Yehowa, ‘Nzambi Mosi ya Kezolaka Bantu ti Kuwila Bo Mawa’

“Mono kele Mfumu Nzambi. Mono kele Nzambi mosi ke zolaka bantu ti kuwila bo mawa; mono ke waka makasi nswalu ve kansi mono ke songaka kaka mambote na mono. Mono ke salaka mambu yonso ya mono ke tubaka.”​—KUBASIKA 34:6.

 1. (a) Inki ngindu ya kepesa kikesa Biblia kemonisa sambu na bayina ke ti bampangi ya mebasikaka na dibundu? (b) Inki mabanza Yehowa kele na yau sambu na bayina kevilaka nzila?

MUKRISTU mosi keta nde: “Mwana na mono ya nkento songaka mono nde yandi vandaka na nzala ya kubasika na dibundu ya Bukristu. Mono vandaka lala ti mpasi na ntima bilumbu, bamposo, nkutu bangonda mingi na nima. Yau vandaka kima mosi ya mbi, mbi kuluta lufwa.” Yo kepesaka mpasi mingi mpenza na kumona muntu ya nge kezolaka mingi mebikisa nzila ya lusambu ya kukonda mvindu. Keti dyambu ya mutindu yina mebwilaka nge? Kana nde ee, kulemba nitu ve. Zaba nde nge ke nge mosi ve, Yehowa mpi kewa bonso nge. (Kubasika 3:7; Yezaya 63:⁠9) Kansi, mabanza na yandi kele nde inki sambu na bantu yina mevilaka nzila? Biblia kemonisa nde Yehowa ke na kubinga bau na mawa yonso, na kwisa kubaka dyaka mambote na yandi. Na bilumbu ya Malashi, yandi bondilaka Bayuda ya ntu-ngolo nde: “Beno kwisa vutuka na mono, ebuna mono mpi ta vutuka na beno.”​—Malashi 3:⁠7.

 2. Inki mutindu Biblia kemonisa nde mawa ke ti kisika ya nene na kimuntu ya Yehowa?

² Na Ngumba ya Sinai, Nzambi songaka Moize nde yandi kele Nzambi ya mawa. Yandi songaka yandi nde: “Mono kele Nzambi mosi ke zolaka bantu ti kuwila bo mawa; mono ke waka makasi nswalu ve kansi mono ke songaka kaka mambote na mono. Mono ke salaka mambu yonso ya mono ke tubaka.” (Kubasika 34:⁠6) Ndinga yai kemonisa nde mawa ke ti kisika ya fyoti ve na kimuntu ya Yehowa. Piere tubaka nde Yehowa “ke zolaka ve nde ata muntu mosi kuvila; kansi yandi ke zolaka nde bantu yonso kubalula ntima.” (2 Piere 3:⁠9) Ata mpidina, mawa ya Nzambi kele ti kisika ya yau kesukaka. Yandi songaka Moize nde: “Mono ke nungisaka ve bantu yina ke salaka mbi, mono ke vilaka ve na kupesa ndola.” (Kubasika 34:7; 2 Piere 2:⁠9) Kansi, “Nzambi kele zola,” ye na kati ya zola, mawa kevandaka ti kisika ya nene. (1 Yoane 4:​8, NW; Yakobo 3:17) Yehowa “ke wilaka beto makasi ve tii kuna,” mpi yandi “ke vandaka na kiese na kusonga beto kuzola” na yandi.​—⁠Mishe 7:​18, 19.

 3. Inki mutindu ngindu ya Yezu ti ya balongi ya Bansiku mpi Bafarize vandaka mutindu mosi ve na yina metala mawa?

³ Yezu kele muntu ya kumonisaka mbotembote bikalulu ya Tata na yandi ya zulu na mutindu na yandi ya kuzinga. (Yoane 5:19) Mutindu yandi bakaka bantu ya mbi ti mawa yonso kesonga ve nde yandi vandaka mona masumu na bau bonso kima mosi ya fyoti. Ve, yina vandaka mawa kaka bonso yina yandi vandaka wila bambefu. (Fwanisa ti Marko 1:​40, 41.) Ee, Yezu monisaka nde kikalulu ya kuwila bankaka mawa kele na kati ya “Bansiku ya kuluta mfunu.” (Matayo 23:23) Kansi, balongi ya Bansiku ti Bafarize vandaka na kikalulu yai ve. Bansiku na bau vandaka ve ata na ndambu ya mawa fyoti. Ntangu bau monaka Yezu kisika mosi ti bantu ya masumu, bau bokutaka nde: “Muntu yai ke yambaka bantu ya mbi, yandi ke diaka mpi ti bo!” (Luka 15:​1, 2) Yezu pesaka bambandu tatu ya kufuluka ti kikalulu ya mawa ya Nzambi, sambu na kulonga bantu ya mbi yai.

 4. Tanga bambandu zole ya Yezu kupesaka ti malongi ya yandi basisaka na yau.

⁴ Ntete, Yezu pesaka mbandu ya muntu yina bikisaka mameme 99, sambu na kwenda kusosa dimeme mosi ya kuvilaka. Yandi longaka bau nde: “[Zulu] ta mona kiese mingi sambu na muntu mosi ya masumu yina me balula ntima. Kiese . . . yina ta luta kiese yina [yo] ke monaka sambu na bantu makumi uvwa na uvwa ya mbote yina ke na mfunu ve ya kubalula ntima.” Na nima, Yezu pesaka mbandu ya nkento mosi ya kewa kyese sambu yandi mezwa kakibende mosi ya mbongo ya kuvilaka. Yandi longaka bau nde: “Bawanzio ya Nzambi ta mona kiese sambu na muntu mosi ya masumu yina me balula ntima.” Mbandu ya tatu, Yezu taka yau bonso kingana.a Bantu mingi kemonaka yau bonso kingana ya kuluta bingana ya nda yonso na kitoko. Beto tadila kingana yai sambu yau tasadisa beto na kuzaba mawa ya Nzambi ti kufulula yau.​—⁠Luka 15:​3-10.

Mwana ya Ntu-Ngolo Mekatuka na Nzo na Bo

5, 6. Inki mutindu mwana ya leki, yina Yezu tubilaka na mbandu ya tatu, monisaka kikalulu ya mbi ya kukonda ntonda?

⁵ “Kuvandaka na muntu mosi, yandi vandaka na bana zole ya babakala. Kilumbu mosi mwana yina ya leki tubilaka tata na yandi nde: ‘Tata, pesa mono dikabu na mono ya bima yina ya mono fweti baka na kimvwama na nge.’ Ebuna tata kabilaka bo bima na yandi. Na nima ya bilumbu fioti, leki tekaka bima yonso yina ya yandi bakaka na tata na yandi, ebuna yandi kwendaka na nsi mosi ya ntama. Kuna yandi bebisaka mbongo na yandi na mubulu.”​—⁠Luka 15:​11-13.b

⁶ Awa mwana yai ya leki monisaka kikalulu ya mbi ya kukonda ntonda. Ntete, yandi lombaka dikabu na yandi ya bima, na nima yandi kwendaka kuyonika yau na luzingu ya “mubulu.” Ngogo ya Kigreki ya bo mebalula awa nde “mubulu” kemonisa “luzingu mosi ya kimpumbulu.” Muntu mosi ya mayele ketendula yau bonso, “kulosa bikalulu ya mbote to kubaka bikalulu ya mbi.” Yai kele kikuma ya bantu mingi kebingaka mwana yai na kingana ya Yezu nde mwana-zoba, sambu yandi yonikaka bikalulu na yandi ya ntete ti bima na yandi yonso.

 7. Banani bubu yai kele bonso mwana-zoba, ye inki kepusaka bamingi na kati ya bantu yina na kusosa dipanda na “nsi mosi ya ntama”?

⁷ Keti bubu yai kele na bantu ya kele bonso mwana-zoba? Ee. Mawa mingi sambu mingi na kati na bau mebasikaka na “nzo” ya ngemba ya Tata na beto ya zulu Yehowa. (1 Timoteo 3:15) Bankaka na kati ya bantu yai kemonaka nzo ya ngemba ya Yehowa bonso boloko; disu na yandi bonso polisi, kansi bonso kima ya lutaninu ve. (Fwanisa ti Nkunga 32:⁠8.) Baka mbandu ya Mukristu mosi ya nkento, mwana ya bo sansaka ti minsiku ya Biblia. Kansi, yandi kudipesaka na dyamba ti na malafu ya ngolo. Tala ngindu ya yandi vandaka na yau na ntangu yina: “Mu vanda sosa kumonisa nde mu lendaka kuzinga mbote mu mosi. Mu vandaka na nzala ya kusala mutindu ntima na mono kezola, mu vanda zola ve muntu kwisa kusonga mono nde ve, kusala buna ve.” Mwana nkento yai landaka dikulu ya mwana-zoba, yandi sosaka dipanda. Mawa mingi, bo kwisaka kubasisa yandi na dibundu, sambu bikalulu na yandi vandaka wakana dyaka ve ti Masonuku.​—⁠1 Korinto 5:​11-13.

 8. (a) Inki mutindu beto kesadisaka bayina kesosa kubuya minsiku ya Nzambi? (b) Sambu na inki beto fwete zitisa luzolo ya muntu na muntu na mambu ya lusambu?

⁸ Yo kepesaka mpenza mpasi na ntima na kumona mpangi mosi ya Mukristu kezola dyaka ve kulanda minsiku ya Nzambi. (Filipi 3:18) Na mambu ya mutindu yai, bankuluntu ti bantu yankaka ya mefwana na kimpeve, kesalaka ngolo sambu na kusadisa bampangi yina kebakaka ngindu ya mbi yai. (Galatia 6:⁠1) Ata mpidina, bau kepusaka ve muntu na kulanda kuvanda Mukristu na kingolongolo. (Matayo 11:​28-30; 16:24) Ata bana, kana bau melungisa mvula ya mefwana, bau mosi fwete baka badesizio na bau na makambu ya lusambu. Konso muntu na kati na beto kele ti kimpwanza ya kusola, na nsuka, yandi mosi tasamba na ntwala ya Nzambi. (Roma 14:12) Ee, beto ‘takatula bambuma yina beto kunaka.’ Bilumbu fyoti na nima, mwana-zoba monaka masonga ya mambu yai.​—⁠Galatia 6:​7, 8.

Mpasi na Insi Mosi ya Ntama

9, 10. (a) Inki mpasi bwilaka mwana-zoba, ye inki lukanu yandi bakaka? (b) Pesa mbandu mosi ya kemonisa nde bayina keyambulaka lusambu ya kyeleka bubu yai kemonaka mpasi bonso mwana-zoba.

⁹ “Ntangu yandi me manisa mbongo na yandi yonso, nzala ya ngolo kwisaka na nsi yina, ebuna yandi yantikaka kumona mpasi. Yo yina yandi kwendaka kusosa kisalu na muntu mosi ya nsi yina, ebuna muntu yina bakaka yandi. Yandi tindaka yandi na bilanga na yandi sambu na kutala bangulu na yandi. Yandi vandaka kuzola kudia bambuma yina ya bangulu ke diaka, sambu yandi dia, yandi fuluka, kansi ata muntu mosi ve vandaka kupesa yandi yo.”​—⁠Luka 15:​14-16.

¹⁰ Ntangu mwana-zoba mebikala maboko mpamba, na kusosa ve nzila ya kuvutuka na nzo, yandi kwendaka kusosa kisalu. Muntu mosi pesaka yandi kisalu ya kapita ya bangulu. Na Nsiku ya Moize, bangulu vandaka na ndonga ya bambisi ya mvindu. Muyuda lendaka kundima ve na kuvanda kapita ya bangulu. (Levi 11:​7, 8) Kansi mwana-zoba waka dyaka nsoni yina ve. Mpamba ve, yandi zabaka nde muntu ya nene yina bakaka yandi na kisalu, vandaka ve na ntangu ya kuditungisa sambu na kansukami ya nzenza bonso yandi. Dikambu ya kubwilaka mwana-zoba kele bonso yina kebwilaka bantu mingi bubu ya keyambulaka nzila ya lusambu ya kyeleka. Mbala mingi, bau kebandaka kusala mambu ya bau vandaka kumona nzanzi. Mu mbandu, mwana bakala mosi ya bamvula 17 yambulaka luzingu ya Bukristu ya yandi yelaka na yau. Yandi kendima nde: “Mono vilaka malongi yonso ya Biblia. Mono kumaka muntu ya pite, kinwi dyamba ti malafu.” Ntama mingi ve, bo losaka yandi na boloko, sambu yandi longukaka mpi kusadila minduki sambu na kuyiba mpi kufwa bantu. Ata na nima yandi belukaka na kimpeve, yandi monaka mpasi mingi na kinsuni sambu na ‘kiese ya masumu ya mwa ntangu fioti’!​—⁠Fwanisa ti Baebreo 11:​24-26.

11. Inki mutindu mpasi ya mwana-zoba lutanaka, ye inki mutindu bantu mingi kebakisaka nde makambu ya inza yina kebendaka bau, kele “luvunu” ya mpamba?

¹¹ Mpasi ya mwana-zoba lutanaka sambu “muntu mosi ve vandaka kupesa yandi [madia].” Banduku na yandi ya mpa kwendaka na wapi? Ntangu yai ya yandi mebikala maboko mpamba, yandi kumaka “kima ya kumenga.” (Bingana 14:​20, NW) Mutindu mosi, bantu mingi ya kebikisaka lukwikilu bubu yai kekwendaka kubakisa nde, makambu ya inza yina kebendaka bantu, kevandaka “luvunu” ya mpamba. (Kolosai 2:⁠8) Nkento mosi ya kubasikaka ntete na kimvuka ya Nzambi, kwisaka kutuba nde: “Mono vandaka na mpasi mingi na ntima sambu mono vandaka dyaka ve na lusadisu ya Yehowa. Mono salaka ngolo na kuvanda mpi bonso bantu ya Inza, kansi mono kukaka ve. Ebuna, bau buyaka mono. Mono kudiwaka bonso mwana ya nsyona, ya kesosa tata ya fwete longa yandi. Na ntangu yina, mono bakisaka nde mono fwete sosa Yehowa. Mono mewaka dyaka ve nzala ya kuzinga kukonda yandi.” Nsukansuka, mwana-zoba mpi, na kingana ya Yezu, bakisaka mutindu yina.

Mwana-Zoba Yantikaka Kuyindula

12, 13. Inki mambu mesadisaka bamingi bubu yai na kubanda kuyindula luzingu na bau? (Tala lupangu.)

¹² “Ntangu yai, yandi yantikaka kuyindula luzingu na yandi, ebuna yandi tubaka na ntima na yandi nde: ‘Bantu mingi ke salaka na nzo ya tata na mono, kansi bo ke na madia ya kuluta mingi yina ya bo lenda manisa mpi ve na kudia. Kansi tala mono yandi yai ke fwa na nzala awa. Mono ke vutuka na tata na mono, ebuna mono ta tubila yandi nde: “Tata, mono salaka masumu na Nzambi ti na nge. Mono me fwana diaka ve na kuvanda mwana na nge. Baka mono bonso muntu mosi na kati ya bantu na nge ya kisalu.” ’ Ntangu yai, yandi bikisaka nsi yina, yandi vutukaka na tata na yandi.”​—⁠Luka 15:​17-20.

¹³ Mwana-zoba “yantikaka kuyindula luzingu na yandi.” Ntete, yandi kudipesaka na kusosa kyese, na kuzinga bonso muntu mosi ya kelala ndosi. Ntangu yai yandi mebakisa mbotembote kisika yandi mekuma na kimpeve. Ata mwana-bakala yai kubwaka, yandi zwaka dyaka kivuvu ya kutelama. Mwa bikalulu ya mbote vandaka dyaka na ntima na yandi. (Bingana 24:16; fwanisa ti 2 Bansangu 19:​2, 3.) Inki beto lenda tuba sambu na bayina kebasikaka na kati ya bantu ya Nzambi bubu yai? Keti yau kele mbote na kutuba nde bau kele dyaka na kivuvu ve, to nde bau kesumukaka na ntwala ya mpeve santu ya Nzambi? (Matayo 12:​31, 32) Yo ke buna ve. Bamingi na kati na bau kewaka mpasi ya ngolo sambu na mbi ya bau salaka. Na nima, bau kebandaka kuyindula luzingu na bau. Mpangi mosi ya nkento ya vandaka na nganda ya dibundu ketuba nde: “Mono bikaka kulutisa ve kilumbu ata mosi nkatu kuyindula Yehowa. Mono vandaka kesamba mbala yonso nde yandi sadisa mono sambu kilumbu mosi, mono vutukila kyeleka.”​—⁠Nkunga 119:176.

14. Inki mwana-zoba kanaka na kusala, ye inki mutindu yandi monisaka kikalulu ya kudikulumusa?

¹⁴ Inki bayina mesalaka mbi lenda sala ntangu yai? Na kingana ya Yezu, mwana-zoba bakaka lukanu ya kuvutuka na nzo ti kulomba ndolula na tata na yandi. Yandi kanaka na kusonga tata na yandi nde: “Baka mono bonso muntu mosi na kati ya bantu na nge ya kisalu.” Bantu ya kisalu ya mutindu yai vandaka ti kontra ya kilumbu mosi. Kisalu na bau lendaka kusuka na katikati ya ntangu. Nge lendaka tesa bau ve ata ti mpika, sambu mpika kezingaka kimakulu na nzo ya mfumu na yandi. Yau kemonisa nde, mwana-zoba vutukaka ve ti ngindu ya kuzinga dyaka bonso mwana na kati ya nzo na bau. Yandi zolaka nde yandi vanda muntu ya mpamba, sambu na kusonga dyaka kwikama na yandi na tata na yandi, konso kilumbu ya keluta. Kansi, tata na yandi yitukisaka yandi.

Tata Yambaka Yandi na Kyese

15-17. (a) Inki tata kusalaka ntangu yandi monaka mwana na yandi? (b) Mvwela ti lupeto ti basandale yina tata pesaka mwana na yandi kesonga inki? (c) Fete yina tata kusalaka kesonga inki?

¹⁵ “Ntangu mwana yango vandaka kaka na nzila, mwa-ntama na nzo na bo, tata na yandi monaka yandi, ebuna yandi wilaka yandi mawa. Ntangu yai, yandi kwendaka ntinu na kukutana ti mwana na nzila, yandi yamba yandi, ebuna yandi pesa yandi beze. Kansi mwana tubilaka yandi nde: ‘Tata, mono salaka masumu na Nzambi ti na nge. Mono me fwana diaka ve na kuvanda mwana na nge.’ Kansi tata tubilaka bampika na yandi nde: ‘Beno kwisa kunata nswalu mvwela ya kuluta kitoko, ebuna beno kwisa lwatisa yandi yo. Beno lwatisa yandi mpi lupeto na musapi ti basandale na makulu. Beno kwisa kunata mwana-ngombe ya mafuta mingi, beno fwa yo, ebuna beto sala fete. Sambu mwana na mono yai vandaka bonso muntu ya kufwa, kansi yandi me baka diaka moyo; yandi vilaka, kansi yandi me monika diaka.’ Ntangu yai, bo yantikaka kusala fete.”​—⁠Luka 15:​20-24.

¹⁶ Tata yonso yina kezolaka mwana na yandi, kezolaka nde mwana na yandi kubeluka nswalu na kimpeve. Yoyina, yo ke mpasi ve na kuyindula nde, meso ya tata ya mwana-zoba vandaka kaka na nzila yina na ntwala ya nzo na yandi, ketala ti nzala ya kumona mwana na yandi kekwisa kuvutuka. Ntangu yai yandi memona mwana na yandi kekwisa! Ziku ilungi vandaka mekuma bonso mwana ya muntu yankaka. Kansi, tata zabaka yandi kaka ntangu yandi vandaka dyaka “mwa-ntama na nzo na bo.” Ata mwana vandaka bilele ya kupasukapasuka mpi ya kulemba, tata zabaka nde yina mwana na yandi, mpi bakaka ntinu sambu na kuyamba yandi!

¹⁷ Ntangu bo mekutana, yandi bwilaka mwana na nkingu mpi pesaka yandi babeze. Na nima, yandi songaka bampika na yandi na kupesa mwana na yandi mvwela, lupeto ti basandale. Bau nataka ve mvwela mosi ya mpamba, kansi “mvwela ya kuluta kitoko,” ziku mvwela yina kevandaka ti malenda, yina ya bo kebasisaka sambu na kuyambila banzenza ya lukumu. Lupeto ti basandale, bo vandaka pesa yau ve na bampika. Tata pesaka yau na mwana sambu bantu yonso kuzaba nde yandi mevutula yandi na kisika na yandi ya mwana na kati ya nzo. Tata sukaka pana ve. Yandi sadisaka fete ya kuvutuka ya mwana na yandi. Beto kezaba mbote nde, fete yai vandaka ve fete ya kukembisa mbi ya mwana kusalaka, to fete kaka sambu mwana kwisaka kuvutuka; kansi yandi zolaka kumonisa kikalulu ya kulolula bankaka. Yau pesaka yandi kyese.

18, 19. (a) Inki bikalulu ya Yehowa nge melonguka na kingana ya mwana-zoba? (b) Inki mutindu Yehowa “ke zola kaka” kumona bansumuki mekwisa kuvutuka bonso na ntangu ya Yuda ti ya Yeruzalemi?

¹⁸ Ntangu yai, inki kingana yai kelonga beto na yina metala Nzambi yina beto mezwaka dibaku ya kusadila? Ntete, yau kesonga beto nde Yehowa kele ‘Nzambi ya ke zolaka bantu ti kuwila bo mawa; ya ke waka makasi nswalu ve kansi ya ke songaka kaka mambote.’ (Kubasika 34:⁠6) Ya kyeleka, mawa kele kikalulu ya nene na kati ya bikalulu ya Nzambi. Yandi kevilaka ve na kumonisa yau na ntwala ya bantu ya mpasi. Ya zole, kingana ya Yezu kelonga beto nde Yehowa kele Nzambi ya ‘ke wilaka bantu mawa [to, ya “kelolulaka bantu,” NW].’ (Nkunga 86:⁠5) Yandi kele bonso muntu ya ketalaka ntangu yonso ntima ya bansumuki, kekinga na kumona mwa kidimbu ya kubalula ntima, na mpila nde yandi lolula bau.​—⁠2 Bansangu 12:12; 16:⁠9.

¹⁹ Mu mbandu, yindula mutindu Nzambi vandaka kuzinga ti bana ya Izraele. Mpeve na yandi vandaka ti profete Yezaya ntangu yandi monaka nde Yuda ti Yeruzalemi vandaka ‘na maladi katuka makulu tii kuna na ntu.’ Kansi, yandi tubaka nde: “[Yehowa] ke zola kaka kutala beno na disu ya mbote. Yandi me yilama na kuwila beno mawa.” (Yezaya 1:​5, 6; 30:18; 55:7; Ezekiele 33:11) Yehowa kele bonso tata yina beto memona na kingana ya Yezu, yandi kele bonso muntu ya ‘ke talaka na nzila.’ Yandi kekingaka na nsongi ya nzila ti mpusa mingi ya kumona mwana mosi ya kutinaka nzo kekwisa kuvutuka. Keti yai mambu ve ya tata ya zola fwete sala?​—⁠Nkunga 103:⁠13.

20, 21. (a) Inki mutindu mawa ya Yehowa kele na kubenda bantu bubu yai? (b) Inki beto tatadila na disolo ya melanda?

²⁰ Konso mvula, bantu mingi keyibukaka nde Yehowa kele Nzambi ya mawa mpi bau kekwisaka kuvutuka na lusambu ya kyeleka. Yau kevandaka kyese mingi sambu na bampangi na bau. Baka mbandu ya tata yina beto tubilaka na luyantiku. Mwana na yandi kubelukaka na kimpeve, ntangu yai yandi kele na kisalu ya ntangu yonso. Tata yango ketuba nde: “Mono memonaka kyese yonso ya muntu lenda mona na ngidika ya bima yai. Mansanga na mono ya mpasi mekumaka mansanga ya kyese.” Na ntembe ve, Yehowa mpi kele na kyese.​—⁠Bingana 27:⁠11.

²¹ Kansi, kingana ya mwana-zoba mesuka awa ve. Yezu landaka kingana na yandi sambu na kumonisa luswaswanu ya kele na kati ya mawa ya Yehowa ti ntima ya mbi yina balongi ya Bansiku ti Bafarize vandaka na yau. Inki mutindu yandi monisaka yau? Inki yau kelonga beto? Beto tatadila mambu yai na dilongi ya melanda.

[Banoti na nsi ya lutiti]

Beto Vutukila

◻ Inki mutindu ngindu ya Yezu vandaka ya kuswaswana ti ngindu ya Bafarize na yina metala kikalulu ya mawa?

◻ Banani bubu yai mefwanana ti mwana-zoba, ye na inki mutindu?

◻ Inki mambu kunataka mwana-zoba na kubanda kuyindula luzingu na yandi?

◻ Inki mutindu tata kumonisaka nde yandi melolula mwana na yandi ya kubalulaka ntima?

[Lupangu ya kele na lutiti 1]

BAU YANTIKAKA KUYINDULA LUZINGU NA BAU

Inki nataka bamingi yina vandaka na nganda ya dibundu ya Bukristu na kuyindula luzingu na bau? Tala bikuma ya bankaka kele na kupesa awa.

“Na ntima na mono, mono vilaka ve kisika kyeleka kubikalaka. Bamvula ya mono salaka na kulonguka Biblia ti kukwenda na balukutakanu pesaka mono bikalulu ya kuswaswana. Inki mpila mono lendaka dyaka kubuya Yehowa? Yandi muntu buyaka mono ve; kansi mono muntu buyaka yandi. Nsukansuka, mono bakisaka nde mono vandaka muntu ya mbi mpi ya ntu-ngolo. Mono bakisaka mpi nde Ndinga ya Yehowa ketuba kyeleka nde, ‘Nge tabuka bambuma ya nge kekuna.’ ”​—⁠C.W.

“Ntangu bebe na mono zabaka ndinga, mono waka mpasi mingi na ntima, sambu mono vandaka na nzala ya kulonga yandi mambu bonso: Yehowa kele nani? inki mutindu kusambila yandi? Mpongi vandaka kwisa dyaka ve. Na mpimpa mosi, mono balukaka na masamba mpi mono dilaka ngolo. Mono dilaka, mpi mono sambaka dyaka Yehowa mbala ya ntete na nima ya bamvula mingi. Mono bakisaka nde luzingu na mono fwete vutuka na maboko ya Yehowa. Mono tulaka ntima nde yandi talolula mono.”​—⁠G.H.

“Kana bantu kubanda kutuba makambu ya lusambu kisika mono kele, mono vandaka songa bau nde, kana kupona dibundu, mono fwete kuma Mbangi ya Yehowa. Mono vandaka yika nde, mono vandaka ntete Mbangi, kansi mono kukaka luzingu yina ve, yau yina mono basikaka. Ntangu mono vandaka ketuba buna, mbala mingi ntima vandaka sala mono mpasi, ye kyese vandaka kumana. Nsukansuka mono tubaka nde, ‘Mawa mingi sambu na mono. Mono fwete sala bansoba ya ngolo na luzingu.’ ”​—⁠C.N.

“Bubu yai bamvula melunga makumi tatu na tanu banda ya bo basisaka mono ti bakala na mono na dibundu. Na 1991, beto yitukaka na kumona bankuluntu zole mekwisa kutala beto. Bau songaka beto nde beto lendaka kuvutuka dyaka na Yehowa. Bangonda sambanu na nima, beto vandaka na kyese mingi ntangu bo vutulaka beto na dibundu. Bakala na mono kele na bamvula 79, mono kele na yau 63.”​—C.A.