Mfumu Mosi ya Mvwama Mebaka Lukanu ya Kukonda Mayele

MFUMU ya leke yina kuvandaka mvwama vandaka kusala kisalu mbote, kuzitisa bansiku, mpi kuzola malongi ya Nzambi. Ntangu yandi kwisaka na Yezu, yandi fukamaka mpi kutubaka nde: “Longi, nge muntu ya mbote. Nki mono fweti sala sambu na kubaka moyo ya mvula na mvula?”

Yezu kumonisaka na mvutu na yandi nde, sambu muntu yina kubaka luzingu, yo lombaka nde yandi landa na kuzitisa bansiku ya Nzambi. Ntangu mwana-bakala yina kulombaka Yezu na kusonga yandi bansiku yango, Yezu kutubaka nde: “Kufwa bantu ve; kusala pite ve; kuyiba ve; kutuba mambu ya luvunu ve; zitisa tata na nge ti mama na nge; zola mpangi na nge bonso nge mosi.” Yai bansiku ya kuluta nene ya kuvandaka na Nsiku yina Nzambi kupesaka na nzila ya Moize. Na nima, mwana-bakala yina ya mfumu kuyulaka nde: “Mono me landaka mambu yina yonso; nki mono fweti sala diaka?”​—Matayo 19:16-20.

Yezu “talaka yandi ti kuzola na ntima” mpi kutubaka nde: “Kima mosi me konda nge. Kwenda kuteka bima na nge yonso, nge pesa mbongo na bansukami, ebuna nge ta vanda na kimvwama na zulu. Na nima, kwisa kulanda mono.”​—Marko 10:17-21.

Yo lombaka nde mfumu yina ya leke kubaka lukanu mosi ya nene. Inki yandi zolaka kusala? Keti yandi zolaka kukangama na kimvwama na yandi to kuyambula yo na luzolo yonso mpi kukuma longoki ya Yezu? Keti yandi zolaka kusosa kimvwama ya nsi-ntoto to kimvwama ya zulu? Yo fwete vanda nde yo vandaka lukanu mosi ya mpasi sambu na yandi. Yo kele pwelele nde yandi vandaka kudibanza sambu na kimpeve na yandi, sambu yandi vandaka kuzitisa Nsiku mpi yandi vandaka kusosa kuzaba mambu yankaka ya yandi lendaka kusala sambu Nzambi kundima yandi. Inki lukanu yandi bakaka? “Yandi vutukaka ti mawa-mawa, sambu yandi vandaka na kimvwama mingi.”​—Marko 10:22.

Lukanu ya mwana-bakala yina ya mvwama kubakaka kuvandaka ve ya mayele. Kana yandi kumaka longoki ya kwikama ya Yezu, yandi zolaka kubaka kima ya yandi vandaka kusosa: luzingu ya mvula na mvula. Biblia kesonga beto ve mambu yina kukuminaka yandi. Kansi, beto mezaba nde kiteso ya bamvula makumi iya na nima, basoda ya Roma kufwaka Yeruzalemi ti kitini ya nene ya Yudea. Bayuda mingi kuvidisaka kimvwama mpi luzingu na bo.

Na kuswaswana ti mwana-bakala yina ya mvwama, ntumwa Piere ti balongoki yankaka kubakaka lukanu ya mbote. Bo ‘bikisaka bima na bo yonso’ mpi bo landaka Yezu. Lukanu yina kunatilaka bo mambote mingi! Yezu kuzabisaka bo nde, bo tabaka bima mingi kuluta bima yina bo yambulaka. Dyaka, bo tabaka luzingu ya mvula na mvula. Bo vandaka ve ti kikuma ya kuvanda mawa sambu na lukanu ya bo bakaka.​—Matayo 19:27-29.