“Mikapu ya Bible” Kesadilamaka bonso Yina Kesimba Butatu Busantu

MIKAPU yankaka ya Bible kesadilamaka bonso yina kesimba Butatu. Kansi, ntangu beto ketanga mikapu yina, beto fwete zaba nde yau vanda Bible to Nkenda mosi ve kenungisa Butatu.

Konso mukapu yina mepesama bonso yina kesimba Butatu fwete bakisama na nsadisa ya yina Bible kelonga na mvimba na yau. Mbala mingi, nkutu, nzyunga ya mukapu yina ketendulaka nsansa na yau ya kyeleka.

Nzambi mosi na bapersona tatu

ANSIKLOPEDI yampa ya katolika (angl.) kemonisa mikapu tatu ya mutindu yina, na kundimaka nde: “Dilongi ya Butatu melongama ve na L[uwawanu] ya N[kulu]. Nzikisa ya kuluta nkulu yina L[uwawanu] Y[ampa] kepesa kele na mikanda ya Paul, kibeni na 2 Kor. 13:13 [nzila 14 na ba Bibles yankaka] mpi 1 Kor. 12:​4-6. Sambu na Baevanzile, mukapu mosi kesadilama na Butatu kele yina Yezu tindaka balongoki na kubotika bantu na Matai 28:19.”

Beto zikisa, na nsadisa ya Bible ya Jérusalem, mpila “bantu tatu” yina metubilama na mwa banzila ya kutanga. “Nlemvo ya Mfumu Yezu Klisto, zola ya Nzambi ye kintwadi ya Mpeve Yanlongo vanda na beno yonso!” (2 Korinte 13:13 [14]) “Kyeleka, makabu ya kimpeve ikele mitindu mingi, kansi Mpeve ikele mosi, kisyelo ikele mitindu mingi, kansi Mfumu kele mosi, bisalu ikele mitindu mingi, kansi Nzambi ikele mosi yina kesala yonso na bantu yonso.” (1 Korinte 12:​4-6) “Kwenda kusala makanda yonso ya bantu balongoki na mono, botika bau na zina ya Tata ye ya Mwana ye ya Mpeve Santu.”​—⁠Matai 28:⁠19.

Keti beto ketanga na mikapu yina nde Nzambi, Kristu mpi mpeve santu kesala Nzambi mosi ya bantu tatu, nde bau yonso tatu kele kiteso mosi na bunzambi, na ngolo mpi na luzingu ya konda luyantiku mpi nsuka? Ikele ve, ata mpi ve sambu bantu tatu metangama na ndonga ketendula nde bau kele tatu na kati ya muntu mosi.

Na Ansiklopedi na bau ya literatire ya Bible, ya teyolozi mpi ya eklezyastika (angl.), McClintock mpi Strong kendima nde ntubilu ya mpidina “kemonisa kaka nde bantu yina tatu metangama, . . . kansi yau kemonisa ve, kibeni, nde bau yonso tatu kele banzambi mpi kebaka nkembo ya bunzambi keteso mosi.”

Ata bansoniki na yau kekwikilaka na Butatu, mukanda yina ketuba sambu na mambu yina 2 Korinte 13:13 (14) ketubila nde: “Beto lenda ve kibeni kutuba nde bau vandaka na kimfumu kiteso mosi, to bumuntu mosi.” Yau keyika sambu na Matai 28:​18-20 nde: “Kansi, mukapu yina mosi kemonisa ve pwelele bumuntu ya bantu tatu yina, ata mpi ve kukukana na bau to bunzambi na bau.”

Mukapu yina ketubila mbotika ya Yezu ketubila dyaka sambu na Nzambi mpi mpeve santu. Yezu “monaka mpeve santu kukulumuka bonso diyembe ye kutuluka na zulu nandi.” (Matai 3:16) Mukapu yai ketuba ve nde bau tatu kele mosi. Mbala mingi, Abraham, Isaac mpi Jacob ketangamaka sika mosi; kansi bau kele ve mpidina muntu mosi. Kiteso mosi, Pierre, Jacques mpi Jean kevukisamaka sika mosi mbalankaka, kansi ata bau mpi kele ve mpidina muntu mosi. Dyaka, sambu mpeve ya Nzambi kulumukaka na Yezu kilumbu ya mbotika nandi, yau ketendula nde kubanda ntama Yezu pakulamaka ve na mpeve. Na yau, inki mutindu yandi lendaka vanda muntu mosi na kati ya Butatu, yina kezola kutuba nde yandi vandaka ntangu yonso mosi ti mpeve santu?

Na 1 Yoane 5:​7, ba Bibles ya nkulu ketubila Tata, Mwana ti mpeve santu sika mosi. Ba biblistes kezaba ata mpidina nde mambu yina vandaka ve na luyantiku na Masonuku, nde yau yikamaka bilumbu mingi nanima. Nkutu, mukapu yai ya kuyika katulamaka na ba Bibles mingi yampa.

Mikapu yankaka, kesadilamaka bonso yina kesimba dilongi yina, ketubila kaka bantu zole ya Butatu: Tata ti Yezu. Beto zikisa mosimosi kati na yau.

“Mono ti Tata, beto kele mosi”

ATA yau ketubila ve muntu ya tatu, mambu yai, kele na Yoane 10:​30, kesadilamaka mingi sambu na kunungisa Butatu. Kansi, Yezu songaka yina yandi zolaka tuba na kuvanda “mosi” ti Tata. Na Yoane 17:​21, 22, yandi kesambila Nzambi sambu nde balongoki nandi “kuvanda mosi, bonso nge, Tata, Yezu tubakaka, nge mu mono ye mono mu nge, na bau mpe vanda mu beto . . . na bau lenda vanda mosi bonso beto ikele mosi.” Keti Yezu vandaka sambila nde balongoki nandi yonso kukituka muntu mosi kaka? Ikele ve. Yandi vandaka sambila sambu bau vukana​—⁠bonso yandi kele ti Nzambi​—⁠na dibanza mosi mpi na lukanu mosi.​—⁠Tala 1 Korinte 1:⁠10.

Na 1 Korinte 3:​6, 8, Paul ketuba nde: “Mono kunaka, Apolo tulaka masa, . . . Yandi ya kuna ye ya tula masa ikele mosi.” Paul zolaka ve kutuba nde Apolo ti yandi vandaka bantu zole na kati ya muntu mosi, kansi nde bau vandaka ya kuvukana na lukanu mosi. Ngogo ya greke mebalulama awa na “mosi” (hen) kele na bukatikati; yau ketendula na nsansa yantete “(kima) mosi” mpi yau kesonga bumosi na ngwakana. Ikele ngogo mosi yina Yezu kesadila na Yoane 10:30 sambu na kusonga bangwizani yandi kele na yau ti Tata nandi. Ikele dyaka ngogo mosi yina Yezu kesadila na Yoane 17:​21, 22. Na yau, ntangu na bisika yina yonso yandi kesadila ngogo “mosi” (hen), yau kele bumosi ya mabanza mpi ya lukanu Yezu ketubila.

Sambu na Yoane 10:​30, Jean Calvin (yina vandaka kwikila na Butatu) tubaka na Komantere nandi na Luwawanu Yampa, T. II, Nsangu yambote ya Yoane: “Ba docteurs ya ntama bebisaka mingi mukapu yina sambu na kumonisa nde Yezu Kristu kele kiteso mosi ti Tata nandi. Sambu Mfumu Yezu kenwanina ve awa bumosi ya bunzambi, kansi ngwakana to ngwizani yandi kele na yau ti Tata nandi.”

Kaka nanima ya mukapu ya Yoane 10:​30, Yezu kemonisa ti ngolo yonso nde yandi tubaka ve, na ndinga yina, nde yandi kele Nzambi. Na Bayuda yina yindulaka nde yandi tubaka mpidina mpi yina kezola kubula yandi matadi, yandi kevutula nde: “Buna beno tuba sambu na yandi ya Tata tulaka nlongo ye fidisaka mu nsi: Nge ikele kutuba mbi. Sambu na mono kutubaka: Mono ikele Mwana ya Nzambi?” (Yoane 10:​31-36, TOB) Ve, Yezu tubaka ve nde yandi vandaka Nzambi Mwana, kansi Mwana ya Nzambi.

Keti yandi “kuditulaka kiteso mosi ti Nzambi”?

MUKAPU yankaka ya Masonuku kemonikaka bonso yau kelonga Butatu; ikele Yoane 5:18. Bonso na Yoane 10:​31-36, Bayuda kezola awa kufwa Yezu sambu yandi kebinga “Nzambi Tata nandi, na kuditulaka kiteso mosi ti Nzambi.”

Kansi, nani ketuba nde Yezu kekuditula kiteso mosi ti Nzambi? Kyeleka yandi mosi ve, sambu yandi kebuya ngindu yina na nzila ya kutanga yai: “Buna Yezu vutulaka ye tubaka kwa bau: . . . ‘Mwana lenda ve kusala mambu yandi mosi, kansi yina ya yandi monaka Tata kusala.’ ”​—⁠Jé.

Na ndinga yina, Yezu kesonga na Bayuda nde yandi kekuditula ve kiteso mosi ti Nzambi mpi nde yandi lenda ve kusala kima na ngolo nandi mosi. Keti beto lenda yindula muntu ya kiteso mosi ti Nzambi Nkwa-Ngolo ketuba nde yandi “lenda ve kusala dyambu mosi na ngolo nandi”? (Tala Daniel 4:​34, 35.) Beto kemona na kutadila mikapu mezyunga yau nde yau vanda na Yoane 5:18 to na Yoane 10:​30, Yezu kebuya bangindu ya luvunu ya Bayuda, bayina, bonso bantu kekwikilaka na Butatu, bau keyindula na lweka.

Keti yandi kele ‘kiteso mosi ti Nzambi’?

NA FILIPE 2:​6, Bible de Sacy (1846) ketuba sambu na Yezu nde: “yina, vandaka na nitu mpi bonso Nzambi yindulaka ve nde yau vandaka mbi sambu na yandi kuditula na kingolongolo kiteso mosi ti Nzambi.” Beto ketanga ngindu mezola fwanana ti yai na La Sainte Bible, ya David Martin (1879). Bantu yankaka yina kekwikilaka na ngindu yina ketuba nde Yezu kele kiteso mosi ti Nzambi kesadilaka dyaka na bilumbu na beto ba Bibles bonso yina. Kansi, tala nki mutindu ba Bibles yankaka kesonika mukapu yina:

1908: “ata yandi vandaka na nitu ya Nzambi, yandi ditombolaka na yau ve sambu na kuditesa ti Nzambi.” La Sainte Bible, ya H. Oltramare.

1965: “Yandi​—⁠na nitu ya bunzambi ya kyeleka! mekudikumisaka ntete ve lulendu ya kuditula kiteso mosi ti Nzambi.” Das Neue Testament, édition revisée, ya Friedrich Pfäfflin.

1968: “yina, ata yandi vandaka na nitu ya Nzambi, kumonaka ve nde kuvanda kiteso mosi ti Nzambi vandaka kima yandi zolaka kitula ya yandi na bwimi.” La Bibbia Concordata.

1984: “yandi vandaka tuka ntama na nitu ya bunzambi, kansi yandi monaka ve nde yandi fwete sosa na kuditula na kingolongolo kiteso mosi ti Nzambi.” La Bible en français courant.

1987: “yina, ata yandi vandaka na nitu ya Nzambi, yindulaka ve na kubaka na kingolongolo, disonga sambu na kuvanda kiteso mosi ti Nzambi.” Les Saintes Ecritures ​—⁠ Traduction du monde nouveau.

1988: “yandi yina kele na nitu ya bunzambi kumonaka ve bonso kima ya kubotula na kingolongolo na kuvanda kiteso mosi ti Nzambi.” TOB.

Kansi bankaka ketubaka nde ata ba Bibles yina ya kwikama kibeni ketuba 1) nde Yezu vandaka ntete kiteso mosi ti Nzambi, kansi yandi vandaka na luzolo na kubika ndonga nandi, to 2) yandi vandaka ve na mfunu ya kubaka na kingolongolo kukukana yina yandi vandaka na yau ntete.

Ralph Martin, na mukanda nandi kebingama Mukanda ya Paul na bantu ya Filipe (angl.), kesala komantere yai na greke ya kisina: “Kansi, beto lenda vanda na ketiketi, nde verbe lenda katuka na nsansa na yau ya kyeleka ya ‘kubotula,’ ‘kubaka na kingolongolo,’ yau kituka ‘kusimba.’ ” Mukanda Le Commentaire interprétatif du Testament grec (angl.) ketuba na ndambu na yau nde: “Beto kemona ve ata nzila mosi kuna ἁρπάζω [har·pa’zo] to ngogo yankaka mekatuka na yau kuvanda na nsansa ya ‘kulunda’ to ‘kusimba.’ Nde verbe yina ketendula kibeni ‘kubotula, kubaka na kingolongolo.’ Na yau nswa mepesama ve na kukatuka na nsansa ya kyeleka, ya ‘kukanga,’ na kubaka nsansa yankaka ya kuswasana mvimba, yina ya ‘kusimba.’ ”

Yina beto metubila ntete kemonisa pwelele nde bansoniki ya ba Bibles yankaka, bonso ya Bible de Sacy to La Sainte Bible, ya David Martin, kebebisa bansiku ya ndinga greke sambu na kumonisa bangindu na bau ya Butatu. Na sika ya kutuba nde Yezu vandaka mona mbi ve na kuditula kiteso mosi ti Nzambi, mukapu ya greke ya Filipe 2:​6, ntangu beto ketanga yau na disu yambote, kemonisa kibeni dyambu yankaka: Yezu kuyindulaka ve nde yau vandaka mbi ve.

Banzila ya nzyunga (nzila 3-5, 7, 8, Jé) ketemuna beto na mpila beto fwete bakisa nzila ya kutanga 6. Paul kepesa nsyamisa yai: “Bika konso muntu na dikulumusa kubanza bankaka kuluta yandi.” Nanima ntumwa kebaka mbandu ya kuluta mbote, yina ya Yezu: “Beno vanda na mabanza mu beno, ya vandaka mu Klisto Yesu.” Inki “mabanza” yina? Keti yau kele ya ‘kuyindula nde yau vandaka mbi ve kuditula na kingolongolo kiteso mosi ti Nzambi’? Ikele ve, yau tawakana ve mvimba na ngindu Paul kezola kulonga. Kansi, Yezu, yina ‘banzaka Nzambi kuluta yandi,’ ‘mesosaka ntete ve na kuditula na kingolongolo kiteso mosi ti Nzambi,’ kansi, “yandi dikulumusaka dyaka mingi, ye lemvukaka tii na lufwa.”

Kyeleka, mambu yina lenda ve kusadilama na Nzambi Nkwa-Ngolo. Ikele Yezu yau ketubila awa, Yezu Kristu yina kemonisa mbote ngindu ya Paul metadila mfunu ya kudikulumusa mpi ya kulemfuka nantwala ya muntu ya kuluta Nene, Ngangi, Jéhovah Nzambi.

“Mono ikele”

NA YOANE 8:​58, mwa ndambu ya ba Bibles, mumbandu Bible ya Jérusalem, ketubisa Yezu nde: “Ntangu Abraham vandaka mebutuka ntete ve, mono kele.” Keti Yezu vandaka longa pana, bonso kendima yau bantu kekwikilaka na Butatu, nde yandi vandaka bingama “Mono Kele”? Keti yau ketendula nde, bonso bau ketuba, nde yandi vandaka Jéhovah ya Masonuku ya ebeleo? Na Exode 3:​14, beto ketanga na Bible Osty nde: “Nzambi tubaka na Moïse: ‘Mono kele yina kele.’ ”

Exode 3:14 (Osty) kesadila mbingilu “Mono kele” na Nzambi, bonso zina kesonga nde yandi kele kibeni ti luzingu mpi nde yandi kelungisaka bilaka nandi. Mukanda kebingama Mikanda tanu yantete ya Moïse mpi bambikudi, yina sonamaka na J. Hertz, ketuba sambu na mbingilu yina nde: “Sambu na bana ya Israele na kimpika, nsansa zolaka vanda, ‘Ata yandi memonisa ntete ve Ngolo nandi na beno, yandi tasala yau; yandi kele mvula na mvula mpi kyeleka yandi takatula beno na kimpika.’ Mingi kelanda bubu yai Rashi [Mufransè ntendudi ya Bible mpi ya nsiku ya Bayuda) na kubalulaka nsa yina na [Exode 3:14] mutindu yai: ‘Mono tavanda yina mono tavanda.’ ”

Ntubilu ya beto kemona na Yoane 8:58 kele ya kuswaswana kibeni ti yina kele na Exode 3:14. Yezu kesadila yau ve bonso zina, kansi sambu na kutendula luzingu nandi na zulu. Nkutu tala nki mutindu ba Bibles yankaka kesonika Yoane 8:⁠58:

1898: “Nantwala Abraham kuvanda, mono vandaka.” La Sainte Bible, ya Ostervald.

1935: “Mono vandaka nantwala Abraham kubutuka!” The Bible​—⁠An American Translation, ya J. Smith mpi E. Goodspeed.

1965: “Nantwala Abraham kubutuka, mono vandaka ntete yina mono kele.” Das Neue Testament, ya Jörg Zink.

1981: “Mono vandaka na luzingu nantwala Abraham kubutuka!” The Simple English Bible.

1987: “Nantwala Abraham kukwisa na luzingu, mono vandaka.” Les Saintes Ecritures ​—⁠ Traduction du monde nouveau.

Na yau, nsansa ya kyeleka ya mukapu yina na greke kele nde mwana “yantete” ya Nzambi, Yezu, yina gangamaka, vandaka nantwala ya kubutuka ya Abraham.​—⁠Kolosai 1:15; Bingana 8:​22, 23, 30; Nzayikusu 3:⁠14.

Mbala yai dyaka, nzyunga ya mukapu yina kesonga nde ikele mpidina beto fwete bakisa mukapu yina. Bayuda kezola kulosa Yezu matadi sambu yandi kendima nde yandi “monaka Abraham” mpamba ve, sambu na bau, yandi vandaka ntete ve ti mvula 50. (Nzila 57) Na yau, yau kele mbi ve nde Yezu zabisa bau mvula nandi. Yau yina yandi ketubila bau nde: “Nantwala Abraham kukwisa na luzingu, mono vandaka.”

“Ndinga vandaka Nzambi”

BIBLE ya Jérusalem kesonika Yoane 1:1 mutindu yai: “Na luyantiku vandaka Ndinga ye Ndinga vandaka ti Nzambi ye Ndinga vandaka Nzambi.” Sambu na bantu yina kekwikilaka na Butatu, mukapu yina ketendula nde “Ndinga” (greke ho lo’gos) yina kwisaka na ntoto Yezu Kristu, vandaka Nzambi Nkwa-Ngolo yandi mosi.

Mbala yai dyaka, beto kemona nde nzyunga ya mukapu yina kesadisa na kuvanda na mbakusulu yambote ya Masonuku. Bible ya Jérusalem, yau mosi, ketuba nde “Ndinga vandaka ti Nzambi.” (Ikele beto metenda yau.) Yina kele “ti” muntu lenda ve kuvanda muntu yina. Na dibanza mosi ti ngindu yina, Zulunalu ya literatire ya Bible (angl.), kusonamaka na jésuite Joseph Fitzmyer, kemonisa nde kana beto tendula kitini yansuka ya Yoane 1:1 bonso yau ketendula na kifalansa “le” Dieu, yau “tawakana ve ti kitini yantete,” ketuba nde Ndinga vandaka ti Nzambi.

Tala nki mutindu ba Bibles yankaka kesonika kitini ya mukapu yina:

1808: “ye ndinga vandaka [n]zambi. The New Testament in an Improved Version.

1864: “ye nzambi vandaka ndinga.” The Emphatic Diaglott, traduction interlinéaire ya Benjamin Wilson.

1928: “ye Ndinga vandaka kigangwa ya bunzambi.” Bible ya Centenaire, Nsangu yambote ya Yoane, Maurice Goguel.

1935: “ye Ndinga vandaka ya bunzambi.” The Bible​—⁠An American Translation, J. Smith ti E. Goodspeed.

1946: “ye ya mutindu ya bunzambi vandaka Ndinga.” Das Neue Testament, Ludwig Thimme.

1963: “ye Ndinga vandaka nzambi.” Les Saintes Ecritures ​—⁠ Traduction du monde Nouveau.

1975: “ye nzambi (to ya mutindu ya bunzambi) vandaka Ndinga.” Das Evangelium nach Johannes, Siegfried Schulz.

1978: “ye na mutindu ya bunzambi vandaka Logos.” Das Evangelium nach Johannes, Johannes Schneider.

Na Yoane 1:​1, beto kemona mbala zole “zina ya ndonga” ya greke the·os’ (nzambi). Na mbala yantete, yau ketubila Nzambi Nkwa-Ngolo, ti yina Ndinga vandaka (“ye Ndinga [lo’gos] vandaka ti Nzambi [forme ya the·os’]”). Théos yina yantete kele nantwala na yau ti ngogo ton (le), kele “kiyitila ya zabakana” to article défini ya greke yina kesadilama sambu na muntu mosi ya kuswaswana, bonso Nzambi Nkwa-Ngolo (“ye Ndinga vandaka ti Nzambi” [le] Dieu).

Na ndambu yankaka, kiyitila kele ve nantwala ya the·os’ ya zole. Mpidina, beto lenda balula mpidyai : “ye [n]zambi vandaka Ndinga.” Kansi, beto monaka nde ba Bibles mingi kebalulaka the·os’ yai ya zole (yina kele awa “zina ya ndonga” kesongaka kikalulu) na “kigangwa ya bunzambi,” “ya bunzambi” to “[n]zambi.” Inki kepesa bau nswa na kusala yau?

Na greke koïnê vandaka ti “kiyitila ya zabakana” (“le,” “la,” “les”), kansi kukonda “kiyitila ya konda zabakana” to article indéfini (“un[e],” “des”). Kana kiyitila ya zabakana kele ve nantwala ya zina ya ndonga kesongaka kikalulu, kiyitila ya konda zabakana lenda tulama pana na kutadila nzyunga na yau.

Na kutadila Zulunalu ya literatire ya Bible nde, bantubilu yina, “kuna ngogo kesongaka kikalulu kelanda verbe kukonda kiyitila nantwala na yau ketendula kaka kikalulu.” Bonso mukanda yina ketuba, yau kesonga nde lo’gos lenda fwanikisama na [n]zambi [un dieu]. Beto ketanga dyaka na mukanda yina sambu na Yoane 1:1: “Ngolo ya ngogo kesonga kikalulu meluta na mpila nde zina ya ndonga [the·os’] lenda ve kutadilama bonso zina kibeni.”

Na yau, yina Yoane 1:1 kemonisa, kele kikalulu ya Ndinga: sambu yau kele “ya bunzambi,” yau kele “nzambi,” kansi ve Nzambi Nkwa-Ngolo. Dibanza yai kewakana na mikanda yankaka ya Bible, yina kemonisa nde Yezu, kebingama awa “Ndinga” sambu na kisalu nandi ya Ntumwa ya Nzambi, yandi kele nansi mpi ti bulemfu, nde yandi tindamaka na ntoto na muntu ya kuluta yandi na nene, Nzambi Nkwa-Ngolo.

Mikapu ya Bible kele mingi kuna zina, ya konda kiyitila na greke, kele kaka kisongi-kikalulu; yau yina babaludi ya Bible kemonisaka mbote, mbalankaka, ntangu kifalansa kelomba yau, na kutulaka nantwala ya zina yina kiyitila ya konda zabakana “mosi” (“un” to “une”). Mpila yina ya kubalula kesadisaka na kumonisa kikalulu ya muntu. Mumbandu na Marc 6:​49, ntangu balongoki ya Yezu monaka yandi na kutambula na zulu ya masa, bau “banzaka nde yau vandaka mpeve [mosi] ya imbi, Jé).” Kiteso mosi, Yoane 1:1 kemonisa nde Ndinga kele ve “Nzambi,” kansi nde, bu yandi kele na kikalulu ya bunzambi, yandi kele “ya bunzambi,” to “kigangwa ya bunzambi.”

Joseph Thayer, teyolozye mpi bibliste mosi yina na kati ya bantu balulaka Bible y’American Standard Version, tubaka kukonda kukakatana nde: “Logos vandaka ya bunzambi, kansi ve Nzambi yandi mosi.” Sambu na jesuite John McKenzie, yandi sonikaka na Diksyoner ya Bible (angl.) nde: “Kubalula yambote ya Yoane 1:1 kepesa yai: ‘. . . ndinga vandaka kigangwa ya bunzambi.’ ”

Grammaire mezitisama

SAMBU na bantu yankaka, ba Bibles yina kezitisa ve nsiku ya kusonika ya greke koïnê yina zabisamaka, na 1933, na muntu ya kuzaba mbote greke E. Colwell. Sambu na yandi, na greke, zina kisongi-kikalulu “kevandaka ti kiyitila ya [zabakana] kana yau kelanda verbe; kana yau kele nantwala ya verbe, yau kele ve na kiyitila ya [zabakana].” Nsoniki yina kezola kutuba pana nde ntangu zina ya ndonga kisongi-kikalulu kele nantwala ya verbe, beto fwete baka yau bonso yau kele kibeni ti kiyitila ya zabakana nantwala na yau (“le,” “la,” “les”). Na Yoane 1:​1, zina ya ndonga ya zole (the·os’), yina kele kisongi-kikalulu, kele nantwala ya verbeS’il te plaît, puis-je couper le mot verbe ou le laisser en un mot?: “ye [the·os’] vandaka Ndinga.” Na yau, na kutadila Colwell, Yoane 1:1 fwete tangama mutindu yai: “ye Nzambi ([le] Dieu) vandaka Ndinga.”

Beto tala mbandu kele na Yoane 8:44. Yezu ketuba awa sambu na Diabulu nde: “Yandi vandaka mufwi.” Bonso na Yoane 1:​1, na greke, zina ya ndonga kisongi-kikalulu (“mufwi”) kele nantwala ya verbe (“vandaka”). Kiyitila ya konda zabakana kele ve nantwala ya ngogo yina, sambu kiyitila ya konda zabakana vandaka ve na greke koïnê. Kansi, ba Bibles mingi keyikaka kiyitila “un,” sambu yau kelombama na grammaire ya greke yempi na nzyunga mpi na ndinga ya kifalansa.​—⁠Tala Marc 11:32; Yoane 4:19; 6:70; 9:17; 10:⁠1.

Colwell ndimaka ngindu yina, sambu yandi ketuba nde: “Na sika yina, yau kele ya konda zabana to indéfini [“un(e)” to “des”] kaka kana nzyunga na yau melomba yau.” Mpidina, yandi ndimaka nde, ntangu nzyunga kelomba yau, mubaludi lenda kotisa kiyitila ya konda zabakana nantwala ya “zina ya ndonga” sambu na kusonga nde yau kele kisongi-kikalulu.

Keti yau kele kiteso mosi ti na Yoane 1:1? Inga, sambu kimbangi ya Bible na mvimba na yau kesonga nde Yezu, ata yandi kele na kikalulu ya bunzambi, ikele ve Nzambi Nkwa-Ngolo. Na yau, yina fwete twadisa mubaludi na bisika ya mpidina, ikele ve nsiku ya Colwell yina lenda bwa, kansi nzyunga na yau. Ba biblistes mingi, yina kebalulaka théos ya zole ya Yoane 1:1 na (kimuntu) ya bunzambi,” “kigangwa ya bunzambi,” “nzambi,” bau kelosa mpidina nsiku ya Colwell​—⁠bonso Ndinga ya Nzambi kesala yau yau mosi.

Mabalumabalu kele ve

SAMBU Yezu Kristu kele “[n]zambi” keti yau kebalula dilongi ya Bible yina ketuba nde Nzambi kele mosi kaka? Ve, sambu Bible kesadilaka mbalankaka ngogo yina sambu na kutubila bigangwa ya ngolo. Beto ketanga na Nkunga 8:5: “Nge yantikaka na kusala yandi [muntu] nansi ya bayina kufwanana ti Nzambi [ebeleo ‘elo·him’],” disonga bawanzyo. Ntangu yandi vutulaka na Bayuda vandaka funda yandi nde yandi vandaka kuditula Nzambi, Yezu tubaka nde: “[Nsiku] bingaka banzambi na bayina ndinga ya Nzambi kwizaka,” disonga bantu yina bingamaka bazusi. (Yoane 10:​34, 35, Jé; Nkunga 82:​1-6) Ata Satana, na 2 Korinte 4:​4, kebingama “nzambi ya nsi yai.”

Kiyeka ya Yezu luta nene na yina ya bawanzyo, ya bantu ya kukonda kulunga to ya Satana. Na yau, sambu bau kebingama “banzambi,” disonga bantu ya ngolo, Yezu lenda mpi kuvanda “nzambi.” Sambu na kiyeka ya nene yandi kele na yau nantwala ya Jéhovah, Yezu kele “Nzambi ya ngolo.” Yoane 1:1; Esaïe 9:⁠6.

Kansi, kisono ya nene na zina yina, “[N]zambi ya ngolo,” kesonga ve nde Yezu kele kiteso mosi ti Jéhovah Nzambi? Ve, sambu na kutadila mbikudulu ya Esaïe, yau kele kaka mosi na kati ya bazina iya Yezu fwete bingama, mpi bazina yina iya keyantika ti kisono ya nene na kifalansa. Dyaka, ata Yezu kebingama “ngolo,” mosi kaka kele “Nkwa-Ngolo.” Kubinga Jéhovah Nzambi “Nkwa-Ngolo” tavanda ve kibeni na nsansa kana bantu yankaka kebingama banzambi kele ve, kansi bayina kele nansi.

Beto lenda tanga na mukanda Bilete ya biblioteke John Rylands (Angleterre) nde, sambu na teyolozye ya katolika Karl Rahner, ntangu the·os’ kesadilama na mikapu bonso Yoane 1:1 sambu na kutubila Kristu, “ata sika mosi ve ‘the·os’ mesadilama na mpila ya kukukisa Yezu ti yina, na sika yankaka na Luwawanu Yampa, kebingama ‘ho Theos,’ na ntubilu yankaka Nzambi Nkwa-Ngolo.” Mukanda yina keyika nde: “Kana bansoniki ya Luwawanu Yampa monaka kibeni mfunu sambu na bakwikidi na kusamuna Yezu bonso ‘Nzambi,’ inki mutindu kutendula nde Luwawanu Yampa ketubila ve nsamuna ya mpidina?”

Keti ntumwa Thomas, sambu na yandi, tubaka ve na Yezu nde: “Mfumu ya mono ye Nzambi ya mono!”? (Yoane 20:28) Sambu na Thomas, Yezu vandaka bonso “nzambi,” kibeni nantwala ya bidimbu ya nkumwa yina tindaka yandi na kutuba mpidina. Ba biblistes yankaka keyindulaka nde, nansi ya matekita, Thomas bokaka kaka kuboka ya kuyituka; yandi vandaka nantwala ya Yezu kansi vandaka tuba na Nzambi. Ata yau vanda nki, Thomas vandaka kwikila ve nde Yezu vandaka Nzambi Nkwa-Ngolo, sambu bantumwa yonso, ti yandi mosi, zabaka nde Yezu tubaka ve ata mbala mosi nde yandi vandaka Nzambi; kansi, yandi longaka nde Jéhovah kele “Nzambi mosi kaka ya kyeleka.”​—⁠Yoane 17:⁠3.

Pana dyaka, nzyunga ya mukapu yina kele na mfunu ya ngolo. Mwa bilumbu nantwala, Yezu, ya kufutumuka, tubaka na Maria Madelene na kwenda kuzabisa mambu yina na balongoki: “Mono ketombuka kwa Tata ya mono ye Tata ya beno, ye kwa Nzambi ya mono ye Nzambi ya beno.” (Yoane 20:17) Ata Yezu futumukaka mpeve ya ngolo, Jéhovah vandaka kaka Nzambi nandi. Nkutu, ata nanima ya kukembisama, Yezu, bonso kemonisa yau mukanda yansuka ya Bible, fulaka na kubinga Jéhovah Nzambi nandi.​—⁠Nzayikusu 1:​5, 6; 3:​2, 12.

Banzila ya kutanga tatu mpamba nanima ya ngituka ya Thomas, Yoane 20:31 kekyenzula dyambu yina na kutubaka: “Kansi yina kusonamaka sambu beno kwikila nde Yezu kele Kristu, Mwana ya Nzambi,” kansi ve Nzambi Nkwa-Ngolo. Ngogo “Mwana” fwete bakisama awa bonso beto kewa yau, kansi ve mosi na kati ya bantu tatu ya diswekamu ya Butatu.

Na dibanza mosi ti Bible

BANTU kekwikilaka na Butatu kesadilaka mikapu yankaka dyaka. Kansi, mikapu yina ketuba dyambu mosi bonso yina beto mekatuka na kutadila: kana nge longuka yau mbote, yau kelonga ve ata fyoti Butatu. Mpidina, ntangu beto kezikisa mikapu bau kesadilaka sambu na kusimba Butatu, beto fwete diyufula: keti ntendula bau kepesa yau kewakana ti malongi yonso kele na Masonuku mpi yina ketuba nde Jéhovah kele Nzambi Nkwa-Ngolo? Kana yau kele mpidina ve, yau kele ntendula yambi.

Beto zaba nde mukapu mosi ve kele yina kemonisa nde Nzambi, Yezu mpi mpeve santu kele muntu mosi na kati ya diswekamu ya Nzambi. Mukapu ata mosi ve ya Mosonuku ketuba nde bau yonso tatu kele kiteso mosi na nene, na ngolo mpi na luzingu ya kukonda luyantiku mpi nsuka. Kansi, Bible, kefula na kundima nde Jéhovah, Nkwa-Ngolo, kele Nzambi mosi kaka Nkwa-Ngolo, nde Yezu kele Mwana nandi, yina yandi gangaka, mpi nde mpeve santu kele ngolo ya kisalu ya Nzambi.

[Bangogo sambu na kubenda dikebi ya kele na lutiti 24]

“Ba docteurs ya ntama bebisaka mingi mukapu yina ya [Yoane 10:30] sambu na kumonisa nde Yezu Kristu kele kiteso mosi ti Tata nandi.”​—Mukanda Komantere na Luwawanu Yampa, T. II, Nsangu yambote ya Yoane, ya Jean Calvin

[Bangogo sambu na kubenda dikebi ya kele na lutiti 27]

Yina kele “ti” muntu lenda ve kuvanda muntu yina

[Bangogo sambu na kubenda dikebi ya kele na lutiti] 28]

“Logos vandaka ya bunzambi, kansi ve NZambi yandi mosi.”​—⁠Joseph Thayer, bibliste

[Bifwanisu ya kele na lutiti 24, 25]

Yezu sambaka Nzambi sambu nde balongoki nandi “kuvanda mosi,” bonso Tata ti yandi kele mosi.

[Kifwanisu ya kele na lutiti 26]

Yezu songaka na Bayuda nde yandi vandaka ve kiteso mosi ti Nzambi na kutubaka nde yandi lendaka ‘ve kusala mambu yandi mosi kansi yina ya yandi monaka Tata kusala’

[Bifwanisu ya kele na lutiti 29]

Sambu Bible kebinga bantu, bawanzyo, mpi ata Satana, “banzambi,” to bankwa ngolo, Yezu yina, na mazulu, kele na kiyeka ya kuluta nene na yina ya bau, lenda bingama mbote kibeni “[n]zambi”