Keti Nge ‘Kesumbaka Ntangu ya Mbote’?

NTUMWA Polo kulongisilaka Bakristu ya Efezo ya mvu-nkama ya ntete nde: “Beno keba mbote na luzingu yina ya beno ke zingaka. Beno zinga ve bonso bantu ya buzoba, kansi beno zinga bonso bantu ya mayele. Awa ya beno kele na ntangu ya mbote, beno sadila yo, sambu bilumbu yai ya beto kele yo kele ya mbi.” (Efezo 5:15, 16) Sambu na nki ndongisila yai vandaka mfunu? Sambu na kuvutula mvutu na ngyufula yai, yo kelomba kuzaba mambu yina Bakristu kukutanaka na yo na mbanza yina ya ntama.

Efezo kuzabanaka mingi sambu na kimvwama na yo, na mansoni ya ngolo yina vandaka kusalama kuna, na nku, ti na bisalu ya mutindu na mutindu ya bademo. Katula mambu yina, Bakristu vandaka kunwana ti malongi ya filozofi ya metala ntangu. Bagreki yina kuvandaka ve Bakristu na Efezo vandaka kundima ve nde ntangu kekwendaka na ntwala. Filozofi ya Greki kulongaka bo nde luzingu kevutukaka mutindu ntangu kebalukaka kukonda nsuka. Muntu yina kusadilaka ve mbote ntangu na yandi na nsungi mosi ya luzingu, lenda baka yo dyaka na nsungi yankaka ya luzingu. Ziku kele mutindu yai ya kuyindula kima kunataka Bakristu ya Efezo na kukonda kutadila manaka yina Yehowa kelandaka sambu na kulungisa mambu na yandi, mpi manaka na yandi ya kusambisa bantu. Yo yina, Polo kulongisilaka bo nde yo lombaka nde bo ‘sumba ntangu ya mbote.’

Polo vandaka kutubila ve ntangu mutindu bantu yonso kebakaka yo. Ngogo ya Kigreki ya yandi sadilaka ketendula ntangu mosi ya mezabana mbote, to nsungi mosi ya bo metulaka sambu na dyambu mosi ya mezabana mbote. Polo vandaka kulongisila Bakristu ya mvu-nkama ya ntete na kusadila mbote ntangu ya mbote, to nsungi ya mbote, yina bo vandaka na yo, na ntwala nde yo mana mpi nde mawa ya Nzambi mpi okazio ya luguluku ya bo vandaka na yo kuvanda dyaka ve.​—Roma 13:11-13; 1 Tesalonika 5:6-11.

Beto kezinga na ntangu mosi ya mbote ya mutindu mosi. Na kifulu ya kubebisa nsungi yai ya mbote yina takwisa dyaka ve, na kulandaka byese ya ntangu fyoti ya nsi-ntoto yai kepesa, Bakristu tavanda mayele kana bo kesadila ntangu ya bo kele na yo na kusala “bisalu ya kemonisa kukangama na Nzambi” ebuna yo takumisa ngolo kuwakana na bo ti Ngangi, Yehowa Nzambi.​—2 Piere 3:11, NW; Nkunga 73:28; Filipi 1:10.