Landa na Kutambula na Nzila ya Yehowa

“Tula ntima na Mfumu Nzambi, landa mpi bansiku na yandi; yandi ta pesa nge ngolo na kubaka ntoto.”​—⁠NKUNGA 37:⁠34.

1, 2. Yo lombaka nde Ntotila Davidi kusala nki sambu na kutambula na nzila ya Yehowa, mpi nki yo kelomba na beto bubu yai?

“SONGA mono nzila ya mono fweti kwenda sambu mono ke tala kaka na nge.” (Nkunga 143:⁠8) Bubu yai, Bakristu ketubaka na ntima na bo ya mvimba kaka mutindu Ntotila Davidi ketuba awa. Bo kezola kusepedisa Yehowa na masonga yonso ti kutambula na nzila na yandi. Kansi yo kelombaka nki? Sambu na Davidi, yo lombaka nde yandi lunda bansiku ya Nzambi. Yo lombaka mpi nde yandi tula ntima na Yehowa, kansi na makanda ya nzyunga ve. Ee, yo lombaka nde yandi sadila kaka Yehowa na kwikama yonso, kansi banzambi ya makanda ya nzyunga ve. Kansi sambu na Bakristu, kutambula ti Nzambi kelomba mambu mingi.

² Ntete, kutambula ti Yehowa bubu yai kelomba kuvanda na lukwikilu na nkudulu ya kimenga ya Yezu, mpi kundima yandi bonso ‘nzila, kieleka, mpi moyo.’ (Yoane 3:16; 14:6; Baebreo 5:⁠9) Yo kelomba mpi kuzitisa “nsiku ya Kristo,” yina kelomba beto na kusonga zola na kati na beto, mpi mingimingi na bampangi ya kupakulama ya Yezu. (Galatia 6:2; Matayo 25:​34-40) Bayina ketambulaka na nzila ya Yehowa kezolaka minsiku na yandi ti bantuma na yandi. (Nkunga 119:97; Bingana 4:​5, 6) Bo kesepelaka mingi na dibaku na bo ya kitoko na kusala kisalu ya Bukristu. (Kolosai 4:17; 2 Timoteo 4:⁠5) Bo kesalaka kisambu ntangu yonso na luzingu na bo. (Roma 12:12) Mpi bo ‘ke kebaka na kuzinga ve bonso bazoba, kansi bonso bantu ya mayele.’ (Efezo 5:15) Ya kyeleka, bo kelosaka ve bimvwama ya kimpeve, sambu na kulanda bima ya kinsuni ya ntangu fyoti to bampusa ya mbi ya kinsuni. (Matayo 6:​19, 20; 1 Yoane 2:​15-17) Dyaka, bikalulu ya kuluta mfunu kele kuvanda ya kwikama na Yehowa ti kutula ntima na yandi. (2 Korinto 1:9; 10:5; Efezo 4:24) Sambu na nki? Sambu beto kezinga na ntangu mosi ya mefwanana ti ntangu ya bantu ya Izraele ya ntama.

Beto Kele na Mfunu ya Kutula Ntima ti Kwikama

 3. Sambu na nki kwikama, lukwikilu ti kutula ntima kesadisaka beto na kubikala na nzila ya Yehowa?

³ Izraele vandaka mwa dikanda mosi ya fyoti ya kukangama na kati ya makanda mingi ya bambeni, ya vandaka kusala bisalu ya mvindu na kusambila banzambi ya biteki. (1 Bansangu 16:26) Kaka bana ya Izraele mpamba bantu vandaka kusambila Yehowa, Nzambi mosi kaka ya kyeleka, ya kemonanaka ve. Yandi lombaka bo na kuvanda ti bikalulu ya kuluta mbote. (Kulonga 6:⁠4) Mutindu mosi bubu yai, bantu ndambu mpamba kesambilaka Yehowa, mpi bo kezingaka na inza mosi ya kele na bantu kiteso ya bamiliare sambanu. Minsiku ti lusambu ya bantu yai kele ya kuswaswana ngolo ti ya bantu yina kesadilaka Yehowa. Kana beto kele na kati ya ndambu ya bantu yai ya kesambilaka Yehowa, beto fwete kangula meso sambu kima mosi kukotisa beto ve na nzila ya mbi. Nki mutindu? Bikalulu yai tasadisa beto: kwikama na Yehowa, lukwikilu, ti kutula ntima mpenza nde yandi talungisa balusilu na yandi. (Baebreo 11:⁠6) Yo tatanina beto na kukonda kutula meso na bima ya inza yai ketudilaka ntima.​—⁠Bingana 20:22; 1 Timoteo 6:⁠17.

 4. Na nki mutindu makanda “me temukaka ve”?

⁴ Ntumwa Polo monisaka nde luswaswanu fwete vandaka na kati ya Bakristu ti bantu ya inza. Yandi sonikaka nde: “Mambu ya mono ke tubila beno ti ya mono ke bondila beno na zina ya Mfumu Yesu, yo yai, nde beno zinga diaka ve bonso bamimpani. Sambu bo ke na mabanza ya mpamba, bo mpi me temukaka ve. Bo ke zabaka ve luzingu yina ya Nzambi ke pesaka, sambu bo zaba kima ve, bo kele ntu-ngolo mpenza.” (Efezo 4:​17, 18) Yezu kele “nsemo ya kieleka.” (Yoane 1:⁠9) Bayina yonso kebuyaka yandi, to ketubaka na munoko nde bo kekwikilaka na yandi kansi bo kelemfukaka ve na “nsiku ya Kristo,” bo “me temukaka ve.” Bo ketambulaka ve ata fyoti na nzila ya Yehowa, bo “ke zabaka ve luzingu yina ya Nzambi ke pesaka.” Ata bo lenda yindula nde bo kele bantu ya mayele na mambu ya inza, “bo zaba kima ve” na yina metala nzayilu ya kenataka na luzingu: nzayilu ya Yehowa Nzambi ti Yezu Kristu.​—⁠Yoane 17:3; 1 Korinto 3:⁠19.

 5. Ata nsemo ya kyeleka kele na kusema na kati ya inza, nki kesalaka nde ntima ya bantu mingi kundima yo ve?

⁵ Kansi, nsemo ya kyeleka kele na kusema na kati ya inza! (Nkunga 43:3; Filipi 2:15) ‘Mayele [ya kyeleka] ke binga na babalabala.’ (Bingana 1:20) Na mvula meluta, Bambangi ya Yehowa salaka bangunga kuluta miliare mosi na kisalu ya kusonga bantu ya bo kezingaka ti bo mambu ya metala Yehowa ti Yezu Kristu. Bankama mingi ya mafunda ya bantu ndimaka nsangu yina. Kansi, keti beto fwete yituka kana bankaka buyaka yo? Ve. Polo tubaka nde “bo kele ntu-ngolo” to, “bo kele na ntima ya ngolo.” (NW) Ntima ya bamosi kendimaka ve sambu na kikalulu ya kusosa mambote na bo mosi mpamba to sambu na zola ya mbongo. Bankaka mebebaka sambu na bangindu ya mbi ya lusambu ya luvunu to sambu na bangindu ya luzingu ya bantu kele na yo bubu yai. Bankaka mepesaka Nzambi mukongo sambu na bampasi ya bo kemonaka na luzingu. Bankaka kezolaka ve kuzitisa bansiku ya kuluta kuzanguka ya Yehowa. (Yoane 3:20) Keti ntima ya muntu yina ketambulaka na nzila ya Yehowa lenda kuma ngolo sambu na mambu ya mutindu yai?

6, 7. Ata bo vandaka bansambidi ya Yehowa Nzambi, nki mambu bwisaka bana ya Izraele, ye sambu na nki?

⁶ Polo monisaka nde mambu ya mutindu yai kuminaka bantu ya Izraele ya ntama. Yandi sonikaka nde: “Ebuna mambu yai yonso kele bambandu sambu na beto, yo ke pesaka beto bandongisila nde beto kuvanda ve na nzala ya kusala mambu ya mbi mutindu bo salaka, beto kusamba mpi banzambi ya biteki ve mutindu bantu ya nkaka na kati na bo salaka. Mutindu bo sonikaka na Mukanda ya Nzambi nde: ‘Bantu vandaka me vanda sambu na kudia ti kunwa, ebuna bo telamaka sambu na kukina.’ Beto kusala pite ve, mutindu bantu ya nkaka na kati na bo salaka; bantu mile makumi zole na tatu fwaka na kilumbu mosi.”​—⁠1 Korinto 10:​6-8.

⁷ Polo ketubila ntete ntangu bantu ya Izraele sambilaka mwana-ngombe ya wolo na nsi ya Ngumba Sinai. (Kubasika 32:​5, 6) Awa bo fwaka mpenza nsiku ya Nzambi ya bo ndimaka bilumbu fyoti na ntwala nde bo tazitisa yo. (Kubasika 20:​4-6; 24:⁠3) Na nima, Polo ketubila ntangu yina bantu ya Izraele sambilaka nzambi Baale sambu bo landaka bana-bankento ya Moabi. (Kutanga 25:​1-9) Kisika lusambu ya mwana-ngombe vandaka kusalama, bantu vandaka kudia mbiki ti “kukina.”a Kansi lusambu ya Baale vandaka kusalama nzila mosi ti pite ya kuluta mingi. (Kusonga 2:14) Sambu na nki bantu ya Izraele salaka masumu yai? Sambu bo kunaka na ntima na bo “nzala ya kusala mambu ya mbi” bonso lusambu ya biteki to mansoni yina vandaka kusalama nzila mosi ti yo.

 8. Nki bandongisila beto kebaka na mambu yina bwilaka bana ya Izraele?

⁸ Polo monisaka nde beto fwete baka bandongisila na bambandu yai. Nki bandongisila? Bubu yai, Mukristu ata mosi ve kefukamaka na ntwala ya kiteki ya wolo ya mwana-ngombe to ya nzambi mosi ya ntama ya Moabi. Kansi pite ti nzala ya kuvanda na konso kima? Bima yai kesalama mingi bubu yai, mpi kana beto yambula mpusa na yo kuyela na ntima na beto, yo takatula beto na nzila ya Yehowa. Nsuka na yo tavanda kaka bonso beto mefukimina biteki, beto takuma bambeni ya Nzambi. (Fwanisa ti Kolosai 3:5; Filipi 3:19.) Yo yina mpi, na kusukisa ndongisila na yandi, Polo tubaka nde: “Beno samba ve banzambi ya biteki.”​—⁠1 Korinto 10:⁠14.

Lusadisu Sambu na Kutambula na Nzila ya Nzambi

 9. (a) Nki lusadisu beto kele na yo sambu na kubikala na nzila ya Yehowa? (b) Pesa nzila mosi ya beto ‘kewilaka ndinga na nima na beto.’

⁹ Kana beto mebaka mpenza lukanu nde beto ketambula na nzila ya Yehowa, yandi tasadisaka beto. Yezaya tubaka nde: “Kana beno kwenda nzila yai to nzila ya nkaka, beno ta wa ndinga na nima na beno ke tuba nde: ‘Nzila yo yai, beno landa yo.’ ” (Yezaya 30:21) Nki mutindu beto ‘ta wa ndinga yina na nima na beto’? Beto zaba nde ke ti muntu ve ya kewaka ndinga ya kyeleka to nsangu ya mekatuka na Nzambi. Beto yonso kewaka “ndinga” ya Nzambi kaka na banzila yai: Ya ntete mpi ya kuluta mfunu kele Masonuku ya kupemama, Biblia, mukanda ya kele ti mabanza ya Nzambi mpi mambu ya yandi mesalaka ti bantu. Konso kilumbu beto kewaka malongi ya luvunu yina kekatukaka na bayina “ke zabaka ve luzingu yina ya Nzambi ke pesaka.”par. 4 Yo yina, na kuvanda ti kimpeve ya mbote, beto fwete tangaka ndinga ya Nzambi mbala na mbala ti kuyindula ntangu yonso mambu ya yo ketuba. Yo tasadisa beto na kubuya mambu ‘ya mpamba-mpamba’ mpi beto takuma ‘ya kuyilama mbote, mpi, tavanda na mpila ya mbote ya kusala konso kisalu ya mbote.’ (Bisalu 14:​14, 15; 2 Timoteo 3:​16, 17) Yo tapesa beto ngolo ti kikesa, mpi yo tasadisa beto sambu ‘mambu yonso ya beto ta sala kubonga.’ (Yozue 1:​7, 8) Yo yina, Ndinga ya Yehowa kepusa beto nde: “Ntangu yai beno bana na mono, beno wila mono. Beno sala mutindu mono ke tuba, ebuna beno ta vanda kiese. Beno wa malongi na mono, mpidina beno ta baka mayele; beno kubuya yo ve.”​—⁠Bingana 8:​32, 33.

10. Nzila ya zole ya beto ‘kewilaka ndinga na nima na beto’ kele nki?

¹⁰ ‘Ndinga ke tubaka mpi na nima na beto’ na nsadisa ya “mpika ya kwikama mpi ya mayele,” yina kepesaka beto “madya na ntangu ya mbote.” (Matayo 24:​45-47, NW) Mpika kepesaka madya yai mingi na nzila ya mikanda ya ketendulaka Biblia. Madya yai menyemamaka mingi na bamvula ya mekatuka kuluta. Mu mbandu, Nzozulu ya Nkengi mesadisaka beto mingi na kuyidika mutindu na beto ya kubakisa bambikudulu. Na zulunalu yai, bo syamisaka beto na kulanda kusala kisalu na beto ya kusamuna ti ya kukumisa bantu balongoki ata bantu mingi kezolaka ve kuwa nsangu. Bo longaka beto na kutina mambu ya lenda bwisa beto, ti na kuyedisa bikalulu ya Bukristu. Beto kele na ntonda mingi sambu na madya yai ya kebasika na ntangu ya mbote!

11. Tendula nzila ya tatu ya beto ‘kewilaka ndinga na nima na beto.’

¹¹ Mpika ya kwikama mpi ya mayele kedisaka beto mpi na nzila ya balukutakanu ya dibundu, balukutakanu zole ya kesalamaka na nzyunga konso mvula, ti lukutakanu ya distrike. Nani Mukristu ya kwikama lenda konda ntonda sambu na balukutakanu yai? Yo kele kima ya mfunu ya kesadisa beto na kutambula na nzila ya Yehowa. Sambu mingi na kati na beto kesalaka ntangu mingi na kisalu to na nzo-nkanda ti bantu yina kele ve lukwikilu mosi ti beto, kuvanda ntangu yonso na balukutakanu kele kima ya kuluta mfunu. Balukutakanu kepesaka beto dibaku ya ‘kupesa kikesa, kuzola bampangi ya nkaka, ti kusadila bo mambu ya mbote.’ (Baebreo 10:24) Beto kezolaka bampangi na beto mpi beto kezolaka mingi kuvukana ti bo.​—⁠Nkunga 133:⁠1.

12. Nki lusilu Bambangi ya Yehowa kele na yo, ye nki mutindu bo mekatuka kumonisa yo?

¹² Bubu yai na inza ya mvimba, bantu kiteso ya bamilio sambanu, ya mebakaka ngolo sambu na madya ya kimpeve ya mutindu yai, kele na kutambula na nzila ya Yehowa, ye bankaka mingi kele na kulonguka Biblia sambu na kuzaba mpi mpila ya kutambula na nzila yina. Keti bo kele dyaka na kikesa ve to nitu melemba bo sambu bo kele mingi ve bonso bamiliare ya bantu yonso ya kele na ntoto? Ata fyoti ve! Bo mesila mpenza na kulanda ‘kuwa ndinga’ ya ketuba ‘na nima na bo’ sambu bo sala luzolo ya Yehowa na kwikama yonso. Na Balukutakanu ya Bansi Mingi mpi ya Distrike, “Ndinga ya Nzambi ke Luzingu,” ya mvu 1998/99, bawi monisaka lusilu yai na meso ya bantu yonso, ntangu bo bakaka lukanu mosi ya kesonga luzolo ya kele na ntima na bo. Lukanu yango vandaka ya kusonika mutindu yai:

Lukanu

13, 14. Nki ngindu ya masonga Bambangi ya Yehowa ke na yo sambu na inza?

¹³ “Beto Bambangi ya Yehowa ya mevukana awa na Lukutakanu ya Distrike yai: ‘Nzila ya Nzambi ke Luzingu,’ beto kendima na ntima mosi nde nzila ya Nzambi kele nzila ya luzingu ya kuluta mbote. Kansi, beto kezaba nde bubu yai bantu mingi keyindulaka ve mutindu mosi ti beto. Bantu memekaka mabanza, bafilozofi, ti bangindu ya mabundu mingi sambu na kusosa nzila ya luzingu ya kuluta mbote. Kansi, kana beto tala nkenda ya bantu ti luzingu ya inza ya bubu na masonga yonso, beto kemona nde mambu yina Nzambi tubaka na Yeremia 10:23 kele kibeni ya kyeleka. Yandi tubaka nde: ‘Ke na muntu ve lenda songa nzila na makulu na yandi ntangu yandi [ke] tambula.’

¹⁴ “Konso kilumbu, beto kemona banzikisa ya kuluta mingi yina kendimisa nde bangogo yina kele ya kyeleka. Bantu mingi kemonaka nzila ya luzingu ya Nzambi bonso kima mosi ya mpamba. Bantu kelandaka mambu yina kemonanaka ya mbote na meso na bo mosi. Kansi yo mebutaka makambu mingi ya mpasi. Beto tanga kaka ndambu ya makambu yango: Kufwa ya luzingu ya dibuta, kuyambula bana bo mosi kukonda muntu ya kutwadisa bo; nzala ya kusosa bima ya kinsuni yina bo kezwaka nkutu ve; kufwa bantu mingi kukonda kikuma, bamvita ti bitumba ya bikanda yina kefwa kiteso ya bantu ya kepesa nkutu boma; mambu ya nsoni yina kepanza maladi ya kesambukilaka na kuvukisa nitu. Beto metanga kaka ndambu ya makambu na kati ya makambu mingi yina kekatula bantu kyese, ngemba ti lutaninu.

15, 16. Na lukanu ya beto bakaka, nki beto silaka na yina metala nzila ya luzingu ya Nzambi?

¹⁵ “Sambu na mambu ya mpasi yai ya bantu kekutana ti yo, mpi sambu ‘bitumba ya kilumbu ya nene ya Nzambi Munkwa-Ngolo Yonso,’ yina bo kebingaka nde Armagedoni mefinama (Kusonga 16:​14, 16), beto Bambangi ya Yehowa, beto kebaka lukanu yai:

¹⁶ “Ntete: Beto kele bantu ya Yehowa Nzambi, sambu konso muntu na kati na beto mekudipesaka ya mvimba na yandi. Beto fwete bikala na lukwikilu mosi ya ngolo na nkudulu ya Mwana na yandi Yezu Kristu, sambu yandi kele muntu yina Yehowa mesadilaka sambu na kugulusa bantu. Beto kele na lukanu ya kutambula na nzila ya luzingu ya Nzambi, ya kusala bonso Bambangi na yandi mpi ya kulemfukila kimfumu ya Nzambi yina Yezu Kristu ke na kutwadisa.

17, 18. Nki Bambangi ya Yehowa tafula na kulanda na yina metala bikalulu ti kimpangi na bo ya Bukristu?

¹⁷ “Zole: Beto tafula na kulanda minsiku ya kuzanguka ya Biblia na yina metala bikalulu ti kimpeve na beto. Beto mebaka lukanu ya kubuya kutambula mutindu makanda ketambulaka na mabanza na bo ya mpambampamba. (Efezo 4:​17-19) Lukanu na beto kele ya kubikala bunkete na meso ya Yehowa, mpi ya kukonda batashe ya inza yai.​—⁠Yakobo 1:⁠27.

¹⁸ “Tatu: Beto takangama ngolo na dibuta ya Bukristu ya inza ya mvimba bonso Masonuku metubila yo. Beto tabikala kaka na bukatikati ya Bukristu na kati ya makanda. Beto tasalaka yonso sambu na kubwa ve na mutambu ya kukabwana to kuyinana sambu na mpusu ya nitu , sambu na insi to sambu na kikanda.

19, 20. (a) Nki Bakristu yina kele ti bana tasala? (b) Nki mutindu Bakristu talanda na kumonisa nde bo kele balongoki ya Kristu?

¹⁹ “Iya: Beto bantu kele ti bana, beto talongaka bana na beto nzila ya Nzambi. Beto tapesaka mbandu ya mbote ya luzingu ya Bukristu. Disongidila beto tatangaka Biblia mbala na mbala, beto talongukaka na dibuta, mpi beto tavukanaka na ntima mosi na bisalu ya dibundu ya Bukristu mpi na kisalu ya bilanga.

²⁰ “Tanu: Beto yonso tanwanaka ngolo sambu na kukuna bikalulu ya bunzambi yina Ngangi na beto kele na yo. Ebuna beto tasalaka yonso sambu na kulanda mbandu ya kimuntu na yandi ti banzila na yandi mutindu Yezu salaka. (Efezo 5:⁠1) Beto mebaka lukanu nde mambu na beto yonso tasalamaka na zola. Mpidina yo tamonisa nde beto kele balongoki ya Kristu.​—⁠Yoane. 13:⁠35.

21-23. Nki Bambangi ya Yehowa talanda na kusala, ye nki bo kendima na ntima na bo?

²¹ “Sambanu: Beto talemba ve na kulonga nsangu ya mbote ya Kimfumu ya Nzambi, na kukumisa bantu balongoki. Beto talonga bo nzila ya luzingu ya Nzambi, mpi beto tasyamisa bo na kulanda kulonguka dyaka mingi na balukutakanu ya dibundu.​—⁠Matayo 24:14; 28:​19, 20; Baebreo 10:​24, 25.

²² “Nsambwadi: Beto yonso talandaka na kutula luzolo ya Nzambi na kisika ya ntete na luzingu na beto. Kana beto kesadila Ndinga na yandi, Biblia, sambu yo twadisa beto, beto tavila ve nzila. Mpidina beto tamonisa nde nzila ya Nzambi meluta kibeni banzila ya inza. Beto kele na lukanu ya kulanda nzila ya luzingu ya Nzambi na kwikama yonso banda bubu yai tii kimakulu!

²³ “Beto kebaka lukanu yai sambu beto ketulaka ntima yonso na lusilu ya zola yina Yehowa silaka beto nde muntu yina kesalaka luzolo ya Nzambi tabikala kimakulu. Beto kebaka lukanu yai sambu beto kendima nde kana beto kezitisa minsiku ti bandongisila yina kele na Masonuku, beto tazinga na nzila ya luzingu ya kuluta mbote bubu yai. Beto tatunga fondasio ya mbote sambu na bilumbu kekwisa, mpi beto tasimba ngolo luzingu ya kyeleka. (1 Timoteo 6:19; 2 Timoteo 4:7b, 8) Kima ya kuluta mfunu kele yai: Beto kebaka lukanu yai sambu beto kezolaka Yehowa Nzambi na ntima na beto yonso, na moyo na beto yonso, ti na ngolo na beto yonso!

24, 25. Nki bantu kusalaka na nima ya kuwa lukanu yai, ye nki bayina ketambulaka na nzila ya Yehowa mesila na kusala?

²⁴ “Bawi yonso yina kele na lukutakanu yai, kana beno mendima lukanu yai, beno tuba nde EE!”

²⁵ Na ntoto ya mvimba, na baplene ya nkweso ti na bisika yankaka mingi, bantu yina yonso vandaka na lukutakanu ndimaka na ndinga ya ngolo mpenza nde “EE!” Bambangi ya Yehowa kuzaba mbotembote na ntima na bo nde bo talanda na kutambula na nzila ya Yehowa. Bo metulaka ntima mpenza na Yehowa mpi kekwikilaka nde yandi talungisa balusilu na yandi. Bo kebikalaka ya kwikama na yandi, na ntangu ya mpasi to ya kyese. Mpi bo kele na lukanu ya ngolo ya kusala luzolo na yandi.

“Nzambi Kele ti Beto”

26. Nki kyese kele na bayina ketambulaka na nzila ya Nzambi?

²⁶ Bambangi ya Yehowa keyibukaka ndongisila yai ya muyimbi bakunga: “Tula ntima na Mfumu Nzambi, landa mpi bansiku na yandi; yandi ta pesa nge ngolo na kubaka ntoto.” (Nkunga 37:34) Bo kevilaka ve nsyamisa ya Polo pesaka: “Kana Nzambi kele ti beto, nani lenda kwisa kunwanisa beto? Ata Mwana na yandi mosi, Nzambi bumbaka yandi ve, kansi yandi bikisaka yandi na kwisa kufwa sambu na beto yonso. Ebuna nki mutindu yandi lenda pesa beto ve mambu yonso nzila mosi ti Mwana na yandi?” (Roma 8:​31, 32) Ee, kana beto kelanda na kutambula na nzila ya Yehowa, yandi tapesaka beto “bima yonso ya kuluta mingi sambu beto mona kiese na yo.” (1 Timoteo 6:17) Kele ve na kisika yankaka ya kitoko ya kuluta yai ya beto kele: beto ketambula na nzila ya Yehowa kumosi ti bampangi na beto ya babakala mpi ya bankento. Yehowa kele na lweka na beto, bika beto kangama ngolo na nzila yai mpi beto kanga ntima tii na nsuka, sambu beto ketula ntima nde, kana ntangu ya yandi tulaka melunga, yandi talungisa balusilu na yandi yonso ya mebikala na meso na beto.​—⁠Tito 1:⁠2.

[Noti na nsi ya lutiti]

Keti Nge Keyibuka?

◻ Nki bikalulu Mukristu fwete vanda na yo sambu yandi nunga na kutambula na nzila ya Nzambi?

◻ Sambu na nki beto fwete tula ntima mingi na Nzambi ti kubikala ya kwikama na yandi?

◻ Nki kesadisaka beto sambu na kutambula na nzila ya Nzambi?

◻ Nki nge mesimba na lukanu ya beto bakaka na lukutakanu ya nene “Ndinga ya Nzambi ke Luzingu”?

[Kifwanisu ya kele na lutiti 18]

Na Lukutakanu ya Distrike mpi ya Bansi Mingi, “Nzila ya Nzambi ke Luzingu,” Bambangi bakaka lukanu mosi ya mfunu kibeni