Yoane Ke Zola Kuwa Yezu

Banda Yoane Mbotiki kele na boloko, kiteso ya mvula mosi me luta. Yandi ke landa kuwa nsangu ya mambu ya kuyituka yina Yezu ke sala. Yandi me wa kiese kibeni ntangu balongoki na yandi me zabisa yandi nde Yezu me futumuna mwana ya mufwidi mosi na mbanza Naini. Kansi, yandi ke zola nde Yezu yandi mosi kusonga yandi nde yandi kele Mesia. Yo yina, yandi me tinda balongoki na yandi zole na Yezu. Sambu na nki? Sambu bo yula Yezu nde: “Keti nge kele Muntu yina ke kwisa, to keti beto fwete vingila muntu ya nkaka?”—Luka 7:19.

Keti ngiufula yai lenda yitukisa beto? Yoane kele muntu yina me kudipesaka na Nzambi. Ntangu yandi botikaka Yezu bamvula kiteso ya zole me luta, yandi monaka mpeve ya Nzambi ke kulumuka na zulu ya Yezu mpi yandi waka mutindu Nzambi tubaka nde yandi me ndima Yezu. Beto yindula ve nde lukwikilu ya Yoane vandaka diaka ve ngolo. Kana ve, Yezu zolaka ve kukumisa Yoane mutindu yandi me sala yo na dibaku yai. Kansi, kana Yoane kele ve ti baketi-keti, sambu na nki yandi ke yula ngiufula yina sambu na Yezu?

Ziku, Yoane ke zola kaka kuzikisa na Yezu yandi mosi kana yandi kele Mesia. Mpidina yo ta pesa yandi kikesa sambu yandi ke mona mpasi na boloko. Mbala ya nkaka, Yoane kele ti kikuma ya nkaka yina ke pusa yandi na kuyula ngiufula yina. Yandi me zaba bambikudulu ya Biblia yina ke tuba nde muntu yina Nzambi me tulaka mafuta ta vanda ntotila mpi ngulusi. Kansi, Yoane kele na boloko bangonda mingi banda Yezu me baka mbotika. Yo yina, yandi ke yula kana yo ta vanda ti muntu ya nkaka yina ta kwisa na nima ya Yezu, yina ta lungisa kibeni bambikudulu yonso yina Masonuku tubilaka sambu na Mesia.

Na kisika ya kusonga balongoki ya Yoane mbala mosi nde: ‘Mono kele Muntu yina ke kwisa,’ Yezu me pesa bo banzikisa yina ke monisa nde Nzambi muntu ke pesa yandi ngolo ya kubelula bantu mingi yina ke bela bamaladi ya mutindu na mutindu. Ebuna yandi me songa balongoki ya Yoane nde: “Beno kwenda kuzabisa Yoane mambu yina beno ke wa mpi ke mona: Bifwa-meso ke mona, bantu ya makulu-kifu ke tambula, bantu yina kele na maladi ya lepre ke kuma bunkete, bifwa-makutu ke wa, bafwa ke futumuka, mpi bo ke zabisa bansukami nsangu ya mbote.”—Matayo 11:4, 5.

Ziku ngiufula ya Yoane ke monisa nde, yandi ke vingila nde Yezu kusala mambu mingi kuluta yina yandi ke sala ntangu yai mpi mbala ya nkaka kubasisa yandi na boloko. Kansi, Yezu ke tubila Yoane na kuyindula ve nde yandi ta sala bimangu mingi kuluta yina yandi ke sala ntangu yai.

Ntangu balongoki ya Yoane me kwenda, Yezu me songa kibuka ya bantu pwelele nde Yoane kele kaka ve mbikudi. Yoane kele “kinati-nsangu” ya Yehowa yina mbikudulu tubilaka na Malaki 3:1. Yandi kele mpi mbikudi Elia, yina mbikudulu tubilaka na Malaki 4:5, 6. Yezu me tuba nde: “Ya kieleka mono ke tubila beno nde, na kati ya bantu yina me butukaka na bankento, kele ve ti muntu me luta Yoane Mbotiki na nene, kansi muntu ya fioti na Kimfumu ya zulu kele nene kuluta yandi.”—Matayo 11:11.

Ntangu Yezu ke tuba nde muntu ya fioti na Kimfumu ya zulu kele nene kuluta Yoane, yandi ke monisa nde Yoane ta vanda ve na Kimfumu ya zulu. Yoane yidikaka nzila sambu na Yezu kansi yandi fwaka na ntwala nde Kristu kukangudila bantu nzila ya kukwenda na zulu. (Baebreo 10:19, 20) Ata mpidina, Yoane kele mbikudi ya kwikama ya Nzambi mpi yandi ta vanda na kati ya bantu yina Kimfumu ya Nzambi ta yala awa na ntoto.