Lukwikilu ya Bakristu Tamekama

“Lukwikilu ke kima ya kevandaka ve ti bantu yonso.”​—2 TESALONIKA 3:​2, NW.

 1. Inki mutindu nkenda memonisaka nde bantu yonso ve kevandaka ti lukwikilu ya kyeleka?

BANDA na luyantiku tii bubu, babakala, bankento, ti bana ya kele ti lukwikilu ya kyeleka kekondaka ve. Beto ketuba nde lukwikilu “ya kyeleka” sambu bantu yankaka mingi memonisaka lukwikilu mosi ya bifwa-meso, kundima mambu kukonda nzikisa to kikuma. Yau kelutaka kuvanda lukwikilu na banzambi ya luvunu to na lusambu mosi ya kewakana ve ti luzolo ya Nkwa-Ngolo, Yehowa, ti Ndinga na yandi ya yandi mepesaka. Yau yina ntumwa Polo sonikaka nde: “Lukwikilu ke kima ya kevandaka ve ti bantu yonso.”​—⁠2 Tesalonika 3:⁠2.

 2. Sambu na inki yau kele mfunu nde muntu na muntu kutadila lukwikilu na yandi?

² Kansi, bangogo ya Polo kemonisa nde na ntangu na yandi, bantu yankaka vandaka ti lukwikilu ya kyeleka, mutindu mosi mpi bubu yai. Bantu ya kuluta mingi ya ketangaka zulunalu yai kezolaka kuvanda ti lukwikilu ya kyeleka mpi kuyedisa yau. Yau kele lukwikilu ya kewakanaka ti nzayilu ya sikisiki ya kyeleka ya Nzambi. (Yoane 18:37; Baebreo 11:⁠6) Keti nge kele muntu ya mutindu yai? Na yau, yau kele mfunu nde nge zaba mpi nge kudibongisa na dyambu yai: lukwikilu na nge tamekama. Sambu na inki beto ketuba buna?

3, 4. Sambu na inki beto fwete tula meso na Yezu kana lukwikilu na beto kemekama?

³ Beto fwete ndima nde Yezu Kristu kele nto ya lukwikilu na beto. Ee, Biblia ketuba nde yandi kele Muntu ya Kelungisaka lukwikilu na beto. Yau ketuba buna sambu na mambu ya Yezu tubaka mpi salaka, mingimingi mutindu ya yandi lungisaka mbikudulu. Yandi yidikaka fondasio mosi ya ngolo sambu bantu kutunga lukwikilu ya kyeleka na zulu na yau. (Baebreo 12:2; Kusonga 1:​1, 2) Dyaka, beto ketanga nde Yezu “mekamaka na mambu yonso bonso beto, kansi kukonda disumu.” (Baebreo 4:​15, NW) Ee, lukwikilu ya Yezu kumekamaka. Dyambu yai fwete lembisa beto nitu ve ata fyoti, yau fwete pesa beto kikesa.

⁴ Na kumekamaka ngolo, nkutu tii na lufwa na zulu ya nti ya mpasi, Yezu “longukaka bulemfu.” (Baebreo 5:​8, NW) Yandi monisaka nde bantu lenda landa lukwikilu ya kyeleka ata na kati ya mimekamu ya ngolo yina lenda bwila bau. Dyambu yai kebenda dikebi mingi kana beto yindula mambu yina Yezu tubaka sambu na balongoki na yandi: “Beno yibuka mambu ya mono tubilaka beno nde: ‘Ata mpika mosi ve me luta mfumu na yandi.’ ” (Yoane 15:20) Ee, sambu na balandi na yandi ya ntangu na beto, Yezu tubaka nde: “Bantu ya bansi yonso ta menga beno sambu na mono.”​—⁠Matayo 24:⁠9.

 5. Inki mutindu Masonuku kemonisa nde beto takutana ti mimekamu?

⁵ Na luyantiku ya mvu-nkama yai, kusambisa yantikaka na nzo ya Nzambi. Masonuku yitaka kutuba nde: “Ntangu me lunga ya Nzambi ta yantika kusambisa bantu; bantu ya ntete ya yandi ta sambisa kele bantu na yandi. Kana beto kele bantu ya ntete ya yandi ta sambisa, ebuna yo ta vanda nki mutindu sambu na bantu yina ke buyaka na kundima Nsangu ya Mbote ya Nzambi? . . . ‘Kana bantu ya mbote me guluka na . . . mpasi, yo ta vanda nki mutindu na bantu yina ke na lukwikilu ve ti na bantu ya masumu?’ ”​—⁠1 Piere 4:​17, 18.

Sambu na Inki Lukwikilu Kemekama?

 6. Sambu na inki lukwikilu ya kumekama kele na mbalu mingi?

⁶ Beto lenda tuba nde, lukwikilu ya kukonda kumekama memonisaka ntete ve mbalu na yau, mpi nkadilu na yau kele ya kukonda kuzabana. Beto lenda fwanisa yau ti sheki yina bau metudila ntete ve mbongo. Bo lenda pesa nge sheki bonso lufutu ya kisalu ya mbote ya nge salaka, to sambu na bima ya nge tekaka, to bo lenda kabila nge yau ya mpamba. Na meso yau lenda monana kitoko, kansi keti yau kele mpenza kitoko? Keti ntalu na yau kele yina ya kemonika na zulu na yau? Mutindu mosi, lukwikilu na beto fwete suka kaka na nganda ve to na munoko. Yau fwete mekama kana beto kezola kumonisa nde yau kele ya ngolo mpenza. Kana lukwikilu na beto memekama, beto tazaba kana yau kele ya ngolo to ya mfunu. Kumekama na yau lenda monisa mpi bisika yina kelomba kutunga yau dyaka to kusyamisa yau.

7, 8. Mimekamu ya lukwikilu na beto kekatukaka na wapi?

⁷ Nzambi kepesaka nzila nde munyokudi to mimekamu yankaka ya lukwikilu kubwila beto. Beto ketanga nde: “Kana bo me benda muntu na kusala masumu na ntangu ya mpasi, yandi lenda tuba ve nde: ‘Nzambi muntu me benda mono sambu na kumeka ya yandi me zola kumeka mono.’ Sambu mambu ya mbi lenda benda ti kubwisa Nzambi ve, ebuna yandi mosi lenda benda ata muntu mosi ve na kusala mbi.” (Yakobo 1:13) Nani to inki kevandaka kisina ya mimekamu yina kebwilaka beto? Yau kele Satana, inza, ti nsuni na beto mosi ya kukonda kukuka.

⁸ Beto lenda ndima nde Satana kevandaka ti bupusi ya ngolo na zulu ya inza, na zulu ya mabanza na yau ti banzila na yau. (1 Yoane 5:19) Mpi ziku beto kezaba nde yandi muntu kenyokulaka Bakristu. (Kusonga 12:17) Kansi, keti beto kendimaka mpi nde Satana kepukumunaka beto na kusadilaka nsuni na beto ya kukonda kukuka, na kusongaka beto byese ya inza, ti kivuvu nde beto tasimba ndobo na yandi, beto tabuya Nzambi, sambu Nzambi mpi kubuya beto? Na ntembe ve, bansadilu ya Satana fwete yitukisa beto ve, sambu yandi sadilaka mayele ya mutindu mosi ntangu yandi mekaka na kupukumuna Yezu.​—⁠Matayo 4:​1-11.

 9. Inki mutindu beto lenda baka mambote na bambandu ya lukwikilu?

⁹ Na nzila ya Ndinga na yandi ti na nzila ya dibundu ya Bukristu, Yehowa kepesa beto bambandu ya mbote ya lukwikilu ya beto lenda landa. Polo kebisaka nde: “Beno yonso beno landa mbandu na mono. Beto me songaka mbandu, ebuna beno landa bantu yina ke landaka mbandu yango yina.” (Filipi 3:17) Polo vandaka na kati ya bansadi ya kupakulama ya mvu-nkama ya ntete, ye yandi pesaka mbandu ya mbote na kumonisa bisalu ya lukwikilu ata yandi vandaka na kati ya mimekamu ya nene. Tii bubu yai na nsuka ya mvu-nkama ya 20, beto kele kaka ti bambandu ya lukwikilu ya mutindu yina. Bangogo ya Baebreo 13:7 kele ngolo kiteso mosi bonso na ntangu ya Polo sonikaka yau: “Beno yindula bambuta na beno ya ntete ya Dibundu [“bantu yina ketwadisa beno,” NW], bayina longaka beno mambu ya Nzambi. Beno yindula mambu ya mbote yina me katuka na luzingu na bo, beno landa lukwikilu na bo.”

10. Inki bambandu ya nene ya lukwikilu ya ntangu yai beto kele na yau?

¹⁰ Ndongisila yai kele na ngolo mingi kana beto tadila bisalu ya ndyatilu ya nsadila ya bapakulami mebutaka. Beto lenda tala mbandu na bau mpi kulanda lukwikilu na bau. Sambu lukwikilu na bau kele lukwikilu ya kyeleka ya mebongaka sambu na mimekamu. Na luyantiku, na 1870, bau vandaka ndambu. Bubu yau mekumaka kimpangi ya Bukristu ya inza ya mvimba. Bambangi kuluta mafuku tanu ti ndambu yina kesamuna mpi kelonga mambu ya Kimfumu ya Nzambi ntangu yai kele mbutu ya lukwikilu ti mvibidilu ya bapakulami. Dibundu ya mvimba ya bubu yai ya bansambidi ya kikesa, ya kyeleka, kemonisaka pwelele nde bau kele na lukwikilu ya memekama.​—⁠Tito 2:⁠14.

Lukwikilu Mekamaka Sambu na Dati ya 1914

11. Inki mutindu 1914 vandaka mvula mosi ya mfunu sambu na C. T. Russell ti bankundi na yandi?

¹¹ Bamvula mingi na ntwala mvita ya ntete ya inza ya mvimba kubanda, nsadila ya bapakulami tubaka nde 1914 tavanda mvula mosi ya nene na yina metala mbikudulu ya Biblia. Kansi, kivuvu na bau na mambu yankaka lutanaka ntinu, mpi bau zabaka ve mbotembote inki kibeni tabwa. Mu mbandu C. T. Russell, prezida ya ntete ya la Société Watch Tower, ti bampangi na yandi zabaka nde yau lombaka kusamuna mingi. Bau tangaka yau na Biblia: “Nsamu yai ya mbote ya kimfumu tasamunwa mu nsi yonso ya ikele na bantu, sambu na kitemo kwa makanda yonso ya bantu buna nsuka takwiza.” (Matayo 24:​14, Luwawanu Yampa) Bau vandaka bantu fyoti, ebuna inki mutindu bau lendaka kusala yau?

12. Inki mutindu muntu mosi ya salaka ti Russell ndimaka kyeleka ya Biblia?

¹² Tala mutindu mambu yai simbaka ntima ya A. H. Macmillan, yina butukaka na Canada mpi salaka kumosi ti Russell. Macmillan vandaka melungisa ntete ve bamvula 20 ntangu yandi zwaka mukanda ya Russell yai: Le plan des âges (1886). (Zina yankaka ya mukanda yai vandaka: Le divin plan des âges. Yau kumaka volime 1 ya Études des Écritures. Volime 2, Le temps est proche [1889], monisaka nde 1914 kele nsuka ya ‘ntangu ya bapaien.’ [Luka 21:​24, Luwawanu Yampa]) Na mpimpa yau yina ya Macmillan tangaka mambu yai, yandi tubaka nde: “Yai fwete vanda kyeleka!” Na kisiwu ya 1900, yandi kutanaka ti Russell na lukutakanu ya nene ya Balongoki ya Biblia, bo vandaka binga Bambangi ya Yehowa mutindu yai na ntangu yina. Ntama ve, Macmillan bakaka mbotika mpi yantikaka kusala ti Mpangi Russell na babilo ya la Société na New York.

13. Inki dyambu ya mpasi Macmillan ti bantu yankaka monaka na yina metala kulungana ya Matayo 24:⁠14?

¹³ Na kutalaka mambu ya bau vandaka tanga na Biblia, bapakulami yai songaka nde na 1914, lukanu ya Nzambi tasalama na mutindu yankaka. Kansi Macmillan vandaka kudiyula ti bantu yankaka nde, inki mutindu kisalu ya kusamuna na ntoto ya mvimba yina kele na Matayo 24:14 tasalama na mwa ntangu yai ya mebikala? Na nima, yandi tubaka nde: “Mono keyibuka dyaka nde mono vandaka tubila yau mbala na mbala ti mpangi Russell, ebuna yandi vandaka tuba nde: ‘Mpangi nge kemona, awa na New York beto kele ti Bayuda mingi kuluta bayina kele na Yeruzalemi. Beto kele na bantu ya Irlande mingi awa kuluta Dublin. Mpi beto kele na bantu ya Italie mingi kuluta Rome. Ebuna, kana beto mesolula ti bau awa, yau tavanda bonso beto mesamuna na inza ya mvimba.’ Kansi, dyambu yango vandaka ndimisa beto mpenza ve. Yau yina beto zwaka dibanza ya kusala ‘Photo-Drame’ na ntangu yina.”

14. Inki kisalu kuyantikaka na ntwala ya 1914?

¹⁴ “Photo-Drame de la création” ke kisalu mosi ya kutomaka mpenza! Yau vandaka bafoto mosi kemonisa dyambu na ndonga, na badiapozitive ya kulere, ntangu yai badiskure ya Biblia ti meziki vandaka tuba na fono sambu na kutendula yau. Na 1913, Nzozulu ya Nkengi tubaka mutindu yai sambu na lukutakanu yina salamaka na Arkansas, U.S.A.: “La Société bakaka lukanu na kimvuka nde ntangu vandaka melunga sambu na kusadila bafoto na kulonga kyeleka ya Biblia. . . . [Russell] tendulaka nde yandi yantikaka dezia kisalu yina tuka bamvula tatu mpi yandi vandaka dezia ti bafoto ya kitoko mingi, yina tabenda bantu mingi ti kuzabisa Evanzile, mpi tasadisa bantu na kuvutukila dyaka lukwikilu na bau na Nzambi.”

15. Inki kisalu “Photo-Drame” kusalaka?

¹⁵ “Photo-Drame” lungisaka mpenza lukanu yina ntangu bau songaka yau mbala ya ntete na Yanuari ya 1914. Nzozulu ya Nkengi pesaka balapolo yai na 1914:

¹⁵ Aprili 1: “Pastere mosi talaka bitini zole, na nsuka yandi tubaka nde: ‘Mono metala kaka ndambu ya PHOTO-DRAME DE LA CRÉATION, kansi mono melonguka dezia malongi mingi ya Biblia kuluta yina mono longukaka bamvula tatu na seminere mosi ya malongi ya Nzambi.’ Muyuda mosi katukaka na kutala yau, ye yandi tubaka nde, ‘Mono mevutuka na nzo bonso Muyuda mosi ya mbote kuluta ntangu ya mono kwisaka.’ Mimpe ti bamasere mingi ya Katolika talaka DRAME mpi nikisaka ntu mpenza. . . . Beto mesala ntete kaka bitini kumi na zole ya DRAME . . . Kansi beto mekuma dezia na bambanza makumi tatu na mosi mpi beto kele na kusonga yau . . . Bantu kuluta mafunda makumi tatu na tanu ketalaka yau konso kilumbu, bau kewa, keyituka, keyindula mpi kebaka mambote.”

¹⁵ Yuni 15: “Bafoto yango mepesa mono kikesa mingi na kumwanga Kyeleka. Yau mekumisa zola na mono mingi sambu na Tata na beto ya Zulu mpi sambu na Mbuta na beto ya luzolo Yezu. Mono kesambaka Nzambi konso kilumbu sambu yandi sakumuna PHOTO-DRAME DE LA CRÉATION mingi, mingi kibeni, kumosi ti bayina yonso kesala sambu na kumonisa yau . . . Mono kesadilaka Yandi kumosi ti beno, F. W. KNOCHE.​—⁠Iowa.”

¹⁵ Yuli 15: “Beto keyangalala na kumona nde bafoto yina mebikisa nsangu mosi ya mbote kibeni na kati ya mbanza yai, mpi beto kendima nde kimbangi yai na meso ya inza kesalama mpi sambu na kuvukisa bantu mingi yina kemonisa nde bau kele wolo ya Mfumu yandi mosi meponaka. Beto kemona mbutu ya kisalu ya Photo-Drame mesala: balongoki ya Biblia mingi ya kikesa mekota ntangu yai na Dibundu yai awa. . . . Mpangi na beno ya nkento na Mfumu, EMMA L. BRICKER.”

¹⁵ Novembri 15: “Beto kezaba mbote nde beto tawa kyese na kuwa kimbangi ya nene yina kepesama na nsadisa ya PHOTO-DRAME DE LA CRÉATION na Opéra de Londres, na Kingsway. Diboko ya Mfumu kele na kumonana pwelele mpenza na kisalu yai, ebuna bampangi ke na kusepela mpila ve . . . Bantu ya mitindu yonso kwisaka kutala yau ti beto; beto monaka bamfumu ya mabundu mingi na kati. Vikere mosi . . . lombaka batike sambu yandi kwisa kutala yau dyaka kumosi ti nkento mpi bana na yandi. Rektere mosi ya Dibundu ya Angleterre talaka DRAME mbala mingi, ye . . . yandi nataka banduku na yandi mingi sambu na kutala yau. Baepisikopo zole ti bantu ya nene mingi vandaka mpi na kati.”

¹⁵ Desembri 1: “Mono ti nkento na mono beto kepesa matondo mingi na Tata na beto ya Zulu sambu na lusakumunu ya kuluta nene mpi ya mbalu yina yandi metindila beto na maboko na nge. Kima ya kusadisaka beto na kumona mpi kundima Kyeleka kele PHOTO-DRAME na nge . . . Beto kele ti mikanda na nge yai, ÉTUDES DES ÉCRITURES, bavolime yonso sambanu. Yau kele lusadisu ya nene.”

Kunwana ti Mimekamu ya Ntangu Yina

16. Sambu na inki 1914 nataka mumekamu mosi ya lukwikilu?

¹⁶ Inki Bakristu ya masonga ya kudipesa salaka ntangu bau monaka nde bivuvu na bau ya kuzinga kumosi ti Kristu na 1914 kulunganaka ve? Bapakulami kotaka na nsungi mosi ya kumekama mpenza. Nzozulu ya Nkengi ya Novembri 1, 1914, tubaka nde: “Beto vila ve nde beto kele na nsungi mosi ya mimekamu.” Mukanda Les Témoins de Jéhovah : Prédicateurs du Royaume de Dieu (1993) keyika nde: “Bamvula yai kubanda na 1914 tii na 1918, vandaka mpenza ‘bamvula ya mimekamu’ sambu na Balongoki ya Biblia.” Keti bau ndimaka nde lukwikilu na bau ti mabanza na bau kuvutuka na nzila ya mbote sambu bau banda kisalu ya nene yina vandaka na ntwala na bau?

17. Inki bapakulami ya kwikama salaka ntangu bau monaka nde bau vandaka kaka na ntoto na nima ya 1914?

¹⁷ Nzozulu ya Nkengi (ya Kingelesi) ya Septembri 1, 1916, tubaka nde: “Beto yindulaka nde kisalu ya Kubuka Mbuma ya kuvukisa Dibundu [ya bapakulami] zolaka kulungana na ntwala ya nsuka ya Bantangu ya Mimpani; kansi ata dyambu mosi ve na kati ya Biblia tubaka mutindu yina. . . . Keti beto kewa ntantu sambu kisalu ya Kubuka Mbuma kefula na kusalama? . . . Bampangi ya luzolo, nkadilu na beto ya ntangu yai fwete vanda ya kupesa matondo mingi na Nzambi, na kuyedisaka mbakisa ya Kyeleka ya kitoko yina Yandi mepesaka beto dibaku ya kumona mpi ya kumonisa, mpi ya kuvanda ti kikesa ya mingi sambu na kuzabisa kyeleka yango na bantu yankaka.” Lukwikilu na bau mekamaka, kansi bau nwanaka ti mimekamu yina mpi bau nungaka yau. Kansi, beto Bakristu, beto fweti vila ve nde mimekamu lenda vanda mingi mpi ya mpila na mpila.

18, 19. Inki mimekamu yankaka basikaka sambu na bantu ya Nzambi na nima ya lufwa ya Mpangi Russell?

¹⁸ Mu mbandu, mumekamu yankaka kwisilaka bapakulami ntangu fyoti na nima ya lufwa ya Mpangi Charles T. Russell. Yau vandaka mumekamu ya kwikama ti lukwikilu na bau. Nani vandaka ‘mpika ya kwikama’ ya Matayo 24:45? Bantu yankaka yindulaka nde Mpangi Russell muntu vandaka mpika ya kwikama, ebuna bau buyaka na kusala kumosi ti bangidika ya mpa ya organizasio. Kana yandi muntu vandaka mpika, inki bampangi zolaka kusala na ntangu yandi fwaka? Keti bau zolaka landa bantu ya mpa yina ponamaka, to ntangu lungaka ya kundima nde Yehowa vandaka sadila ve muntu mosi, kansi kibuka ya mvimba ya Bakristu bonso kisadilu, to kalasa ya mpika?

¹⁹ Mumekamu yankaka kwisilaka Bakristu ya kyeleka na 1918, ntangu bamfumu ya Kikristu kusakusaka bamfumu ya inza na kusala organizasio ya Yehowa ‘mbi na zina ya nsiku.’ (Nkunga 94:​20, KJ) Muvuma mosi ya kunyokula Balongoki ya Biblia yantikaka na Amerika ya Nordi ti na Eropa. Luteleminu ya bamfumu ya mabundu lungisaka lukanu na yau na Mayi 7, 1918, ntangu luyalu ya États-Unis basisaka mikanda sambu na kukanga J. F. Rutherford ti bankundi na yandi mingi ya ngolo, bonso A. H. Macmillan. Bau kukusilaka bau nde bau vandaka bambendumuki, mpi bamfumu buyaka kundima nde bau vandaka ve ti makambu.

20, 21. Mutindu Malashi 3:​1-3 tubaka yau, inki kisalu salamaka na kati ya bapakulami?

²⁰ Bau bakisaka ve na ntangu yina nde kisalu ya kugedisa vandaka na kusalama, mutindu Malashi 3:​1-3 ketendula yau: “Kilumbu ya yandi ta kwisa nani ta kuka kukanga ntima? Nani ta kuka kuzinga diaka kana yandi kwisa kumonika? [Kinati-nsangu ya ngwakana] ta vanda bonso tiya yina ke katulaka mvindu ya bibende to bonso savo ya bo ke katudilaka mvindu ya bilele. Yandi ta kwisa kusambisa bantu bonso muntu yina ke katulaka mvindu ya arza. Yandi ta katula mbi ya banganga-Nzambi bantu ya dikanda ya Levi mutindu bo ke katulaka mvindu ya arza ti wolo. Ebuna na nima bo ta zaba kunata makabu ya mbote na Mfumu Nzambi mutindu bansiku ke tuba.”

²¹ Mutindu Mvita ya Ntete ya Inza ya Mvimba finamaka na kumana, mwa ndambu ya Balongoki ya Biblia kutanaka ti mumekamu yankaka: keti bau talunda bukatikati na konda kukota na bitumba ya inza to ve? (Yoane 17:16; 18:36) Bankaka lundaka yau ve. Yau yina, na 1918, Yehowa tindaka “kinati-nsangu ya ngwakana,” Kristu Yezu, na ngidika ya tempelo na Yandi ya kimpeve, sambu na kukatula mvindu ya inza na kati ya kibuka ya fyoti ya bansambidi na Yandi. Bayina kundimaka na kumonisa lukwikilu ya kyeleka bakaka dilongi na mambu ya bau monaka mpi bau fulaka kisalu ya kusamuna na kikesa yonso.

22. Inki beto tatadila dyaka na yina metala mimekamu ya lukwikilu?

²² Mambu ya beto mekatuka kulonguka kele ve kaka mambu ya mbote ya melutaka. Yau ketadila kibeni kimpeve ya dibundu ya Yehowa bubu yai na ntoto ya mvimba. Kansi, bika na dilongi ya melanda beto tadila mwa mimekamu ya kimpeve yina bantu ya Nzambi kele na kukutana na yau bubu. Beto tamona mpi inki beto lenda sala na kununga yau.

Keti Nge Keyibuka?

◻ Sambu na inki bantu ya Yehowa kezabaka nde lukwikilu na bau tamekama?

◻ Inki bikesa salamaka na ntwala ya 1914 sambu na kuyalumuna nsangu ya Nzambi?

◻ “Photo-Drame” vandaka inki, ye inki kisalu yau salaka?

◻ Inki mutindu makambu ya kulutaka na 1914-18 kumekaka lukwikilu ya bapakulami?

[Kifwanisu ya kele na lutiti 12]

Ntangu mvu-nkama kumaka na nsuka, bantu mingi na bansi mingi vandaka longuka Biblia na nsadisa ya mikanda yai: “L’Aurore du Millénium,” na nima bau kumaka kubinga yau nde “Études des Écritures”

[Kifwanisu ya kele na lutiti 13]

Mukanda mosi ya C. T. Russell kusonikaka; na kati, yandi sonikaka ndinga yai ya luyantiku ya drame: “ ‘Photo-Drame de la création’ kele kisalu ya IBSA (Kimvuka ya Balongoki ya Biblia na Ntoto) mesala. Yau mesalama sambu na kulonga bantu yonso malongi ya Nzambi ya kewakana ti siansi, mpi ya kekumisa Biblia”

[Kifwanisu ya kele na lutiti 15]

Demetrius Papageorge tambulaka mingi na kusonga “Photo-Drame de la Création.” Na nima, bau tulaka yandi na boloko sambu yandi lundaka bukatikati ya Bukristu