Yezu Ke Longa Nikodemo na Mpimpa

Ntangu Yezu vandaka na Yeruzalemi sambu na nkinsi ya Paki ya mvu 30 na ntwala ya ntangu na beto, yandi salaka mambu ya kuyituka, to bimangu. Yo yina, bantu mingi tulaka lukwikilu na yandi. Nikodemo kele Mufarize mpi yandi ke salaka na tribinale ya nene ya Bayuda yina bo vandaka kubinga Sanedreni. Yandi me yituka mpi ke zola kuzaba mambu mingi. Yo yina, yandi me kwenda kutala Yezu na mpimpa. Ziku sambu yandi ke wa boma nde kana bantwadisi ya nkaka ya Bayuda kumona yandi, bangwisana na bo ta beba.

Nikodemo tubaka nde: “Rabi, beto me zaba nde nge me katukaka na Nzambi sambu na kulonga beto, sambu ata muntu mosi ve lenda sala bidimbu yai ya nge ke sala kana Nzambi kele ve ti yandi.” Yezu songaka Nikodemo nde kana muntu ke zola kukota na Kimfumu ya Nzambi, yandi fwete ‘butuka mbala zole.’—Yoane 3:2, 3.

Kansi, inki mutindu muntu lenda butuka mbala zole? Nikodemo yulaka Yezu nde: “Keti yandi lenda kota na divumu ya mama na yandi na mbala ya zole mpi kubutuka?”—Yoane 3:4.

Ve, kubutuka mbala zole ke tendula ve mambu yina. Yezu tendulaka nde: “Kana muntu kubutuka ve na masa mpi na mpeve, yandi lenda kota ve na Kimfumu ya Nzambi.” (Yoane 3:5) Ntangu Yezu bakaka mbotika mpi mpeve santu kulumukaka na zulu na yandi, yandi butukaka “na masa mpi na mpeve.” Na ntangu yina, ndinga mosi katukaka na zulu mpi tubaka nde: “Yai Mwana na mono, ya mono ke zolaka mingi, yina mono me ndima.” (Matayo 3:16, 17) Mpidina, Nzambi tubaka nde Yezu me kuma mwana na yandi ya kimpeve mpi yandi kele ti kivuvu ya kukota na Kimfumu ya zulu. Na nima, na Pantekoti ya mvu 33 ya ntangu na beto, Nzambi tiamunaka mpeve santu na bantu yina bakaka mbotika sambu bo butuka mbala zole sambu na kukuma bana na yandi ya kimpeve.—Bisalu 2:1-4.

Yo kele mpasi sambu Nikodemo kubakisa mambu yina Yezu ke longa yandi na yina me tala Kimfumu. Yo yina, Yezu ke pesa yandi bantendula ya nkaka na yina me tala mukumba ya mfunu yina yandi kele ti yo mutindu yandi kele mwana ya Nzambi. Yezu ke tuba nde: “Mutindu Moize tedimisaka nioka na ntoto ya zelo na zelo, mutindu mosi mpi bo fwete tedimisa Mwana ya muntu, sambu konso muntu yina ke kwikila na yandi kubaka luzingu ya mvula na mvula.”—Yoane 3:14, 15.

Bamvula mingi na ntwala, banioka vandaka kutatika bantu ya Izraele. Sambu na kuguluka, yo lombaka nde bo tala nioka ya kwivre. (Kutanga 21:9) Kiteso mosi, bantu yonso fwete monisa lukwikilu na mwana ya Nzambi sambu bo guluka na lufwa mpi bo baka luzingu ya mvula na mvula. Na nima ya kumonisa mukumba ya zola yina Yehowa kele ti yo na diambu yai, Yezu zabisaka Nikodemo nde: “Nzambi zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, sambu konso muntu yina ke monisa lukwikilu na Mwana kufwa ve kansi kubaka luzingu ya mvula na mvula.” (Yoane 3:16) Banda Yezu me yantika kisalu ya kusamuna, bangonda kiteso ya sambanu me lunga mpi yandi me monisa pwelele nde yandi kele nzila sambu bantu kuguluka.

Yezu ke zabisa Nikodemo nde: “Nzambi tindaka ve Mwana na yandi na nsi-ntoto sambu yandi sambisa nsi-ntoto.” Yo ke tendula nde Nzambi tindaka ve Yezu sambu na kusambisa bantu na mutindu ya mbi, mpi kuzengila bo yonso nkanu ya lufwa. Kansi, mutindu Yezu me tuba yo, Nzambi tindaka yandi “sambu nsi-ntoto kuguluka na nzila na yandi.”—Yoane 3:17.

Sambu Nikodemo vandaka kuwa boma, yandi kwendaka kutala Yezu na mpimpa. Yo yina, mutindu Yezu manisaka disolo na yandi ti Nikodemo ke benda kibeni dikebi. Yandi tubaka nde: “Kikuma yina bo ke sambisa bantu yo yai: nsemo [disongidila, Yezu na nzila ya luzingu mpi ya malongi na yandi] kwisaka na nsi-ntoto, kansi bantu zolaka mpimpa kuluta nsemo, sambu bisalu na bo vandaka ya mbi. Sambu muntu yina ke salaka mambu ya mbi ke mengaka nsemo mpi ke kwisaka ve na nsemo, sambu bo monisa ve bisalu na yandi na mpenza. Kansi muntu yina ke salaka mambu ya kieleka ke kwisaka na nsemo, sambu bisalu na yandi kumonana nde yo me salama na kuwakana ti Nzambi.”—Yoane 3:19-21.

Ntangu yai, yo ke lomba nde Nikodemo, yina kele Mufarize mpi longi ya Izraele, kuyindula mambu yina yandi me katuka kuwa na yina me tala mukumba yina Yezu kele ti yo na lukanu ya Nzambi.