KAPU 20

Keti Nge Kezolaka Ntangu Yonso Kuvanda Muntu ya Ntete?

KETI nge mezaba muntu mosi yina kezolaka ntangu yonso kuvanda muntu ya ntete?— Yandi le tindika bantu yankaka sambu yandi kubaka kisika ya ntete na mulongo. Keti nge memonaka dezia kima ya mutindu yina?— Longi ya Nene kumonaka nkutu bambuta yina vandaka kusosa kubaka bisika ya ntete, to ya kuluta mfunu. Mpi yandi sepelaka na yo ve. Beto tala nki mutindu mambu yango kulutaka.

Biblia ketubila beto nde bo bingisaka Yezu na feti mosi ya nene na nzo ya Mufarize mosi, yina kuvandaka mfumu ya nene na dibundu na bo. Ntangu Yezu kukumaka, yandi yantikaka kutala mutindu banzenza yankaka ya bo bingisaka vandaka kwisa kukota mpi kupona bisika ya kuluta kitoko. Yo yina yandi telaka banzenza yango disolo mosi. Keti nge kezola kuwa yo?—

Yezu kutubaka nde: ‘Kana muntu kubinga nge na feti mosi ya makwela, kupona ve kisika ya kuluta mbote, to ya kuluta mfunu.’ Keti nge mezaba sambu na nki Yezu kutubaka mpidina?— Yandi tendulaka nde ziku munkwa feti ya mebinga nge kubingaka mpi muntu mosi ya kuluta mfunu. Ebuna, mutindu nge kemona yo na kifwanisu, munkwa feti mekwisa kutuba nde: ‘Telema, bikila yandi kisika yai, mpi nge kwenda kuvanda kuna.’ Ebuna nzenza yina kwendaka kupona kisika ya ntete takudiwa nki mutindu?— Yandi tawa nsoni sambu banzenza yina yankaka yonso tatala yandi mutindu yandi takatuka na kisika ya lukumu sambu na kwenda kuvanda na kisika ya kukonda lukumu.

Yezu vandaka kumonisa nde yo ke mbote ve na kuzolaka kisika ya kuluta lukumu. Yo yina, yandi tubaka nde: ‘Kana bo mebinga nge na feti mosi ya makwela, kwenda kuvanda na kisika yina ya kukonda lukumu. Na nima muntu yina kubingaka nge le kwisa kutubila nge nde, “Nduku na mono, kwisa kuvanda awa na kisika ya lukumu.” Ebuna, nge tavanda na lukumu na meso ya bayina yonso yankaka ya bo bingaka, na ntangu nge takwenda na kisika ya kuluta mbote.’—Luka 14:1, 7-11.

Keti nge mebakisa dilongi yina ke na disolo ya Yezu?— Beto tadila mbandu mosi sambu na kuzikisa kana nge mebakisa yo. Yindula ntete kana nge ke na kumata na bisi mosi ya mefuluka ti bantu. Keti nge takwenda nswalu sambu na kuvanda na kiti ebuna nge bikisa mbuta ya kutelama?— Keti Yezu tasepela kana nge sala mutindu yina?—

Muntu mosi le tuba nde Yezu ketalaka kwa yandi ve mambu ya beto kesalaka. Kansi, keti nge kendima yo?— Ntangu Yezu kuvandaka na feti yina ya nene na nzo ya Mufarize, yandi vandaka kutala mutindu bantu vandaka kupona bakiti ya kuvanda. Keti nge keyindula ve nde yandi kemonaka mpi mambu ya beto kesalaka bubu yai?— Ntangu yai ya Yezu ke na zulu, ntembe kele ve nde yandi ke na kisika mosi ya kesadisa yandi na kutala beto mbotembote mpenza.

Kana muntu kesosa kuvanda muntu ya ntete, yo le basisa mavwanga. Mbala mingi, yo kesalaka nde bantu kuswana, mpi bo wa makasi. Bantangu yankaka yo kesalamaka mutindu yina ntangu bana kekwendaka kutambula bo yonso na bisi. Kana bo kangula bakyelo ya bisi, bana kenwaninaka sambu na kukota bantu ya ntete. Bo kezolaka kuvanda na bakiti ya kuluta kitoko, yina kevandaka penepene ya bafenetre. Kansi nki le salama na nima?— Bo le kuma kudiwila makasi bo na bo.

Kuzola kuvanda muntu ya ntete le nata matata mingi. Nkutu yo nataka matata na kati ya bantumwa ya Yezu. Mutindu beto longukaka na Kapu 6 ya mukanda yai, bo vandaka kutulana ntembe bo na bo sambu na kuzaba kana nani kulutaka nene na kati na bo. Ebuna, inki Yezu kusalaka?— Yandi pesaka bo malongi sambu bo katula bangindu yina. Kansi na nima, bo tulanaka dyaka ntembe yankaka. Beto tala nki mutindu yo yantikaka.

Bantumwa ti balongoki yankaka vandaka kusala nzyetolo ya nsuka kumosi ti Yezu sambu na kukwenda na Yeruzalemi. Yezu vandaka kutubila bo mambu ya metala Kimfumu na yandi, ebuna Yakobo ti Yoane vandaka kuyindula mutindu ya bo tayala ti yandi bonso bamfumu. Bo telaka yo nkutu mama na bo, Salome. (Matayo 27:56; Marko 15:40) Ebuna na ntangu bo vandaka kukwenda na Yeruzalemi, Salome kwisaka kumona Yezu, yandi fukamaka na ntwala na yandi, mpi yandi lombaka nde Yezu kusadila yandi kima mosi ya mbote.

Yezu kuyulaka nde: ‘Nki nge kezola?’ Yandi vutulaka nde yandi kezola nde Yezu kuvandisa bana na yandi penepene na yandi ntangu yandi takuma na Kimfumu na yandi, mosi na diboko na yandi ya kitata, ebuna yankaka na diboko na yandi ya kimama. Nge keyindula nde bantumwa yina yankaka kumi kuwaka nki mutindu ntangu bo waka mambu yina Yakobo ti Yoane tindaka mama na bo na kulomba sambu na bo?—

Bo wilaka Yakobo ti Yoane makasi mingi mpenza. Yo yina Yezu kupesaka bantumwa na yandi yonso bandongisila mingi ya mayele. Yezu kutubilaka bo nde bamfumu ya makanda kezolaka kuvanda bantu ya nene mpi ya mfunu. Bo kezolaka kuvanda ti kisika ya kuluta nene sambu muntu yonso kulemfukila bo. Kansi Yezu kutubilaka balongoki na yandi nde bo fwe vandaka ve mutindu yina. Na kisika ya kusala bonso bamfumu yina,Yezu kutubaka nde: ‘Kana muntu mosi na kati na beno kezola kuvanda mfumu, yandi fwe vanda mpika ya bantu ya nkaka.’ Yindula dyambu yai!—Matayo 20:20-28.

Keti nge mezaba nki mpika kesalaka?— Yandi kesadilaka bantu yankaka, yandi kekingaka ve nde bankaka kusadila yandi. Yandi kebakaka kisika ya kukonda lukumu, kansi kisika ya ntete ve. Yandi kesalaka mambu ya kemonisa nde yandi ke mfunu mingi ve, yandi kesalaka ve mambu ya kemonisa nde yandi ke mfunu mingi. Mpi yibuka nde Yezu kutubaka nde yina kezola kuvanda muntu ya ntete, yandi fwe salaka mambu bonso mpika ya bantu yankaka.

Ntangu yai, nge keyindula nde mambu yai ketendula nki sambu na beto? — Keti mpika le swanisa mfumu na yandi sambu na kuzaba kana nani tavanda na kiti ya kuluta kitoko? To keti yandi le swana sambu na kuzaba kana nani tadya ntete? Inki nge keyindula?— Yezu kutendulaka nde mpika ketulaka ntangu yonso mfumu na yandi na kisika ya ntete.—Luka 17:7-10.

Yo yina, olie na kusosa kuvanda muntu ya ntete, inki beto fwe salaka? — Beto fwe vanda bonso bampika ya bantu yankaka. Mpi yo ketendula nde beto fwe tulaka bankaka na ntwala na beto. Disongidila, kubaka bankaka nde bo ke na mfunu mingi kuluta beto. Keti nge le yindula mambu yina nge le sala sambu na kutula bankaka na kisika ya ntete?— Sambu na nki nge vutuka ve na balutiti 40 ti 41 sambu na kutala dyaka mwa mambu ya nge le sala sambu na kutula bankaka na kisika ya ntete mpi na kusadila bo.

Nge tayibuka nde Longi ya Nene vandaka kusadila bankaka sambu na kumonisa nde yandi vandaka kutula bo na ntwala na yandi. Nkutu, na mpimpa ya nsuka ya yandi lutisaka ti bantumwa na yandi, yandi fukamaka sambu na kuyobisa bo makulu. Kana beto mpi kesadila bankaka sambu na kutula bo na kisika ya ntete, beto tasepedisa Longi ya Nene ti Tata na yandi, Yehowa Nzambi.

Beto tanga baverse yankaka ya Biblia ya kesyamisa beto na kutula bankaka na ntwala na beto: Luka 9:48; Roma 12:3; mpi Filipi 2:3, 4.

[Kifwanisu ya kele na lutiti 107]

Keti nge memonaka ntete bantu yina kesosaka kuvanda bantu ya ntete?

[Bifwanisu ya kele na lutiti 108, 109]

Inki dilongi Yezu vandaka kulonga ntangu yandi tubilaka bayina kebakaka bakiti ya kuluta kitoko, to ya ntete?

[Kifwanisu ya kele na lutiti 110]

Inki Salome kelomba na Yezu, mpi nki yo mebasisa?