DILONGI 14

Inki Beto Fwete Sala Sambu Dibundu na Beto Kusepedisa Nzambi?

Ya Bo Me Niema na Papie

Mutindu beto tubilaka yo na dilongi ya me luta, mabundu yonso ve ke sepedisaka Nzambi. Ata mpidina, beto lenda sambila Ngangi na beto na mutindu yina ke pesaka yandi kiese. Inki “lusambu” to dibundu ke sepedisaka yandi? (Yakobo 1:27) Beto tala mambu yina Biblia ke longaka.

1. Malongi ya dibundu na beto fwete katuka na wapi?

Malongi ya dibundu na beto fwete katuka na Biblia. Yezu songaka Nzambi nde: “Ndinga na nge kele kieleka.” (Yoane 17:17) Mabundu ya nkaka ke buyaka kusadila malongi ya Ndinga ya Nzambi Biblia. Na kisika ya kusadila malongi ya Biblia, yo ke sadilaka malongi mpi bansiku ya bantu. Kansi Yehowa ke sepelaka ve ti bantu yina ‘ke buyaka bansiku na yandi.’ (Tanga Marko 7:9.) Diaka, beto ke pesaka ntima na yandi kiese ntangu beto ke sadilaka malongi mpi bandongisila ya Biblia.

2. Inki mutindu beto fwete sambila Yehowa?

Yo me fwana nde beto sambila kaka Yehowa Nzambi yina salaka beto. (Kusonga 4:11) Yo ke tendula nde beto fwete zola yandi, kusambila kaka yandi mpi kusadila ve biteki to bifwanisu ntangu beto ke sambila yandi.—Tanga Yezaya 42:8.

Lusambu na beto fwete vanda ‘ya santu mpi ya Yehowa ke ndimaka.’ (Baroma 12:1) Yo ke tendula nde beto fwete zitisa bansiku na yandi. Mu mbandu, bantu yina ke zolaka Yehowa, ke zolaka mpi ke lemfukaka na bansiku na yandi sambu na makwela. Diaka bo ke buyaka mambu ya mbi bonso, kusadila makaya mpi kusadila na mutindu ya mbi bima ya ke lawusaka to malafu.a

3. Sambu na nki beto fwete sambila Yehowa na dibundu ti bampangi na beto Bakristu?

Balukutakanu na beto ya konso mposo ke pesaka beto dibaku ya ‘kukumisa Yehowa . . . na dibundu.’ (Nkunga 111:1, 2) Beto ke salaka yo mpi ntangu beto ke yimbaka bankunga sambu na kupesa Nzambi lukumu. (Tanga Nkunga 104:33.) Yehowa ke lombaka beto na kukwenda na balukutakanu sambu yandi ke zolaka beto mpi yandi ke zabaka nde yo ta sadisa beto na kuzinga mvula na mvula. Ntangu beto ke kwendaka na balukutakanu, beto ke pesanaka kikesa ti bampangi.

LONGUKA MAMBU MINGI

Beto tala sambu na nki Yehowa ke zolaka ve nde beto sadila biteki ntangu beto ke sambila yandi mpi mambu ya mfunu yina beto fwete sala sambu na kukumisa yandi.

4. Beto fwete sadila ve biteki ntangu beto ke sambila Nzambi

Inki mutindu beto ke zabaka nde kusadila biteki ke sepedisaka ve Nzambi? Beno tala VIDEO mpi na nima beno pesa mvutu na ngiufula ya ke landa.

VIDEO: Keti Nzambi Ke Ndimaka nde Beto Sadila Biteki Ntangu Beto Ke Sambilaka Yandi? (3:26)

Bifwanisu: 1. Bakala mosi ke samba na ntwala ya babolo ya madia mpi ya nzambi mosi ya kiteki. 2. Bakala mosi me simba shapele mpi ke samba na ntwala ya kiteki ya Maria.

Inki kuminaka bansadi ya Nzambi ya ntangu ya ntama yina vandaka kusosa kusadila biteki sambu na kusambila yandi?

Bantu ya nkaka ke yindulaka nde kusadila biteki ke sadisaka bo na kukwenda pene-pene na Nzambi. Kansi kusala mutindu yai ke salaka nde Nzambi kubuya bo kibeni! Beno tanga Kubasika 20:4-6 mpi Nkunga 106:35, 36. Na nima beno pesa mvutu na bangiufula yai:

Inki bima to biteki nge ke monaka bantu ke sadila ntangu bo ke sambilaka Nzambi?
Inki mutindu Yehowa ke tadilaka kusadila biteki?
Ebuna nge, nki mutindu nge ke tadilaka kusadila biteki?

5. Kusambila kaka Yehowa ke katulaka beto na kimpika ya malongi ya luvunu

Tala mutindu kusambila Yehowa na mutindu yina yandi ke ndimaka ke katulaka beto na kimpika ya malongi ya luvunu. Beno tala VIDEO.

VIDEO: Kieleka Katulaka Mono na Kimpika (5:16)

Beno tanga Nkunga 91:14 mpi na nima beno pesa mvutu na ngiufula yai:

Yehowa ke tuba nde yandi ta sala nki kana beto ke zola mpi ke sambila kaka yandi?

6. Beto ke sambilaka Nzambi na balukutakanu ya dibundu

Beto ke kumisaka Yehowa mpi ke pesanaka kikesa ntangu beto ke yimbaka mpi ke pesaka bamvutu na balukutakanu ya dibundu. Beno tanga Nkunga 22:22 mpi na nima beno pesa mvutu na bangiufula yai:

Keti nge ke sepelaka ti bamvutu yina bampangi ke pesaka na balukutakanu?
Keti nge ta zola kudibongisa sambu na kupesa mpi mvutu?

Bifwanisu: Longoki mosi ya Biblia ya nkento ke longuka kusambila Nzambi na mutindu yina yandi ke ndimaka. 1. Yandi ke yimba sambu na kukumisa Nzambi na lukutakanu ya dibundu. 2. Yandi ke pesa bamvutu na lukutakanu ya dibundu. 3. Yandi ke songa nkento mosi ti mwana na yandi ya nkento video ya ke tubila malongi ya Biblia.

7. Yehowa ke waka kiese ntangu beto ke songaka bantu mambu ya beto ke longukaka

Beto ke vandaka ti mabaku mingi ya kusonga bantu ya nkaka malongi ya Biblia. Beno tanga Nkunga 9:1 mpi 34:1. Na nima beno pesa mvutu na ngiufula yai:

Tanga kima mosi ya nge me longukaka na Biblia yina nge ta sepela kusonga mpi muntu ya nkaka.

BANTU YA NKAKA KE TUBAKA NDE: “Konso muntu fwete sambila Nzambi na mpila yandi me zola.”

Inki nge ke yindula?

NA BUNKUFI

Beto ke sepedisaka Ngangi na beto kana beto ke sambila kaka yandi, ke kumisa yandi na balukutakanu ya dibundu mpi ke songa bantu ya nkaka mambu ya beto ke longuka.

Inki Nge Me Simba?

Sambu Nzambi kundima dibundu na beto, malongi na yo fwete katuka na wapi?
Sambu na nki beto fwete sambila kaka Yehowa?
Sambu na nki beto fwete sambila Nzambi na dibundu ti bantu yina ke zolaka kusepedisa yandi?

Dati ya beno me manisa dilongi yai:

Mambu ya Kusala

Pesa mvutu na lukutakanu mosi ya dibundu.

Mambu ya Nkaka::

Your other goal

TALA MPI

Na disolo “Mono Ke Sambilaka Diaka Ve Biteki,” tala mutindu nkento mosi yambulaka kusambila biteki.

“Biblia Ke Sobaka Luzingu ya Bantu” (Disolo ya kele na Nzozulu ya Nkengi)

Tala mambu yina ta sadisa nge na kupesa bamvutu na balukutakanu ya dibundu.

“Kumisa Yehowa na dibundu” (Nzozulu ya Nkengi, Yanuari 2019)

Tala mambote yina balukutakanu ya dibundu natilaka leke mosi ya bakala ata yo vandaka ve pete sambu yandi kwenda na balukutakanu.

Yehowa Ke Kudibanzaka Sambu na Mono 3:07

Bantu mingi ke yindulaka nde Bakristu fwete sadila kulunsi. Keti beto fwete sadila yo ntangu beto ke sambila Nzambi?

“Sambu na Nki Bambangi ya Yehowa Ke Sadilaka Ve Kulunsi na Lusambu na Bo?” (Disolo ya kele na jw.org)

a Beto ta tubila mambu yai na malongi ya ntwala.