Yezu Kristu—Inki Mutindu Beto Fwete Yibuka Yandi?

Na Desembri, bantu mingi na ntoto ya mvimba ke talaka bifwanisu ya Yezu bonso bebe; na kati ya kidikilu, sanduku ya nene yina bo vandaka kutudila bambisi madia. Kansi, beto fwete yibuka Yezu kaka bonso bebe?​—a Bika beto tubila mutindu mosi ya mfunu ya kuyibuka yandi. Beto lenda baka dilongi na mambu yina kuminaka kimvuka ya bangungudi na nseke pene-pene ya Betelemi na mpimpa.

Wanzio mosi basikilaka bangungudi na kintulumukina. Yandi zabisaka bo nde: “Bubu yai, . . . bo me butila beno Ngulusi, yina kele Kristu, Mfumu.” Wanzio zabisaka bo mpi nde bo ta kuta Yezu “bo me ziunga [yandi] na lele mpi me lala na kidikilu.” Kaka na ntangu yina, bawanzio ya nkaka mingi monanaka mpi yantikaka “kukumisa Nzambi.”

Inki mutindu nge zolaka kudiwa kana nge waka bawanzio ke kumisa Nzambi?​— Bangungudi vandaka na kiese kibeni! Bo tubaka nde: “Bika beto kwenda na Betelemi mpi beto tala diambu yai ya me salama.” Kuna bo monaka “Maria ti Yozefi, mpi mwana ya fioti me lala na kidikilu.”

Na nima, bantu ya nkaka kwendaka na Betelemi kisika Maria mpi Yozefi vandaka. Ntangu bangungudi zabisaka bo mambu yina salamaka, bo yonso yitukaka. Keti nge ke waka kiese ya kuzaba mambu yina ya kitoko ya me tala Yezu?​—Bantu yonso yina ke zolaka Nzambi ke waka kiese. Bika beto tala mutindu lubutuku ya Yezu ke natilaka bantu kiese ya mingi. Sambu na yo, beto tadila ntete ntangu yina Maria vandaka me kwela ntete ve.

Kilumbu mosi wanzio Gabriele kwisaka kutala Maria. Yandi silaka Maria nde yandi ta buta mwana yina “ta vanda muntu ya nene mpi bo ta binga yandi Mwana ya Muntu ya Kuluta Kuzanguka.” Gabriele tubaka nde: “Yandi ta yala bonso Ntotila . . . mpi Kimfumu na yandi ta vanda ve ti nsuka.”

Maria zolaka kuzaba mutindu diambu yina lenda salama sambu yandi me vukisaka ntete ve nitu ti bakala. Yo yina, Gabriele tendudilaka yandi nde: “Ngolo ya Muntu ya Kuluta Kuzanguka ta fika nge. Sambu na kikuma yina mpi mwana yina ta butuka bo ta binga yandi muntu ya santu, Mwana ya Nzambi.” Kukatula Mwana ya Nzambi na zulu mpi kutula yandi na divumu ya Maria sambu yandi yela bonso bebe, vandaka kimangu ya nene mpenza!

Keti nge me monaka dezia bifwanisu to bateyatre yina ke monisaka “bantu ya mayele” tatu me kwenda kutala mwana Yezu kumosi ti bangungudi?​— Na nsungi ya Lubutuku mambu yina ke salamaka mingi. Kansi, mambu yango ke vandaka ya kieleka ve. ‘Bantu yai ya mayele’ vandaka kibeni bantu ya ke zabisaka makwisa na nsadisa ya bambwetete, bantu yina ke salaka mambu yina Nzambi ke mengaka. Bika beto tala mambu yina salamaka ntangu bo kumaka. Biblia ke tuba nde: “Ntangu bo kotaka na nzo, bo monaka mwana yango ti Maria mama na yandi.” Yo yina, Yezu vandaka diaka ve bebe na kidikilu; kansi yandi vandaka mwana-fioti yina vandaka kuzinga ti Yozefi mpi Maria na nzo!

Inki mutindu bantu yango monaka Yezu?​— “Mbwetete” twadisaka bo mbala mosi ve na Betelemi, kansi ntete-ntete na Ntotila Erode na Yeruzalemi. Biblia ke tuba nde Erode sosaka kumona Yezu sambu na kufwa yandi. Sesepi, yindulula diambu yai. Nge ke yindula nde nani basisaka mbwetete yina vandaka kutwadisa bantu yina na Erode?​— Yo vandaka ve Yehowa, Nzambi ya kieleka, kansi mbeni na yandi Satana Diabulu!

Bubu yai, Satana ke pusaka bantu na kuyindula nde Yezu kele bonso bebe ya me konda ngolo. Kansi wanzio Gabriele zabisaka Maria nde: “Yandi ta yala bonso Ntotila . . . , mpi Kimfumu na yandi ta vanda ve ti nsuka.” Ntangu yai, Yezu ke yala bonso Ntotila na zulu, mpi ntama mingi ve yandi ta fwa bambeni yonso ya Nzambi. Yai mambu ya beto fwete yibuka sambu na Yezu, mpi beto fwete zabisa yo na bantu ya nkaka.