Tanina Kikesa na Nge na Kisalu ya Kusamuna

KUSAMUNA nsangu ya mbote kele kisalu ya kuluta mfunu yina ke salama bubu yai na ntoto. Sambu nge kele Mbangi ya Yehowa, ntembe kele ve nde nge ke bakisaka nde kupesa maboko na kisalu ya kukumisa bantu balongoki ya Yezu kele lukumu mingi. Ata mpidina, nge ke ndimaka nde, bantangu ya nkaka bansamuni mpi bapasudi-nzila ke kutanaka ti bampasi na yina me tala kutanina kikesa na bo na kisalu ya kusamuna.

Mpasi ya nkaka ya bansamuni mingi ke kutanaka ti yo kele nde ntangu bo ke salaka kisalu ya nzo na nzo, bo ke kutaka ve bantu; sambu, bantu mingi ke vandaka ve na banzo na bo. Ata bansamuni me kuta bo na banzo, mbala mingi bantu ke monisaka nde bo kele ve na mfunu ya nsangu yina bansamuni me natila bo, bankaka nkutu ke kulaka bansamuni. Bansamuni ya nkaka ke kudiyangisaka mingi sambu teritware na bo kele nene mpi bantu mingi ke ndima nsangu, bo ke yindulaka nde bo ta kuka ve kusamuna na teritware yina ya mvimba. Bansamuni ya nkaka me samunaka bamvula mingi, bo yindulaka ve nde kisalu yango ta baka ntangu mingi mutindu yina, yo yina bo me lembaka nitu.

Keti kuzaba nde bansadi ya Yehowa ke kutana ti bampasi yina lenda manisa kikesa na bo na kisalu ya kusamuna lenda yitukisa beto? Ve. Mpi, beto fwete yindula ve nde na nsi-ntoto yai ya Satana Diabulu “muntu ya mbi,” beto ta samuna nsangu ya kieleka ya Nzambi kukonda mpasi.—1 Yoa. 5:19.

Yo vanda nge ke kutana ti mpasi ya nki mutindu na kisalu ya kusamuna, vanda ti kivuvu nde Yehowa ta sadisa nge na kununga yo. Kansi, inki lenda sadisa nge na kutanina kikesa na nge na kisalu ya kusamuna? Bika beto tadila mambu yina lenda sadisa beto.

Konso mvula, bamilio ya bantu ke bakaka mbotika sambu na kukuma Bambangi ya Yehowa. Kana nge me katuka kubaka mbotika, ntembe kele ve nde nge ke sepelaka na kubaka eksperiansi ya bansamuni ya ntama. Kana nge kele nsamuni ya ntama, keti nge ke mona ve nde yo me fwana na kusadisa bansamuni ya mpa?

Yezu zabaka nde balongoki na yandi vandaka na mfunu ya lusadisu sambu na kukuma bansamuni ya mbote; yo yina, yandi songaka bo mutindu ya kusamuna. (Luka 8:1) Bubu yai mpi, bampangi ya nkaka kele na mfunu ya lusadisu sambu na kukuma bansamuni ya mbote.

Sambu na kukuma nsamuni ya mbote, yo ta lomba kaka ve nde nsamuni ya mpa kusamuna mingi. Yandi ta vanda mpi na mfunu ya lusadisu ya zola ya bampangi ya nkaka. Lusadisu yina ke tadila mpi (1) kuzabisa nsamuni yina kele ti eksperiansi ve mutindu ya kubongisa bangogo ya kukotila na masolo, (2) kuyantika disolo ti muwi mpi bantu yina ke luta na bala-bala, (3) kukabula mikanda, (4) kuvutukila bantu yina monisaka mpusa, mpi (5) kuyantika kulonguka Biblia ti bantu. Kieleka kele nde, nsamuni ya mutindu yai ta kuma nsamuni ya mbote kaka kana yandi ke tula dikebi na mambu yina mpangi ya ke pesa yandi formasio ke tuba to ke sala, mpi kana na kisalu ya kusamuna yandi ke sadila mambu yina bo zabisaka yandi. (Luka 6:40) Ntembe kele ve nde, nsamuni ya mpa ta sepela nde bampangi kuwidikila yandi na dikebi yonso mpi kusadisa yandi ntangu yandi kele na mpusa ya lusadisu. Nsamuni ya mpa ke sepelaka mpi nde bo sikisa yandi mpi kupesa yandi bangindu yina lenda sadisa yandi.​—Lo. 4:9, 10.

Ata nge me sala bikesa sambu na kusolula ti bawi, bilumbu ya nkaka, masolo ya mbote ta vanda kaka yina nge ta solula ti mpangi ya nge ke samuna ti yandi. Yibuka nde Yezu tindaka balongoki na yandi na kisalu ya kusamuna “zole-zole.” (Luka 10:1) Mpidina, ntangu yina bansamuni ke lutisa na kisalu ya kusamuna ke pesaka bo dibaku ya ‘kupesana kikesa.’​—Bar. 1:12.

Inki mambu nge lenda tuba ntangu beno ke solula? Nge lenda tubila diambu mosi ya ke pesa kikesa yina nge me kutana ti yo, ya nge me katuka kulonguka na kulonguka na nge mosi, na lusambu ya dibuta, to yina nge longukaka na lukutakanu, yina kumisaka lukwikilu na nge ngolo. Yo lenda vanda mpi nde, yo kele mbala ya ntete ya nge ke samuna ti mpangi yina. Sosa kuzaba mutindu yandi longukaka kieleka. Inki ndimisaka yandi nde yai kele kibeni dibundu ya kieleka? Inki mikumba to baeksperiansi yandi me bakaka? Nge lenda tubila mpi baeksperiansi na nge. Ata bantu ke ndima beno to ve, kusamuna ti mpangi ya nkaka ke pesaka dibaku ya ‘kulanda na kutungana.’​—1 Bate. 5:11.

Kuvanda ti kikalulu ya kulonguka ta sadisa beto na kutanina kikesa na beto na kisalu ya kusamuna. “Mpika ya kwikama mpi ya mayele” ke basisaka mikanda mingi yina ke vandaka ti masolo ya mutindu na mutindu. (Mat. 24:45) Yo yina, masolo kele mingi yina nge lenda longuka sambu na kukumisa kimpeve na nge ngolo. Na kulonguka na beto mosi, beto lenda sosa mvutu na ngiufula yai: Sambu na nki kisalu ya kusamuna kele mfunu mingi? Lupangu ya lutiti 16 ke pesa mwa bikuma.

Kutadila bangindu yina lupangu ke tubila lenda pusa nge na kulanda kusamuna ti kikesa. Nge lenda longuka yo diaka sambu na kusosa bikuma ya nkaka. Yo yina, yindulula na bikuma yina mpi baverse yina ke simba bikuma yango. Ntembe kele ve nde, kusala mpidina ta sadisa nge na kutanina kikesa na nge na kisalu ya kusamuna.

Mbala na mbala, organizasio ya Yehowa ke zabisaka beto bangindu yina beto lenda sadila sambu na kutomisa mayele na beto ya kusamuna. Mu mbandu, katula kisalu ya nzo na nzo, beto lenda sonikila bantu mikanda, kusamuna na nzila ya telefone, na babala-bala, na bisika ya bantu mingi, na mabaku ya mbote mpi na bisika ya mumbongo. Beto lenda fiotuna mpi kisalu na beto ya kinsuni sambu na kusamuna na teritware yina bantu ke samunaka mingi ve.

Keti nge me mekaka kusadila bangindu yina? Bampangi mingi me sadilaka yo mpi yo me basisaka mbutu ya mbote. Beto tadila bambandu tatu ya ke landa.

Mbandu ya ntete ke tadila bangindu yina vandaka na Kisalu na Beto ya Kimfumu, na disolo mosi yina tubilaka mutindu ya kuyantika kulonguka Biblia ti bantu. Yo pusaka April, mpangi-nkento mosi na kulomba banduku na yandi tatu ya kisalu na kulonguka Biblia. Yandi yitukaka mpi sepelaka mingi ntangu bo yonso ndimaka mpi kumaka kukwisa na balukutakanu.

Mbandu ya zole ke tadila bangindu ya kukabula bazulunalu. Kisalu na Beto ya Kimfumu siamisaka beto na kusosa bantu yina ta sepela na disolo mosi yina kele na zulunalu. Na États-Unis, nkengi mosi ya nziunga tubaka nde na teritware mosi yandi kabulaka Réveillez-vous ! yina vandaka kutubila ba pneu, na bantu yonso yina vandaka kusala na bisika yina bo ke tekaka ba pneu. Yandi ti nkento na yandi kabulaka mpi Réveillez-vous ! yina vandaka ti ntu-diambu “Mieux comprendre son médecin,” na babiro ya minganga kuluta 100 na nziunga na yandi. Yandi ke tuba nde: “Kukwenda kutala bo sadisaka beto na kuzabana ti bo mpi kupesa bo mikanda na beto. Ntangu beto zabanaka ti bo mbote-mbote, beto kumaka kukwenda kutala bo kuna.”

Mbandu ya tatu ke tadila ngindu ya kusamuna na nzila ya telefone. Judy, mpangi-nkento mosi sonikilaka biro ya ke twadisaka kisalu na ntoto ya mvimba sambu na kumonisa ntonda na ngindu ya kitoko yina bo pesaka na kusamuna na nzila ya telefone. Yandi ke tuba nde, mama na yandi yina vandaka ti bamvula 86 yina vandaka mbefo, kumaka kusamuna mbala na mbala na nzila ya telefone, mpi yo sadisaka yandi na kulonguka ti mama mosi ya bamvula 92!

Bangindu yina mikanda na beto ke pesaka sambu na kuta kimbangi, ke sadisaka kibeni. Sadilaka yo! Yo lenda sadisa nge na kutanina kiese mpi kikesa na nge na kisalu ya kusamuna.

Kusamuna mbote ke tendula ve kukabula mikanda mingi, kulonguka Biblia ti bantu mingi, to kukumisa bantu Bambangi ya Yehowa. Katula kaka bantu ya dibuta na yandi, bantu ikwa Noa sadisaka na kukuma bansadi ya Yehowa? Ata mpidina, yandi vandaka nsamuni ya mbote kibeni. Diambu ya mfunu kele kusadila Yehowa na kwikama yonso.​—1 Bak. 4:2.

Bansamuni mingi me monaka nde sambu na kuyedisa kikesa na bo na kisalu ya kusamuna, bo fwete kuditudila balukanu ya mbote. Inki lenda vanda balukanu yango? Lupangu yina kele na lutiti yai ke tubila ndambu ya balukanu yango.

Ti lusadisu ya Yehowa, sala nde kisalu na nge kubasisa mbutu ya mbote. Kana nge ke sala bikesa sambu na kulungisa balukanu na nge, nge ta vanda na kiese na mambu yina nge ke sala mpi ya kuzaba nde nge ke sala yonso yina nge lenda sala sambu na kuzabisa nsangu ya mbote.

Ya kieleka, nge lenda kutana ti bampasi na kisalu na nge ya kusamuna. Kansi, kele ti mambu yina nge lenda sala sambu na kukuma nsamuni ya kikesa. Beno pesana kikesa ti muntu yina nge ke samuna ti yandi, vanda ti kikalulu ya kulonguka mbala na mbala, sadila bangindu yina mpika ya kwikama mpi ya mayele ke pesaka, mpi kuditudila balukanu ya mbote. Kuvila ve nde nge kele ti dibaku ya nene yina Nzambi me pesaka nge: kuvanda Mbangi na yandi sambu na kuzabisa nsangu ya mbote. (Yez. 43:10) Kana nge ke sala yonso sambu na kutanina kikesa na nge na kisalu ya kusamuna, nge ta kuma ti kiese ya mingi kibeni!