Dibuta ya Yehowa Kele na Bumosi ya Mbalu

“Tala! Mbote mpi kyese ya inki mutindu yau kele na bampangi kuzinga kumosi na kimvuka!”​—NKUNGA 133:​1, NW.

 1. Inki kele mvwandilu ya mabuta mingi bubu yai?

DIBUTA kele na mpasi bubu yai. Na mabuta mingi, binduku ya makwela mekuma ya kuluta mpasi. Kufwa makwela keyela bisika yonso, ye bana mingi ya bibuti yina mefwaka makwela kezingaka na mawa mingi. Mafunda ya mabuta kele na kyese mpi bumosi ve. Kansi, kele ti dibuta mosi yina kele ti kyese ya kyeleka mpi bumosi ya sikisiki. Kele dibuta ya luyalanganu ya mvimba ya Yehowa Nzambi. Na kati na yau, mafuku na mafuku ya bawanzyo ya kemonikaka ve kesala bisalu na bau na ngwisana ti luzolo ya Nzambi. (Nkunga 103:​20, 21) Kansi, keti kele ti dibuta ya mutindu yina ya kesepela na bumosi na zulu ya ntoto?

2, 3. (a) Banani bubu yai kele na kati ya dibuta ya luyalanganu ya mvimba ya Yehowa, mpi Bambangi ya Yehowa yonso bubu yai lenda tesana ti inki? (b) Inki bangyufula beto tatadila?

² Ntumwa Polo sonikaka nde: “Mono ke fukamaka na meso ya Tata Nzambi sambu na kusamba yandi Tata, yina ke pesaka zina ya kieleka na konso fami [dibuta] na zulu ti awa na nsi-ntoto.” (Efezo 3:14, 15) Konso dibuta ya kikanda na zulu ya ntoto kebaka zina na yau na Nzambi sambu yandi kele Ngangi. Ata kele ve ti dibuta ya bantu na zulu, na ntubilu ya kifwani, Nzambi mekwelaka organizasio na yandi ya zulu, mpi Yezu tavanda ti nkento ya kimpeve yina tavukana ti yandi na mazulu. (Yezaya 54:5; Luka 20:​34, 35; 1 Korinto 15:50; 2 Korinto 11:2) Bapakulami ya kwikama na zulu ya ntoto kele ntangu yai bantu ya dibuta ya Nzambi ya luyalanganu ya mvimba, ye “mameme yankaka” ya Yezu, ti kivuvu ya ntoto, kele bamambere na yau ya makwisa. (Yoane 10:​16, NW; Roma 8:​14-17; Nzozulu ya Nkengi [ya Kifalansa] Yanuari 15, 1996, lutiti 31) Ata mpila yina, Bambangi ya Yehowa yonso bubu yai lenda fwanisama ti dibuta ya kuvukana ya inza ya mvimba.

³ Keti nge kele na kati ya dibuta ya kitoko ya inza ya mvimba ya bansadi ya Nzambi? Kana nde ee, nge kesepela na lusakumunu mosi ya kuluta nene ya konso muntu lenda baka. Bantu mingi tandima nde dibuta ya mvimba ya Yehowa​—organizasio na yandi ya kemonana​—kele kisanga ya ngemba ti bumosi na kati ya ntoto ya kuyuma ya inza ya mavwanga mpi ya kukonda bumosi. Inki mutindu bumosi ya dibuta ya Yehowa ya inza ya mvimba lenda kutendulama? Mpi inki bikuma keyedisa bumosi ya mutindu yina?

Mbote mpi Kyese ya Inki Mutindu!

 4. Na bangogo na nge mosi, inki mutindu nge lenda tuba mambu ya Nkunga 133 ketuba na yina metala bumosi ya bumpangi?

⁴ Muyimbi-bankunga Davidi tondaka ngolo bumosi ya bampangi. Yandi vandaka nkutu ya kupemama na kuyimba sambu na yau! Sala bonso nge kemona yandi ti nsambi (harpe) na yandi ntangu yandi keyimba nde: “[“Tala! Mbote mpi kyese ya inki mutindu yau kele na bampangi kuzinga kumosi na kimvuka!,” NW]. Yo kele bonso mafuta ya ntalu ya bo me tula na ntu ya Aroni, yo ke kulumuka tii na mandefo na yandi, tii na nkingu ya mvwela na yandi. Yo kele bonso malulu na ngumba ya Ermoni, yo ke bwa-bwa na zulu ya bangumba ya Sioni. Po pana Mfumu Nzambi tubaka nde yandi ta sakumuna bantu, yandi ta pesa bo luzingu yina ke manaka ve.”​—Nkunga 133:​1-3.

 5. Na lufulu ya Nkunga 133:​1, 2, inki mfwanisa lenda salama na kati ya bantu ya Izraele ti bansadi ya Nzambi bubu yai?

⁵ Bangogo yai lunganaka ti bumosi ya bumpangi yina sepelisaka bantu ya ntama ya Nzambi, bantu ya Izraele. Na Yeruzalemi, na nsungi ya bankinsi na bau tatu ya mvula, bau vandaka kuzinga mpenza kumosi na kimvuka. Ata nkutu bau vandaka kukatuka na bikanda ya kuswaswana, bau vandaka dibuta mosi. Kuvukana kumosi vandaka ti bupusi ya mbote na zulu na bau, bonso mafuta ya kupakula ya madidi ti nsudi ya mbote. Ntangu ya mafuta ya mutindu yai losamaka na ntu ya Aroni, yau kitaka na mandefo na yandi ye kotaka na nkingu ya mvwela na yandi. Na yina metala bantu ya Izraele, kuvanda kumosi vandaka ti bupusi ya mbote yina kotaka na kimvuka yonso ya bantu yina kuvukanaka. Mavwanga vandaka kukatulama, ye bumosi vandaka kuyala. Bumosi ya mutindu mosi kele bubu yai na dibuta ya mvimba ya Yehowa. Bamvukana ya mbala na mbala kele ti bupusi ya kimpeve ya mbote na zulu ya bamambere na yau. Mavwanga to mpasi yina lenda basika kekatulamaka na nsadisa ya ndongisila ya Ndinga ya Nzambi. (Matayo 5:​23, 24; 18:​15-17) Bantu ya Yehowa ketondaka mingi kikesa ya bamosi kepesaka na bankaka na nzila ya bumosi na bau ya bumpangi.

6, 7. Inki mutindu bumosi ya bantu ya Izraele vandaka bonso malulu na Ngumba Ermoni, ye balusakumunu ya Nzambi lenda monana wapi bubu yai?

⁶ Inki mutindu kuzinga ya kuvukana na bumosi ya bantu ya Izraele vandaka mpi bonso malulu ya Ngumba Ermoni? Mutindu nsongi ya ngumba yina kele nda kiteso ya kuluta bametre 2800 na zulu ya nivo ya nzadi, mfinama na mvula ya mvimba yau kevandaka ya kukangama ti matadi ya mvula ya mpembe (neige). Matadi ya nsongi ya Ngumba Ermoni kebasisaka midinga ya masa na mpimpa ye yau kebutaka malulu mingi, malulu yina kesansaka banti na nsungi ya nda ya kisiwu. Mupepe ya madidi ya kekatukaka na Ngumba ya nda ya Ermoni lenda nata midinga ya masa yina ntama na ndambu ya sudi bonso na Yeruzalemi, kisika yau kekwendaka kukangama bonso malulu. Ebuna, muyimbi-bankunga tubilaka yau mbotembote bonso ‘malulu na ngumba ya Ermoni, ya ke bwa-bwa na zulu ya bangumba ya Sioni.’ Ngibusa ya kitoko ya bupusi ya madidi ya inki mutindu yai, yina keyedisaka bumosi ya dibuta ya bansambidi ya Yehowa!

⁷ Na ntwala ya kugangama ya dibundu ya Bukristu, Sioni, to Yeruzalemi, vandaka santre ya lusambu ya kyeleka. Yau yina, Nzambi tumaka nde lusakumunu kuvanda kuna. Sambu na kifwani, Nto ya balusakumunu yonso vandaka na tempelo na Yeruzalemi, yau vandaka kulomba nde balusakumunu kukatuka kuna. Yau yina, sambu lusambu ya kyeleka kevandaka dyaka ve ya kukangama ti kisika mosi, lusakumunu, zola, ti bumosi ya bansadi ya Nzambi lenda kumonana bisika yonso na zulu ya ntoto bubu yai. (Yoane 13:​34, 35) Inki kele mwa bikuma ya keyedisaka bumosi yina?

Bikuma ya Keyedisaka Bumosi

 8. Inki beto kelonguka na yina metala bumosi na Yoane 17:​20, 21?

⁸ Bumosi ya bansambidi ya Yehowa mekangama ti bulemfu na Ndinga ya Nzambi ya mebakisama mbotembote, kumosi ti malongi ya Yezu Kristu. Na kutindaka Mwana na yandi na inza sambu na kuta kimbangi sambu na kyeleka mpi kuditambika na nzila ya lufwa, Yehowa kangulaka nzila sambu dibundu ya Bukristu ya kuvukana kusalama. (Yoane 3:16; 18:37) Nzikisa nde tavanda ti bumosi ya sikisiki na kati ya bamambere na yau monanaka pwelele ntangu Yezu sambaka nde: “Mono ke samba kaka ve sambu na balonguki na mono mpamba, kansi mono ke samba mpi sambu na bantu yina ta tula ntima na mono sambu na malongi na bo. Mono ke samba sambu bo yonso kuvanda muntu mosi. Tata, bo vanda na kimvuka ti beto, mutindu nge kele na mono, mono mpi kele na nge. Bo vanda muntu mosi, sambu bantu ya nsi-ntoto yai kundima nde nge muntu tindaka mono.” (Yoane 17:​20, 21) Balandi ya Yezu kumaka mpenza na bumosi mosi bonso yina kele na kati ya Nzambi ti Mwana na yandi. Mambu yai salamaka sambu bau lemfukaka na Ndinga ya Nzambi ti na malongi ya Yezu. Mboninu ya mutindu mosi kele kikuma ya ngolo ya bumosi sambu na dibuta ya inza ya mvimba ya Yehowa bubu yai.

 9. Inki kele kisalu ya mpeve santu na bumosi ya bantu ya Yehowa?

⁹ Kikuma yankaka ya kevukisa bantu ya Yehowa kele nde beto kele ti mpeve santu, to ngolo ya kisalu ya Nzambi. Yau kesadisaka beto na kubakisa kyeleka ya mesongamaka na Ndinga ya Yehowa ye na kusadila yandi na bumosi. (Yoane 16:​12, 13) Mpeve kesadisaka beto na kutina bisalu ya kinsuni ya kefwaka bumosi bonso mavwanga, kimpala, makasi ya kuluta, ti kuswana. Na kisika na yau, mpeve ya Nzambi kebutaka na kati na beto bambuma ya bumosi ya zola, kyese, ngemba, kukanga ntima, mawete, bumbote, lukwikilu, kudikulumusa ti kudiyala.​—Galatia 5:​19-23.

10. (a) Inki mfwanana lenda kusalama na kati ya zola ya kele na kati ya dibuta mosi ya kinsuni ya kuvukana ti zola yina kemonana pwelele na kati ya bantu ya kudipesa na Yehowa? (b) Inki mutindu mambere mosi ya Nto-kimvuka monisaka mawi na yandi na yina metala kuvukana ti bampangi na yandi ya kimpeve?

¹⁰ Bamambere ya dibuta ya kuvukana kezolanaka mpi kevandaka na kyese ya kuvanda kumosi. Mutindu mosi, bantu ya dibuta ya kuvukana ya bansambidi ya Yehowa kezolaka yandi, Mwana na yandi, ti bankundi bankwikidi. (Marko 12:30; Yoane 21:​15-17; 1 Yoane 4:21) Kaka bonso dibuta ya kinsuni kesepelaka na kudya kumosi, bayina mekudipesaka na Nzambi kevandaka na kyese na kumonana na balukutakanu ya Bukristu ya fyoti mpi ya nene, sambu na kubaka mambote ya mvukana ya mbote ti madya ya kimpeve ya kuluta mbote. (Matayo 24:​45-47; Baebreo 10:​24, 25) Kilumbu mosi, mambere mosi ya Nto-kimvuka ya Bambangi ya Yehowa tubilaka yau mutindu yai: “Sambu na mono, kuvukana ti bampangi kele mosi na kati ya kyese ya kuluta nene ya luzingu na mono mpi nto ya kikesa. Kana mpila kele, mono kezolaka kukuma na Nzo ya Kimfumu na kati ya bantu ya ntete, ye mono kezolaka kukatuka na kati ya bantu ya nsuka. Kyese kefulukaka mono na ntima kana mono ketuba ti bantu ya Nzambi. Kana mono kele na kati na bau, mono kekudiwaka bonso mono kepema ti dibuta na mono.” Keti nge mpi kewaka mutindu yina?​—Nkunga 27:4.

11. Na inki kisalu Bambangi ya Yehowa kezwaka kyese, mpi inki kevandaka mbutu ya kutula kisalu ya Nzambi na kisika ya ntete na luzingu na beto?

¹¹ Dibuta ya kuvukana kezwaka kyese na kusalaka makambu kumosi. Mutindu mosi, bayina kele na kati ya dibuta ya bansambidi ya Yehowa kemonaka kyese na kusalaka kumosi kisalu na bau ya kusamuna Kimfumu ti kukumisa bantu balongoki. (Matayo 24:14; 28:​19, 20) Kuvukana mbala na mbala na kisalu yina kenataka beto na kuzabana mbotembote ti Bambangi yankaka ya Yehowa. Kukumisa kisalu ya Nzambi kima ya ntete na luzingu na beto, ye kupesa maboko na bisalu yonso ya bantu na yandi, keyedisaka mpi mpeve ya dibuta na kati na beto.

Ndonga ya Teokrasi Kele Mfunu

12. Inki kele bikalulu ya dibuta ya kyese mpi ya kuvukana, ye inki ngidika kuyedisaka bumosi na dibundu ya Bukristu ya mvunkama ya ntete?

¹² Dibuta yina kele ti lutwadisu ya ngolo kansi ya zola, yina kele mpi ya ndonga kelutaka kuvanda ya kuvukana mpi na kyese. (Efezo 5:​22, 33; 6:1) Yehowa kele Nzambi ya ndonga ya ngemba, ye bayina yonso ya kele na kati ya dibuta na yandi kebakaka yandi bonso “Muntu ya Kuluta Kuzanguka.” (Daniele 7:​18, 22, 25, 27, NW; 1 Korinto 14:33) Bau mpi kendimaka nde yandi mesolaka Mwana na yandi, Yezu Kristu, mvingidi-difwa ya bima yonso mpi mepesaka yandi kiyeka na zulu ti na ntoto. (Matayo 28:18; Baebreo 1:​1, 2) Dibundu ya Bukristu kele organizasio ya ndonga ya kuvukana, Yezu kele Ntu na yau. (Efezo 5:23) Sambu na kutwadisa bisalu na dibundu ya mvunkama ya ntete, kuvandaka ti nto-kimvuka ya vandaka kimvuka ya bantumwa mpi “bambuta” yankaka ya kutela na kimpeve. Dibundu mosi mosi vandaka ti bankengi ya kuponamaka, to bankuluntu, ye bansadi ya kisalu. (Bisalu 15:6; Filipi 1:1) Bulemfu na bayina vandaka kutwadisa yedisaka bumosi.​—Baebreo 13:17.

13. Inki mutindu Yehowa kebendaka bantu, mpi inki mbutu yau kebasisaka?

¹³ Kansi, keti ndonga yai yonso kemonisa nde bumosi ya bansambidi ya Yehowa kele mbutu ya lutwadisu mosi ya ngolo, ya kukonda mawa? Ata fyoti ve! Kele ve ata ti kima mosi ya kukonda zola na yina metala Nzambi ti organizasio na yandi. Yehowa kebendaka bantu na kumonisaka zola, ye konso mvula bankama ya mafunda ya bantu, na luzolo na bau mosi mpi na kyese yonso kekotaka na kati ya organizasio na yandi na kubotamaka bonso kidimbu ya kudipesa na bau na ntima ya mvimba na Nzambi. Mabanza na bau kele bonso ya Yozue yina syamisaka bankundi na yandi bantu ya Izraele nde: “Beno sola bubu yai kana nani nzambi beno me zola kusambila, . . . Kansi mono ti fami na mono beto ta sadilaka Mfumu Nzambi.”​—Yozue 24:15.

14. Sambu na inki beto lenda tuba nde organizasio ya Yehowa kele teokrasi?

¹⁴ Mutindu beto kele bantu ya dibuta ya Yehowa, beto kele na kyese kaka ve, kansi na lutaninu mpi. Yau kele mutindu yina sambu organizasio na yandi kele teokrasi. Kimfumu ya Nzambi kele teokrasi (kisina ya ngogo kele na Kigreki the·osʹ, nzambi, ye kraʹtos, luyalu). Yau kele luyalu ya Nzambi, ya yandi metulaka ndonga mpi meyadisaka. “Dikanda ya santu” ya kupakulama ya Yehowa kelemfukaka na luyalu na yandi ye na mutindu yina, yau kele mpi teokrasi. (1 Piere 2:​9, NW) Ti Muntu ya Teokrasi ya Nene, Yehowa, bonso Zuzi, Mupesi-Nsiku, mpi Ntotila na beto, beto fwete kudiwa na lutaninu. (Yezaya 33:22) Kansi, kusala inki kana ntembe mebasika sambu na kuyangisa kyese, lutaninu ti bumosi na beto?

Nto-kimvuka Salaka

15, 16. Inki ntembe basikaka na mvunkama ya ntete, mpi sambu na inki?

¹⁵ Sambu na kubumba bumosi ya dibuta, yau talomba kuyidika mambu ya ntembe bantangu yankaka. Yindula ntangu yai nde, yau lombaka kuyidika dyambu ya kimpeve sambu na kubumba bumosi ya dibuta ya bansambidi ya Nzambi na mvunkama ya ntete T.B. Inki lendaka kusalama? Nto-kimvuka vandaka kusala, na kubakaka banzengolo na makambu ya kimpeve. Beto kele na mambu ya kusonama ya bisalu ya mutindu yina na Masonuku.

¹⁶ Mfinama na mvu 49 T.B., nto-kimvuka vukanaka na Yeruzalemi sambu na kuyidika dikambu mosi ya ngolo, na kusalaka buna, bau bumbaka bumosi ya “bantu ya fami ya Nzambi.” (Efezo 2:19) Kiteso ya bamvula 13 na ntwala, ntumwa Piere samunaka na Korneye, ye Mimpani ya ntete kumaka bankwikidi ya kubotama. (Bisalu, kapu 10) Na ntangu ya nzyetolo ya ntete ya Polo bonso misionere, Mimpani mingi yambaka Bukristu. (Bisalu 13:1–14:28) Ya kyeleka, dibundu ya Bakristu ya Mimpani salamaka na Antioshe ya Siria. Bayuda yankaka ya Bakristu monaka nde Mimpani yina ndimaka lukwikilu fwanaka kuyotisama mpi kulanda Nsiku ya Moize, kansi bankaka buyaka. (Bisalu 15:​1-5) Ntembe yai lendaka kufwa bumosi yonso, nkutu yau lendaka kuganga mabundu ya kukabwana ya Bayuda ti ya Mimpani. Yau yina, nto-kimvuka kingaka ve na kusala nswalu sambu na kubumba bumosi ya Bukristu.

17. Inki nsadilu ya ngwisana ya teokrasi metendulama na Bisalu kapu 15?

¹⁷ Na kutadilaka Bisalu 15:​6-22, “bantumwa ti bambuta kutanaka kisika mosi sambu na kutala mbote-mbote mambu yina.” Bantu yankaka mpi vandaka pana, ti bantu ya kwisaka na zina ya Antioshe. Piere tendulaka ntete nde na munoko na yandi ‘bantu yina kele Bayuda ve waka mpi Nsangu ya Mbote, bo mpi kwikilaka yo.’ Na nima, “bantu yonso” widikilaka ntangu Barnabasi ti Polo “vandaka kutubila bo nki mutindu Nzambi pesaka bo ngolo ya kusala mambu ya kuyituka ya mutindu na mutindu na kati ya bantu yina kele Bayuda ve,” to Mimpani. Na nima, Yakobo pesaka dibanza na yina metala mutindu mambu lendaka kuzengama. Na nima nto-kimvuka bakaka nzengolo, beto ketanga nde: “Bantumwa, bambuta ti bantu yonso ya dibundu, bo zengaka nde bo fweti sola bantu ya nkaka na kati na bo sambu na kutinda bo ti Polo na Barnabasi na bwala Antioshe.” “Bantu yina solamaka”​—Yude ti Silasi​—natilaka bankundi bankwikidi mukanda mosi ya kupesa kikesa.

18. Nto-kimvuka bakaka inki nzengolo na yina metala Nsiku ya Moize, ye inki mutindu yau simbaka Bakristu ya Bayuda ti ya Mimpani?

¹⁸ Mukanda yango ya vandaka kusamuna nzengolo ya nto-kimvuka yantikaka ti bangogo yai: “Beto bantumwa ti bambuta yina kele bampangi na beno ya Dibundu, beto me tindila beno mbote, beno bampangi yina butukaka Bayuda ve, ke vandaka na bwala Antioshe ti na provense ya Siria ti na provense ya Silisia.” Bampangi yankaka vandaka na lukutakanu yai ya mfunu, kansi yau kemonana nde na kati ya nto-kimvuka vandaka kaka “bantumwa ti bambuta.” Mpeve ya Nzambi twadisaka bau, sambu mukanda vandaka kutuba nde: “Mpeve ya Nzambi ti beto, beto me zenga na kutula kilo ya nkaka ve na zulu na beno, kansi kilo mosi mpamba ya mfunu yo yai: Beno lenda dia ve mbisi yina ya bo me pesa ntete makabu na banzambi ya biteki, beno lenda nwa ve menga, beno lenda dia ve mbisi yina ya bo me fwa na kukanga mungungu na yo, beno lenda sala pite mpi ve.” (Bisalu 15:​23-29; beto bantu metengimisa bisono.) Yau lombaka ve nde Bakristu kuyotisama mpi kulunda Nsiku ya Moize. Nzengolo yai sadisaka Bakristu ya Bayuda ti ya Mimpani na kusala mpi kutuba na bumosi. Mabundu yangalalaka, mpi bumosi ya mbalu kufulaka, kaka mutindu yau kele na kati ya dibuta ya Nzambi ya inza ya mvimba bubu yai na nsi ya lutwadisu ya kimpeve ya Nto-kimvuka ya Bambangi ya Yehowa.​—Bisalu 15:​30-35.

Sala na Bumosi ya Teokrasi

19. Sambu na inki bumosi meyelaka na dibuta ya bansambidi ya Yehowa?

¹⁹ Bumosi keyelaka kana bamambere ya dibuta kesadisana bamosi ti bankaka. Yau kele kiteso mosi na kati ya dibuta ya bansambidi ya Yehowa. Na kuvandaka bantu ya teokrasi, bankuluntu ti bantu yankaka ya dibundu ya mvunkama ya ntete sadilaka Nzambi na kusadisaka mbotembote nto-kimvuka mpi ndimaka banzengolo na yau. Ti lusadisu ya nto-kimvuka, bankuluntu ‘longaka nsangu ya Nzambi’ ye bamambere ya dibundu na kimvuka ‘wakanaka na mambu yina bo vandaka kutuba.’ (2 Timoteo 4:​1, 2; 1 Korinto 1:10) Yau yina, kyeleka mosi kaka ya Masonuku vandaka kulongama na kisalu ya kusamuna mpi na balukutakanu ya Bukristu, na Yeruzalemi, na Antioshe, na Roma, na Korinto, to na konso kisika yankaka. Bumosi ya teokrasi ya mutindu yina kele bubu yai.

20. Sambu na kubumba bumosi na beto ya Bukristu, inki beto fwete sala?

²⁰ Sambu na kubumba bumosi na beto, beto yonso yina kele na kati ya dibuta ya mvimba ya Yehowa fwete sala ngolo na kumonisa zola ya teokrasi. (1 Yoane 4:16) Beto fwete lemfuka na luzolo ya Nzambi mpi kumonisa luzitu ya ngolo sambu na ‘mpika ya kwikama’ mpi Nto-kimvuka. Ya kyeleka, mutindu mosi ti kudipesa na beto na Nzambi, bulemfu na beto kele ya luzolo mpi ya kyese. (1 Yoane 5:3) Na mutindu ya kufwana ya inki mutindu muyimbi-bankunga vukisaka kyese ti bulemfu! Yandi yimbaka nde: “Aleluya! Lukumu na Mfumu Nzambi! Kyese na muntu yina ke tinaka Mfumu Nzambi boma, yina ke monaka kiese na kulanda bansiku na yandi.”​—Nkunga 112:1.

21. Inki mutindu beto lenda monisa beto mosi nde beto kele bantu ya teokrasi?

²¹ Yezu, Ntu ya dibundu, kele kibeni muntu ya teokrasi mpi kesalaka ntangu yonso luzolo ya Tata na yandi. (Yoane 5:30) Na yau, bika beto landa Mupesi-mbandu na beto na kusalaka luzolo ya Yehowa na nzila ya teokrasi ti ya bumosi, na ngwisana yonso ti organizasio na yandi. Na nima ti kyese ya kekatuka na ntima mpi matondo, beto lenda yimba nkunga ya muyimbi-bankunga: “Tala! Mbote mpi kyese ya inki mutindu yau kele na bampangi kuzinga kumosi na kimvuka!”

Inki Mutindu Nge Tapesa Mvutu?

◻ Inki mutindu bumosi ya Bukristu lenda wakana ti Nkunga 133?

◻ Inki kele mwa bikuma ya keyedisaka bumosi?

◻ Sambu na inki ndonga ya teokrasi kele mfunu sambu na bumosi ya bantu ya Nzambi?

◻ Inki mutindu nto-kimvuka salaka sambu na kubumba bumosi na mvunkama ya ntete?

◻ Inki kele disongidila ya bumosi ya teokrasi sambu na nge?

[Kifwanisu ya kele na lutiti 13]

Nto-kimvuka salaka sambu na kubumba bumosi