Longuka na Ndinga ya Nzambi

Inki Mutindu Bigangwa ya Kimpeve Kevandaka ti Bupusi na Zulu na Beto?

Disolo yai kepesaka bamvutu na bangyufula yina ziku nge meyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kutadila bamvutu yango ti nge.

 1. Bawanzyo kele banani?

Bawanzyo kele bigangwa ya kimpeve yina kezingaka na zulu. Bo kele ti mutindu ya luzingu yina meluta ya bantu. Nzambi ya kyeleka, yina kele ti nitu ya kimpeve, gangaka bawanzyo na ntwala ya kuganga ntoto. (Yobi 38:4, 7; Matayo 18:10) Bamilio ya bawanzyo ya kwikama kevandaka na nzyunga ya Yehowa.​—Tanga Nkunga 103:20, 21; Daniele 7:9, 10.

 2. Keti bawanzyo kesadisaka bantu?

Bawanzyo sadisaka Loti muntu ya lunungu. Yandi vandaka kuzinga na mbanza yina Nzambi bakaka lukanu ya kufwa sambu bantu vandaka kusala mambi. Bawanzyo zole pesaka Loti ti dibuta na yandi balukebisu sambu na kutina. Bantu mingi tulaka ve dikebi na lukebisu. Kansi, Loti ti bana na yandi ya bankento gulukaka sambu bo lemfukaka na lukebisu yina Nzambi pesaka bo na nzila ya bawanzyo.​—Tanga Kuyantika 19:1, 13-17, 26.

Biblia kemonisa nde, bawanzyo kesadisaka bantu bubu yai na kutwadisaka kisalu ya bantu yina kesamunaka nsangu ya mbote ya Kimfumu na kwikama yonso. (Matayo 24:14) Nsangu ya mbote kele mpi lukebisu. Bonso lukebisu yina Nzambi pesaka Loti, yo kele ve nsaka. Nzambi kepesaka yo na nzila ya bawanzyo.​—Tanga Kusonga 1:1; 14:6, 7.

Nzambi lenda sadila bawanzyo sambu na kupesa beto kikesa ntangu beto kekutana ti bampasi. Yandi tindaka wanzyo mosi sambu na kupesa Yezu kikesa.​—Tanga Luka 22:41-43.

Ntama mingi ve, Nzambi tasadila bawanzyo sambu na kufwa bantu ya mbi yina kebasisaka bampasi. Yo tapesa bantu kikesa mpenza.​—Tanga 2 Tesalonika 1:6-8.

 3. Inki mutindu bademo kevandaka ti bupusi na zulu na beto?

Kaka mutindu bantu mingi na ntoto salaka mambu ya mbi mpi lemfukilaka ve Nzambi, mutindu mosi na zulu bawanzyo mingi kolamaka na Nzambi. (2 Piere 2:4) Bo kebingaka bawanzyo yai ya bankolami bademo. Satana Dyabulu kele mfumu na bo. Satana mpi bademo na yandi kekusaka bantu.​—Tanga Kusonga 12:9.

Satana kesadilaka mumbongo ya mbi, baluyalu ya politiki mpi dibundu ya luvunu sambu na kukusa bantu na kulemfukila ve Nzambi. Yo yina, Satana kele na kisina ya kukonda lunungu, mubulu mpi bampasi yina kenyokula bantu.​—Tanga 1 Yoane 5:19.

 4. Inki mutindu bademo kekusaka bantu?

Satana mekusaka bantu mingi na kulongaka nde bafwa kekitukaka bigangwa ya kimpeve yina lenda solula ti bo. Kansi, Biblia ketuba nde bafwa lenda sala ata kima mosi ve. (Longi 9:5) Kansi, bampeve ya mbi kekusaka bantu na mutindu bo kefululaka ndinga ya bantu yina mefwaka ya beto vandaka kuzola. (Yezaya 8:19) Bampeve ya mbi kekusaka bantu yankaka na nzila ya banganga-ngombo, bantu yina ketubilaka makwisa, bisalu ya bampeve ya mbi mpi mazi. Ndinga ya Nzambi kekebisa beto na kubuya bisalu yonso ya mutindu yina. Yo yina, beto fwete losa konso kima yina ya beto kele ti yo ya kele na kuwakana ti bademo mpi lusambu ya biteki.​—Tanga Kulonga 18:10, 11; Bisalu 19:19.

Kana beto kezolaka Yehowa, beto fwete wa ve bademo boma. Kana beto kelonguka Ndinga ya Nzambi mpi kesala mambu yina yo kelomba beto, beto tatelamina Dyabulu mpi takwenda penepene ya Nzambi. Yehowa kele ngolo mingi kuluta bademo. Bawanzyo ya Nzambi ya kwikama lenda pesa beto kikesa ntangu beto kele na mfunu na yo.​—Tanga Nkunga 34:7; Yakobo 4:7, 8.

Sambu na kuzaba mambu mingi, tala kapu 10 ya mukanda yai, Inki Biblia Kelonga Mpenza?, yina Bambangi ya Yehowa mebasisaka.