-
Inki Mambu Nzambi Ke Kana Kusala Sambu na Beto?Zinga Mvula na Mvula!—Kulonguka ya Biblia Yina Ta Natila Nge Mambote
-
-
DILONGI 25
Inki Mambu Nzambi Ke Kana Kusala Sambu na Beto?
Biblia ke tubaka nde luzingu ya bantu kele ya “ntangu fioti mpi [yo] me fulukaka na bampasi.” (Yobi 14:1) Keti yai luzingu ya Nzambi ke zolaka nde beto vanda ti yo? Kana mpidina ve, nki mambu yandi ke kana kusala sambu na beto? Keti mambu yango ta salama mpenza? Beto tala bamvutu ya Biblia ya ke pesa kikesa.
1. Yehowa ke zolaka nde beto vanda ti luzingu ya nki mutindu?
Yehowa ke zolaka nde beto vanda ti luzingu ya mbote kibeni. Ntangu yandi salaka bantu ya ntete, Adami ti Eva, yandi tulaka bo na paladisu ya kitoko, disongidila kilanga ya Edeni. Na nima, “Nzambi sakumunaka bo, mpi yandi tubilaka bo nde: ‘Beno buta mingi mpi beno kuma mingi, beno fulusa ntoto mpi beno yala yo.’” (Kuyantika 1:28) Yehowa vandaka kuzola nde bo buta bana, bo kumisa ntoto ya mvimba paladisu mpi bo keba bambisi. Yandi vandaka kuzola nde bantu yonso kuvanda ti sante ya mbote kibeni mpi bo zinga mvula na mvula.
Ata mambu me salamaka ve mutindu yai,a Nzambi ke zolaka kaka nde beto kuma ti luzingu ya mbote mutindu yandi vandaka kuzola ntete. (Yezaya 46:10, 11) Tii bubu yai, yandi ke zolaka nde bantu ya bulemfu kuvanda ti luzingu ya mbote kibeni mpi bo zinga mvula na mvula.—Tanga Kusonga 21:3, 4.
2. Inki lenda sadisa beto na kuzinga na kiese bubu yai?
Yehowa me salaka beto ti “nzala ya mambu ya kimpeve,” disongidila nzala ya kuzaba mpi ya kusambila yandi. (Tanga Matayo 5:3-6.) Yandi ke zolaka nde beto sala kinduku ya ngolo ti yandi, beto ‘tambula na banzila na yandi yonso, beto zola yandi’ mpi beto sadila yandi “na ntima na [beto] ya mvimba.” (Kulonga 10:12; Nkunga 25:14) Kusala mutindu yai ke sadisaka beto na kuzinga mpenza na kiese ata beto ke kutana ti bampasi. Beto ke kumaka mpenza na kiese kana beto ke sambila Yehowa mpi ke zitisa bansiku na yandi.
LONGUKA MAMBU MINGI
Beto tala zola ya mingi yina Yehowa monisaka ntangu yandi vandaka kuyidikila beto ntoto mpi beto tala na Ndinga na yandi mambu yina yandi ke kana kusala sambu na beto.
3. Yehowa ke zolaka nde bantu kuvanda ti luzingu ya mbote mpenza
Beno tala VIDEO mpi na nima beno pesa mvutu na ngiufula ya ke landa.
Sambu na nki Nzambi salaka ntoto, kisika yai ya kitoko?
Beno tanga Longi 3:11 mpi na nima beno pesa mvutu na ngiufula yai:
Mutindu verse yai me monisa yo, Yehowa ke zolaka nde beto vanda ti luzingu ya nki mutindu?
4. Yehowa ke zolaka kaka nde bantu kuvanda ti luzingu ya mbote mpenza
Beno tanga Nkunga 37:11, 29 mpi Yezaya 55:11. Na nima beno pesa mvutu na ngiufula yai:
Inki mutindu beto me zaba nde Yehowa ke zolaka kaka nde beto vanda ti luzingu ya mbote mpenza?
Kana nzo mosi me beba, bo lenda yidika yo diaka. Mutindu mosi mpi Nzambi ta yidika ntoto sambu na bantu yina ke zolaka yandi
5. Kusambila Yehowa ke sadisaka beto na kuzinga mpenza na kiese
Beto ke kumaka mpenza na kiese ntangu beto ke zabaka sambu na nki beto kele na luzingu. Beno tala VIDEO mpi na nima beno pesa mvutu na ngiufula ya ke landa.
Inki mambote Terumi bakaka ntangu yandi zabaka sambu na nki Nzambi me salaka beto?
Beno tanga Longi 12:13 mpi na nima beno pesa mvutu na ngiufula yai:
Inki beto fwete sala mutindu beto me zaba nde Yehowa me salaka mambu mingi sambu na beto?
MUNTU YA NKAKA LENDA YULA NGE NDE: “Sambu na nki beto kele na luzingu?”
Inki mvutu nge ta pesa?
NA BUNKUFI
Yehowa ke zolaka nde beto vanda ti luzingu ya mbote kibeni mpi beto zinga mvula na mvula awa na ntoto. Kana beto ke sambila yandi na ntima ya mvimba, beto ta kuma kuzinga na kiese banda bubu yai.
Inki Nge Me Simba?
Yehowa vandaka kuzola nde Adami ti Eva kuvanda ti luzingu ya nki mutindu?
Inki mutindu beto me zaba nde Yehowa ke zolaka kaka nde bantu kuvanda ti luzingu ya mbote mpenza?
Inki lenda sadisa nge na kuzinga mpenza na kiese?
TALA MPI
Tala mambu ya ke ndimisa nde kilanga ya Edeni vandaka mpenza.
“Edeni Keti Yo Vandaka Kisika ya Ntete Yina Bantu Kuzingaka?” (Nzozulu ya Nkengi, Februari 1, 2011)
Tala mambu ya ke ndimisaka beto nde ntoto ta vanda mvula na mvula.
Tala mambu ya Biblia ke lombaka beto na kusala sambu na kuvanda na kiese.
“Sambu na Nki Beto Kele na Luzingu?” (Disolo ya kele na jw.org)
Tala mutindu bakala mosi yina vandaka kuyindula nde yandi vandaka na bima yonso bakisaka nde yandi kondaka kima mosi na luzingu.
a Na dilongi ya ke landa, nge ta zaba mambu yina salaka nde beto kuma ti luzingu ya mpasi mutindu yai.
-
-
Kimfumu ya Nzambi Kele Nki?Zinga Mvula na Mvula!—Kulonguka ya Biblia Yina Ta Natila Nge Mambote
-
-
2. Banani fwete yala ti Yezu?
Yezu ke yala ve yandi mosi. Bantu ya “mabuta yonso, ya bandinga yonso, ya bansi yonso, mpi ya makanda yonso” fwete kuma bantotila sambu na kuyala ntoto. (Kusonga 5:9, 10) Bantu ikwa ta yala ti Kristu? Banda ntangu Yezu vandaka awa na ntoto, bantu mingi kibeni me kumaka balongoki na yandi. Kansi bantu 144 000 mpamba fwete kwenda na zulu sambu na kuyala ti Yezu. (Tanga Kusonga 14:1-4.) Bakristu yonso ya nkaka ta zinga awa na ntoto mpi bo ta kuma bantu ya Kimfumu ya Nzambi.—Nkunga 37:29.
-
-
Mambu Yina Kimfumu ya Nzambi Ta SalaZinga Mvula na Mvula!—Kulonguka ya Biblia Yina Ta Natila Nge Mambote
-
-
Mambu Yina Kimfumu ya Nzambi Ta Sala
Kimfumu ya Nzambi me bandaka dezia kuyala. Kubika fioti, yo ta yidika mpenza mambu mingi na ntoto. Beto tala mwa mambu ya mbote yina Kimfumu ya Nzambi ta sala.
1. Inki Kimfumu ya Nzambi ta sala sambu bantu kuzinga diaka na ngemba mpi bo sala kaka mambu ya mbote?
Yezu, Ntotila ya Kimfumu ya Nzambi, ta fwa bantu ya mbi mpi bimfumu ya bantu na bitumba ya Armagedoni. (Kusonga 16:14, 16) Na ntangu yina, mambu yai ya Biblia tubaka ta lungana mpenza: “Kubika kaka fioti, mpi bantu ya mbi ta vanda diaka ve.” (Nkunga 37:10) Na nzila ya Kimfumu ya Nzambi, Yezu ta sala nde ngemba mpi mambu ya mbote kuvanda na ntoto.—Tanga Yezaya 11:4.
2. Luzingu ta vanda nki mutindu ntangu luzolo ya Nzambi ta salama awa na ntoto?
Ntangu Kimfumu ya Nzambi ta yala ntoto, ‘bantu ya mbote ta baka ntoto mpi bo ta zinga mvula na mvula na zulu na yo.’ (Nkunga 37:29) Yindula mutindu luzingu ta vanda na ntoto ntangu bantu yonso ta kuma bantu ya mbote, ta zolaka Yehowa mpi ta zolanaka! Ata muntu mosi ve ta belaka diaka mpi bantu yonso ta zingaka mvula na mvula.
3. Inki mambu Kimfumu ya Nzambi ta sala ntangu bantu ya mbi ta fwa?
Na nima ya lufwa ya bantu ya mbi, Yezu ta yala bamvula 1 000. Na ntangu yina, yandi mpi bantu 144 000 yina ta yala ti yandi ta sadisa bantu na kukuma bantu ya kukonda masumu. Na nsuka ya bamvula 1 000, ntoto ta kuma paladisu mosi ya kitoko mpi bantu yonso ta zingaka na kiese sambu bo ta lemfukaka na bansiku ya Yehowa. Na nima, Yezu ta vutula Kimfumu na Yehowa, Tata na yandi. “Zina [ya Yehowa ta kuma diaka] ya santu” na mutindu yina me salamaka ntete ve. (Matayo 6:9, 10) Yo ta monana pwelele nde Yehowa kele Mfumu ya mbote yina ke zolaka bantu na yandi. Na nima, Yehowa ta fwa Satana ti bademo na yandi mpi bantu yonso ya nkaka yina ta kolama na luyalu na yandi. (Kusonga 20:7-10) Kimfumu ya Nzambi ta nata luzingu ya mbote ya kukonda nsuka.
LONGUKA MAMBU MINGI
Beto tala sambu na nki beto fwete tula ntima nde Nzambi ta sadila Kimfumu na yandi sambu na kulungisa mambu yina Biblia ke tubaka sambu na bilumbu ke kwisa.
4. Kimfumu ya Nzambi ta fwa bimfumu ya bantu
“Muntu me yalaka muntu sambu na kupesa yandi mpasi.” (Longi 8:9) Yehowa ta sadila Kimfumu na yandi sambu na kumanisa mambu yai ya mbi.
Beno tanga Daniele 2:44 mpi 2 Batesalonika 1:6-8. Na nima, beno pesa mvutu na bangiufula yai:
Inki Yehowa ti Mwana na yandi Yezu ta sala bimfumu ya bantu mpi bantu yina ke pesaka yo maboko?
Inki mutindu mambu ya nge me longuka sambu na Yehowa mpi Yezu ke ndimisa nge nde mambu ya bo ta sala ta vanda ya mbote?
5. Yezu kele Ntotila ya kuluta mbote
Yezu, Ntotila ya Kimfumu ya Nzambi, ta sala mambu mingi sambu na mambote ya bantu na ntoto. Beno tala VIDEO sambu na kumona mutindu Yezu monisaka nde yandi ke zolaka kusadisa bantu mpi nde Nzambi muntu me pesaka yandi ngolo ya kusala yo.
Ntangu Yezu vandaka awa na ntoto, yandi salaka mwa mambu yina Kimfumu ya Nzambi ta sala. Na kati ya mambu yai ya ke landa, nki yo nge ke vingila kumona ti nzala ya ngolo? Beno tanga baverse ya kele na lweka ya mambu yango sambu na kubakisa yo mbote.
NTANGU YEZU VANDAKA NA NTOTO, YANDI . . .
NA ZULU, YEZU . . .
lembikaka nzadi-mungwa mpi mupepe ya ngolo.—Marko 4:36-41.
ta yidika bisika yonso yina ntoto me bebaka.—Yezaya 35:1, 2.
disaka bantu mingi na mutindu ya kuyituka.—Matayo 14:17-21.
ta manisa nzala na ntoto.—Nkunga 72:16.
belulaka bantu mingi.—Luka 18:35-43.
ta sala nde bantu yonso kuvanda ti sante ya mbote kibeni.—Yezaya 33:24.
vutulaka bantu na luzingu.—Luka 8:49-55.
ta futumuna bantu ya kufwa mpi ta manisa bampasi yina lufwa ke nataka.—Kusonga 21:3, 4.
6. Kimfumu ya Nzambi ta sala nde bantu kuvanda ti luzingu ya mbote na bilumbu ke kwisa
Kimfumu ya Nzambi ta lungisa mbote-mbote mambu yina Yehowa kanaka ntete sambu na bantu. Bantu ta zinga mvula na mvula na paladisu na ntoto. Beno tala VIDEO sambu na kumona mutindu Yehowa ke sadila Mwana na yandi Yezu sambu na kulungisa mambu yina yandi ke kana kusala sambu na bantu.
Beno tanga Nkunga 145:16 mpi na nima beno pesa mvutu na ngiufula yai:
Inki mpila nge ke kudiwa mutindu nge me zaba nde Yehowa ta “lungisa nzala ya konso kima ya kele na luzingu”?
BANTU YA NKAKA KE TUBAKA NDE: “Bampasi lenda mana kana bantu ya mbote kukota na guvernema.”
Inki bampasi Kimfumu ya Nzambi ta manisa yina bimfumu ya bantu lenda kuka ve?
NA BUNKUFI
Kimfumu ya Nzambi ta lungisa mambu yina Nzambi ke kana kusala. Yo ta kumisa ntoto ya mvimba paladisu mpi bantu yonso ya mbote ta zinga kuna mpi ta sambilaka Yehowa mvula na mvula.
Inki Nge Me Simba?
Inki mutindu Kimfumu ya Nzambi ta santisa zina ya Yehowa?
Inki ke ndimisa nge nde Kimfumu ya Nzambi ta sala mambu ya Biblia ke tubaka?
Na kati ya mambu yina Kimfumu ya Nzambi ta sala, nki yo nge ke vingila kumona ti nzala ya ngolo?
TALA MPI
Tala kana Armagedoni kele nki.
“Bitumba ya Armagedoni Kele Nki?” (Disolo ya kele na jw.org)
Tala mambu yina ta salama na nsungi yina Yezu bingaka nde “mpasi ya nene.”
Tala mutindu mabuta lenda yindula mambote yina Kimfumu ya Nzambi ta natila beto na Paladisu.
Na disolo “Bangiufula Mingi ya Mono Vandaka Kudiyula Vandaka Kuyangisa Mono,” tala mutindu muntu mosi ya mubulu zwaka bamvutu na bangiufula yina yandi vandaka kudiyula.
“Biblia Ke Sobaka Luzingu ya Bantu” (Disolo ya kele na Nzozulu ya Nkengi)
-