Ata Mpasi Kele, Kangama na Lukwikilu na Nge!

“Bampangi na mono, kana bampasi ya mutindu na mutindu ke bwila beno, beno fweti baka yo bonso mambu mosi ya kiese.”​—YAKOBO 1:2.

 1. Inki mambu kekangisaka ve bantu ya Yehowa na kusadila yandi ti lukwikilu mpi “zola ya ntima”?

BANTU ya Yehowa kesalaka bonso Bambangi na yandi na kutulaka lukwikilu na yandi mpi na kuvandaka ti “kyese ya ntima.” (Kulonga 28:​47, NW; Yezaya 43:​10, NW) Bau kesalaka buna ata mimekamu mingi kenatilaka bau mpasi na luzingu. Ata bau kele na mpasi, bau kebakaka kikesa na bangogo yai: “Bampangi na mono, kana bampasi ya mutindu na mutindu ke bwila beno, beno fweti baka yo bonso mambu mosi ya kiese; sambu beno zaba nde, kana lukwikilu na beno kele kaka ata na ntangu ya mpasi, mpidina ke songa nde beno zaba kukanga ntima.”​—Yakobo 1:2, 3.

 2. Inki beto kezaba na yina metala nsoniki ya mukanda ya Yakobo?

² Bangogo yai kele longoki Yakobo, mpangi ya Yezu Kristu ya mama mosi, muntu kusonikaka yau mfinama na mvu 62 T.B. (Marko 6:⁠3) Yakobo vandaka nkuluntu na dibundu ya Yeruzalemi. Na kutuba ya mbote, yandi, Sefasi (Piere), ti Yoane, bau “vandaka kumonika bonso nde bo kele makunzi”​—⁠ya ngolo, ya kupika ngolo, yina vandaka simba dibundu. (Galatia 2:⁠9) Ntangu bau nataka dikambu ya luyotisu na ntwala ya “Bantumwa ti bambuta” mfinama na mvu 49 T.B., Yakobo pesaka dibanza mosi ya Masonuku yina kundimamaka na nto-kimvuka ya mvu-nkama ya ntete.​—⁠Bisalu 15:​6-29.

 3. Bakristu ya mvu-nkama ya ntete kutanaka ti inki mimekamu, ye inki mutindu beto lenda baka mambote ya kuluta mingi na mukanda ya Yakobo?

³ Bonso ngungudi ya kimpeve ya kekudibanzaka, Yakobo ‘zabaka mutindu mameme vandaka monika.’ (Bingana 27:​23, NW) Yandi zabaka nde na ntangu yina, Bakristu vandaka na kati ya mimekamu ya ngolo. Yau lombaka kusongisa mabanza ya bankaka, sambu bau vandaka kumonisa lutondo kaka na bamvwama. Bankaka vandaka samba kaka na mpila ya kusala. Bankaka dyaka vandaka pesa bampangi na bau mpasi sambu bau vandaka yala ludimi na bau ve. Mpeve mosi ya inza vandaka na bupusi mosi ya mbi, ye bamingi vandaka bwisa ntima ve, bau vandaka samba mpi ve. Na kutuba ya mbote, Bakristu yankaka belaka maladi ya kimpeve. Mukanda ya Yakobo vandaka tubila bamambu yai na mutindu mosi ya mbote mpi ndongisila na yandi kele mfunu bubu yai, mutindu yau vandaka na mvu-nkama ya ntete T.B. Beto tabaka mambote mingi kana beto longuka mukanda yai bonso yandi sonikaka yau sambu na beto.a

Ntangu Beto Kele na Kati ya Bampasi

 4. Inki mutindu beto fwete tadila bampasi?

⁴ Yakobo kemonisa beto mutindu ya kutadila bampasi. (Yakobo 1:​1-4) Yandi ketuba ve nde yandi basikaka divumu mosi ti Mwana ya Nzambi, kansi yandi kekudibinga na kudikulumusa yonso nde, muntu “yina ke sadilaka Nzambi ti Mfumu Yesu Kristu.” Yakobo kesonikila “makanda kumi na zole” ya Izraele ya kimpeve, yina “me panzanaka,” mingimingi sambu na munyokudi. (Bisalu 8:1; 11:19; Galatia 6:16; 1 Piere 1:⁠1) Bonso Bakristu, bantu kenyokulaka beto mpi, ye beto kemonaka “bampasi ya mutindu na mutindu.” Kansi, kana beto yibuka nde kukanga ntima na bampasi kekumisaka lukwikilu na beto ngolo, beto tabaka yau “bonso mambu mosi ya kiese” kana yau mebwila beto. Kana beto lunda kwikama na beto na Nzambi na ntangu ya bampasi, yau tanatila beto kiese ya kyeleka.

 5. Inki beto lenda tanga na kati ya bampasi na beto, ye inki kesalamaka kana beto menunga na kukanga ntima sambu na yau?

⁵ Bampasi yankaka ya kebwilaka beto kebwilaka mpi bantu yonso. Mu mbandu, maladi lenda kanga beto. Ntangu yai, Nzambi kebelulaka ve bantu na bimpa, kansi yandi kepesaka mvutu na bisambu ya beto kelombaka mayele ti ngolo sambu na kunwana ti maladi. (Nkunga 41:​1-3) Mpasi yankaka beto kemonaka sambu na lunungu, sambu beto kele Bambangi ya Yehowa. (2 Timoteo 3:12; 1 Piere 3:14) Kana beto menunga na kukanga ntima na bampasi ya mutindu yina, yau kepesaka nzikisa nde beto kele na lukwikilu, yau kekumaka ya ‘kumekama.’ Mpi kana lukwikilu na beto menunga, yau kebutaka “kukanga ntima.” Kana lukwikilu na beto mekuma ngolo sambu na bampasi, yau tasadisa beto na kukanga ntima na mimekamu ya kekwisa.

 6. Inki mutindu beto lenda “kanga ntima tii kuna,” ye inki bitambi ya kyeleka beto lenda sala kana beto kele na kumekama?

⁶ Yakobo ketuba nde, “beno kanga ntima tii kuna.” Kana beto bikisa mpasi yau landa tii kuna, nkatu kusosa mpila ya kusukisa yau nswalu na banzila ya kewakana ve ti Masonuku, kukanga ntima takumisa beto Bakristu ya kulunga, ya kufuluka ti lukwikilu. Ya kyeleka, kana mpasi mebasisa balebakanu na beto, beto fwete sosa lusadisu ya Yehowa sambu na kununga yau. Inki beto lenda sala kana mpasi yango kele mpukumuna mosi ya kepusa beto na kusala mansoni? Beto fwete samba sambu na dikambu yina mpi kusala na kuwakana ti bisambu na beto. Yau lenda lomba nde beto sosa kisika yankaka ya kisalu to beto sala kima yankaka na mpila nde beto landa na kukangama na Nzambi.​—⁠Kuyantika 39:​7-9; 1 Korinto 10:⁠13.

Kulomba Mayele

 7. Inki mutindu beto lenda zwa lusadisu sambu na kunwana ti bampasi?

⁷ Yakobo kesonga beto kima ya beto fwete sala kana beto kezaba ve mutindu ya kunwana ti dikambu mosi ya mpasi. (Yakobo 1:​5-8) Yehowa tanganina beto ve sambu beto mekonda mayele mpi beto melomba yandi yau ti lukwikilu yonso. Yandi tasadisa beto na kutadila bampasi na beto na mutindu ya mbote mpi na kukangila yau ntima. Bampangi na beto, to kulonguka ya Biblia, lenda yibusa beto mikapu ya kutudila dikebi. Mutindu Nzambi ketwadisa makambu lenda monisa beto mpi kima ya beto fwete sala. Mpeve ya Nzambi lenda twadisa beto. (Luka 11:13) Sambu na kuzwa mambote ya mutindu yina, beto fwete landa nzila mosi kaka ya kukangama na Nzambi ti bantu na yandi.​—⁠Bingana 18:⁠1.

 8. Sambu na inki muntu ya ntima zole kezwaka kima ve na maboko ya Yehowa?

⁸ Yehowa kepesaka beto mayele ya kunwana ti bampasi kana beto “tula ntima kaka nde [beto] ta baka mambu yina ya [beto] me lomba.” Muntu ya “ntima zole . . . kele bonso kitembo ya masa yina ya mupepe ke tombulaka na zulu ti ke nataka na ndambu yonso” nkatu kuzaba. Kana beto kele bantu ya kukonda ngolo na kimpeve, beto ‘lenda tula ntima ve nde beto ta baka konso kima na Mfumu Nzambi.’ Beto vanda ve bantu ya “ntima zole,” ye ya ‘ke balulaka bikalulu’ na kisambu to na mutindu yankaka. Kansi, bika beto vanda na lukwikilu na Yehowa, Nto ya mayele.​—⁠Bingana 3:​5, 6.

Bamvwama ti Bansukami Lenda Wa Kyese

 9. Sambu na inki beto bansambidi ya Yehowa kele na kikuma ya mbote ya kuwa kiese?

⁹ Ata bunsukami kele mosi na kati ya bampasi na beto, beto vila ve nde Bakristu yonso, bamvwama ti bansukami, lenda mona kyese. (Yakobo 1:​9-11) Na ntwala ya kukuma balandi ya Yezu, mingi na kati ya Bakristu ya kupakulama vandaka na bima fyoti ya kinsuni mpi inza vandaka vweza bau. (1 Korinto 1:26) Kansi, bau lendaka kuwa kyese sambu bau ‘me tulamaka na ntwala,’ na kisika ya bamvingidi-difwa ya Kimfumu. (Roma 8:​16, 17) Kansi, bamvwama yina vandaka ntete bantu ya lukumu ‘me tulamaka na nima,’ bonso balandi ya Kristu ye bantu ya inza kevwezaka bau. (Yoane 7:​47-52; 12:​42, 43) Kansi, bonso bansadi ya Yehowa, beto yonso lenda sepela sambu bimvwama ya inza ti bisika ya lukumu kele na mfunu ve na ntwala ya bimvwama ya kimpeve yina beto kele na yau. Beto kesepelaka mingi kibeni sambu na kati na beto kisika kele ve sambu na lulendo ti kimuntu ya nene na luzingu!​—⁠Bingana 10:22; Bisalu 10:​34, 35.

10. Inki mutindu Mukristu fwete tadila kimvwama ya kinsuni?

¹⁰ Yakobo kesadisa beto na kuzaba nde luzingu na beto kekatukaka ve na kimvwama mpi na mambu ya beto lenda sala na inza. Mutindu kitoko ya kintuntu ketaninaka yau ve na kufwa na ‘tiya ya ngolo’ ya ntangu, mutindu mosi mpi kimvwama ya muntu lenda kumisa ve luzingu na yandi nda. (Nkunga 49:​6-9; Matayo 6:27) Yandi lenda fwa “kaka na kati ya kisalu” na yandi, yina lenda vanda mumbongo. Yau yina, kima ya mfunu kele kuvanda ‘mvwama na meso ya Nzambi’ mpi kusala yonso yina beto lenda, sambu na kumatisa mambote ya Kimfumu.​—⁠Luka 12:​13-21; Matayo 6:33; 1 Timoteo 6:​17-19.

Kyese na Bayina Kekangaka Ntima na Bampasi

11. Inki bivuvu ya luzingu kele sambu na bayina kesimbaka lukwikilu na bau ngolo na kati ya bampasi?

¹¹ Beto yonso, bamvwama to bansukami, tavanda na kyese kaka kana beto kanga ntima na bampasi na beto. (Yakobo 1:​12-15) Kana beto kanga ntima mpi kusimba kaka lukwikilu na bampasi, beto lenda bingama bantu ya kyese, sambu kyese kele na kusala mambu ya lunungu na meso ya Nzambi. Bakristu yina mebutamaka na mpeve kebakaka “mpu ya lukumu ya luzingu,” luzingu ya lenda fwa ve na mazulu, kana bau kangama ngolo na lukwikilu na bau tii na lufwa. (Kusonga 2:​10, NW; 1 Korinto 15:50) Kana beto kele ti kivuvu ya ntoto ye beto kelunda lukwikilu na beto na Nzambi, beto lenda kinga na kubaka luzingu ya mvula na mvula na paladisu ya ntoto. (Luka 23:43; Roma 6:23) Yehowa kele mbote mpenza na bayina yonso ketulaka lukwikilu na yandi!

12. Ntangu beto kekutana na bampasi, sambu na inki beto lenda tuba ve nde: “Nzambi muntu ke zola kumeka mono”?

¹² Keti yau lenda salama nde Yehowa yandi mosi kupesa beto mpasi sambu na kumeka beto? Ve, beto lenda tuba ve nde: “Nzambi muntu me benda mono sambu na kumeka ya yandi me zola kumeka mono.” Yehowa kemekaka beto ve na kunata beto na kubwa na masumu, kansi yandi kesadisaka beto kibeni mpi kepesaka beto ngolo yina kelombamaka sambu na kukanga ntima na bampasi kana beto bikala ya kukangama ngolo na lukwikilu. (Filipi 4:13) Nzambi kele ya santu, na yau, yandi lenda kotisa beto ve na mambu yina lenda lembisa ngolo na beto na ntwala ya masumu. Kana beto mosi mekudikotisa na mambu ya kukonda busantu, mpi beto mesala masumu, beto lenda pesa mukumba yina na Nzambi ve, “sambu mambu ya mbi lenda benda ti kubwisa Nzambi ve, ebuna yandi mosi lenda benda ata muntu mosi ve na kusala mbi.” Ata Yehowa lenda bikisa nzila nde mpasi kulonga beto sambu na mambote na beto, yandi kemekaka beto ve ti ngindu ya mbi. (Baebreo 12:​7-11) Satana lenda pukumuna beto na kusala mbi, kansi Nzambi lenda gulusa beto na maboko ya muntu ya mbi yai.​—⁠Matayo 6:⁠13.

13. Inki lenda salama kana beto kubuya ve mpusa mosi ya mbi?

¹³ Beto fwete samba mingi sambu dyambu mosi lenda natila beto ngindu ya mbi yina lenda pusa beto na kusala masumu. Yakobo ketuba nde: “[Kana muntu me sala mbi], tuba nde nzala na yandi mosi ya mbi me benda yandi ti me kanga yandi.” Beto lenda tula ve masumu na beto na ntu ya Nzambi, kana beto mosi bikisaka ntima na beto kufimpa bampusa ya mbi. Kana beto kula ve mpusa ya mbi, yau kebakaka divumu ‘bonso nkento,’ ntima kesansaka yau, mpi yau ‘ke butaka masumu.’ Kana disumu mesalama, yau ‘ke nataka lufwa.’ Na ntembe ve, beto fwete yala ntima na beto mpi kutelamanina bupusi ya masumu. (Bingana 4:23) Nzambi kebisaka Kaini nde disumu kezola kununga nge, kansi yandi telamaninaka yau ve. (Kuyantika 4:​4-8) Ebuna, inki beto fwete sala kana beto mebanda kukota na nzila mosi ya kewakana ve ti Masonuku? Ya kyeleka mpenza, beto fwete pesa ntonda kana bankuluntu yina kele Bakristu kesosa kusadisa beto na mpila nde beto sala ve masumu na meso ya Nzambi.​—⁠Galatia 6:⁠1.

Nzambi Kele Nto ya Mambu ya Mbote

14. Na inki mutindu beto lenda tuba nde makabu ya Nzambi kele “ya mbote mpenza”?

¹⁴ Beto fwete yibuka nde Yehowa kele Nto ya bampasi ve, kansi Nto ya mambu ya mbote. (Yakobo 1:​16-18) Yakobo kebinga bankwikidi yankaka nde “bampangi na mono ya mono ke zolaka” mpi yandi kemonisa nde Nzambi kele Mupesi ya “makabu yonso ya mbote mpenza.” Makabu ya Yehowa, ya kimpeve ti ya kinsuni, kele “ya mbote mpenza,” to ya kulunga, kima mosi ve kekondaka na yau. Yau “ke katukaka na zulu,” kisika Nzambi kevandaka. (1 Bantotila 8:39) Yehowa kele “Nzambi yina salaka bamwinda ya zulu”​—⁠ntangu, ngonda, ti bambwentete. Yandi kepesaka beto mpi nsemo ya kimpeve ti kyeleka. (Nkunga 43:3; Yeremia 31:35; 2 Korinto 4:⁠6) Nzambi kele bonso ntangu ve, sambu madidi ya ntangu kesobaka ntangu yau ketambulaka mpi yau kekumaka na kisika ya kuluta zulu kaka na midi; kansi, Nzambi kevandaka kaka na kisika na yandi ya kuluta zulu, ntangu yandi kepesaka bima ya mbote. Yandi tasadisa beto mpenza na kunwana ti bampasi kana beto kesadila mbotembote bangidika ya kimpeve ya yandi kepesaka na nzila ya Ndinga na yandi ti ya “mpika ya kwikama mpi ya mayele.”​—⁠Matayo 24:⁠45.

15. Inki kele dikabu mosi ya kuluta mbote ya Yehowa?

¹⁵ Inki dikabu mosi ya kuluta mbote Nzambi mepesaka? Kubuta yina yandi butaka bana ya kimpeve na nsadisa ya mpeve santu, na kusalaka na kuwakana ti nsangu ya mbote, to “nsangu ya kieleka.” Bayina mebutukaka na kimpeve kele “bantu ya ntete [“bambuma yankaka ya ntete,” NW],” yina ponamaka na kati ya bantu yonso sambu na kuvanda ‘kimfumu mosi mpi banganga-Nzambi’ na zulu. (Kusonga 5:10; Efezo 1:​13, 14) Mbala yankaka Yakobo vandaka yindula makabu ya bambuma ya ntete ya orze yina bantu pesaka na Nisani 16, kilumbu ya Yezu futumukaka; ti makabu ya mampa zole ya ble na kilumbu ya Pantekoti, kilumbu mpeve santu tyamukaka na zulu ya balongoki. Na mutindu yina, Yezu kele bambuma ya ntete ye bayina vukanaka na difwa mosi ti yandi kele “bambuma yankaka ya ntete.” Ebuna, kana beto kele ti kivuvu ya ntoto? Kana beto yibuka kivuvu yai ntangu yonso, yau tasadisa beto na kukangama ti Mupesi ya “makabu yonso ya mbote,” yina mesalaka nde luzingu ya mvula na mvula kuvanda na nsi ya luyalu ya Kimfumu.

Vanda ‘Muntu Yina Kesadilaka Ndinga’

16. Sambu na inki beto fwete vanda ya ‘kuyilama na kuwa, kuyindula ntete na twala ya kutuba ti kuwa makasi nswalu ve’?

¹⁶ Ata yau vanda nde lukwikilu na beto kele na kumekama na bampasi ntangu yai to ve, beto fwete vanda “bantu yina kesadilaka ndinga.” (Yakobo 1:​19-25) Beto fwete vanda bantu “ya kuyilama na kuwa” ndinga ya Nzambi, mpi bantu ya bulemfu na kusadila yau. (Yoane 8:47) Dyaka, beto fwete ‘yindula ntete na ntwala ya kutuba,’ na kufimpaka mbotembote mambu ya beto ketuba. (Bingana 15:28; 16:23) Ziku Yakobo kezola songa beto na kutuba ve nswalunswalu nde bampasi na beto kekatukaka na Nzambi. Yandi kelongisila beto mpi na “kuwa makasi nswalu ve, sambu muntu yina ke waka makasi yandi ke salaka ve mambu yina me lunga na meso ya Nzambi.” Kana kima ya muntu yankaka metuba mepesa beto makasi, beto fwete bwisa ntima sambu na kupesa ve mvutu ya mbi. (Efezo 4:​26, 27) Mpeve ya makasi yina lenda buta mindondo mpi kunatila bankaka mpasi. Yau lenda buta ve mambu yina ya lukwikilu ya Nzambi na beto ya lunungu kelomba na beto. Dyaka, kana beto “kele na luswasukusu mingi” (NW), beto tawa “makasi nswalu ve,” mpi bampangi ya babakala ti ya bankento tafinama na beto.​—⁠Bingana 14:⁠29.

17. Inki kesalamaka kana beto mekatula mbi na ntima mpi na mabanza?

¹⁷ Ya kyeleka mpenza beto fwete buya “mambu yonso yina kele ya nsoni”​—⁠mambu yonso yina Nzambi kewaka nzanzi mpi ya kebendaka makasi. Dyaka, beto fwete ‘losa mambu ya mbi ya mutindu na mutindu.’ Beto yonso fwete sukula mambu yonso ya mvindu na luzingu na beto ya kinsuni mpi ya kimpeve. (2 Korinto 7:1; 1 Piere 1:​14-16; 1 Yoane 1:⁠9) Kukatula mambu ya mbi na ntima mpi na mabanza sadisaka beto na kudikulumusa ‘na kundima nsangu [ya kyeleka] yina ya yandi tulaka na ntima na beto.’ (Bisalu 17:​11, 12) Ata beto mesalaka bilumbu fyoti to mingi bonso Bakristu, beto fwete bikisa dyaka bakyeleka mingi ya Masonuku kukunama na ntima na beto. Sambu na inki? Sambu, na nsadisa ya mpeve ya Nzambi, ndinga ya mekunama na ntima kebutaka “kimuntu ya mpa” yina kepesaka luguluku.​—⁠Efezo 4:​20-24, NW.

18. Inki mutindu muntu ya kewaka ndinga meswaswana ti yina kesadilaka yau mpi?

¹⁸ Inki mutindu beto kemonisaka nde ndinga kele ntwadisi na beto? Na kuvandaka “bantu yina kesadilaka ndinga, kansi bayina kewaka kuwa mpamba ve” (NW). (Luka 11:28) “Bantu yina kesadilaka ndinga” kevandaka na lukwikilu yina kebutaka bisalu bonso: kusala kisalu ya Bukristu na kikesa yonso ti kukwenda ntangu yonso na balukutakanu ya bantu ya Nzambi. (Roma 10:​14, 15; Baebreo 10:24, 25) Muntu yina kewaka ndinga kuwa mpamba “me fwanana na muntu yina ke kuditala na tala-tala.” Kana yandi kuditala imene, yandi simba nzila yandi kwenda, ebuna yandi vila kima ya yandi fwete yidika na nitu na yandi. Bonso “bantu yina kesadilaka ndinga,” beto kelongukaka mpi kelemfukilaka “nsiku ya mbote” ya Nzambi, yina ketadila mambu yonso yina yandi kelombaka na beto. Kimpwanza ya beto kezwaka kele kibeni ya kuswaswana ti kimpika ya masumu ti ya lufwa, sambu yau kenataka na luzingu. Na yau, bika beto ‘kwamina na nsiku ya kulunga’ (NW), na kufimpaka yau mpi na kulemfukilaka yau ntangu yonso. Mpi yindula fyoti! Beto kele na kyese yina kekatukaka na lemvo ya Nzambi, sambu beto ‘kesalaka kisalu, beto kele bawi ya kevilaka ve.’ (NW)​—Nkunga 19:​7-11.

Beto Kele Bansambidi ya Zina Mpamba Ve

19, 20. (a) Na kutadilaka Yakobo 1:​26, 27, inki lusambu ya kugedila kelombaka na beto? (b) Pesa mwa bambandu ya lusambu ya kukonda mvindu.

¹⁹ Kana beto kezola kubaka lemvo ya Nzambi, beto fwete yibuka nde lusambu ya kyeleka kele lusambu ya munoko mpamba ve. (Yakobo 1:26, 27, NW) Beto lenda yindula nde beto kele ‘bansambidi’ ya Yehowa kendimaka. Kansi, kima ya mfunu kibeni kele mutindu ya yandi mosi kebakaka konso muntu na kati na beto. (1 Korinto 4:⁠4) Kima ya kuluta mbi lenda vanda kukonda kununga na ‘kukanga ludimi.’ Beto takudikusa ngolo kana beto yindula nde Nzambi kesepela na lusambu na beto, kana beto kekusila bankaka, ketuba luvunu, to kesadila ludimi mbi na mitindu yankaka. (Levi 19:16; Efezo 4:25) Ya kyeleka, beto kezola ve nde “mutindu ya lusambu” na beto kukuma “ya kukonda mfunu” mpi nde Nzambi kubuya yau sambu na kikuma mosi to yankaka.

²⁰ Ata Yakobo metanga ve mambu yonso ya kelombama na lusambu ya kugedila, yandi ketanga dyambu mosi: ‘kusadisa bana-nsona ti bamifwidi ya bankento na bampasi na bau.’ (Galatia 2:10; 6:10; 1 Yoane 3:18) Dibundu ya Bukristu kemonisaka dikebi ya nene na kusadisa bamifwidi. (Bisalu 6:​1-6; 1 Timoteo 5:​8-10) Sambu Nzambi kele Ntanini ya bamifwidi ti bana ya kukonda batata, bika beto sala kumosi ti yandi na kusalaka yina ya beto lenda, sambu na kusadisa bau na kimpeve ti na kinsuni. (Kulonga 10:​17, 18) Lusambu ya kugedila ketendula mpi “kudibumba beto mosi ya kukonda ditono ya inza,” kimvuka ya bantu ya kukonda lunungu yina Satana keyalaka. (Yoane 17:16; 1 Yoane 5:19) Bika nde beto bikala ya kukonda ndyatilu ya inza yina ya kukonda bunzambi, na mpila nde beto lenda kumisa Yehowa mpi kuvanda ti mfunu mingi na kisalu na yandi.​—⁠2 Timoteo 2:​20-22.

21. Inki bangyufula yankaka beto fwete tadila dyaka na yina metala mukanda ya Yakobo?

²¹ Ndongisila ya Yakobo yina beto mekatuka kutadila fwete sadisa beto na kukanga ntima na bampasi mpi kukangama na lukwikilu na beto. Yau fwete matisa ntonda na beto sambu na Mupesi ya zola ya makabu ya mbote. Ye bangogo ya Yakobo kesadisa beto na kulanda kusadila lusambu ya kugedila. Na inki kima yandi kebenda dyaka dikebi na beto? Inki bitambi yankaka beto lenda sala sambu na kumonisa nde beto kele na lukwikilu ya kyeleka na Yehowa?

[Noti na nsi ya lutiti]

Inki Mvutu Nge Tapesa?

◻ Inki tasadisa beto na kukanga ntima na bampasi?

◻ Sambu na inki Bakristu kewaka kyese ata bampasi kele?

◻ Inki mutindu beto lenda kuma bantu yina kesadilaka ndinga?

◻ Inki lusambu ya kugedila kelombaka?

[Kifwanisu ya kele na lutiti 5]

Kana nge kele na kati ya mpasi, tula lukwikilu na ngolo ya Yehowa ya kupesa mvutu na bisambu

[Bifwanisu ya kele na lutiti 7]

“Bantu yina kesadilaka ndinga” kesamuna Kimfumu ya Nzambi na ntoto ya mvimba