Beno Budisa Ve “Bantu yai ya Kukonda Mfunu” Sakuba

 1. Inki Yehowa me sadilaka beto yonso?

YEHOWA muntu me bendaka beto yonso na yandi. (Yoa. 6:44) Yo ke tendula nki? Yehowa talaka bantu yonso mbote-mbote na ntoto mpi yandi monaka diambu mosi ya mfunu na nge. Yandi monaka nde nge kele ti ntima ya masonga yina lenda landa kuzola yandi. (1 Bans. 28:9) Yehowa ke zabaka nge, yandi ke bakisaka nge mpi yandi ke zolaka nge. Kuzaba mambu yai ke pesa beto kibeni kikesa!

 2. Inki mutindu Yezu monisaka nde Yehowa ke tudilaka mameme na yandi yonso dikebi?

² Yehowa ke tudilaka nge dikebi mingi mpi yandi ke tudilaka Bakristu yonso dikebi. Sambu na kubakisa yo, Yezu fwanisaka Yehowa ti ngungudi. Kana dimeme mosi na kati ya mameme 100 me vila, nki ngungudi ta sala? Yandi ta ‘bikisa mameme 99 na zulu ya bangumba sambu na kukwenda kusosa dimeme yina me vila.’ Kana ngungudi me mona dimeme yina, yandi ta wila yo ve makasi kansi yandi ta wa kiese. Inki yo ke longa beto? Mameme yonso kele mfunu na meso ya Yehowa. Yezu tubaka nde: “Sambu na Tata na mono yina kele na zulu, yo kele ve diambu ya mbote nde ata muntu mosi na kati ya bantu yai ya kukonda mfunu kufwa.”—Mat. 18:12-14.

 3. Inki beto ta tubila na disolo yai?

³ Beto ke zolaka ve kusala mambu yina ta lembisa bampangi na beto nitu. Inki lenda sadisa beto na kubudisa ve bampangi na beto sakuba? Mpi nki beto fwete sala kana muntu mosi me sala diambu yina me pesa beto mpasi? Disolo yai ta pesa bamvutu na bangiufula yai. Beto tadila ntete mambu ya me tala “bantu yai ya kukonda mfunu” yina Matayo kapu 18 ke tubila.

 4. “Bantu yai ya kukonda mfunu” kele banani?

⁴ “Bantu yai ya kukonda mfunu” kele balongoki yonso ya Yezu. Bo yonso kele “bonso bana ya fioti” sambu bo ke ndimaka na luzolo yonso nde Yezu kulonga bo. (Mat. 18:3) Ata bo me katukaka na bisika ya kuswaswana mpi bo kele ti mabanza ya kuswaswana mpi kimuntu ya kuswaswana, bo yonso ke monisaka lukwikilu na Kristu. Kristu mpi ke zolaka bo mingi.—Mat. 18:6; Yoa. 1:12.

 5. Inki mutindu Yehowa ke kudiwaka kana muntu mosi ke sadila bansadi na yandi mambu ya mbi?

⁵ “Bantu yai ya kukonda mfunu” kele mfunu mingi na meso ya Yehowa. Sambu na kubakisa mutindu Yehowa ke tadilaka bantu yai, beto tadila ntete mutindu beto ke tadilaka bana-fioti. Bana-fioti ke vandaka mfunu mingi na meso na beto. Beto ke zolaka kutanina bo sambu bo ke vandaka ve ngolo, bo ke zabaka ve mambu mingi mpi bo ke vandaka ve mayele bonso bambuta. Beto ke zolaka ve kumona muntu mosi ke sadila muntu ya nkaka diambu ya mbi mpi beto ke waka makasi ntangu beto ke monaka muntu mosi ke sadila mwana-fioti mambu ya mbi. Mutindu mosi, Yehowa ke zolaka kutanina beto, yo yina yandi ke waka makasi mingi kana muntu mosi ke sadila bansadi na yandi mambu ya mbi.—Yez. 63:9; Mar. 9:42.

 6. Mutindu 1 Bakorinto 1:26-29 ke monisa yo, nki mutindu nsi-ntoto ke tadilaka balongoki ya Yezu?

⁶ Inki mutindu balongoki ya Yezu kele bonso “bantu ya kukonda mfunu”? Banani ke vandaka bantu ya mfunu na nsi-ntoto yai? Na nsi-ntoto yai, bantu ya mfunu kele bamvwama, bantu yina me zabanaka mpi bantu yina kele ngolo. Sambu na bantu ya nsi-ntoto, balongoki ya Yezu kele “bantu ya kukonda mfunu.” (Tanga 1 Bakorinto 1:26-29.) Kansi Yehowa ke tadilaka bo ve mutindu yina.

 7. Inki mutindu Yehowa ke zolaka nde beto tadila bampangi na beto?

⁷ Yehowa ke zolaka bansadi na yandi yonso yo vanda bayina ke sadilaka yandi banda bamvula mingi to bamvula fioti. Bampangi yonso kele mfunu na meso ya Yehowa mpi na meso na beto. Beto fwete “zola kimvuka ya mvimba ya bampangi,” beto fwete zola ve bampangi ndambu. (1 Pie. 2:17) Beto fwete sala ngolo sambu na kusala ve mambu yina ta pesa bo mpasi mpi beto fwete monisila bo zola. Kana beto me bakisa nde beto me sadila mpangi mosi diambu ya mbi, beto fwete lutisa yo ve mpi kuyindula nde mpangi yina ta lolula beto mpi yandi ta vila diambu yina. Sambu na nki bantu ya nkaka lenda wa mpasi sambu na mambu yina beto me tuba to me sala? Mbala ya nkaka yo lenda vanda sambu na mutindu bo me yelaka. Bampangi ya nkaka lenda yindula nde bo ke vandaka na nsi ya bantu ya nkaka. Bampangi ya nkaka kele ya mpa na kieleka mpi bo me zaba ntete ve mutindu ya kukanga ntima na bifu ya bantu ya nkaka. Yo vanda mutindu yina to ve, beto fwete sala yonso sambu na kutula ngemba. Diaka, kana mpangi mosi ke wa mpasi mbala na mbala sambu na mambu yina bantu ya nkaka ke tuba to ke sala, yandi fwete soba kikalulu yina. Kana yandi sala mutindu yina, yandi ta vanda na kiese mpi yandi ta vanda ti kinduku ya mbote ti bampangi.

 8. Inki bikalulu ya mbi bantu vandaka ti yo na bilumbu ya Yezu?

⁸ Sambu na nki Yezu tubilaka “bantu yai ya kukonda mfunu”? Balongoki ya Yezu yulaka yandi nde: “Nani kibeni kele muntu ya kuluta nene na Kimfumu ya zulu?” (Mat. 18:1) Bayuda mingi vandaka kuzola nde bantu kumona nde bo kele mfunu mingi. Muntu mosi ya mayele ke tuba nde: “Kuvanda ti lukumu mpi kuzabana vandaka diambu ya kuluta mfunu mingi na luzingu na bo.”

 9. Yo lombaka nde balongoki ya Yezu kusala nki?

⁹ Yezu zabaka mbote nde balongoki na yandi fwete sala ngolo sambu na kukatula mpeve ya kutesana yina Bayuda mingi vandaka ti yo. Yandi songaka bo nde: “Muntu yina kele muntu ya kuluta nene na kati na beno kukuma bonso leke na beno yonso, mpi muntu yina ke twadisa beno kukuma bonso muntu yina ke sadila bankaka.” (Luka 22:26) Beto ta vanda bonso ‘baleke’ kana beto ke “tadila bankaka nde bo me luta” beto. (Bafil. 2:3) Kana beto ke monisa kikalulu yai, beto ta budisa ve bankaka sakuba.

10. Inki ndongisila ya Polo beto fwete sadila?

¹⁰ Bampangi na beto yonso me luta beto na diambu mosi to na diambu ya nkaka. Beto ta bakisa yo kukonda mpasi kana beto ke tula dikebi na bikalulu na bo ya mbote. Beto fwete sadila ndongisila yai ya ntumwa Polo pesaka Bakristu ya Korinto: “Nani ke sala nde nge swaswana ti muntu ya nkaka? Inki kima ya nge kele na yo yina bo me pesaka nge ve? Ebuna, kana bo me pesaka nge yo kibeni, sambu na nki nge ke kudikumisa bonso nde bo pesaka nge yo ve?” (1 Bak. 4:7) Beto fwete sosa ve kaka nde bantu kundima beto to kuyindula nde beto me luta bantu ya nkaka. Kana mpangi mosi ke salaka badiskure ya mbote to mpangi-nkento mosi ke longukaka mbote Biblia ti bantu, yandi fwete pesa lukumu yonso na Yehowa.

11. Inki dilongi beto ke baka na mbandu ya Yezu ya me tala mfumu mosi ti mpika na yandi?

¹¹ Ntangu fioti na nima, ntangu Yezu songaka balongoki na yandi na kubudisa ve bantu ya nkaka sakuba, yandi pesaka bo mbandu ya mfumu mosi ti mpika na yandi. Mfumu yina songaka mpika na yandi na kufuta diaka ve mfuka ya mingi yina yandi vandaka ti yo, yina yandi zolaka ve kukuka kufuta. Na nima, mpika yina buyaka kukatula mfuka ya mpika ya nkaka yina vandaka ti mfuka na yandi ya fioti kibeni. Yo yina, mfumu tulaka mpika yai ya nku na boloko. Inki dilongi beto ke baka? Yezu tubaka nde: “Tata na mono yina kele na zulu ta sadila beno mpi mambu mutindu mosi kana konso muntu na kati na beno ke lolula ve mpangi na yandi na ntima ya mvimba.”—Mat. 18:21-35.

12. Inki mutindu beto ke pesaka bampangi ya nkaka mpasi kana beto ke lolula ve bampangi yina me sadila beto diambu ya mbi?

¹² Mambu ya mpika yina ya nku salaka pesaka yandi mpasi mpi yo pesaka bantu ya nkaka mpasi. Ntete, mpika yina vandaka ve ntima-mbote mpi yandi wilaka ve nduku na yandi mawa mutindu yandi “losaka yandi na boloko tii ntangu yandi ta futa mfuka na yandi.” Ya zole, yandi pesaka bampika ya nkaka mpasi na mambu yina yandi salaka. Ntangu banduku na yandi ya “bampika monaka mambu yina salamaka, bo kudiyangisaka mingi.” Mutindu mosi, mambu yina beto ke salaka ke yangisaka bantu ya nkaka. Kana mpangi mosi me sadila beto diambu ya mbi mpi beto ke buya kulolula yandi, nki ta salama? Ya ntete, beto ta pesa yandi mpasi sambu beto me buya kulolula yandi, beto me buya kutudila yandi dikebi mpi beto me buya kumonisila yandi zola. Ya zole, beto ke pesa bampangi ya nkaka na dibundu mpasi ntangu bo ta bakisa nde beto ke wakana ve ti mpangi yina.

13. Mbandu ya mpangi mosi ya mupasudi-nzila ke longa beto nki?

¹³ Kana beto ke lolula bampangi, beto ta kudiwa mbote mpi beto ta sadisa bampangi ya nkaka na kudiwa mbote. Beto tadila mbandu ya mpangi-nkento Crystal yina kele mupasudi-nzila. Mpangi-nkento mosi na dibundu sadilaka yandi mambu ya mbi. Mpangi Crystal ke tuba nde: “Kutuba na yandi vandaka bonso mbele. Ntangu beto vandaka kukwenda na kisalu ya kusamuna, mono vandaka ve kuzola kukota kamio mosi ti yandi. Yo manisaka mono nzala ya kusamuna mpi kiese yonso.” Mpangi Crystal yindulaka nde yandi vandaka ti bikuma ya mbote ya kuwa makasi. Kansi yandi kangilaka ve mpangi yina kimbeni. Na kudikulumusa yonso, yandi sadilaka ndongisila ya Biblia ya kele na disolo “Lolula na Ntima Yonso” na Nzozulu ya Nkengi ya Novembri 1, 1999. Yandi lolulaka mpangi yina. Mpangi Crystal ke tuba nde: “Mono me bakisaka nde beto yonso ke salaka bikesa sambu na kusoba mpi Yehowa ke vandaka pene ya kulolula beto konso kilumbu. Mono waka bonso nde bo me katula mono kizitu na mapeka. Mono kumaka diaka na kiese.”

14. Mutindu Matayo 18:21, 22 ke monisa yo, nki mambu ya mpasi ntumwa Piere kutanaka ti yo mpi nki dilongi beto ke baka na mambu yina Yezu songaka yandi?

¹⁴ Beto me zaba nde beto fwete lolula bampangi sambu yo kele diambu ya mbote yina beto fwete sala. Kansi bantangu ya nkaka yo lenda vanda mpasi sambu na kulolula bo. Mbala ya nkaka yo vandaka mpi mpasi sambu ntumwa Piere kulolula bantu ya nkaka. (Tanga Matayo 18:21, 22.) Inki lenda sadisa nge? Ya ntete, yindulula mutindu Yehowa ke lolulaka nge. (Mat. 18:32, 33) Yo lombaka ve nde Yehowa kulolula beto, kansi yandi ke lolulaka beto na ntima ya mvimba. (Nk. 103:8-10) Yo yina, “beto mpi beto fwete zolana.” Beto fwete lolula mpi bantu ya nkaka. Kana beto ke lolula bampangi na beto, yo kele bonso nde beto ke defisa bo. (1 Yoa. 4:11) Ya zole, yindula mambu yina ta salama kana beto me lolula bampangi. Beto lenda sadisa mpangi yina me sadila beto diambu ya mbi. Yo ta sadisa dibundu na kuvanda na bumosi, beto ta tanina kinduku na beto ti Yehowa mpi beto ta katula kizitu na mapeka na beto. (2 Bak. 2:7; Bakol. 3:14) Na nima, samba muntu yina ke lombaka beto na kulolula bantu ya nkaka. Kubika ve nde Satana kubebisa kinduku na nge ya mbote ti bampangi. (Baef. 4:26, 27) Beto kele ti mfunu ya lusadisu ya Yehowa sambu na kutina mitambu ya Satana.

15. Mutindu Bakolosai 3:13 ke monisa yo, nki beto lenda sala kana mpangi mosi me sadila beto diambu ya mbi?

¹⁵ Inki nge ta sala kana mpangi mosi me sadila nge diambu ya mbi? Sala yonso sambu na kutanina ngemba. Samba Yehowa na masonga yonso sambu yandi sadisa nge. Samba yandi sambu yandi sadisa muntu yina me sadila nge diambu ya mbi mpi samba yandi na kusadisa nge na kumona bikalulu ya mbote ya muntu yina; bikalulu yina ke pusaka Yehowa na kuzola yandi. (Luka 6:28) Kana nge ke kuka ve kulolula mpangi na nge, yindula mutindu ya mbote yina nge lenda solula ti yandi. Yo kele mbote na kubakisa nde mpangi kanaka ve kusadila nge diambu ya mbi. (Mat. 5:23, 24; 1 Bak. 13:7) Ntangu nge ke solula ti yandi, monisa yandi nde yandi vandaka ve ti ngindu ya kusadila nge diambu ya mbi. Inki nge ta sala kana yandi ke zola ve kutula ngemba? “Landa kukanga-ntima na mambu” na yandi. Kuyambula yandi ve. (Tanga Bakolosai 3:13.) Diambu ya kuluta mfunu kele nde, kumeka ve kukangila yandi kimbeni sambu yo lenda bebisa kinduku na nge ti Yehowa. Kubika ve ata fioti nde diambu mosi kulembisa nge. Kana nge sala mutindu yai, nge ta monisa nde nge ke zolaka Yehowa mingi kuluta bima yonso.—Nk. 119:165.

16. Inki mukumba beto yonso kele ti yo?

¹⁶ Beto ke sepelaka ti mukumba na beto ya kusadila Yehowa na bumosi na “kimvuka mosi” na nsi ya lutwadisu ya “ngungudi mosi.” (Yoa. 10:16) Mukanda Beto Mevukana Sambu na Kusala Luzolo ya Yehowa, lutiti 165 ke tuba nde: “Mutindu nge ke baka mambote ya bumosi yai, nge kele ti mukumba ya kutanina yo.” Yo yina, beto fwete “sala bikesa sambu na kutadila bampangi na beto mutindu Yehowa ke tadilaka bo.” Beto yonso, disongidila “bantu ya kukonda mfunu” kele mfunu mingi na meso ya Yehowa. Keti nge ke tadilaka mpi bampangi na nge mutindu yai? Yehowa ke monaka mpi ke sepelaka ti mambu yonso yina nge ke salaka sambu na kusadisa bampangi mpi kutudila bo dikebi.—Mat. 10:42.

17. Inki lukanu beto me baka?

¹⁷ Beto ke zolaka bampangi na beto mingi. Yo yina, beto “baka lukanu ya kutula ve kima mosi ya ke budisaka sakuba to sakuba na ntwala ya mpangi na beto.” (Bar. 14:13) Beto ke monaka nde bampangi na beto me luta beto mpi beto ke zolaka kulolula bo na ntima ya mvimba. Beto fwete bika ve nde mambu yina bampangi ya nkaka ke sala kubudisa beto sakuba. Kansi beto “landa mambu yina ke kotisaka ngemba mpi mambu yina ke sadisaka na kupesana kikesa.”—Bar. 14:19.