Keti Nge Ke Bakaka Biblia na Valere?

1-3. Ziku nki basisaka mavwanga na kati ya Sentishe ti Evodia? Inki beto lenda sala sambu mambu ya mutindu yai kubasika ve na kati na beto? (Tala kifwanisu ya luyantiku ya disolo.)

BETO ke bakaka Biblia na valere sambu beto me zaba nde yo kele mukanda ya Nzambi. Biblia kele ti bandongisila yina lenda sadisa beto na kubasisa ve mavwanga na kati na beto, mpi kusungika beto ntangu beto ke sala bifu. Inki mutindu beto ke tadilaka bandongisila ya Biblia? Yindula Evodia ti Sentishe, bampangi-bankento zole yina Nzambi tulaka mafuta na mvu-nkama ya ntete. Biblia ke tuba kaka nde bo swanaka, kansi yo ke zabisa ve kikuma. Beto baka mbandu ya mambu yina lendaka kubasisa mavwanga na kati na bo.

² Mbala ya nkaka, Evodia bingisaka bampangi na kukwisa kudia na nzo na yandi. Kansi yandi bingisaka ve Sentishe. Na nima, Sentishe waka bampangi ke tubila na kiese yonso madia yina bo diaka mpi yandi waka makasi. Ziku yandi tubaka nde: ‘Mu ndimaka ve nde Evodia lenda buya kubingisa mono! Mu ke yindulaka nde beto kele banduku ya ngolo.’ Sentishe monaka nde Evodia ke zolaka yandi mpenza ve mpi ke sepelaka ve kuvanda nduku na yandi. Na nima, Sentishe mpi bingaka kaka bampangi yina Evodia bingisaka na kukwisa kudia na nzo na yandi kansi yandi bingaka ve Evodia. Ziku diambu yai pesaka bampangi ya nkaka na dibundu mpasi. Biblia ke monisa nde Polo sungikaka bampangi yai zole mpi siamisaka bo na kutula ngemba. Ziku bo ndimaka ndongisila ya Polo mpi bo landaka kusadila Yehowa na kiese.—Bafilipi 4:2, 3.

³ Bubu yai mpi, kima mosi lenda sala nde beto wakana ve ti mpangi mosi. Kansi kana beto sadila bandongisila ya Biblia, beto lenda yidika yo. Nkutu beto lenda sala bikesa sambu diambu ya mutindu yina kubasika ve. Diaka, kana beto ke lemfuka na mambu yina Biblia ke tuba, beto ta monisa nde beto ke bakaka mukanda ya Yehowa na valere.—Nkunga 27:11.

4, 5. Inki bandongisila Ndinga ya Nzambi ke pesa beto na yina me tala kuyala mawi na beto?

⁴ Bantangu ya nkaka, yo ke vandaka mpasi na kuyala mawi. Kana muntu me finga beto to me sadila beto mambu ya mbi, ziku sambu na insi na beto, mpusu na beto to mutindu beto ke monana, yo lenda pesa beto mpasi to makasi. Mingi-mingi kana muntu yango kele mpangi na beto Mukristu. Inki bandongisila ya Biblia lenda sadisa beto na diambu yai?

⁵ Yehowa me zaba mambu yina lenda basika kana beto ke yala ve mawi na beto. Kana diambu mosi me pesa beto mpasi to makasi, beto lenda tuba to kusala mambu yina lenda pesa beto mpasi na nima. Na Biblia, Yehowa ke longa beto na kuyala mawi na beto mpi yandi ke zabisa beto nde: “Kuwa ve makasi nswalu.” Kuzitisa ndongisila yai ke sadisaka beto na kuyidika mambu mingi yina lenda basisa mavwanga! (Tanga Longi 7:9; Bingana 16:32.) Biblia ke longa beto mpi na kulolula bantu ya nkaka. Nkutu Yezu tubaka nde kana beto ke lolula ve bantu ya nkaka, Yehowa mpi ta lolula beto ve. (Matayo 6:14, 15) Keti yo ke lomba nde nge sala diaka bikesa sambu na kuvanda ntima nda mpi kulolula bankaka?

 6. Inki lenda salama kana beto ke yala ve mawi na beto?

⁶ Kana beto ke yala ve mawi na beto, beto lenda bumbila mpangi mosi makasi na ntima to nkutu kuyantika kumenga yandi. Beto lenda pusa mpi bampangi ya nkaka na kumenga yandi. Ata beto ke sala yonso sambu bantu kuzaba ve nde beto me wilaka mpangi mosi makasi to ke mengaka yandi, nsuka-nsuka bampangi ya nkaka ta bakisa diambu yango. Na nima, bo lenda yantika kutina beto. (Bingana 26:24-26) Kana bankuluntu me zaba diambu yango, bo ta sadila Biblia sambu na kusadisa beto na kuyambula makasi mpi kumenga ve bankaka. Bo ta siamisa beto na kuvanda ti kikalulu ya kulolula bankaka. (Levi 19:17, 18; Baroma 3:11-18) Kana bankuluntu me pesa nge ndongisila ya Biblia, mukanda ya Yehowa, keti nge ta lemfuka?

7, 8. (a) Inki mutindu Yehowa ke twadisaka bansadi na yandi? (b) Inki bantuma Biblia ke pesa beto, mpi sambu na nki beto fwete lemfuka na bantuma yai?

⁷ Yehowa ke twadisa kitini ya organizasio na yandi yina kele na ntoto mpi ke longa beto. Inki mutindu? Yandi me tulaka Kristu “mfumu ya dibundu.” Kristu me ponaka “mpika ya kwikama mpi ya mayele” sambu na kulonga mpi kutwadisa bansadi ya Nzambi. (Baefezo 5:23; Matayo 24:45-47) Bonso nto-kimvuka na mvu-nkama ya ntete, mpika ya kwikama ke bakaka Biblia na valere sambu yo kele Ndinga ya Nzambi. (Tanga 1 Batesalonika 2:13.) Inki bantuma Biblia ke pesa beto?

⁸ Biblia ke lomba beto na kukwenda ntangu yonso na balukutakanu. (Baebreo 10:24, 25) Biblia ke lomba beto yonso mpi na kukwikila kaka na malongi na yo. (1 Bakorinto 1:10) Yo ke zabisa beto diaka na kulanda “kusosa ntete Kimfumu.” (Matayo 6:33) Biblia ke siamisa beto na kusamuna nzo na nzo, na bisika ya bantu mingi, mpi na bisika yonso yina beto lenda mona bantu. (Matayo 28:19, 20; Bisalu 5:42; 17:17; 20:20) Yo ke songa bankuluntu na kusadisa dibundu na kuvanda bunkete. (1 Bakorinto 5:1-5, 13; 1 Timoteo 5:19-21) Biblia ke zabisa beto na kuvanda bunkete na nitu mpi kuyambula mabanza ti bikalulu yina Yehowa ke mengaka.—2 Bakorinto 7:1.

 9. Nani Yezu me ponaka sambu na kusadisa beto na kubakisa Ndinga ya Nzambi?

⁹ Bantu ya nkaka ke zolaka ve nde muntu ya nkaka kutendudila bo Biblia. Kansi banda 1919, Yezu ke sadilaka “mpika ya kwikama mpi ya mayele” sambu na kusadisa bansadi ya Nzambi na kubakisa mambu yina Biblia ke longaka mpi kusadila yo. Ntangu beto ke lemfukaka na malongi ya Biblia, beto ke sadisaka dibundu na kuvanda bunkete, na ngemba mpi na bumosi. Kudiyula nde: ‘Keti mono ke vandaka ya kwikama na Yezu mpi ke lemfukaka na lutwadisu ya mpika ya kwikama?’

10. Inki mutindu mukanda ya Ezekiele ke tendula kitini ya organizasio ya Yehowa ya kele na zulu?

¹⁰ Biblia ke zabisa beto nde bansadi ya Yehowa ya kele na zulu kele mpi ya kuyidika mbote. Mu mbandu, Ezekiele monaka na mbona-meso Yehowa ke pusa pusu-pusu mosi yina ke kwenda nswalu na konso ndambu yina yandi me zola. (Ezekiele 1:4-28) Pusu-pusu yai ke monisa kitini ya organizasio ya Nzambi ya kele na zulu; yo ke lemfukaka nswalu na lutwadisu na yandi. Yo ke sadisaka mpi kitini ya organizasio na yandi ya kele na ntoto. Yindula bansoba mingi yina me salama na organizasio ya Nzambi na bamvula kumi yai ya me katuka kuluta. Kuvila ve nde Yehowa muntu ke twadisaka dibundu na kusala bansoba yina. Kubika fioti, Kristu mpi bawanzio ta fwa nsi-ntoto yai ya mbi. Ata muntu mosi ve ta vweza diaka Yehowa mpi zina na yandi to ta tuba nde yandi ke yalaka mbote ve!

11, 12. Inki mambu organizasio ya Yehowa ke sala na bilumbu yai ya nsuka?

¹¹ Beto tadila mambu yina organizasio ya Yehowa ke sala na bilumbu yai ya nsuka. Kutunga. Bampangi mingi ya babakala ti ya bankento me sala ngolo sambu na kutunga babiro ya mpa ya ke twadisaka kisalu ya Bambangi ya Yehowa na ntoto ya mvimba. Yo kele na Warwick, na provense ya New York, na Etats-Unis. Bampangi ya nkaka me kudipesaka na luzolo yonso sambu na kutunga Banzo ya Kimfumu mpi Babetele. Bampangi yai yonso ke salaka na nsi ya lutwadisu ya biro yina ke twadisaka kisalu ya kutunga na nsi-ntoto ya mvimba. Beto ke tonda bampangi yai ya ke salaka ngolo sambu na kutunga bisika yai ya lusambu. Bansadi ya Yehowa na ntoto ya mvimba ke pesaka makabu, ata ya fioti, sambu organizasio kutunga bisika yai. Yehowa ke sakumunaka bansadi na yandi sambu na kudikulumusa mpi kwikama na bo.—Luka 21:1-4.

¹² Malongi. Yehowa ke zolaka kulonga bansadi na yandi. (Yezaya 2:2, 3) Yindula banzo-nkanda mingi yina beto kele ti yo. Mu mbandu, Nzo-Nkanda ya Bapasudi-Nzila, Nzo-Nkanda ya Bansamuni ya Kimfumu, Nzo-Nkanda ya Gileade, Nzo-Nkanda ya Bampangi ya Mpa ya Dibuta ya Betele, Nzo-Nkanda ya Bankengi ya Nziunga ti Bankento na Bo, Nzo-Nkanda ya Bankuluntu, Nzo-Nkanda ya Kisalu ya Kimfumu, mpi Nzo-Nkanda ya Bampangi ya Komite ya Filiale ti Bankento na Bo. Diaka, site Internet na beto jw.org. kele ti Biblia mpi mikanda ya nkaka na bandinga mingi. Yo kele ti mambu mingi ya mfunu sambu na bana ti mabuta, mpi mambu mingi ya mpa. Keti nge ke sadilaka site yai na kisalu ya kusamuna mpi na lusambu na beno ya dibuta?

13. Bansadi ya Yehowa fwete sala nki?

¹³ Kuvanda na organizasio ya Yehowa mpi kuzaba mambu yina yandi ke lomba beto kele lukumu ya nene! Sambu beto me zaba mambu yina ke sepedisaka Nzambi, beto fwete lemfukila yandi mpi kusala mambu ya mbote. Ata bantu mingi ke zolaka kusala mambu ya mbi, beto fwete “menga mambu ya mbi” mutindu Yehowa ke mengaka yo. (Nkunga 97:10) Beto fwete vanda ve bonso bantu yina ke yindulaka nde ‘mambu ya mbote kele mbi mpi mambu ya mbi kele mbote.’ (Yezaya 5:20) Beto ke zolaka kusepedisa Yehowa, yo yina beto me bakaka lukanu ya kubikala bunkete na mambu yonso. (1 Bakorinto 6:9-11) Mambu yina Yehowa ke zabisaka beto na Biblia kele sambu na mambote na beto. Beto ke zolaka yandi mpi ke sepelaka kubikala ya kwikama na yandi. Yo yina, beto ke lemfukaka na lutwadisu na yandi na konso kisika yina beto kele, mu mbandu na mabuta na beto, na dibundu, na kisalu, to na nzo-nkanda. (Bingana 15:3) Nge lenda yindula mpi mambu ya nkaka ya nge fwete sala sambu na kubikala ya kwikama.

14. Inki mutindu batata lenda vanda ya kwikama na Yehowa?

¹⁴ Kulonga bana. Na Biblia, Yehowa me pesaka bibuti bantuma na mutindu ya kulonga bana na bo. Bibuti fwete keba na kulanda ve mabanza ya bantu ya insi ntoto yai. (Baefezo 2:2) Mu mbandu, na bisika ya nkaka, tata ya dibuta lenda yindula mutindu yai: ‘Awa, bamama bantu ke longaka bana.’ Kansi Biblia ke tuba pwelele nde batata fwete longa bana na bo mambu ya Yehowa. (Baefezo 6:4) Batata ti bamama yina ke zolaka Yehowa ke sepelaka nde bana na bo kuvanda banduku ya Yehowa, mutindu Samuele vandaka nduku ya Yehowa banda na kileki.—1 Samuele 3:19.

15. Inki mutindu beto lenda monisa kwikama na Yehowa ntangu beto ke zola kubaka balukanu ya nene?

¹⁵ Kubaka balukanu. Na ntwala ya kubaka balukanu ya nene, beto fwete sosa ntete kuzaba mabanza ya Yehowa sambu beto vanda ya kwikama na yandi. Biblia mpi dibundu na yandi lenda sadisa beto na kuzaba mabanza na yandi. Mu mbandu, bubu yai bibuti ya nkaka ya me kwendaka kuzinga na bansi ya nzenza ke vutulaka bana na bansi yina bo katukaka sambu na kuzinga ti bampangi na bo. Mpidina, bo zole lenda sala bisalu mpi kuzwa mbongo mingi. Ya kieleka, lukanu yai ke tadila muntu yandi mosi; kansi bankwelani fwete kudiyula nde: ‘Inki mutindu Yehowa ta tadila lukanu na beto?’ (Tanga Baroma 14:12.) Yo kele mbote na kutadila ntete mambu yina Biblia ke tuba na ntwala ya kubaka balukanu ya nene na yina me tala dibuta mpi kisalu. Beto kele na mfunu ya lusadisu ya tata na beto ya zulu sambu beto mosi lenda twadisa ve bitambi na beto.—Yeremia 10:23.

16. Inki mambu ya mpasi mama mosi kutanaka ti yo ntangu yandi butaka? Inki sadisaka yandi na kubaka lukanu ya mbote?

¹⁶ Tata mosi ti nkento na yandi kwendaka na nsi ya nzenza. Ntangu bo kumaka, bo butaka mwana-bakala mpi bo bakaka lukanu ya kuvutula yandi na insi na bo sambu na kuzinga ti bibuti na bo. Na ntangu yina, mama ya mwana yai yantikaka kulonguka Biblia ti mpangi-nkento mosi. Yandi longukaka nde yandi mosi fwete longa mwana na yandi mambu ya Yehowa. (Nkunga 127:3; Bingana 22:6) Yandi sambaka Yehowa, mutindu Biblia ke lombaka beto, sambu Yehowa kusadisa yandi na kusala mambu ya mbote. (Nkunga 62:7, 8) Diaka yandi zabisaka diambu yango na mpangi yina vandaka kulonga yandi Biblia mpi na bampangi ya nkaka ya dibundu. Ata bantu ya nkaka ya dibuta na yandi ti banduku songaka yandi na kutinda mwana na bibuti, yandi bakisaka nde yo vandaka ve lukanu ya mbote. Bakala na yandi monaka mutindu bampangi ya dibundu sadisaka nkento na yandi ti mwana. Yo yitukisaka yandi mingi, yo yina yandi yantikaka kulonguka Biblia mpi kukwenda na balukutakanu ti dibuta na yandi. Mama yai waka kiese mingi ntangu yandi bakisaka nde Yehowa pesaka mvutu na kisambu na yandi!

17. Inki bantuma dibundu ke pesaka beto ntangu beto ke longuka Biblia ti muntu?

¹⁷ Kulanda lutwadisu. Kana beto kele ya kwikama na Nzambi, beto ta landa lutwadisu yina dibundu na yandi ke pesa beto. Mu mbandu, beto tadila mambu yina beto fwete sala kana beto me yantika kulonguka ti muntu mukanda Inki Biblia Kelongaka Mpenza? Beto me longukaka nde konso kilumbu na nima ya kulonguka, beto fwete bakaka minuta fioti sambu na kusadisa longoki na kuzaba mambu mingi ya organizasio ya Yehowa. Beto lenda sadila video Inki Ke Salamaka na Nzo ya Kimfumu? mpi kamukanda Banani Kesala Luzolo ya Yehowa Bubu Yai? Kana beto me manisa mukanda Biblia Kelongaka, beto fwete longuka ti yandi mukanda “Beno Bikala na Zola ya Nzambi” sambu na kusadisa yandi na kukuma diaka ti “lukwikilu ya ngolo” ata yandi me katuka kubaka mbotika. (Bakolosai 2:7) Keti nge ke lemfukaka na lutwadisu yai?

18, 19. Inki bikuma fwete pusa beto na kupesa Yehowa mersi?

¹⁸ Beto kele ti bikuma mingi ya kupesa Yehowa mersi! Ya ntete, “na nzila na yandi beto kele na luzingu.” (Bisalu 17:27, 28) Yandi me pesaka beto mpi Biblia, mukanda na yandi. Bonso Bakristu ya Tesalonika, beto ke bakaka dikabu yai na valere sambu yo me katukaka na Nzambi.—1 Batesalonika 2:13.

¹⁹ Biblia me sadisaka beto na kukuma banduku ya Yehowa. (Yakobo 4:8) Beto kele na kiese mingi sambu Nzambi me ndimaka beto na dibundu na yandi! Beto kele na mawi bonso muyimbi-bankunga yina sonikaka nde: “Beno pesa Yehowa matondo, sambu yandi kele mbote; zola na yandi ya kwikama ke zingaka kimakulu.” (Nkunga 136:1) Na konso verse ya Nkunga yai, muyimbi-bankunga me vutukila bangogo “zola na yandi ya kwikama ke zingaka kimakulu.” Ya kieleka, kana beto kele ya kwikama na Yehowa mpi ke lemfuka na lutwadisu ya dibundu na yandi, yandi ta pesa beto luzingu ya mvula na mvula mpi yandi ta vanda ya kwikama na beto kimakulu!