Yehowa?— Kana mpidina, beto fwe songaka nde beto kewilaka Nzambi mpenza, mutindu Yezu kusalaka. Nzambi ketubilaka beto na nzila ya Biblia. Yo tavanda mbote ve na kutuba nde beto kewilaka Nzambi kansi na nima beto kendima mpi kesala mambu ya kewakana ve ti yina ya Biblia kelongaka, mpidina ve?— Kuvila mpi ve nde beto tavanda na kyese ya kusepedisa Yehowa kana beto kezola yandi na masonga yonso.

Ntangu yai, beto tanga baverse yai yankaka ya Biblia ya kesonga mambu ya beto fwe zaba mpi kundima na yina metala Yezu: Matayo 7:21-23; Yoane 4:25, 26; mpi 1 Timoteo 2:5, 6.

[Kifwanisu ya kele na lutiti 33]

Inki mambu wanzyo Gabriele kusongaka Maria?

[Kifwanisu ya kele na lutiti 34]

Sambu na nki bo ke na kutula Yezu na kidikilu?

[Kifwanisu ya kele na lutiti 35]

Inki nsangu ya mbote wanzyo mosi na kati ya bawanzyo yai kutubilaka bangungudi?