Kabula Ndembikilu Yina Yehowa Kepesaka

“Beto ke tula ntima na beno mpamba ve, sambu beto ke zaba nde mutindu beno ke [“kabulaka,” “NW”] mpasi sambu na bampasi na beto, mutindu mosi mpi beno [“takabula ndembikilu,” “NW”].”​—2 KORINTO 1:7.

1, 2. Inki bantu mingi yina mekumaka Bakristu bubu yai memonaka?

BATANGI mingi ya bilumbu yai ya Nzozulu ya Nkengi kuyelaka kukonda mpasi na nzayilu ya kyeleka ya Nzambi. Mbala yankaka yau kele mpila yina sambu na nge. Kana mutindu yina, yibuka mutindu nge kudiwaka ntangu meso na nge ya mbakisa bandaka kukanguka. Mu mbandu, ntangu nge bakisaka na mbala ya ntete nde bafwa ke na kumonaka mpasi ve kansi bau kezaba ata kima ve, keti yau vandaka kupema ve sambu na nge? Ye ntangu ya nge longukaka kivuvu ya bafwa, nde bankama ya mafuku ya bantu tafutumuka sambu na kuzinga na inza ya mpa ya Nzambi, keti nge bakaka ndembikilu ve?​—Longi 9:5, 10; Yoane 5:​28, 29.

² Inki beto lenda tuba sambu na lusilu ya Nzambi ya kusukisa mambi mpi ya kukitula ntoto yai paladisu? Ntangu nge longukaka dyambu yai, keti yau lembikaka nge ve mpi kufulusa nge ti mpusa ya ngolo ya kuvanda kuna? Inki mutindu nge kudiwaka ntangu nge longukaka na mbala ya ntete dibaku ya konda kufwa kansi ya kulanda kuzinga na kati ya Paladisu ya ntoto yina kekwisa? Na ntembe ve nge vandaka na kyese. Ee, nge kumaka muntu ya kebakaka nsangu ya ndembikilu ya Nzambi yina Bambangi ya Yehowa kesamunaka ntangu yai na inza ya mvimba.​—Nkunga 37:​9-11, 29; Yoane 11:26; Kusonga 21:​3-5.

 3. Sambu na inki bayina kekabulaka nsangu ya ndembikilu ti bankaka kemonaka mpi mpasi?

³ Ata mpila yina, ntangu nge mekaka na kukabula nsangu ya Biblia ti bankaka, nge monaka mpi nde “bantu yonso ve ke zolaka kundima Nsangu ya Mbote.” (2 Tesalonika 3:2) Mbala yankaka, bankaka na kati ya banduku na nge ya ntama sekaka nge sambu nge monisaka lukwikilu na nge na balusilu ya Biblia. Mbala yankaka nge kutanaka nkutu ti mbangika sambu nge landaka kulonguka Biblia kumosi ti Bambangi ya Yehowa. Ziku luteleminu kumaka ngolo ntangu nge bandaka na kusala bansoba sambu na kuwakanisa luzingu na nge ti minsiku ya Biblia. Nge bandaka kumona mpasi yina Satana ti inza na yandi kenataka na zulu ya bayina yonso kendimaka ndembikilu ya Nzambi.

 4. Inki mitindu ya kuswaswana bayina mekatuka kusepela lenda sadila na ntwala ya mpasi?

⁴ Na mawa yonso, mutindu Yezu yitaka kutuba, mpasi kenataka bankaka na kubula dibaku mpi kuyambula mvukana na bau ti dibundu ya Bukristu. (Matayo 13:​5, 6, 20, 21) Bankaka kevibidilaka mpasi na kubikisaka mabanza na bau ya kukangama na balusilu ya ndembikilu yina bau kele na kulonguka. Nsukansuka, bau kepesaka luzingu na bau na Yehowa ye kebotamaka bonso balongoki ya Mwana na yandi, Yezu Kristu. (Matayo 28:​19, 20; Marko 8:34) Ya kyeleka, mpasi kesukaka ve kana Mukristu mebotama. Mu mbandu, kubikala ya kugedila lenda vanda mvita ya ngolo sambu na muntu yina vandaka ntete ti luzingu ya mansoni. Bankaka fwete nwana ti luteleminu ya ntangu yonso ya bantu ya dibuta yina kele bankwikidi ve. Ata Mpasi kuvanda ya inki mutindu, bayina yonso kelandaka luzingu ya kudipesa na Nzambi na kwikama yonso lenda tula ntima na kima mosi. Sambu na bau mosi kibeni, bau tazwa ndembikilu mpi lusadisu ya Nzambi.

“Nzambi ya Ndembikilu Yonso”

 5. Kumosi ti mimekamu yonso yina Polo monaka, inki yankaka yandi monaka?

⁵ Muntu mosi ya kundimaka na mudindu ndembikilu ya Nzambi kepesaka vandaka ntumwa Polo. Na nima ya ntangu mosi ya kuluta mpasi na Azia ti na Masedonia, yandi waka kupema mosi ya ngolo ntangu yandi waka nde dibundu ya Korinto ndimaka mbote mukanda na yandi ya kunganina. Yau pusaka yandi na kusonikila bau mukanda ya zole, yina kele ti bangogo ya lukembilu yai: “Lusakumunu kuvanda na Nzambi mpi Tata ya Mfumu na beto Yezu Kristu, Tata ya nkenda mingi mpi Nzambi ya ndembikilu yonso, yina kelembikaka beto na mpasi na beto yonso.”​—2 Korinto 1:​3, 4, NW.

 6. Inki beto kelonguka na bangogo ya Polo yina kele na 2 Korinto 1:​3, 4?

⁶ Bangogo yai ya kupemama ketuba mambu mingi. Bika beto fimpa yau. Ntangu Polo kekembisa to ketonda Nzambi to kelomba na yandi na kati ya mikanda na yandi, mbala mingi beto kemona nde yandi kepesa mpi matondo mingi sambu na Yezu, Mfumu ya dibundu ya Bukristu. (Roma 1:8; 7:25; Efezo 1:3; Baebreo 13:​20, 21) Yau yina, Polo ketubila “Nzambi mpi Tata ya Mfumu na beto Yezu Kristu” bangogo ya lukembilu yai. Na nima, sambu na mbala ya ntete na mikanda na yandi, yandi kesadila zina ya Kigreki ya mebalulama “nkenda mingi.” Zina yai kebasika na ngogo mosi ya kesadilamaka sambu na kumonisa mawa sambu na mpasi ya muntu yankaka. Na yau, Polo tendulaka mawi ya zola ya Nzambi sambu na konso nsadi na Yandi yina ya kwikama ya kemona mpasi​—⁠mawi ya zola yina kepusaka Nzambi na kumonisila bau nkenda. Na nsuka, Polo ketula ntima na Yehowa bonso nto ya kikalulu yai ya mbote na kubingaka yandi nde “Tata ya nkenda mingi.”

 7. Sambu na inki yau lenda tubama nde Yehowa kele “Nzambi ya ndembikilu yonso”?

⁷ “Nkenda mingi” ya Nzambi kenatilaka muntu ya kenyokwama na mpasi kupema. Yau yina Polo kelanda na kutubila Yehowa bonso “Nzambi ya ndembikilu yonso.” Ebuna, konso ndembikilu yina beto lenda mona sambu na bumbote ya bampangi na beto bankwikidi, beto lenda tula ntima na Yehowa bonso nto na yau. Kele ve ti ndembikilu ya kyeleka, ya kezingaka mingi yina kekatukaka ve na Nzambi. Dyaka, kele yandi muntu gangaka muntu na kifwani na yandi, na kupesaka beto nkadilu ya kuvanda bandembiki. Ye kele mpeve santu ya Nzambi kepusaka bansadi na yandi na kumonisa nkenda ya mingi na bayina kele na mfunu ya ndembikilu.

Ya Kulongama na Kuvanda Bandembiki

 8. Ata Nzambi kele ve kisina ya mimekamu na beto, inki malanda ya mbote mvibidilu ya bampasi na beto lenda vanda na yau na zulu na beto?

⁸ Ata Yehowa kepesaka nzila nde mimekamu ya mpila na mpila kukumina bansadi na yandi ya kwikama, yandi kele ve ata fyoti kisina ya mimekamu ya mutindu yina. (Yakobo 1:13) Kansi, ndembikilu ya yandi kepesaka ntangu beto kevibidilaka mpasi lenda longa beto na kuvanda ti mawi mingi na bampusa ya bankaka. Ti inki mbutu? “Na mpila nde beto lenda kuka na kulembika bayina kele na konso mutindu ya mpasi na nsadisa ya ndembikilu yina beto mosi kele na kulembikama na Nzambi.” (2 Korinto 1:​4, NW) Na mutindu yina, Yehowa kelonga beto na kuvanda bakabudi ya mbote ya ndembikilu na yandi ti bankundi bankwikidi mpi ti bayina beto kekutanaka na bau na kisalu na beto mutindu beto kelanda mbandu ya Kristu mpi “kukatula mawa ya bantu yina ke na mafwa.”​—Yezaya 61:2; Matayo 5:4.

 9. (a) Inki tasadisa beto na kuvibidila bampasi? (b) Inki mutindu bankaka kezwaka ndembikilu kana beto kevibidila bampasi na kwikama yonso?

⁹ Polo kuvibidilaka bampasi na yandi mingi na nsadisa ya ndembikilu ya mingi yina yandi bakaka na Nzambi na nzila ya Kristu. (2 Korinto 1:5) Beto mpi lenda baka ndembikilu mingi na kuyindululaka na balusilu ya mbalu ya Nzambi, na kusambaka sambu na lusadisu ya mpeve santu na yandi, mpi na kumonaka bamvutu ya Nzambi na bisambu na beto. Na mutindu yina, beto tabaka ngolo ya kulanda kusimba kimfumu ya Yehowa mpi kumonisa nde Dyabulu kele mukusi. (Yobi 2:4; Bingana 27:11) Ntangu beto mevibidila na kwikama yonso konso mutindu yina ya mpasi, bonso Polo, beto fwete pesa lukumu yonso na Yehowa, munkwa ndembikilu yina kesadisaka Bakristu na kubikala ya kwikama na kati ya mimekamu. Mvibidilu ya Bakristu ya kwikama kele ti ngolo ya ndembikilu na zulu ya kimpangi, na kupusaka bankaka na kusila na “kuvibidila bampasi ya mutindu mosi.”​—2 Korinto 1:6.

10, 11. (a) Inki kele mwa mambu yina nataka mpasi na zulu ya dibundu ya Korinto ya ntama? (b) Inki mutindu Polo lembikaka dibundu ya Korinto, ye inki kivuvu yandi monisaka?

¹⁰ Bantu ya Korinto vandaka ti dikabu na bau ya bampasi yina kuminaka Bakristu ya kyeleka yonso. Dyaka, bau vandaka ti mfunu ya ndongisila sambu na kubasisa muntu ya pite ya konda kubalula ntima na dibundu. (1 Korinto 5:​1, 2, 11, 13) Kukonda kusala mpidina mpi kumanisa mavwanga ti bankabisa nataka nsoni na zulu ya dibundu. Kansi, nsukansuka bau sadilaka ndongisila ya Polo mpi monisaka mbalula ya ntima ya kyeleka. Yau yina, yandi sikisaka bau na tiya yonso mpi tubaka nde mvutu na bau ya mbote na mukanda na yandi lembikaka yandi. (2 Korinto 7:​8, 10, 11, 13) Yau fwete vanda nde, muntu yina basisamaka na dibundu balulaka mpi ntima. Yau yina, Polo longisilaka bau na ‘kulolula yandi, na kupesa yandi kikesa sambu yandi vanda ve na mawa ya kuluta nene.’​—2 Korinto 2:7.

¹¹ Yau fwete vanda mpenza nde mukanda ya zole ya Polo lembikaka dibundu ya Korinto. Ye yai vandaka mosi na kati ya banzodila na yandi. Yandi tendulaka nde: “Beto ke tula ntima na beno mpamba ve, sambu beto ke zaba nde mutindu beno ke [“kabulaka,” NW] mpasi sambu na bampasi na beto, mutindu mosi mpi beno [“takabula ndembikilu,” NW].” (2 Korinto 1:7) Na nsuka ya mukanda na yandi, Polo tumaka nde: “Beno pesa kikesa na [“lembika,” NW] bampangi ya nkaka, . . . ebuna Nzambi yina ke zolaka beno, yina ke pesaka ngemba, yandi ta vanda na beno.”​—2 Korinto 13:11.

12. Inki nsatu Bakristu yonso kele na yau?

¹² Dilongi ya mfunu ya inki mutindu beto lenda longuka na dyambu yai! Bampangi yonso ya dibundu ya Bukristu fwete “kabula ndembikilu” yina Nzambi kepesaka na nzila ya Ndinga na yandi, mpeve santu na yandi, mpi organizasio na yandi ya ntoto. Ata bayina mebasisamaka na dibundu lenda vanda na mfunu ya ndembikilu kana bau mebalula ntima mpi mesongisa nzila na bau ya mbi. Yau yina, “mpika ya kwikama mpi ya mayele” metulaka ngidika mosi ya nkenda sambu na kusadisa bau. Mbala mosi na mvula, bankuluntu zole lenda kwenda kutala bantu yankaka ya mebasisamaka na dibundu. Yau lenda vanda nde bantu yai kemonisaka dyaka ve nkadilu ya nkolama to kulanda dyaka kusala masumu ya nene mpi lenda vanda na mfunu ya lusadisu sambu na kusala bitambi ya mfunu sambu na kuvutuka na dibundu.​—Matayo 24:45; Ezekiele 34:16.

Mpasi ya Polo na Azia

13, 14. (a) Inki mutindu Polo tubilaka ntangu ya mpasi yina yandi monaka na Azia? (b) Inki dikambu lenda vanda nde Polo vandaka kuyindula?

¹³ Mutindu ya mpasi yina dibundu ya Korinto kutanaka na yau tii na kiteso yai, lendaka ve kutesama ti bampasi yina lombaka nde Polo kuvibidila. Yau yina, yandi lendaka kuyibusa bau nde: “Beto zola nde beno zaba, bampangi na beto, nki mutindu ya bampasi ya beto monaka na provense ya Azia. Beto monaka mpasi ya kuluta kiteso; yo yina, beto vandaka na ngindu diaka ve nde beto lenda zinga. Na mabanza na beto, beto monaka nde beto fweti fwa kaka na mpasi. Mambu yina longaka beto nde beto lenda tula ntima ve na beto mosi, kansi beto fweti tula ntima na Nzambi yina ke tedimisaka bantu na lufwa. Yandi muntu katulaka beto na lufwa ya nene, yandi mpi ta katula beto na lufwa na bilumbu ke kwisa. E, beto ke tula ntima nde yandi ta katula beto na yo diaka.”—2 Korinto 1:​8-10.

¹⁴ Bantendudi yankaka ya Biblia kekwikilaka nde Polo vandaka kutubila mavwanga yina vandaka na Efezo, yina lendaka kukatula luzingu ya Polo ti yina ya bankundi bantambudi na yandi zole, bantu ya Masedonia, Gayusi ti Aristarke, luzingu na bau. Bakristu yai zole natamaka na ngolo yonso na nzo ya nsaka mosi ya nene ya kufuluka ti kibuka yina vandaka kutuba “na ndinga ya ngolo na kimvuka kiteso ya balere zole nde: ‘Artemisi, nzambi ya bantu ya Efezo, kele nzambi ya nene!’ ” Na nsuka, mfumu mosi ya mbanza nungaka na kuvandisa kibuka yango pima. Kigonsa yai ya luzingu ya Gayusi ti Aristarke fwete vanda nde yau pesaka Polo mayindu mingi. Na kutuba ya mbote, yandi zolaka kwenda sambu na kuyindula ti kibuka yina ya konda mayele, kansi bau pimisaka yandi sambu na kutula ve luzingu na yandi na kigonsa na mutindu yina.​—Bisalu 19:26-41.

15. Inki dyambu ya kuluta mpasi yina lendaka kutubilama na 1 Korinto 15:32?

¹⁵ Ata mpila yina, yau lenda vanda nde Polo vandaka kutubila mvwandilu mosi ya kuluta dyambu yai ya beto metubila na mpasi. Na mukanda na yandi ya ntete na Korinto, Polo yulaka nde: “Awa na Efezo, kana mono nwanaka na bambisi ya makasi kaka sambu na mambu ya kimuntu, nki mfunu na mono sambu na mambu yina?” (1 Korinto 15:32) Yau lenda tendula nde luzingu ya Polo nwanisamaka ve kaka na bantu yina kele bonso bambisi, kansi mpi na bambisi ya makasi ya kyeleka yina vandaka na stade ya Efezo. Bau vandaka kupesa babandi ndola na kutulaka bau ti bambisi ya makasi sambu na kunwana, ntangu bibuka ya mefulukaka ti nzala ya menga vandaka kulomba buna. Kana Polo vandaka kutendula nde yandi nwanaka ti bambisi ya makasi ya kyeleka, yau fwete vanda nde na ntangu ya nsuka yandi gulusamaka na kimangu na lufwa ya nku, kaka mutindu Daniele gulusamaka na munoko ya bantambu ya kyeleka.​—Daniele 6:22.

Bambandu ya Bilumbu Yai

16. (a) Sambu na inki Bambangi ya Yehowa mingi lenda zabana na bampasi yina Polo kumonaka? (b) Beto lenda tula ntima na inki sambu na bayina kufwaka sambu na lukwikilu na bau? (c) Inki malanda ya mbote monanaka na ntangu ya kuguluka ya Bakristu na lufwa na ngituka yonso?

¹⁶ Bakristu mingi ya bilumbu yai lenda fwanana ti bampasi yina Polo kumonaka. (2 Korinto 11:​23-27) Bubu mpi, Bakristu memonaka “mpasi ya kuluta kiteso,” mpi bankaka mekutanaka ti makambu yina bau ‘vandaka na ngindu diaka ve nde bo lendaka kuzinga.’ (2 Korinto 1:8) Bankaka mefwaka na maboko ya bibuka ya bagondi to bambangiki ya nku. Beto lenda tula ntima nde ngolo ya ndembikilu ya Nzambi sadisaka bau na kuvibidila mpi nde bau fwaka ti bantima mpi bangindu ya kutula mbotembote na kulungisama ya kivuvu na bau, kivuvu ya zulu to ya ntoto. (1 Korinto 10:13; Filipi 4:13; Kusonga 2:10) Bisika yankaka, Yehowa yidikaka mambu mpi bampangi na beto gulukaka na lufwa. Ntembe kele ve nde bayina megulukaka na mutindu yina, meyedisaka mingi nkadilu ya kutula ntima na “Nzambi yina ke tedimisaka bantu na lufwa.” (2 Korinto 1:9) Na nima, bau lendaka kutuba ti lukwikilu ya ngolo ntangu bau kekabula nsangu ya ndembikilu ya Nzambi ti bankaka.​—Matayo 24:14.

17-19. Inki baeksperiansi kele ya kemonisa nde bampangi na beto na Rwanda vandaka bakabudi na ndembikilu ya Nzambi?

¹⁷ Ntama mingi ve, bampangi na beto ya zola na Rwanda kutanaka na mambu ya kufwanana ti yina ya Polo ti bankundi na yandi. Bamingi vidisaka luzingu na bau, kansi ngolo ya Satana nungaka ve na kufwa lukwikilu na bau. Kansi, bampangi na beto na insi yina monaka ndembikilu ya Nzambi na mitindu mingi. Na ntangu ya kufwisana ya Batutsi ti Bahutu na Rwanda, vandaka ti Bahutu yina tulaka luzingu na bau na kigonsa sambu na kutanina Batutsi mpi Batutsi yina taninaka Bahutu. Bankaka kugondamaka na bantu yina kelutisaka makambu sambu bau taninaka bankundi na bau bankwikidi. Mu mbandu, Mbangi mosi ya Muhutu zina na yandi Gahizi gondamaka na nima ya kubumba mpangi mosi ya nkento ya Mututsi zina na yandi Chantal. Bakala ya Chantal ya Mututsi, Jean, kubumbamaka kisika yankaka na mpangi nkento mosi ya Muhutu zina na yandi Charlotte. Jean ti mpangi-bakala yankaka ya Mututsi bikalaka ya kubumbana bilumbu 40 na kati ya dibulu ya kebasisaka midinga ya kikuku na nganda, na kubasikaka kaka na mpimpa sambu na mwa ntangu fyoti. Na ntangu yina yonso, Charlotte vandaka kupesa bau madya ti lutaninu, ata yandi vandaka kuzinga mfinama ti kan mosi ya basoda ya Bahutu. Foto yai ya nge kemona na lutiti yai kele foto ya Jean ti Chantal ya mevukana dyaka, bau kevutula matondo mingi na bankundi na bau bansambidi ya Bahutu na mpila bau ‘tulaka bankingu na bau na kigonsa,’ sambu na bau, kaka bonso Prisila ti Akilasi salaka sambu na ntumwa Polo.​—Roma 16:​3, 4.

¹⁸ Mbangi yankaka ya Muhutu Rwakabubu, kumisamaka na zulunalu mosi (Intaremara) sambu yandi taninaka bankundi bankwikidi Batutsi.a Yau tubaka nde: “Muntu yankaka kele Rwakabubu, Mbangi ya Yehowa mosi, yina landaka kubumba bantu bisika mingi na kati ya bampangi (mutindu bankundi bankwikidi kebinganaka) na yandi. Yandi vandaka kulutisa kilumbu ya mvimba na kunataka madya ti masa ya kunwa sambu na bau ata yandi kebelaka maladi ya pema (Asthme). Kansi, na mutindu ya kutuba ve, Nzambi kumisaka yandi ngolo.”

¹⁹ Tadila dyaka, bankwelani zole ya Bahutu yina vandaka kusepela ti kyeleka, bazina na bau Nicodeme ti Athanasie. Na ntwala ya luyantiku ya kufwisana, bankwelani yai zole vandaka kulonguka Biblia ti Mbangi mosi ya Mututsi zina na yandi Alphonse. Na kutulaka luzingu na bau na kigonsa, bau bumbaka Alphonse na nzo na bau. Na nima, bau monaka nde nzo vandaka ve na kisika ya lutaninu sambu Bahutu ya lweka zabaka nduku na bau yina ya Mututsi. Yau yina, Nicodeme ti Athanasie bumbaka Alphonse na dibulu mosi na kati ya lupangu na bau. Yau vandaka kukatula mosi ya mbote sambu bantu ya penepene yantikaka na kwisa kusosa Alphonse beto tuba nde konso kilumbu. Ntangu yandi vandaka kulala na dibulu yina bilumbu 28, Alphonse vandaka kuyindulula masolo ya Biblia bonso yina ya Rahabi, yina bumbaka bantu ya Izraele zole na ludi ya nzo na Yeriko. (Yozue 6:17) Bubu yai, Alphonse kelandaka kisalu na yandi na Rwanda bonso nsamuni ya nsangu ya mbote, ti matondo mingi nde balongoki na yandi ya Biblia ya Bahutu tulaka luzingu na bau na kigonsa sambu na yandi. Ebuna Nicodeme ti Athanasie? Ntangu yai bau kele Bambangi ya Yehowa ya kubotama mpi ketwadisaka kulonguka ya Biblia ti bantu ya kesepelaka kiteso ya 20.

20. Na inki mutindu Yehowa melembikaka bampangi na beto na Rwanda, kansi inki nsatu ya ntangu yonso bamingi na kati na bau kele na yau?

²⁰ Na ntangu kufwisana kuyantikaka na Rwanda, bansamuni ya nsangu ya mbote kuvandaka 2500 na insi yina. Ata bankama kuvidisaka luzingu na bau to tindamaka na ngolo na kutina insi na bau, ntalu ya Bambangi memataka kuluta 3000. Yai kele nzikisa nde Nzambi lembikaka bampangi. Inki beto lenda tuba sambu na bansyona ti bafwola yina kele na kati ya Bambangi ya Yehowa? Na kutuba ya mbote, bau kelanda na kumona mpasi mpi kele na mfunu ya ndembikilu ntangu yonso. (Yakobo 1:27) Mansanga na bau takatulama kimakulu kaka kana lufutumuku mesalama na inza ya mpa ya Nzambi. Ata mpila yina, matondo sambu na bisalu ya bampangi na bau mpi sambu bau kele bansambidi ya “Nzambi ya ndembikilu yonso,” bau kekuka na kunwana ti luzingu.

21. (a) Na inki bisika yankaka bampangi na beto kele na mfunu ya ngolo ya ndembikilu ya Nzambi, ye inki kele nzila mosi ya beto yonso lenda sadila na kusadisa? (Tala lupangu “Ndembikilu na Nsungi ya Bamvula Iya ya Mvita.”) (b) Inki ntangu nsatu na beto ya ndembikilu talungisama kimakulu?

²¹ Na bisika yankaka mingi, bonso Erythrée, Singapour, Yougoslavie ya ntama, bampangi na beto kelanda kusadila Yehowa na kwikama yonso ata bampasi kele. Bika nde beto sadisa bampangi ya mutindu yina na kusalaka badodokilu ntangu yonso na mpila nde bau kuzwa ndembikilu. (2 Korinto 1:11) Mpi bika nde beto vibidila na kwikama yonso tii na ntangu yina Nzambi, na nzila ya Kristu, “ta kusula mansanga yonso na meso na [beto]” na kutuba ya mbote kibeni. Na nima beto tamona na kiteso ya kulunga ndembikilu yina Yehowa tapesa na inza na yandi ya mpa ya lunungu.​—Kusonga 7:17; 21:4; 2 Piere 3:13.

[Noti na nsi ya lutiti]

Keti Nge Kezaba?

◻ Sambu na inki Yehowa kebingama “Nzambi ya ndembikilu yonso”?

◻ Inki mutindu beto fwete tadila bampasi?

◻ Ti nani beto lenda kabula ndembikilu?

◻ Inki mutindu nsatu na beto ya ndembikilu talungana kimakulu?

[Kifwanisu ya kele na lutiti 31]

Jean ti Chantal, ata bau vandaka Bambangi Batutsi, Bambangi Bahutu bumbaka bau na bisika yankaka na ntangu ya kufwisana na Rwanda

[Kifwanisu ya kele na lutiti 31]

Bambangi ya Yehowa kelanda na kukabula nsangu ya ndembikilu ya Nzambi ti bamfinangani na bau na Rwanda