1. Yezu kele nani?

Yezu kele wanzio mosi ya ngolo mingi ya ke zingaka na zulu. Yehowa salaka yandi na ntwala ya kusala bima yonso ya nkaka. Yo yina, Biblia ke bingaka yandi “mwana ya ntete ya lugangu yonso.” (Bakolosai 1:15) Diaka, Yezu mpamba muntu Yehowa yandi mosi salaka. Yo yina Biblia ke bingaka yandi “Mwana na yandi mosi kaka ya kubutuka.” (Yoane 3:16) Yezu vandaka kusala ti Tata na yandi Yehowa mpi yandi vandaka kusadisa yandi na kusala bima yonso ya nkaka. (Tanga Bingana 8:30.) Tii bubu yai, Yezu ke vandaka kaka ti kinduku ya ngolo ti Yehowa. Yandi ke kudipesaka kaka na kisalu na yandi ya kinati-ndinga ya Nzambi, disongidila “Ndinga” yina ke pesaka bansangu mpi bansiku ya Yehowa.​—Yoane 1:14.

Beto ke salaka masumu, ke niokwamaka mpi ke fwaka sambu bakala ti nkento ya ntete, Adami ti Eva, kolamaka na Nzambi.a Ata mpidina, beto me konda ve kivuvu. Yehowa me yidikaka mambu sambu na beto. Yandi me pesaka Mwana na yandi Yezu Kristu sambu na kukatula beto na kimpika ya disumu mpi ya lufwa. Biblia ke tubaka nde Yezu pesaka Kimenga na yandi ntangu yandi fwaka. Yandi pesaka luzingu na yandi ya kukonda masumu sambu na kukatula beto na kimpika ya disumu mpi lufwa. (Tanga Matayo 20:28.) Yezu ndimaka kufwa ata yandi vandaka ti nswa ya kuzinga mvula na mvula awa na ntoto. Yo me salaka nde beto kuma diaka ti kivuvu ya kubaka mambote yonso yina Adami ti Eva vidisaka. Yezu monisaka mpi nde yandi ti Yehowa, bo ke zolaka beto mingi. Dilongi yai ta sadisa beto na kupesa diaka mersi mingi sambu na mambu yina Yezu me salaka sambu na beto.

1. Inki mambote lufwa ya Yezu ke natilaka beto bubu yai?

Beto ke salaka mambu mingi yina ke pesaka Yehowa mpasi sambu beto kele bantu ya masumu. Kansi, kana beto ke wa mpenza mawa sambu na masumu yina beto ke salaka, ke lomba Yehowa na kulolula beto na nzila ya Yezu Kristu mpi ke sala bikesa ya kuvutukila ve bifu yango, beto ta kuma banduku ya ngolo ya Nzambi. (1 Yoane 2:1) Biblia ke tuba nde: “Kristu fwaka mbala mosi mpamba sambu na masumu, muntu ya lunungu sambu na bantu ya kukonda lunungu, sambu yandi nata beno na Nzambi.”​—1 Piere 3:18.

2. Inki mambote lufwa ya Yezu ta natila beto na bilumbu ke kwisa?

Yehowa tindaka Yezu sambu yandi pesa luzingu na yandi ya kukonda masumu “sambu konso muntu yina ke monisa lukwikilu na [Yezu] kufwa ve kansi kubaka luzingu ya mvula na mvula.” (Yoane 3:16) Kubika fioti na nsadisa ya kimenga ya Yezu, Yehowa ta katula mambu yonso ya mbi yina kukolama ya Adami me nataka. Yo ke tendula nde kana beto ke monisa lukwikilu na kimenga ya Yezu, beto ta kuma ti dibaku ya kuzinga mvula na mvula na paladisu awa na ntoto!​—Yezaya 65:21-23.

LONGUKA MAMBU MINGI

3. Lufwa ya Yezu ke katulaka beto na kimpika ya disumu mpi ya lufwa

VIDEO: Sambu na Nki Yezu Fwaka?​—Kitini 1 (2:01)

• Inki mambote Adami vidisaka ntangu yandi kolamaka na Nzambi?

Beno tanga Baroma 5:12 mpi na nima beno pesa mvutu na ngiufula yai:

• Inki bampasi disumu ya Adami me natilaka nge?

Beno tanga Yoane 3:16 mpi na nima beno pesa mvutu na ngiufula yai:

• Sambu na nki Yehowa tindaka Mwana na yandi na ntoto?

1. Adami vandaka muntu ya kukonda masumu kansi yandi kolamaka na Nzambi. Yo yina bantu yonso me kumaka bantu ya masumu mpi ke fwaka

2. Yezu vandaka muntu ya kukonda masumu yina vandaka kulemfukila Nzambi. Yo me salaka nde bantu kuvanda ti kivuvu ya kukuma ti nitu ya kukonda masumu mpi ya kuzinga mvula na mvula

4. Lufwa ya Yezu lenda natila bantu yonso mambote

VIDEO: Sambu na Nki Yezu Fwaka?​—Kitini 2 (2:00)

• Inki mutindu lufwa ya muntu mosi lenda natila bantu yonso mambote?

Beno tanga 1 Timoteo 2:5, 6 mpi na nima beno pesa mvutu na ngiufula yai:

• Adami vandaka muntu ya kukonda masumu. Kansi bantu yonso me kumaka bantu ya masumu mpi ke fwaka sambu yandi salaka disumu. Yezu mpi vandaka muntu ya kukonda masumu. Inki mambote lufwa ya Yezu me nataka sambu yo kuma kimenga “ya me fwanana”?

5. Kimenga ya Yezu kele dikabu yina Yehowa me pesaka nge

Banduku ya Yehowa ke bakaka kimenga ya Yezu bonso dikabu ya Nzambi me pesaka bo. Mu mbandu, beno tanga Bagalatia 2:20 mpi na nima beno pesa mvutu na ngiufula yai:

• Inki mutindu ntumwa Polo monisaka nde yandi vandaka kubaka kimenga ya Yezu bonso dikabu ya Nzambi pesaka yandi?

Ntangu Adami salaka disumu, yandi mpi bana na yandi yonso bakaka ndola ya lufwa. Kansi Yehowa tindaka Mwana na yandi sambu yandi fwa mpi sambu nge zwa dibaku ya kuzinga mvula na mvula.

Ntangu nge ke tanga baverse yai, yindula mutindu Yehowa vandaka kudiwa ntangu Mwana na yandi vandaka kumona mpasi. Beno tanga Yoane 19:1-7, 16-18 mpi na nima beno pesa mvutu na ngiufula yai:

• Inki mutindu nge ke kudiwa ntangu nge ke yindula mambu yina Yehowa mpi Yezu me ­salaka sambu na nge?

NA BUNKUFI

Lufwa ya Yezu me salaka nde Yehowa kulolula masumu na beto mpi yo ke pesaka beto kivuvu ya kuzinga mvula na mvula.

Inki Nge Me Simba?

• Sambu na nki Yezu fwaka?

• Sambu na nki Biblia ke tuba nde lufwa ya Yezu kele kimenga ya me fwanana?

• Inki mambote lufwa ya Yezu lenda natila nge?

TALA MPI

Tala sambu na nki Biblia ke bingaka luzingu ya kukonda masumu ya Yezu nde nkudulu.

“Inki Mutindu Kimenga ya Yezu Kele ‘Nkudulu Sambu na Bantu Mingi’?” (Disolo ya kele na jw.org)

Tala mambu ya beto fwete sala sambu na kuguluka.

“Yezu Ke Gulusaka​—Inki Mutindu?” (Disolo ya kele na jw.org)

Keti Yehowa ke lolulaka ata masumu ya nene?

“Bamvutu na Bangiufula ya Biblia” (Nzozulu ya Nkengi, Mayi 1, 2013)

Tala mutindu kuzaba mfunu ya kimenga ya Yezu sadisaka bakala mosi na kusoba bikalulu na yandi.

“Mono Kele Diaka Ve Mpika ya Mubulu” (Disolo ya kele na jw.org)

1. Inki beto ke salaka mpi sambu na kupesa matondo sambu na mambu yina Nzambi ti Kristu me sadilaka beto?

Biblia ke tuba nde “konso muntu yina ke monisa lukwikilu na [Yezu]” ta zinga mvula na mvula. (Yoane 3:16) Kumonisa lukwikilu ke tendula nki? Yo ke tendula nde beto fwete suka ve kaka na kundima nde Yezu kele. Kansi beto fwete monisa yo na balukanu ya beto ke bakaka mpi na mambu ya beto ke salaka. (Yakobo 2:17) Kinduku na beto ti Yezu mpi Tata na yandi Yehowa ke kumaka ngolo kana mambu ya beto ke tuba mpi ke sala ke monisa nde beto kele ti lukwikilu.​—Tanga Yoane 14:21.